උසස් පෙළ විභාග ප්‍රතිඵල නිකුත් වුණා…. උසස් පෙළ ජීවිතයේ එකම කඩඉම ලෙසින් සලකන්න එපා.

උසස් පෙළ විභාග ප්‍රතිඵල නිකුත් වුණා.උසස් පෙළ කියන්නේ අපේ රටේ විදිහට නම් ජීවිතයේ කඩඉමක්. නමුත් උසස් පෙළ අසමත් වුන හෝ අපේක්ෂිත ප්‍රතිඵල නොලැබු පමනින් දරුවෙක් ජීවිතයේ අතරමං වන්නේ නැහැ. ඒ නිසා ජිවිතය කඩා වැටෙනවා වගේ පසුතැවිලි විමත් අවශ්‍ය නැහැ.ඒ නිසා උසස් පෙළ ජීවිතයේ එකම කඩඉම ලෙසින් සලකන්න එපා.

නමුත් අපි හිතන විදිහට දරුවන් හිතන්නේ නැහැ.

උසස් පෙළ විභාගයට ඉදිරිපත් වෙන කාලය දරුවෙකුගේ ජීවිතයේ කුනාටු කාලයක් කිව්වොත් නිවරැදියි. ඔවුන්ගේ හිතේ ආවේග බොහොමයි. සමාජයේ කැපී පෙනේන උවමනාවෙන් පසු වෙනවා.ඒ නිසාම දරුවන්ට උසස් පෙළ ප්‍රතිඵල නිසා ඇති වෙන පීඩනය දරා ගැනීමත් අපහසු වෙන්න පුලුවනි.

නව යොවුන් දරුවන්ගේ හුදෙකලා බව

අද නව යොවුන් වයසේ පසුවෙන දරුවන් බොහොම හුදෙකලා ජීවිතයක් ගෙවනවා.. ඔවුන් ගනුදෙනු කරන්නේ ජංගම දුරකථනය සමග පමණයි. විටෙක අම්මලා වුනත් මේ විදිහට කියනවා ඔබ අසා ඇති. ආවා..කැවා…කාමරයට ගියා..එතැනින් එහාට ගෙදරත් එක්ක කිසිම ගනුදෙණුවක් නැහැ.

වරදින තැනත් එතැනයි..

දරුවෙකුගේ ලෝකය දෙමව්පියන්ට විවෘත විය යුතුයි. විශේෂයෙන් නව යොවුන් වයසේ පසුවෙන දරුවෙක් දෙමව්පියන් සහ පවුලේ උදවිය සමග සමීප සම්බන්ධතාවයක් ගොඩ නගා ගැනීම ඉතාම වැදගත්.එවැනි සම්බන්ධතාවයක් ඇති විටෙක තමන්ගේ හිතේ ඇති සතුට වගේම දුක්ඛ දෝමනස්සයන් පවුලේ අය සමග බෙදා හදා ගැනීමට පුලුවනි.

නව යොවුන් වුනත් ප්‍රශ්න ඉදිරියේ ඔවුන් අසරණයි..

කර දඬු උස් මහත් වුනත් උඹලා අපට තවම දරුවෝ…මනෝ විද්‍යාව නොදත් අපේ වැඩිහිටියන් එදා දරුවන්ට දැනමුතුකම් දුන්නේ ඒ විදිහටයි. ඇත්තටම ප්‍රශ්න ඉදිරියේදී නව යොවුන් දරුවන් බොහොම අසරණයි.ඒ නිසා ඔවුන්ගේ ප්‍රශ්න ඉදිරියේ වැඩිහිටියන්ගේ උදව් අවශ්‍ය වෙනවා. ඒ ශක්තිය වැඩිහිටියන් විසින් ලබා දීම ඉතාම වැදගත්.

වැඩිහිටියන්ද බුද්ධිමත් වීම..

