එක බඩවැල කඩාගෙන ඉපදුනත් ,එකම පවුලක සහෝදර සහෝදරියන් අතරත් විවිධ වෙනස්කම් දක්නට ලැබීම අපටත් ඉතාම හුරු පුරුදුයි.මේ නිසාම දරුවන් අතරත් විවිධ අන්දමේ මත ගැටුම්, වාද විවාද වගේම බහින් බස්වීම් ඇති වෙනවා. දරුවන්ගේ ගති ලක්ෂණවලදී දෙමව්පියන් විසින් පවුලේ බඩපිස්සා..එහෙම නැත්නම් අපි මුලින්ම හුරතල් බලපු දරුවා..විදිහට විශේෂණ එකතු කරනවා.මේ විශේෂණ නිසා දරුවන්ගේ පෞරෂය පිළිබඳවත් පසුකාලීනව විවිධ ගැටළු ඇති වෙන්න පුලුවනි.
19 වෙනි සියවසයේ අග භාගයේ සහ 20 වෙනි සියවසයේ මුල් භාගයේ ඔස්ට්‍රියාවේ විසූ භෞතවෛද්‍යවරයෙකු (physician) මෙන්ම මනෝ චිකිත්සකයෙකු(psychotherapist).ලෙසින් කටයුතු කළ ඇල්ප්‍රඩ් ඇඩ්ලර්, දරුවන් සත් දෙනෙකුගෙන් සමන්විත පවුලක මැද සාමාජිකයෙකි. එකම පවුලක හැදී වැදුණු දරුවන්ට එකිනෙක වෙනස් පෞරුෂයන් ඇති බවක් දක්නට ඇත්තේ ඇයිදැයි හඳුනා ගැනීමට ඔහුට අවශ්‍ය විය. ඔහුගේ මෙම අධ්‍යනය සිදු වුනේ 1927 වසරේදී.
දරුවා වැඩිමහල් ද නැති නම් බාලයා ද යන්න සලකා බලා දෙමව්පියන් දරුවන්ට වෙනස් ලෙස සලකන බවට සංකල්පයක් ඔහු විසින් ඉදිරිපත් කරනු ලැබුවා. මේ දරුවන් මේ අන්දමින් සංසන්දනය කරනු ලැබීම හීනමානය (Inferiority) පිළිබඳ හැඟීමක් ඇති කරන බව ඔහුගේ විශ්වාසය වුණා. එතැන් සිට වැඩිහිටි පිළිවෙල හා සම්බන්ධ චරිත ලක්ෂණ (Characteristics) දෙස පර්යේෂකයන් ගේ වැඩි අවධානයක් යොමු වුනා.
පවුලේ වැඩිමහල් දරුවා අන් අය සතුටු කරන්නෙකු යැයි විශ්වාස කරනවා. ඉස් ඉස්සෙල්ලාම දුවක බලාපොරොත්තු වෙන්නෙත් වැඩිමහල් දරුවා වගකීම් සහගත, විශ්වාසය තැබිය හැකි, සුපරික්ෂාකාරී දරුවෙකු ලෙස සලකන නිසයි. නමුත්සමහර විට දෙමව්පියන් අපේක්ෂා කරන දෙයට වෙනස් අන්දමින් විට ඔහු හෝ ඇයගෙන් සිය බලය පෙන්වන (Bossy) සහ අධිකාරිවාදී චරිත ලක්ෂණ පෙන්නුම් කරන්නත් පුලුවනි. වැඩිමහල් දරුවා කෙරෙහි දෙමව්පියන්ගේ වැඩි සැලකිල්ලක් යොමු වන අතර දෙවන දරුවා පවුලට එක් වීමත් සමග බොහෝ විට ඔහුට හෝ ඇයට නොසැලකිල්ලක් හෝ ඇති වෙනවා.පවුලේ වැඩිමහල් දරුවන් විදිහට උපත ලැබූ ජාත්‍යන්තර තලයේ චරිත අතරටදෙවන ලෝක යුද සමයේ බ්‍රිතාන්‍යයේ අගමැති ධුරය හොබවන ලද වින්ස්ටන් චර්චිල් සහ හැරි පොටර් කතා මාලාවේ කතෘවරිය ජේ.කේ රෝලින් ඇතුලත් වෙනවා.
