සමාජයේ ජීවත්වෙන අපිට වගේම අපේ දරුවන්ටත් තනිවම ජීවත් වෙන්න බැහැ. ඒ නිසා මිතුරන්ගේ ඇසුර අවශ්‍යයි. ඒ ගැන කිසිම විවාදයක් නැහැ.ඒත් අපි මෙච්චර කාලයක් හිතා ගෙන හිටියේ අපි ඇසුරු කළ යුත්තේ සමාන අදහස් ඇති උදවිය පමණක් බවයි. එක වර්ගයේ කුරුල්ලන් එකට ලගිනවා කියන කියමන අනුව අපි හිතන්නේ යාලුවන් අතර තිබිය යුත්තේ සමාන ගති පැවතුම් කියලයි. ඒත් දැන් ඒ අදහස වෙනස් වෙමින් තිබෙනවා.
පර්යේෂකයන්ගේ අදහස අනුව ඔවුන් පෙන්වා දෙන්නේ අපි අතර සිටිය යුත්තේ විවිධ ගති පැවතුම් ඇති මිතුරු පිරිසක් බවයි. එහෙම නම් මිතුරන් ඇසුරු කිරීමේ වාසිය අපිත් හදුනා ගෙන දරුවන්ටත් එහි ප්‍රතිඵල ලබා දෙමු…
නිර්මාණශීලිත්වය
මිතුරන් ඇසුර නිසා නිර්මාණශීලිත්වය ඇති වෙන බව පර්යේෂකයනගේ අදහසයි. එය ඇත්ත. ඔබ තනිවම සිටිනවාට වඩා යමක් මිතුරන් සමග සිටියදී කරන්න පුලුවනි. උදාහරණයක් විදිහට ඔබ යම් ස්ථානයකට තනියම යනවාට වඩා මිතුරන් සමග යන විට එහි ඇති වෙන වෙනස්කම් බොහොමයක් තිබෙනවා. මේ ගමනේදී සින්දු, නැටුම් පමණක් නොවෙයි, ඡායාරූප ගැනීම් පවා සිදු වෙනවා. හුදෙකලාව ගන්නා සෙල්ෆි ජායාරුපයකට වඩා කණ්ඩායමක් සමග ගනු ලබන ඡායාරූපය පිරිසක් සමග ඉතාම නිර්මාණශීලිත්වය. එහි වැඩි වැදගත්කමක් අදට වඩා හෙට දවසේ ලැබෙනවා.ගනු ලබන ඡායාරූපය ඉතාම නිර්මාණශීලියි.
ලැබෙන වාසි
දරුවන්ට වගේම වැඩිහිටියන් වන ඔබටත් විවිධ තරාතිරම්වල මිතුරන් ඇසුරු කරන විට සමාජ සම්බන්ධතාවයන් පුලුල් වෙනවා. තනිවම කර ගැනීමට අපහසු කාර්යන් විවිධ මිතුරන් ඇසුරු කිරීමෙන් පහසුවෙන් ඉටු කර ගැනීමට හැකියාව ලැබෙනවා. පංති මට්ටමින් වුනත් ගණිතයට අදක්ෂ දරුවෙකුට ඒ විෂයට හැකියාව ඇති මිතුරෙකුගෙන් උදව් ලබා ගත හැකියි. චිත්‍රවලට අපහසුතාවයක් තිබෙන දරුවෙක් ඒ වෙනුවෙන් තම මිතුරාගේ සහය ලබා ගනීවි. වැඩිහිටියන්ගේ ලෝකය මීටත් වෙනස්. ඔවුන්ගේ වපසරිය පුලුල්. ඒ නිසා විවිධ විදිහට විහිදී ගිය කටයුතු ඉටු කර ගැනීමේදී විවිධ මිතුරන්ගෙන් විවිධ විදිහට උදව් උපකාර ලැබේවි.
විරුද්ධ අදහස් ඉවසීම
සමාන අදහස් තිබෙන අය පමණක් එකට එක් වීම නිසා නිවරැදි දෙය අවබෝධ කර ගැනීම අපහසුයි. එකම අතකට ගමන් කරනවා විනා එහි විවිධ පැතිකඩ දෙස බැලීමක් නැහැ. ඒ නිසා විවිධ අදහස් තිබෙන මිතුරන් ඇසුර අවශ්‍ය වෙනවා. උදාහරණයක් විදිහට ඔබේ දරුවා දෙවැනි වතාවට විභාගය කිරීමට අකමැත්තක් දක්වනවා නම් යන අතට පාර නොතබා එහි ආදීනව කියා දෙන අන්දමේ මිතුරන් පිරිසක් සිටීම වැදගත්. එවන් අවස්තාවක දරුවාගේ හිතට ධනාත්මක ලෙසින් නැවත වතාවක් විභාගයට පෙනී සිටීමේ වටිනාකම් කියා දෙන මිතුරෙක් සිටීම ඉතාම වැදගත්. ඒ නිසා එකම අන්දමේ සිතුවිලි සහ ආකල්ප වලට වඩා වෙනස් වෙනස් සිතුවිලි සහිත පිරිසකගේ ඇසුර වැදගත් බව පර්යේෂකයන් විසින් පෙන්වා දෙනවා.
