- Advertisement -

අළුත උපන් දරුවා වෙනිවැල්ගැට වතුරෙන් නෑවීම සුදුසුද?

-

මොනවද මේ වෙන වෙනිවැල්ගැට කියන්නේ.

උද්භිද විද්‍යාත්මකව Coscinium Fenestratum යන නාමයෙන් හඳුන්වන විශාල ශාකමත වැතිරී වැඩෙන වැලක් වන වෙනිවැල් ගැට ශ‍්‍රී ලංකාවේ පහතරට තෙත් කලාපීය වනාන්තර තුල දැකිය හැකිය. ශ‍්‍රී ලාංකීය පාරම්පරික හා ආයුර්වේද වෙදකමේදී මෙන්ම හෙල වෙදකමේදී මෙයට හිමි වන්නේ සුවිශේෂී තැනකි. එසේ වන්නේ මෙම ශාකයේ ඇති අසීමාන්තික වූ ඖෂධ ගුණයන් නිසයි. 

- Advertisement -

සෙම් ප්‍රතිශ්‍යාව, උණ, ආසාත්මිකතා, ගෙඩි, සර්ප විෂ, මුඛ රෝග, දද, කුෂ්ඨ ආදි රෝග මෙන්ම අධික ලේ වහනය, සෙංගමාලය, පණු රෝග සඳහාත් ආහාර අජීර්ණය නිසා ඇති වන ආහාර අරුචිය සඳහා පමණක් නොව සිරුරේ සර්ව අංග ආශ‍්‍රිතව ඇති වන රෝග තත්ත්ව සඳහා ඖෂධයක් ලෙස භාවිත කිරීමට හැකි වන්නේ මෙම ශාකයේ වූ මේ අසීමාන්තික ගුණය හේතු කොටගෙනය. මෙහි ඖෂධීය ගුණය ගැන සිතද්දී අලුත උපන් දරුවාගේ සෞඛ්‍යයට ගලපා ගැනීම සඳහා මව්වරුන් උනන්දු වීම අරුමයක් නොවේ. දේශීය වෙදකම තුල නවජ දරුවන් සඳහා නෑවීමට ජලයට වෙනිවැල් ගැට එකතු කිරීම වරදක් සේ නොදකින්නේ ඉහත හේතූ නිසයි. එනම් සමට ආරක්‍ෂාවක් සැපයීම මෙන්ම ඒ මගින් සමේ රෝග සඳහා ප‍්‍රතිශක්තියක් ලැබීමට මෙය හේතුවක් විය හැකි හෙයිනි. 

අලුත උපන් දරුවෙකු වෙනිවැට ගැට තැම්බූ වතුරෙන් සේදීම සුදුසුද?‍

එසේ වුවද කුඩා දරුවා උපන් විගස මෙලොවදී තමන්ගේ පරිසරය වෙනස් වීම පෝෂණය සදහා අමතර වෙහෙසක් දැරීමට සිදුවීමට නිතැතින්ම සිදු වේ. ඒ මව්කුස සිටියදී ජලජ පරිසර වටා පිටාවක සිටීම මෙන්ම පෝෂණය වැදෑමහ හරහා සැපයෙන හෙයින් ආහාර අවශ්‍යතා සදහා අමතර වෙහෙසක් දැරීමට සිදු නොවේ. 

ළදරුවෙක් මෙලොව එළිය දුටු විගස පරිසර වෙනස, මවට ප‍්‍රසවයේ ඇති වෙහෙසකාරී බව මෙන්ම මව හා දරු සම්බන්ධතාවය හොඳින් ගොඩනඟා ගැනීමට ගත වන කාලය තුල දරුවාට ලැබෙන මව්කිරි ප‍්‍රමාණය අඩු වීම හෝ දරුවා උරාබොන මව්කිරි ප‍්‍රමාණය අඩුවීම නිසා ශරීරය කහ පැහැ වීම සිදු විය හැකියි. මෙසේ සිදු වන්නේ රතු රුධිර සෛල බිඳ වැටීම සමග එයින් ඇති වන බිලි රුබින් වර්ණකය නිසයි. මෙය දරුවාගේ ඇස්, නියපොතු මෙන්ම ශරීරය තුලින්ද දැකිය හැකියි. සමෙහි කහ පැහැය ඇති වීම මගින් දරුවාට ලැබුණු මව්කිරි ප‍්‍රමාණය අඩු වීම හෝ රුධිර ඝණ නොගැලපීම මතින් ඇති වන කහ පැහැවීමක් හෝ වෙනත් ආසාධන තත්ත්වයක් නිසා විය හැකියි. මෙය හඳුනා නොගත හොත් එය දරුවාට අනර්ථයක් විය හැකි තත්ත්වයක් හෙයින් ඒ පිළිබඳව සැලකිලිමත් විය යුතුය. 

