පාචනය මාරාන්තිකයි… දරුවන් රැකගන්නේ මෙහෙමයි

child_with_stomached

ශ්‍රී ලංකාව වැනි දියුණු වෙමින් පවතින ආසියාතික රටවල බහුලව දැකිය හැකි රෝග තත්ත්ව අතරට වැටෙන පාචනය පිළිබඳව මව්වරුන් නිසි දැනුවත් බවක් ලැබිය යුතු වන්නේ, පාචන තත්ත්වයට ගොදුරු වන වැඩි පිරිසක් කුඩා දරුවන් නිසාය.

පාචන රෝගය බෝ වෙන්නේ,

පාචනය එහෙමත් නැතිනම් අතීසාරය බහුල වශයෙන් වෛරස හේතුවෙන්ද ඇතැම්විට බැක්ටීරියා හේතුවෙන්ද ඇති විය හැකියි. රොටා වෛරසය සහ ශිගෙල්ලා බැක්ටීරියාව පාචනය තත්ත්වයට හේතු වන විෂබීජ වේ. මෙම රෝගකාරක වෛරස හෝ බැක්ටීරියා බොහෝවිට සිරුරට ඇතුළු වන්නේ අප ලබාගන්නා අපිරිසිදු වූ ආහාර පාන හරහායි.

රෝග ලක්ෂණ : 
  • තද උණ
  • දියර ස්වභාවයෙන් බඩඑළිය යෑම
  • මලපහ සමග රුධිරය පිටවීම
  • වමනය

පාචනය, අතීසාර තත්වයේදී මලපහ සමග ජලය ඉවත්වීම නිසා සිරුරේ ඇති ජල ප්‍රතිශතය පහත බැසීම හේතුවෙන් ඉතා ඉක්මනින් රෝගියා විජලනයට පත්වීම සිදු විය හැකියි. මෙම රෝගයේ අවදානම් තත්ත්වය එයයි. මන්ද මේ හේතුවෙන් සිරුරේ පැවතිය යුතු ලවණ සාන්ද්‍රනයේද වෙනස්කම් සිදුවේ.

රෝගියා විජලනයට ලක්ව ඇති බව හඳුනා ගත හැක්කේ,

  • රෝගී දරුවාට නිතර නිතර පිපාසය දැනෙයි.
  • මුත්‍රා පිටවන වාර ගණන අඩුවේ.
  • දිව, තොල් වියළි ස්වභාවයක් ගනී.
  • සම වියළීම සහ ඇදෙන සුලු බවක් පෙන්නුම් කරයි.
  • දරුවාගේ ක්‍රියාකාරිත්වය අඩු වීම හා මලානික බව.

මෙවැනි තත්වයකදී දරුවාට ලබා දිය හැකි සුදුසුම පානය වන්නේ ජීවනී දියරයයි. අද වන විට දරුවන් වඩාත් ප්‍රිය කරන ආකාරයේ රසයන්ගෙන් යුතුව සැකසී ඇති නිසාම ජීවනී දරුවන්ට ලබා දීම පහසුය. ජීවනී දියරයට අමතරව බත් කැඳ, දොඩම් යුෂ, තැඹිලි වතුර ආදිය ලබා දිය හැකි අතරම ප්‍රෝ බයෝටික් අඩංගු යෝගට් ලබාදීමද වඩාත් සුදුසුය.

මේ සියල්ල නිවැරදි ආකාරයෙන් ලබාදීම ඉතා වැදගත් වන අතරම ප්‍රමාණ පිළිබඳව දැනුවත් වීමට වෛද්‍ය උපදෙස් අවශ්‍ය වනු ඇත. දෙමාපියන් වන අපි නිවසේ රඳවාගෙන දිගින් දිගටම දරුවාට ප්‍රතිකාර කිරීම නුදුසුදු විය හැක්කේ දරුවා අවදානම් විජලන තත්ත්වයට ලක්වුවහොත් හඳුනා ගැනීමට අවැසි දැනුම දෙමාපියන් වන අප සතුව නොතිබිය හැකි බැවිනි. ඒ නිසාම දරුවා වෛද්‍යවරයෙකුගේ පරීක්ෂණයට ලක්වීම වඩාත් සුදුසුය.

මාරාන්තික විය හැකි පාචනය තත්ත්වයෙන් වැළකීමට නම්,

  • පිරිසිදු ජිවන පිළිවෙත් අනුගමනය කරන්න.
  • සනිපාරක්‍ෂක වැසිකිලි භාවිත කරන්න.
  • ආහාර පිසීමට/කෑමට පෙර මෙන්ම වැසිකිලි භාවිතයෙන් පසු සබන් යොදා දෙඅත් සෝදන්න.
  • ආහාර මැස්සන් වැනි කෘමි සතුන්ගෙන් අපවිත්‍රවීමට ඉඩ නොතබන්න.
  • උතුරවා නිවාගත් පිරිසිදු ජලය පමණක් පානය කිරීමට වග බලාගන්න.
  • නොපිසින ලද පලා වර්ග එළවළු වර්ග ආහාරයට ගන්නේ නම් ඒවා හොදින් සෝදා ලුණු මිශ්‍ර ජලයේ මද වෙලාවක් බහා තබා ආහාරයට ගන්නට පුරුදු වෙන්න.
  • වැසි සමයේදී හොඳින් පිසින ලද ආහාර ගැනීමට සැලකිලිමත් වෙන්න.
  • මාර්ග දෙපස ඇති වෙළද සල් වලින් පිසන ලද ආහාර මිල දී ගැනීමෙන් වලකින්න.
  • ළදරුවන්ට මාස හය සම්පූර්ණ වන තෙක් මව්කිරි පමණක් ලබාදෙන්න.
– වෛද්‍ය පර්යේෂණ ආයතනයේ ක්ෂුද්‍ර ජීවි විද්‍යා අංශයේ ජ්‍යෙෂ්ඨ ලේඛකාධිකාරී වෛද්‍ය එම්. එන්.ජයවර්ධන මහත්මිය සමග සකසන ලද ලිපියකි –
අධ්‍යාපනික අතින් කොයිතරම් උසස් මට්ටමක හිටියත් අම්මෙක් වුණාම ඇති වන ගැටලූවලට අපි ළඟ පිළිතුරු නෑ. මව්පදවියත් එක්ක දහසකුත් එකක් ප්‍රශ්න මටත් ඇති වුණා. ඔය අතරෙදියි මව්වරුන් වෙනුවෙන්ම වෙන්වුණු පුවත්පතක සංස්කාරකවරිය විදියට සේවය කරන්න මට අවස්ථාව ලැබුණේ. අම්මා කෙනෙක් විදියට මට ඇති වෙන ගැටලූ අධ්‍යාපනය අතින්, මිල මුදල් අතින් ඉහළ, පහළ ඕනෑම තරාතිරමක හැම අම්මා කෙනෙක්ටම පොදුයි කියලා ඔය අතරෙදි මම තේරුම් ගත්තා. මගේ අත්දැකීම්, දරුවන් ගැන මට තියෙන ගැටලූ ගැන වෘත්තීමය සුදුසුකම් සහිත පුද්ගලයන් එක්ක සාකච්ඡ කරලා, සටහන් කරන්න මම හිතුවේ දහස් ගණනක් මව්වරුන්ට නිවැරදිම මගපෙන්වීම අවශ්‍ය බව දැණුනු නිසා.

LEAVE A REPLY

Please enter your comment!
Please enter your name here