නොගැලපෙන තොරතුරු මග හරින්න එපා
සමහර අවස්ථාවලදී ඔබට නොගැලපෙන තොරතුරු මිතුරන් ඉදිරිපත් කරන විට ඔබට නොගැලපෙන විට ඔවුන් මගහැර සිටින්නට උත්සාහ කරනු ඇත. එහෙත් ඔබ කළ යුත්තේ එය නොවේ. මෙම අදහස් විවිධ පැතිකඩ ඔස්සේ සලකා බලන්න. එයින් යම් දෙයක් ඔබට ලබා ගත හැකි බව වැටහේ නම් එම තීන්දුව ලබා ගන්න.
අන් අයට ගරු කිරීම
විවිධ අදහස් ඇති මිතුරන් සමග ඇසුරේ සිටින විට අනිත් අයගේ අදහස් වෙනුවෙන් පමණක් නොව එම පුද්ගලයන් වෙනුවෙන් ගරු කිරීමේ ගති ලක්ෂණ ඇති වේ. මෙය ආකල්පමය ලෙසින්ද ඉතා සුබදායී ක්‍රියාවකි. ඒ නිසා බාල කාලයේ පටන්ම ඔබ දරුවාටත් අන් අයගේ අදහස් වෙනුවෙන් ගරු කිරීමේ ආකල්ප හුරු කරන්න.
අධිමානසිකත්වයෙන් මිදීම
එකම කණ්ඩායමේ පිරිසක් එකට සිටින විට ඔවුන් අතර ඇති වෙන්නේ තමා මුල් කර ගත් අධිමානසිකත්වයකි. පංතියක වුනත් වෛද්‍යවරුන්ගේ දරුවන් පමණක් මිතුරු ඇසුරක් පවත්වා ගන්නේ නම් අපි වෛද්‍යවරුන්ගේ දරුවන්ය යන අධිමානසිකත්වයකින් කටයුතු කිරීම එතරම් සුදුසු නැහැ. ඒනිසා පර්යේෂකයින් පෙන්වා දෙන්නේ මේ අන්දමින් විවිධ මානයන් ගොඩ නැගෙන විට අධිමානසිකත්වය එතරම් සුබවාදී නොවන බවයි. ඒ නිසා දරුවන්ගේ මිතුරන් අතරත් ඔබ විවිධ තරාතිරම් අනුව මිතුරන් වර්ග කිරීම එතරම් සුබවාදී නැහැ. මේ තත්වය නිසාම පංතියක වුනත් පුංචි කණ්ඩායම් ඇති වෙලා දරුවන් අතර තිබෙන සහජීවනය නැති වෙන්න පුලුවන්.
සහකම්පනය ගොඩ නැගීම
එකම ප්‍රශ්නය දිහා විවිධ කෝනයන්ගෙන් බලන විට මධ්‍යස්ථ තැනක නවතින්න පුලුවන්. ඒ නිසා විවිධ අදහස් ඇති මිතුරන්ගේ ඇසුර වඩාත් වැදගත් වෙනවා. එකම විදිහට බලන පිරිසකින් සාධාරණ බවක් ඇති වෙන්නේ නැහැ. ඒ නිසා මිතුරන් අතරත් විවිධ අදහස් තිබෙන අය සිටීම වැදගත්.
විවිධ අදහස් ඇති අය ඇසුරු කිරීමෙන් ආකල්ප තුළ වෙනසක් ඇති වෙන බව දැන් හදුනාගෙන තිබෙනවා. මුල් කාලයේදී මෙම අධ්‍ය්‍යනය සිදු කරනු ලැබුවේ එක්සත් ජනපදයේය. එහිදී පෙනී ගියේ සුදු ඇමරිකානුවන් සහ අප්‍රිකානු සම්භවයක් ඇති කලු ජාතිකයන් එකම පාසලක අධ්‍යාපනය ලැබීම ඉතාම සාර්ථක වූ බවයි. මහා බ්‍රිතාන්‍යයේත් මේ පිලිබඳව අධ්‍යාපනයක් පවත්වන ලද අතර එහිදී පෙනී ගියෙත් මෙම විවිධ ජන කණ්ඩායම් අතර මිතුරු ඇසුර වඩාත් වැදගත් මෙන්ම ප්‍රතිඵලදායක බවයි. ඒ නිසාම මෙම තේමාව මුල් කර ගෙන විවිධ රූපවාහිනී සහ සිනමාවන් පවා නිර්මාණය කරනු ලැබුවා. වසර හැටක් පමණ කාලයක් පුරා සිදු කරන ලද අධ්‍යනයන් මගින් පෙනී ගියේ විවිධ වර්ගයේ පුද්ගලයන් ඇසුරු කිරීමෙන් සහ එකට ජීවත්වීමෙන් සාමකාමී සහ ධනාත්මක අදහස් ඇති ලෝකයක් නිර්මාණය කළ හැකි බවයි.