මෙසේ හෙයින් නවජ දරුවා වෙනිවැල් ගැට වලින් නෑවීමෙන් සම මත කහ පැහැයක් ඇති විය හැකි නිසා එය රෝගී තත්ත්වයක් ලෙස වටහා ගැනීමට හේතු විය හැකියි. වෙනිවැල්ගැට වතුරේ තැම්බෙන විට කහ පැහැයක් ඇති වේ. මේ කහ පැහැය සම මතට වැටීම නිසා සම කහ පැහැයක් ගැනීම සුළු වශයෙන් ඇති විය හැකිවා සේම දිගටම මෙසේ සිදු වීමෙන් එය දරුවා කහ වීමක් ලෙසින් තීරණය කොට වෛද්‍ය උපදෙස් සඳහා යොමු කිරීමටත් අනවශ්‍ය ලෙසින් රසායනාගාර පරීක්‍ෂණ වෙත යොමු කිරීමටත් හේතු විය හැකියි. ඒ වගේම දරුවාට කහ පැහැ වුවහොත් එය වෙනිවැල් ගැට වතුරෙන් සේදීම නිසා යැයි සිතා අවශ්‍ය ප්‍රතිකාර වෙත යොමු නොවී සිටීමටද ඉඩ ඇත. මේ කරුණු දෙක නිසාම පළමුව දරුවා හොඳින් මව් කිරි උරා බොන්නේද යන්න හොඳින් තහවුරු කරගැනීම ඉතා වැදගත් වේ. එය හොඳින් හඳුනාගත හැක්කේ දරුවා හොඳින් කිරි උරාබීම, කිරි උරා බිව් පසු දරුවා සංතෘප්තිමත්ව සිටීම, දිනකට 7, 8 වතාවක් මුත‍්‍රා පහ කිරීම යන කරුණු මෙන්ම සති 4 කදී පමණ බර කිරා බැලීමේදී දරුවාගේ වර්ධන රේඛාව නියමිත දිශාව වෙත යොමුව පිහිටීම යන කරුණු මගිනි. මේ කරුණු තහවුරු කර ගැනීම සිදුවන තෙක් දරුවා නෑවීම සඳහා පිරිසිදු ජලය පමණක් භාවිත කිරීම වඩාත් සුදුසු වේ. වෙනිවැල් ගැට මගින් දරුවාට වෙනත් අහිතකර තත්ත්වයක් ඇති වන බවක් සොයාගෙන නැතිමුත් කහ වීම යන්න දරුවාගේ සෞඛ්‍යයට බරපතල තර්ජනයක් එක්කල හැකි තත්ත්වයක් හෙයින් අනවශ්‍ය ලෙස සම්මත කහපැහැය ඇති කරවිය හැකි දෙයින් මුල් කාලයේ ඈත්වීම වැදගත්ය. 

එසේම නවජ දරුවා සිටින කාමරයේ බිත්ති වල කහ පැහැය, දොර ජනෙල් රෙදි, ඇඳ ඇතිරිලි, දරුවාගේ ඇඳුම් වල කහ පැහැය පවා ඇති විට අපට ඒ ඒ පරිසරය තුලදී දරුවා කහ පැහැයෙන් දැකිය හැකියි. මෙසේ හෙයින් දරුවා සඳහා කාමරය සකස් කිරීමේදීද මෙය ඉතා වැදගත් විය හැකියි. එසේම දොර ජනෙල් මෙන්ම ඇඳ ඇතිරිලි වල පැහැය පවා මේ දින වලදී ඉතා වැදගත්. එසේ හෙයින් මුල් දින වලදී දරුවා සදහා පිළියෙල කරන රෙදි පිළි සුදු පැහැති වීම වැදගත්. එසේ සුදු පැහැය යොදා ගැනීම කහ පැහැය පමණක් නොව, වෙනත් පැහැයක් හඳුනා ගැනීමට පවා වැදගත් වේ. උදාහරණයක් ලෙස හෘද රෝගයක් ඇති දරුවකු නිල් පැහැ වීම, දරුවාගේ මල සමග රුධිරය පිටවීම, ආදී අවස්ථාවන් වලදී වුවද ඒවයේ පැහැය හඳුනා ගැනීමට සුදු පැහැයෙන් දරුවාගේ රෙදි පිලි තෝරා ගැනීමට සැලකිලිමත් විය යුතුය. 

එසේම මව ගැන සැලකුවහොත් ඇයටද පූර්ව ප‍්‍රසව සමයේ ඇඳුම් සකසා ගැනීමේදී ලා පැහැති ඇඳුම් සකසා ගැනීමට උපදෙස් ලබාදෙන්නේ මවගේ රුධිර වහනයක් වුවද හඳුනාගැනීමට පහසු වන ලෙසිනි. 

වෙනිවැල් ගැට නුසුදුසු දෙයක් නොව එය නිසා ඇති වන වැරදි වැටහීමක් නිසා දරුවාට අනර්ථයක් විය හැකි බව දැන් ඔබට වැටහෙනවා ඇති. මේ නිසා එහි ඖෂධීය ගුණය පසුව දරුවාට ලබාදිය හැකි හෙයින් මුල් මාසය වත් පසුවන තුරු වෙනිවැල් වතුරින් දරුවා නෑවීම නොකල යුතුයි. ආයුර්වේද වෛද්‍ය ක‍්‍රමය හා බටහිර වෛද්‍ය ක‍්‍රමය අතර පවතින දුරස්ථභාවය නිසා සමහර මතිමතාන්තර ඇති වුවද වෙනිවැල්ගැට නෑවීම සම්බන්ධව ඇති විය හැකි තත්ත්වය ඉහතින් විස්තර කල දෙයම හෙයින් මේ පිළිබව නිවැරදි නිගමනයකට එළඹීමට ඔබට මේ කරුණු උදව් උපකාර කරගැනීමට හැකි වනු ඇත. 

 

විශේෂඥ මතය, අදහස සහ මූලික සටහන:

අයිරාංගනී ගගලගමුව

පවුල් සෞඛ්‍ය සේවා නිළධාරීනි

සෞඛ්‍ය වෛද්‍ය නිලධාරී කාර්යාලය

බුලත්සිංහල

 

 

LEAVE A REPLY

SUBSCRIBE කරන්න ⇢

165,796FansLike
12,900SubscribersSubscribe
- Advertisement -
- Advertisement -

More article