දරුවකු මෙලොවට බිහි කරන්නට පෙරුම් පුරා සිටින ඔබට

Pregnant Asian woman

පුංචි බිළිඳියක්ව මෙලොව උපත ලබන ගැහැණිය ක්‍රම ක්‍රමයෙන් වැඩෙන්නේ අම්මා යන චරිතය තම පුංචි මනසින් ස්පර්ශ කරමින්ය. කෙමෙන් කෙමෙන් කාලය සමග පරිනත වන ඇය තාරුණ්‍යයේ සොඳුරු බව විඳිමින් විවාහයට පත්වේ. ඉන් අනතුරුව ඇය කුඩා කල මනසින් ස්පර්ශ කළ මවගේ චරිතය සැබෑවටම තම ජීවිතයට ආරෝපණය කර ගන්නට සිහින දකින්නීය. ගැහැණියකට මෙලොව පැළඳිය හැකි සුන්දරම , වටිනාම කිරුළ මව් පදවියේ කිරුළය. ඉතින් ඇය තම කුසට ජීවයක් වඩින තුරා බලා හිඳියි. ඒ බලාපොරොත්තු ඉටු වූ විට ඇය ඒ වෙනුවෙන් කෙතරම් නම් පේවන්නේද? කෑම බීම ,ඇඳුම් පැළදුම්, තම දෛනික ජීවන රටාව පවා වෙනසකට ලක් කර ගනියි. දස මසක් පුරාවට නව ජීවයකට තම කුස තුල ඉඩ සලසාලමින් රැකවරණය සදයි.

ගර්භණී සමයේ මවගේ මානසික සුවය මතු උපදින දරුවාට මවගේ කුස තුල සිටින කාලයේ පටන්ම බලපායී. නීරෝගී යහපත් දරුවකු ලෝකයකට දායාද කිරීම සෑම මවකගේම පැතුමයි. කුස තුල සිටින අවදියේ පටන්ම මවගේ සිතුවිලි වලින්ද පෝෂණය වන හෙයින්ම ගර්භණී සමයේ මවගේ සිතුම් පැතුම්ද සුන්දර විය යුතුමය. ඒ සඳහා මවගේ මානසික ඒකාග්‍රතාවය බෙහෙවින්ම වැදගත්ය. එසේ මානසික සුවය ලබා ගැනීමට ආගමික වතාවත්වත් වල යෙදීම හා භාවනාව උපයෝගී කර ගත හැකිය. භාවනා කිරීමේදී ගර්භණී මවකට මෙම අගනා වදන් පෙළ උපකාරී වනු ඇත. මෙම වදන් පෙළ දිනකට වරක් හෝ දෙවරක් නිස්කලංක වට පිටාවක සිට සිතෙන් මෙනෙහි කරන්න.

බුදු ගුණ අනන්තයි, ධම්ම ගුණ අනන්තයි, සංඝ ගුණ අනන්තයි
අනන්ත වූ බුදු ගුණයෙන් මාගේ කුසේ සිටින පුංචි පැටියා නිදුක් වෙත්වා! සුවපත් වෙත්වා!
සියලු අඟ පසඟයන්ගෙන් පරිපූර්ණ වෙත්වා !
ආයු, වර්ණ සැප, බල, ප්‍රඥාව වැඩෙත්වා!
මෛත්‍රියෙන්, කරුණාවෙන් ,උපේක්ෂාවෙන් වැඩෙත්වා!
බෝසත් ගුණයෙන් පිරිපුන්  ලෝ සතට සිත සුව සලසන්නෙක්ම වේවා!
මේ සත්‍යනුභාව බලයෙන්
මාගේ කුස තුල සිටින දරුවා ද මා ද නිරෝගී වේවා!
සුවපත් වේවා! සැනසේවා!
 බිහි වන මොහොතේ මටද දරුවාටද කරදර බාධක නොවේවා!
සියලු අඟ පසඟයන්ගෙන් පරිපූර්ණ වූ
ඥානවන්ත ගුණවන්ත කළ්‍යාණ මිත්‍රයකු වැනි
වාසනාවන්ත පින් ඇති දරුවකු
වාසනාවන්ත මොහොතක බිහි කරන්නට වාසනාව ලැබේවා!
මාගේ කුස තුල සිටිනා දරුවා සේම
අනෙකුත් උපදින සියලුම දරුවෝද
එසේ වාසනාවන්ත වේවා!
සියලූ සත්ත්වයෝ නිදුක් වෙත්වා! නීරෝගී වෙත්වා ! සුවපත් වෙත්වා!