දරුවන්ගේ ප්‍රතිඵල ඉදිරියේ වැඩිහිටියන්ද කම්පාවට පත් වෙන අවස්ථාවන් තිබෙනවා. ඇතැම් දෙමව්පියන් දරුවන්ට වඩා කඩා වැටෙනවා. අල්ලපු ගෙදර දරුවා..නංගි ගේ මල්ලිගේ දරුවාගේ ප්‍රතිඵල මෙතැනට අදාල නැහැ. සමහර විට දරුවාට තමන්ගේ ප්‍රතිඵල නිසා ඇති වුන පිඩනය දරා ගැනීමට පුලුවන් වුනත් දෙමව්පියන්ගේ කඩා වැටීම දරා ගැනීමට අපහසු වෙන්න පුලුවනි. ඒ නිසාම දරුවා තවත් කම්පාවට පත් වෙන අවස්ථාවන් ගැන ඔබටත් අත්දැකිම් ඇති.

ඉතින් දරුවා අස්වසන්නේ කොහොමද..?

වැඩිහිටියෙක් ලෙස ඔබ දරුවාගේ ප්‍රතිඵල ගැන ඔහුගේ හිත නැවත ශක්තිමත් කිරීම වැදගත්. ලැබුන ප්‍රතිඵල ගැන කම්පා නොවී තවත් අවස්ථාවක් ඇත්නම් ඒ වෙනුවෙන් සූදානම් වීමට අවවාද කරන්න. ඒ අවස්ථාව පෙරට වඩා සැලසුමකින් ගොඩ නගා ගත හැකි බැව් කියා දෙන්න.

ඒ වගේම අපේක්ෂිත ප්‍රතිඵල නොලැබෙන්නත් බලපාන යම් හේතු ඇති නිසා ඒවා හදුනා ගන්න. මෙම අවස්ථාවේදී වැරදුන තැන් නිවරැදි කර ගෙන ඉදිරියට යෑමට තිබෙන අවස්ථාවෙන් ප්‍රයෝජන ගත හැකි බවත් දරුවාට කියා දෙන්න.

මේ දරුවා විභාගයට ඉදිරිපත් වුන අවසාන අවස්ථාව නම්..ඔවුන්ගේ විශ්ව විද්‍යාල සිහිනය හෝ වෛද්‍ය, ඉංජිනේරු සිහිනය බිද වැටුනා නම් ඒ ගැන පසුතැවිලි නොවී වැටුන තැනින් නැගිටීමට අවශ්‍ය ධෛර්ය ලබා දෙන්න.

ඉලක්කය බිද වැටුන බැව් ඇත්ත..

මෙතෙක් දරුවා උසස් පෙළ මුල් කර ගෙන යම් ඉලක්කයක් ගොඩ නගා ගෙන තිබුනා නම් ඔවුන් ලද ප්‍රතිඵල ඉදිරියේදීම ඒ සිහිනය බිද වැටුනා නම් දැන් අලුත් ඉලක්කයක් ගොඩ නගා ගැනීමට අවශය චිත්ත ශක්තිය ගොඩ නගන්න.ඒ වෙනුවෙන් ඇති විකල්ප අවස්තාවන් විමසා බලන්න.දැන් ඒ වෙනුවෙන් ගවේශන මාර්ග බොහොමයක් තිබෙන නිසා වැටුන තැනින් නැවත ගොඩ එන ධෛර්ය ඇති කරන්න.

