දරුවාගේ ජීවිතයේ පලමු වසර තුලදී නිතරම ඇඳුම් මාරු කිරීමේ අවශ්‍යතාවය මතු වේ. දරුවාගේ වර්ධන වේගය පලමු මාස 12 තුලදී සීඝ්‍රයෙන් ඉහල යාම හා නිරන්තරයෙන් මුත්‍රා, මලපහ පිට කිරීමේ සිදුවීම් ඇතිවීම මීට හේතුව ලෙස සඳහන් කල හැක. අද වෙලඳපොලේ තේරීම් ගණනාවක් යටතේ විවිධ විලාසිතාවන්ගෙන් පිරි සිඟිති ඇඳුම් ලබා ගත හැක. මේ නිසා බොහෝ මව්වරු තම සිඟිති දරුවාට ඇදුම් මිලදී ගැනීමට කැමත්තක් දක්වති. නමුත් දරුවා පලමු මාස 12 තුලදී සීඝ්‍රයෙන් වැඩෙන බැවින් මෙසේ තම සිත්ගත් සියලුම ඇඳුම් මිලදී ගැනීම නුවණට හුරු දෙයක් නොවේ.
පලමු වසර තුලදී, දරුවාට අවශ්‍ය කරන මූලික ඇඳුම් මොනවාද?
පෙර සඳහන් කල පරිදි , ඉපදී වසරක් පිරෙන කාලය තුලදී දරුවා සීඝ්‍ර වර්ධන වේගයක් පෙන්නුම් කරයි. මෙහි ප්‍රතිඵලයක් ලෙස ඔවුන්ට නිතරම වැඩෙන සිරුරට සරිලන ඇඳුම් ඇන්දවිය යුතු වේ. ඔබ බිළිඳාට ඇඳුම් මිලදී ගැනීමේදි, එකම ප්‍රමාණයේ ඇඳුම් ගණනාවක් මිලදී ගැනීමෙන් වැලකී සිටින්න. කෙසේ වෙතත් අමතර ඇඳුම් වල අවශ්‍යතාවය නිතර පහල වුවත්, තරමක ලොකු ප්‍රමාණයෙන් යුතු ඇඳුම් මිලදී ගැනීම නුවණට හුරුය. තවද බිළිඳාට ඇඳුම් මිලදී ගැනීමේදි එහි මෘදු බව, නිම වී ඇති රෙද්දේ තත්ත්වය (සැහැල්ලු කපු ඇඳුම් වඩාත් සුදුසුය.) පිලිබඳ ඔබ සැලකිලිමත් විය යුතු වේ.
අලුත උපන් දරුවාගේ සම ඉතා මෘදු බවින් යුක්ත වේ. මේ නිසා ඉපදී පලමු මාස කිහිපය තුලදී බිළිඳාට සැහැල්ලු, අලුත් හා පිරිසිදු රෙදිපිළි වලින් නිමවූ ඇඳුම් ඇන්දවිය යුතුය. ඉන්පසු කෙමෙන් කෙමෙන්, ඔබට මදක් පාවිච්චි කල, වෙනත් හිතවත් දරුවකුගේ ඇඳුම් භාවිතා කල හැක. පොලියෙස්ටර් වැනි සින්තටික් තන්තු වලින් නිපදවූ කෘතිම රෙදිපිලි වලින් නිමවූ ඇඳුම් ඇන්දවීමෙන් වලකින්න. ඉලාස්ටික් පටි සහිත මේස් හා කලිසම් ඇන්දවීමේදි, එවා සිඟිති සිරුරට තද නොවන සේ ලිහිල් ලෙස තිබේ දැයි පරික්ෂා කරන්න.
නැපී රෙදි මිලදී ගැනීම මීලඟට කල යුතු ප්‍රධානම දෙයකි. පාවිච්චි කර ඉවත දැමිය හැකි නැපී රෙදි,දැන් වෙලඳ පොලේ වෙලඳ නාම ගණනාවක් යටතේ මිලදී ගත හැක. කාර්යබහුල ඔබට මෙය ඉතා සුදුසු විකල්පයක් වුවත්, මිලෙන් අධික විය හැක. මීට හොඳම ක්‍රමය, සැහැල්ලු තුනී රෙදිපිළි වලින් නිපදවූ නැපී රෙදි භාවිතා කිරීමයි. අලුත උපන් බිළිඳාට දිනකට අඩුම තරමේ නැපී රෙදි තිහක් පමන අවශ්‍ය වේ. හදිසි අවස්ථාවකදි අමතර නැපී රෙදි නිවසේ නිතරම තිබේ දැයි වග බලා ගන්න. මේ සමඟම නැපී කටු, නැපී ලයිනර්, වතුරට ඔරොත්තු දෙන කලිසම් මිලදී ගන්න. ජීවානුහරණය කල පිරිසිදුකාරක හා පියරු කුඩු ලබා ගැනීමද අනිවාර්ය වේ.
බිළිඳාට මිලදී ගත යුතු රෙදිපිලි සහ සෝදා පිරිසිදු කිරීමට අවශ්‍ය දේ සහිත ලැයිස්තුවක් පහත දැක්වේ.
රෙදිපිළි.
රාත්‍රි ඇඳුම් කට්ටල 5ක්.
වෙස්ට් 5ක්.
බිළිඳු පාවහන් (baby booties) හෝ කපු රෙදි වලින් නිමවූ මේස් කුට්ටම් 4ක්.
බිබ් පහක්.
ගෙත්තම් හිස්වස්නයක්. (baby bonnet)
මෘදු බ්ලැන්කෙට්ටුවක් හෝ සළුවක්.
ස්වෙටරයක්, සීතලට අන්දවන වූල් රෙද්දෙන් නිමවූ කාඩිගන් කෝට් එකක්.
ළදරු ඩයපර් ඇතුලු අනෙකුත් දෑ.
පාවිච්චි කර ඉවත දැමිය හැකි නැපී රෙදි.
කපු රෙදි රෝලක්.
බිළිඳු ක්‍රීම්.
පැම්පස් නිසා සමෙහි ඇතිවන උෂ්ණ පලු සඳහා ක්‍රීම්, එඬරු තෙල්, සින්ක් හෝ වැස්ලීන්.
නෑවිම සඳා අවශ්‍ය කරන දෑ.
ස්පන්චියක්.
මුහුන පිසීම සඳහා සැහැල්ලු තුවා.
දිව පිරිසිදු කරන උපකරණයක්.
බිළිඳු දත් බුරුසු තුනක්.
මෘදු කෙඳි සහිත කෙස් බුරුසුවක්.
බිළිඳු නියපොතු කපන කතුරක්.
ඉහත ලැයිස්තුව සම්පූර්ණ කර ගත හොත්, දෙමාපියන්ට කිසිදු බාධාවකින් තොරව තම බිළිඳාගේ ප්‍රසූතිය සඳහා සූදානම් විය හැක.