එසේම දරුවකු මෙළොවට බිහි කරන්නට මවක් විඳින වේදනාව අතිමහත්ය. එවන් වේදනාවකින් පෙළෙන මවකට අංගුලිමාල සූත්‍රයේ පිහිට ආරක්ෂාව ලැබේ. මෙම පිරිත විලිරුදාවෙන් පෙළෙන ගර්භනී මාතාවකගේ ප්‍රසූතිය පහසු කරවන ලෙස කරනු ලබන සත්‍ය ක්‍රියාවකි.එනිසා මෙම අංගුලිමාල සූත්‍රය ගර්භනී මවකට සෙත සලසයි.

පරිත්තං යං භණන්තස්ස
නිසින්නට්ඨාන ධෝවනං
උදකම්පි විනාසේති
සබ්බ මේව පරිස්සයං
අංගුලිමාල පිරිත සොත්ථිනා ගබ්භවූට්ඨානං –
යඤ්ච සාධෙති තං ඛණෙ
ථෙරස්සංගුලිමාලස්ස
ලොකනාථේන භාසිතං
කප්පට්ඨායී මහා තේජං පරිත්තං තං හණාමහෙ
යතොහං භගිනි ආරියාය ජාතියා – ජාතො නාභි ජානාමි සඤචිච්චපාණං
ජීවිතා වෝරෝපෙතා තේන  සච්චේන සොත්ථි තෙ හෝතු සොත්ථි ගබ්භස්සාති

අංගුලිමාල පිරිතෙහි තේරුම


” සහෝදරිය මම යම් අවස්ථාවක ආර්ය ජාතියෙන් උපන්නෙම්ද පැවදි උපසම්පදාව ලැබීද එතැන් සිට දැනුවත්ව ප්‍රාණියෙකුගේ දිවි තොරකල බවක් නොදනිමි. ඒ සත්‍ය බලයෙන් තොපට යහපතක්ම වේවා. දරුගැබටද යහපතක්ම වේවා. මේ උත්ත්ම පිරිතෙන් ඒ සැබෑ වදනින් සියලු රෝග සැනෙකින් දුරුවී ඔබට නිරන්තර සුවයක්ම සහ ශාන්තියක්ම වේවා.” 

මව් පදවියේ කිරුළ දරන්නට පෙරුම් පුරන ඔබට මෙය අත්වැලක් වනු ඇත.

මා දෙහිවල උසස් තාක්ෂණ ආයතනයේ උසස් ජාතික ගණකාධිකරණය ඩිප්ලෝමා පාඨමාලාව (ව්‍යපාර වාණිජවේදී උපාධියට සමානය) සහ ශ්‍රී ජයවර්ධනපුර විශ්ව විද්‍යාලයේ ව්‍යපාර පරිපාලන උපාධිය හදාරා වසර නමයක කාලයක් සහකාර ගණකාධිකාරිණියක් වශයෙන් වෘත්තීමය නියැලුනෙමි. උසස් පෙළ හා උසස් අධ්‍යපනයෙන් පසුව වෘත්තිමය වශයෙනුත් මා ගණුදෙනු කලේ ගිණුම් වල හර බැර අතර වුවද සංසාර පුරුද්දට මා ලද ප්‍රාග්ධනයක් ලෙස යමක් සුන්දරව දැකීමටත් ,සිතීමටත් ඒ සිතුවිලි අකුරු වලට පෙරලන්නටත් හැකියාව මා සතුවිය. කාන්තාවකට මෙලොව දිනිය හැකි ඉහළම කිරුළට උරුමකම් කියන මා පුතුන් දෙදෙනෙකුගේම අම්මාය. විශ්වයේම ඇති සොඳුරුතම ස්ථානය නිවහනය. එහි සාමය සතුට සෞභාග්‍යය රැඳවිය යුත්තේ අම්මාය. එනිසාවෙන්ම මගේ පුංචි පැටවුන්ගේ රැකවරණය වෙනුවෙන් මා වෘත්තියෙන් සමුගත්තෙමි. මුළුගැන්වී තිබූ ලිවීමේ හැකියාවට පන්නරය ලැබුණේ ඉන් පසුවය. අම්මා පුවත් පතෙහි විශේෂාංග ලේඛිකාවක වශයෙන් ලේඛණ කලාවට පිවිසි මා ලේඛණ කලාවෙන් ඉදිරියට යන්නට අපේක්ෂා කරමි.

LEAVE A REPLY

Please enter your comment!
Please enter your name here