දරුවන් සමග සුපිරි වෙළඳසැලකට යන දෙමව්පියන්ට විටෙක ඉතාම අසීරුතාවයන්ට මුහුණ දීමට සිද්ධ වෙනවා. දරුවන්ට වෙළඳපොලේ භාණ්ඩ වටිනාකම හෝ අවශ්‍යතාවය තේරෙන්නේ නැහැ. ආකර්ශණීය විදිහට අසුරා තබන සහ ඉතාම ප්‍රසන්න වූ පරිසරයකදී ඔවුන් හැසිරෙන්නේ තමන්ට අවශ්‍ය විදිහටයි. බඩු භාණ්ඩ එහා මෙහා ගෙන යන ට්‍රොලිවලට අවශ්‍ය දෙයට වඩා අනවශ්‍ය දේ අසුරන්නත්, එහා මෙහා දුව පැන යමින් රාක්ක ඇසුරුමේ තිබෙන බඩු භාණ්ඩ එහා මෙහා කිරීමටත්, අනවශ්‍ය දේ ඉල්ලා කෑ මොර දෙන්නත් දරුවන් සුපිරිවෙළඳසැල ආයුධයක් කර ගන්නවා. එහෙමනම් සුපිරි වෙළඳසැලට යන විට දරුවන් කැටුව යා යුතු නැද්ද…
දරුවන්ටත් මේ පරිසරය වටහා දිය යුතුයි
අද දරුවා හෙටදෙවසේ පවුල් ජීවිතයකට අනිවාර්යෙන්ම පත් වෙන නිසා ඔවුන්ද වෙළඳපොල හැසිරීම අනිවාර්යෙන්ම ඉගෙනගත යුතුයි. ඒ නිසාම ඔබ දරුවන්ද සුපිරි වෙළඳසැලට කැටුව යා යුතු අතර එහිදී හැසිරෙන අන්දම කියා දීම ඉතා වැදගත්.මෙය දරුවන්ගේ සෙල්ලම් පිටියක් නොවන බව ඔවුන්ට කියා දෙන්න. එක්තරා දරුවන් දෙදෙනෙක් සුපිරි වෙළඳසැලේ තම සහෝදරයා සමග දුව පනින විට අසුරා තිබුන ජෑම් බෝතල් දෙකක් බිම වැටී බිඳුන අතර ඒ වෙනුවෙන් අලාබය දෙමව්පියන්ට ගෙවීමට සිද්ධ වුණා. මේ නිසා කිසිම විටෙක දරුවන් නිදැල්ලේ හැර ඔබ වෙළඳසැලේ ඔබේ අවශ්‍යතාවයන් වෙනුවෙන් පමණක් යෙදෙන්න එපා. නිතරම දරුවන් කරන්නේ කුමක්දැයි විමසිල්ලෙන් සිටින්න.
මුලින්ම ලැයිස්තුවක් පිළියෙල කරගන්න
බොහෝ විට සුපුරි වෙළඳසැලකදී අපිට නිවසේ අවශ්‍යතාවයන් නොදැනීම දැනගන්න පුලුවන්. බඩු භාණ්ඩ, එළවලු, පළතුරු සහ වෙනත් සියලු දේ එකම වහලක් යටතේ මිළට ගත හැකි නිසා මේ පහසුව ඇති වුනත් ඔබ නිවසේදීම ලැයිස්තුවක් පිළියෙල කරන්න. මේ ලැයිස්තුවේදී මුලින්ම නිවසට සහ අදට අත්‍යවශ්‍ය දේ සටහන් කරගන්න.
දරුවාගේ සහයෝගයත් ලබා ගන්න
මේ ලැයිස්තුව පිළියෙල කරන විට දරුවාගේ සහයෝගය ලබා ගන්න. නිවසේ අවශ්‍ය සහ අත්‍යවශ්‍ය දේ ගැන ඔවුන් සමග සාකච්ඡා කරන්න. සුපිරි වෙළඳසැලේදීත් ඔබ වෙත ඇති ලැයිස්තුවේ අවශ්‍යතාවයන් නිවරැදිව ලබා ගත්තාද යන්න සලකා බැලීමට දරුවන්ගේ සහයෝගය ලබා ගන්න.