ෆීනික්ස් කුරුල්ලෙක් වෙන්න කියා දෙන්න

ෆීනික්ස් කුරුල්ලා අලු මතින් නැවත නැගිටින්නා සේ දරුවාටත් නැවත නැගිටින පන්නරය ලබා දෙන්න. ජීවිතය හැමදාමක් වරදින්නේ නැති බවත් වැරදුන තැන් ඇති බොහෝ පුද්ගලයන් නැවත නැගී සිටියේ වැරදුන තැනින් බැව් කියා දෙන්න. මේ වෙනුවෙන්  අලි බබා වෙළඳ ජාලයේ ”ජැක් මා ” ගේ චරිතාපදානය මේ වෙනුවෙන් හොදම උදාහරණයයි. ඔහු රැකියාවන් තිහකට ඉල්ලුම් කළත් ඒ සියල්ලලෙන්ම ඔහු ප්‍රතික්ෂෙප විය. වෙන දෙයක් තබා චීනයේ KFC ආයතනය ආරම්භ කරන විට ඒ වෙනුවෙන් විසි හතර දෙනෙක් ඉල්ලුම්පත් යොමු කර තිබුනි. කළමනාකාරිත්වය විසින් විසි තුන්දෙනෙකු තෝරා ගත් අතර එයින් ප්‍රතික්ෂෙප වුන එකම පුද්ගලයා ”ජැක් මා “පමණි. නමුත් ඔහු එතැනින් වැටුනේ නැත. යම් ලෙසකින් ඔහු එතැනින් පරාජිත මානසිකත්වයක් ගොඩ නගා ගත්තා නම් අද ජැක් මා නමින් බිලියනපතියෙක් නිර්මානය වන්නේ නැත.

නව යොවුන් සිත බොහොම ඉක්මනින් වෙනස් වෙනවා.

ප්‍රතිඵල සමග දරුවන්ගේ දරා ගැනීමේ හැකියාවන් එකිනෙකාට වෙනස් නිසා ඔවුන් ගැන අවධානයෙන් සිටින්න.බොහෝ දරුවන් විසින් තමන්ගේ අපේක්ෂිත ප්‍රතිඵල නොලැබුන විට ජීවිතය පවා එපා වෙන අන්දමින් පරාජිත බවට පත් වේ.පරාජිත මානසිකත්වය දරුවෙකුගේ ජීවිතයට එතරම් ගැලපෙන්නක් නොවේ. ඒ නිසා මේ කාලසීමාවේදී ඔවුන්ගේ හිතට සතුටක් ලබා දෙන කටයුතු වෙත යොමු කරන්න. අවශ්‍යතාවයන් ගැන විමසන්න.අනාගත ඉලක්ක සමග ඉදිරියට යෑමේ පන්නරය ලබා දෙන්න.එසේ නොමැතිව අනේ වෙච්ච දෙයක් යැයි තව තවත් දරුවා තුළ පරාජිත මානසිකත්වය ගොඩ නැගීම කිසි සේත්ම සුදුසු නැත.

ප්‍රතිඵල සමග ගනුදෙණුව බොහාම අසීරුයි..

ප්‍රතිඵ සමග ගනුදෙණු කිරීම පහසු නැහැ. සමාජාජාල නිසා දැන් සුබපැතුම් නිතරම හුවමාරු වෙනවා. සාර්ථකත්වයට පත් දරුවන් එයින් සතුටට පත් වෙන බව සැබෑය. අපිත් ඒ දරුවන්ට සුබ පතමු. මේ අතරම තම මිතුරු හවුලේ අපේක්ෂිත ඉලක්කයට පත් නොවුන මිතුරන්ගේ සිත් සුවපත් කිරීමටත් හැකි අන්දමින් ගනුදෙනු කිරීමටත් ඔබට පුලුවනි. එක් අවස්ථාවකදී උසස් පෙළ අසමත් වුනත් අද වෙන විට මහ කළමනාකරුවෙකු ලෙසින් කටයුතු කරන චරිතාපදානයක් ගැන තොරතුරු සමාජාලා ඔස්සේ හුවමාරු විය. කාර්මික විද්‍යාල අධ්‍යාපනයෙන් රැකියාව ලබා එතැන් පටන් ඉදිරියට ගිය ඒ චරිතාපදානය උසස් පෙළ අසමත් දරුවන්ට මනා වූ ශක්තියක් විය.එවැනි අත්දැකීම් හුවමාරු වුන විට ”උසස් පෙළ නැත්නම් ජීවිතයක් නැත..” යන මානසිකත්වයෙන් මිදී දරුවාට තමාගේ අනාගත ස්ථාවරත්වය ගොඩ නගා ගැනීමට මනා වූ ශක්තියක් ලැබෙනු ඇත.

 

 

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here