දරුවාගේ පූර්ණ වර්ධනය සෑම දෙමව්පියෙකුගේ ම සිහිනයකි. වර්තමානයේ බොහෝ දෙමව්පියන් “ඇසට ඇස බැලීම” (Eye contact) පිළිබඳව දැනුවත්ව සිටිනුයේ ඔටිසම් තත්වය පිළිබඳ ඇති දැනුවත් භාවයත් සමඟයි. පූර්ණ වර්ධනය උදෙසා ඇසට ඇස බැලීම සෑම දරුවෙකුට ම වැදගත් වන බව වර්තමානයේ පිළිගන්නා මතයයි.
සන්නිවේදනය නිතරම ද්වි පාර්ශවීය වේ…
එම පාර්ශවය දෙක සන්නිවේදනයේ දී පුද්ගලයන් දෙදෙනකු යැයි සිතමු. එම පුද්ගලයන් දෙදෙනා එකිනෙකාට කතා කරන විට ඔවුන් එකිනෙකාගේ ඇස් දෙස බලමින් සන්නිවේදනය යෙදෙමින් වාචික මෙන්ම අවාචික සන්නිවේදනය ද සිදු කරනු ලබයි. මෙය සරලව ම ඇසට ඇස බැලීම ලෙස හඳුන්වා දිය හැකිය.
ඇසට බැලීම ඉතා වැදගත් වන්නේ කුඩා අවධියේදි මවුපියන්ට තම දරුවා සමඟ සන්නිවේදනය කිරීමටයි. දරුවා හට ශාරීරික, මානසික හා සමාජයීය වශයෙන් දුර්වලතා ඇත්නම් ඇස් බලා සන්නිවේදනය කිරීමේ අපහසුතා තිබිය හැකි ය. තවද දෘශ්‍ය ආබාධ තත්ත්වයක් නිසා ඇති වන ඇසට ඇස නොබැලීමෙන් වෙනස් වන බව කිව යුතුමය.
දරුවන් බොහෝ දේ ඉගෙන ගනු ලබන්නේ, ග්‍රහණය කර ගනු ලබන්නේ තම දෘශ්‍ය සංවේදන උපයෝගී කර ගනිමිනි. ඔවුන් බොහෝ දේ දැකීම තුළින් ඊට අවශ්‍ය තොරතුරු රැස් කර ගනිති. තවද ඇස ට ඇස බැලිම වැදගත් වන්නේ දරුවා කුඩා කාලයේ දී තම මව සමග සන්නිවේදනය කිරීම සිදුවන්නේ මේ හරහා වීම නිසාවෙනි. ඉතා කුඩා කාලයේ පටන් වර්ධනය වන මෙම කුසලතාවය දරුවන්ගේ මනා භාෂා වර්ධනයත් සමාජ සංවේදී භාෂා භාවිතයටත් මනා රුකුලක් වන බව පර්යේෂණ මගින් තහවුරු වී ඇත.
වර්තමානයේ දරුවන් ඇසට ඇස බැලීම වර්ධනය අඩාල කරණ කරුණු ද පර්යේෂණ මඟින් සොයා ගෙන ඇත.
ඒ අතර, දරුවා හට කුඩා අවධියේ ම ජංගම දුරකථන, ටැබ් පරිගණක ආදිය ලබා දීම තුළින් දරුවා සමාජානුයෝජනය අඩු වීම හා සමාජ සම්බන්ධතා පදනම් කරගත් භාෂාවක් භාවිතා නොකිරීම දැකගත හැකි වන අතර එම නිසා දරුවා සන්නිවේදනය කරන විට ඇසට ඇස බැලීමේ කුසලතා ද අවම වන බව සොයාගෙන ඇත. ඊට හේතුව වන්නේ දරුවා නොකඩවා තම අවධානය හා ඇස් මට්ටම ජංගම දුරකථන තිරයට ලබාදීම දීමයි. එමගින් ඔබ දරුවාට කතා කළ ද ඔබගේ දරුවා ජංගම දුරකථන තිරය දෙස බලමින් ඔබ සමග සන්නිවේදනය කිරීම හා ඔබගේ ඇස් දෙස බලමින් සන්නිවේදනය නොකිරීම හරහා මනා සමාජ අන්තර් පුද්ගල සන්නිවේදනය සිදු නොවන බව ට හඳුනාගෙන ඇත.
මෙම තත්ත්වය දෘෂ්‍යාබාධ තත්ත්වයක් දැයි බොහෝ දෙමව්පියන් අසන වාර දැක ගත හැකිය. සරලව ම ප්‍රකාශ කළ හැක්කේ දෘශ්‍ය ඉන්දීය අපහසුතා නොමැතිව ඇසට ඇස බැලීමේ අඩු කම දෘශ්‍යාබාධිත තත්ත්වයක් නොවන බවයි. නමුත් දෘශ්‍යාබාධිත තත්ත්වයක් හෝ යම්කිසි සුවිශේෂී තත්ත්ව එනම් ඔටිසම් වැනි තත්ත්ව නිසා ද ඇසට ඇස බැලීම අවම වීම දැකගත හැක.
ඇසට ඇස බැලීම අවම වීම දරුවා වැඩෙත් ම දරුවාගේ පෞරුෂ වර්ධනයට බලපාන්නේ කෙසේද?
වැඩෙන දරුවාගේ පෞරුෂ වර්ධනය මෙම කුසලතාව ඉතා වැදගත් වේ. මන්ද,
- පිරිසක් ඉදිරියේ කතා කිරීම ට
- සමාජ සම්බන්ධතා ගොඩ නගා ගැනීමට
- යම් ඉදිරිපත් කිරීම සාර්ථක ලෙස ඉදිරිපත් කිරීමට (presentation skills)
- තමා ඉදිරිපත් කරන තොරතුරු ග්‍රාහකයන්ට අවබෝධ කිරීමට
- ග්‍රාහකයාගේ විශ්වාසය තහවුරු කර ගැනීමට
- අන්තර් පුද්ගල සම්බන්ධතා ඇති කර ගැනීම ට
- සම්මුඛ සාකච්ඡා වලට මුහුණ දීමට
- තමන් කතා කරන තොරතුරු පිළිබඳ අසන්නා ට විශ්වාසය ගොඩ නගා ගැනීමට
- සන්නිවේදනය කරන අතරතුර මුහුණෙන් ප්‍රකාශ වන අවාචික සන්නිවේදන ඉරියව් තේරුම් ගැනීමට ආදී බොහෝ කාරණා වලදී දරුවාට ඇසට ඇස බැලීම ඉතා වැදගත් වේ.
එම නිසා කුඩා කාලයේ සිට දරුවාගේ මුහුණ දෙස බලමින් කතා කිරීම, peek a boo සෙල්ලම් කිරීම, ජංගම දුරකථන තිර වලින් ඉවත් කරමින් මුහුණ දෙස බලමින් සන්නිවේදනය කිරීම හා නිතර දරුවා අනිකුත් පුද්ගලයන් සමඟ සන්නිවේදනය ට යොමු කිරීම වැනි දේ තුළින් දරුවාගේ ඇසට ඇස බැඳීම ගැටලුවකින් තොරව වර්ධනය කර ගැනීම ට ඔබට හැකියාව ඇත.
කථන හා භාෂා චිකිත්සක සජිනි පෙරේරා මහත්මිය විසිනි.