අකුරු ලියන්න කම්මැලිකරන පැටවුන්ටත් හොඳයි
මගේ දියණිය බාලකාලයේදී අසා ලිවීමට දක්වන්නේ මහත් කම්මැලිකමක්. ඒත් නගරයට යෑමට පෙරාතුව ඇයට අවශ්‍ය දේ කොළයක ලියන්න කී විට සැනින් එය ලියන්න ඇය දක්වන ලද හැකියාව නිසා අපි නිතරම ඇයට ඒ විදිහට අවශ්‍ය බඩු ලියන්න අවස්තාව ලබා දුන්නා. ඒ නිසා කිසිම අමුතු වෙහෙසක් නැතුව ඇය ලියන්න ඉගෙන ගත්තා. ඔබත් දරුවන්ට තමන්ගේ අවශ්‍යතාවයන් සටහන් කර දෙන්න කිව්වොත් ඔවුන් ඉතා අපුරුවට ඒ දෙය කරනු ඇති.
දරුවාගේ අවශ්‍යතාවයන්ද විමසා දැනගන්න
සුපිරි වෙළඳසැලට ගිය විට දරුවාට අවශ්‍ය දේ නිවසේදීම දැන ගන්න. ඉවක් බවක් නැතුව අවශ්‍යතාවයන් ගැන දරුවන්ගෙන් ලැබෙන පැමිනිලි වෙනුවෙන් එය ඉතාම හොඳ විසදුමකි. ඒ වගේම ඔබේ වැය ශීර්ෂ පිලිලෙ කර ගැනීමටත් එය හොඳම පියවරක් වෙනු ඇත.
දරුවන්ගේ සහයෝගය භාණ්ඩ තෝරන විට ලබා ගන්න
දරුවන් අයාලේ තබා ඔබ බාණ්ඩ මිළට ගැනීමට වඩා ඔවුන්ද ඒ වෙනුවෙන් සම්බන්ද කර ගන්න.හය හතර තේරෙන දරුවන්ට භාන්ඩ මිළට ගන්නා විට එහි ඇසුරුමේ ඇති තොරතුරු බැලීමට කියා දෙන්න.
එක් දරුවෙක් අම්මාට කියාසිටියේ භාන්ඩ මිලට ගන්නා විට ඇසුරුමේ තිබෙන ලේබලය ගැන විමසා බලන ලෙසයි. අම්මා බලන්නේ මිළ විතරයි. ඒත් ඇසුරුමේ දිනය, ක්ලඉකුත්වෙන දිනය, අඩංගු දේ ගැන බලන්න. දරුවා පාසලේ උගත් ප්‍රායෝගික තාක්ෂණ කුසලතාවය එදා තමන්ගේ මිළට ගන්නා දෙයට සම්බන්ධ කර ගත්තා.
මුදල් පසුම්බියේ තරම සිතන්න
ඔබ ඉවක් බවක් නැතුව මිළදී ගැනීමේ වෙනුවෙන් යොමු වුනත් කවුන්ටරයේදී අපහසුතාවයන්ට පත් නොවන සේ සකසුරුවම් සහතිතව මිළදී ගැනීම ඉතාම වැදගත්. ඩෙබිට් හෝ ක්‍රෙඩිට් කාඩ් පතෙන් වැය බර නිදහස් කර ගත හැකි වුනත් මේ කුමන මාධයයෙන් හෝ අනවශ්‍ය ලෙසින් වියදම් දැරීමට වඩා මිළ පාලනයකින් බඩු මිළට ගන්න. මිළට ගන්නා අතරවාරයේදීම ඒ ගැන සසඳා බලන්න.
බිල්පත සුරැකිව තබා ගන්න
මිළට ගත් බවට වූ එකම සහතිකය බිල්පත නිසා එය සුරැකිව තබා ගන්න. දරුවාට බිල්පත දී එහි ඇති අයිතමයන් නිවරැදිව බැලීමට සහය කර ගන්න. එයින් ඔවුන් තුළ ගණිතමය සංකල්පයන් වර්ධනය වෙනු ඇත. දැණුම් තේරුම් ඇති දරුවාට යන්ත්‍රානුසාරයෙන් වුනත් මිළට ගත් අයිතමයන් හා මිළ අතර ගැලපීම, ඉතුරු මුදල් පිලිබඳ නිවරැදිතාවය පරීක්ෂා කිරීමට උපදෙස් දෙන්න.
