සමහර දරුවන් ඉතා සාර්ථකව විභාගයට මුහුණ දෙයි. තවත් දරුවන් අසාර්ථක වෙයි. නමුත් සියලු දරුවන්ට එක හා සමානව විභාගය සමත් විය නොහැකිය. එම නිසා ඔබේ දරුවා අනෙක් දරුවන් මෙන්ම සාර්ථකව නොවුන ද ඔහුව ඇගයීමට ලක් කිරීම ඔබ සතු දෙයකි. එසේම ඔබේ දරුවා කිසි විටෙක අනෙක් දරුවන් සමග සංසන්දනය කරන්න යන්න එපා. එවැනි අවස්ථා වල දරුවා මානසිකව වැටීමට පුළුවන. ඔබේ දරුවාට විභාගය හොදින් සමත් වීමට නම් ඔබෙනුත් උදව් ඔහුට අවශ්‍යය. දරුවන්ට තනි ගමනක් යා නොහැකිය.
විභාගය ඉතා පහසුවෙන් සමත් වීමට දරුවා තුල පවතින විශ්වාසය බලපානු ලැබේ. ඔබ නිතරම දරුවා දිරිමත් කල යුතුය. දරුවා අධික ලෙස වෙහෙසභාවයට පත් නොකළ යුතුය. සැහැල්ලුවෙන් යුතුව මුහුණ දිය හැකි ආකාරයට ඔහුව සුදානම් කල යුතුය.
ඇතැම් දරුවන් විභාගය ආසන්න වූ විට අධික බියක් දක්වති. මට විභාගය අමාරුයි. මට විභාගය පාස් වෙන්න බැරි වේවි. පාඩම් කල කිසි දෙයක් මතක නෑ ආදී ලෙස සිතුවිලි පැන නැගේ. ඔබේ දරුවාගේ බිය සමහර විට ඔබ සමග පවසාවි. ඇතැම් දරුවන් එසේ පවසන්නේ නැත. අම්මා හෝ තාත්තා බනිවි යැයි ඔහුට සිතේ. නමුත් ඔහුගේ බිය ඔබට අවබෝධ කර ගත හැකි විය යුතුය. ඇතැම් දරුවන්ට මේ අධික බිය නිසාම ආහාර ගැනීමද අපහසු වේ. දිගින් දිගටම ආහාර ප්‍රතික්ෂේප කරයි. ඇතැම් විට අසනීප වුව විය හැකිය. දරුවා විභාගය අමාරු යැයි නිතර නිතර සිතු විට එය යටි සිතට කා වැදී සැබෑවටම විභාගය අමාරු විය හැකිය.
මෙලෙස අනියත් බියක් හට ගැනීමෙන් දරුවා පාඩම් කිරීම් අත්හැරීමට ඉඩ ඇත. දරුවාගේ විභාගය ආසන්න වූ විට ඔබ දැඩි සැලකිලිමත් බවක් දැක්විය යුත්තේ මේ නිසාය. සමහර දරුවන් දිවි නසා ගැනීමට පවා පෙළඹීමට විභාගය හේතු වේ. ඔහු යම් හෙයකින් විභාගය අසමත් වුවහොත් තම දෙමවුපියන් කොයි ආකාරයට ක්‍රියාත්මක වේ දැයි ඔහුට බියක් හට ගනී. මේ නිසාම ඔබ ඔබේ දරුවා දිරි ගැන්විය යුතුය. ඔහු දක්‍ෂ බවත් විභාගය සාර්ථකව සමත් විය හැකි බවත් දරුවාට පවසන්න.
විභාගයට සුදානම් වන විට පසුගිය ප්‍රශ්නවලට පිළිතුරු සැපයීම ඉතා වැදගත්. ඒ සදහා දරුවා පොළඹවාලන්න. අඩුම තරමේ පසු ගිය ප්‍රශ්න 10ක්වත් අධ්‍යයනය කිරීම වටි. ඒ හරහා මුළු විෂය නිර්දේශයම ආවරණය කර ගත හැකිය. මේ හරහා පිළිතුරු සැපයීමේ වේගය වැඩි කර ගත හැකිය. එසේම ලැබෙන ප්‍රශ්න පිලිබදව යම් අකාරයකට අනුමාන කළ හැකිය.
ඒ නිසා දරුවාට එහි පවතින වාසිදායක තත්වය පහදා දෙන්න. එසේම අමාරු විෂයන් වලට වැඩි කාලයක් යොදවන ලෙස ඔහුට කියන්න. එසේම දරුවාට අමාරු විෂයන් තිබේ නම් එම විෂයන් පහසුවෙන් ධාරණය කර ගන්න ක්‍රම පිලිබදව පහදා දෙන්න. බොහෝ දරුවන් ගණිතය, විද්‍යාව වැනි විෂයන් වලට බිය වෙයි. එවිට නිතර නිතර එම විෂයන් වලට යොදවන කාලය වැඩි කිරීම වැදගත්.
මේ සියලු දේ සිදු කොට දරුවා විභාගය අසමත් විය හැකිය. එවිට දරුවට දොස් පවරන්න යන්න එපා. එය දරුවාගේ ජිවිතයට වුව හානිකර විය හැකිය. විභාගය යනු ජීවිතය නොව. විභාගය අසමත් වූ පිරිස් අද ලෝකයේ ප්‍රබලයන් බවට පත් වී ඇත. දරුවා නැවත වරක් විභාගයට පෙනී සිටීමට ඔහුව දිරි ගන්වන්න. දරුවාගේ මනස බිද වැටෙන කිසිවක් කියන්න එපා. එය දරුවාට අහිතකර විය හැකිය.