පවුලේ මැද දරුවා අතරමැදියෙකු විදිහට බොහොම පීඩාවට පත් වෙනවා. වැඩිමහල් දරුවාට තිබෙන සැලකිල්ලත්, බඩපිස්සාට තිබන ආදරයත් ඔවුන්ට අහිමියි.මේ නිසා පවුලේ මැද දරුවා බොහෝ විට නොසලකා හැරීම්වලට ලක් වෙනවා.බිල් ගේට්ස් වගේම මැඩෝනා පවුලේ මද්දුම සාමාජිකයන්.
පවුලේ බාල දරුවා තමා ගැනම සිතන (Self-centred), යමක් තම වාසියට හරවා ගනු ලබන (Manipulative), සෙල්ලමට බර, විනෝදකාමී සහ සිත් ඇදගන්නා හැසිරීමක් ඇති පුද්ගලයෙකු බව බොහෝ විට විශ්වාස කරනවා. ඒ වගේම ඔවුන් තමාටමඅවධානය (Attention) දිනා ගැනීම සඳහා විශාල අරගලයක යෙදෙන ස්වාධීනත්වය (Independence) පවත්වා ගෙන යාම සහ සෙසු සහෝදර සහෝදරියන්ට වඩා වෙනසක් පෙන්නුම් කරන පිරිසක්.මහත්මා ගාන්ධි පවුලේ බඩපිස්සා විදිහට උපත ලබා ජගත් කීර්තියට පත් වූ සුවිශේෂී පුද්ගලයෙක්.
එකා යකා කියන්නා වගේම පවුලක එකම දරුවා තමන් ගැනම සිතන (Self-centred) ආත්මාර්ථකාමී චරිතයක්. ලියනාඩෝ ඩා වින්චි සහ හැරී පෝටර් චරිතයට පන පොවන ‘‘ඩැනියල් රැන්ඩ්ලිෆ් “ පවුලේ එකම දරුවා විදිහට උපත ලද අයයි.
1996 වසරේදී ඇමරිකානු ජාතික මනෝ විද්‍යාඥයෙකු වන ෆ්‍රෑන්ක් සලොවේ (Frank Sulloway) ඉදිරිපත් කළ මතයකින් කියවුණේ සෑම පවුලකම පැවැත්ම (Survival) සඳහා ඇති තරඟය සහෝදර සහෝදරියන් අතර වෙනස්කම් ඇති වීමට හේතු වෙන බවයි. ඔවුන්ගේ මෙම අරගලය සිදු වෙන්නේ දෙමව්පියන්ගේ අවධානය දිනා ගැනීම සඳහා බැව් ෆෑන්ක් සලොවේ සඳහන් කරනවා.
- ඒකත් ඇත්ත කියලා ඔබට හිතේවි..
සමහර විට ඔබ පවුලේ වැඩිමලාට වැඩියෙන් සලකන්නේ අපි හාපුරා දැක්ක දරුවානේ කියලා.ඒ වගේම මෙහි අනිත් පැත්තත් සිද්ධ වෙනවා. සමහර දෙමව්පියන් දෙවැනි තුන්වැනි දරුවන් පවුලට එකතු වෙද්දී වැඩිමලාව අතහැර දමනවා විතරක් නොවෙයි,පමණටත් වඩා වගකීම් පවරනවා. එවිට වැඩිමහල් දරුවා තමන්ගේ බාල සහෝදරයන් සමග නොදැනම අරගලයක් ඇති කර ගැනීමට සූදානම්.
ඒ නිසා පවුලේ වැඩිමලා,මද්දුමයා සහ බාලයා විදිහට වෙනසක් නැතුව හැම දරුවාම මගේය කියන සිතුවිල්ලෙන් කටයුතු කරන කිසිම ගැටලුවක් නැති වේවි.
