පොතේ හැටියට දරුවන් හදන්න බැහැ කිව්වත් දරුවන් හදන විට යහපත් දරුවෙක් හදා වඩා ගන්නා මං සලකුණු අපි දැන හදුනා ගැනීම ඉතා වැදගත්. දරුවෙක් කියන්නේ ලේ මස් ඇට නහර වලින් සමන්විත ජීවයක්. ඔහු යහපත් ලෙස සමාජගත වුනොත් ලැබෙන ආශිර්වාදය වගේම ඔහු සමාජයට අහිතකර පුද්ගලයෙක් වුනොත් ඇති වෙන ආදීනව ඉතාම නපුරුයි. මේ නිසා දරුවා මලක් බව ආරක්ෂා කර ගෙන ඔහු සමාජයට වාගේම ඔහුගේ අනාගතයටත් මුහුණ දීමට හැකි පූර්ණ පෞරෂයෙන් යුක්ත තැනැත්තෙක් බවට පත්කිරීම අවශ්‍ය වෙනවා.මේ නිසා අද අම්මලා දරුවා ගැබ දරණ කාලයේ පටන්ම ඔහුගේ පෞරෂය ගැන වෙහෙසෙනවා. ආහාර පාන වලින් ලබා දෙන ශාරිරික නිරෝගිතාවය වගේම මානසික සුවතාවය ගැන නිරන්තරව යොමු වෙන මේ යුගයකදී දරුවන් හදා වඩා ගැනීමට අවශ්‍ය දැණුම පොත් පත් කියවා හෝ උපයා ගැනීමට අමමලා දක්වන උනන්දුව ගැන ඇත්තටම අපි සතුටට පත් විය යුතුයි.
මුල් ළමා විය ගැන දෙමව්පියන් ඇතත්ටම වඩාත් අවධානය දැක්වීම අවශ්‍ය වන්නේ දරුවාගේ ජීවිතය ගොඩ නගන අත්තිවාර සකස් වන්නේ එතැනදී නිසයි. මේ නිසා අම්මා තාත්තා වගේම දරුවා සමග ගණුදෙණු කරන උදවිය මානසික චිකිත්සකයෙකු තරම් සියුම් නිරීක්ෂකයෙක් වීම වැදගත්.
ඒ නිසාම අද බොහෝ දෙනා පොත් පත් කියවලා දරුවන්ගේ මානසිකත්වය ගැන කරුණු අවබෝධ කර ගන්නවා.. ඒත් බහුලව පොත් පත් වෙළදපොලට එකතු වෙන අද කාලයේ හරියටම ගැලපෙන පොතක් තෝරා ගැනීම එතරම් පහසු නැහැ. ඒ කටයුත්ත හරියට පිදුරු ගොඩ ඉදිකටුවක් හොයනවා වගේ අපහසුයි.පොත්ත තෝරා ගැනීමේදී මේ කෘතිය ලියන ලද පුද්ගලයා ගැන සොයා බලන්න. මුල් ළමා විය ගැන ඔහුට තිබෙන අධ්‍යාපන හා සමාජ දැණුම ගැන සොයා බලන්න. පොත රචනා කරන ලද තැනැත්තා උපාධිධාරියෙකු වීම එයින් අදහස් නොවේ. ඔහු සමාජය තුලින් ඒ දැණුම උපයා ගෙන තිබීම ඉතාම වැදගත් වෙනවා. ඒ නිසා අදාල කතුවරයාට පුර්ව ළමා විය ගැන ඇති දැනුම සොයා බැලීම ඉතාම වැදගත් වෙනවා.
මේ දැනුම වෙනුවෙන් ඔහුට හෝ ඇයට උපාධි අවශ්‍ය නැත. සමාජයේ සිද්ධි අධ්‍යනයන් මගින් ඔහු බෙහෝ දේ දැන ගෙන සිටින්නට පුලුවන. මේ අත්දැකීම් ඔබට බෙහෙවින් ප්‍රයෝජනවත් ලෙසින් ඔබේ දරුවා හැඩ ගසා ගැනීමට හේතු වෙනු ඇත. මේ ප්‍රායෝගික කරුණු දරුවාට ඉතා පහසුවෙන් ආදේශ කර ගෙන ඉතා යහපත් දරුවෙකු ලෙසින් ඔබ අපූරු නිර්මානයක් අනාගතයේදී සමාජයට දායක වෙනු ඇත.
දරුවාගේ හිත හඳුනා ගැනීමට කියවන පොත මේ විදිහට තිබුනොත් …
සරල බස් වහරකින් ලියැවී තිබුනොත් එය තේරුම් ගැනීම අපහසු වන්නේ නැත. ඇත්තටම අපි යමක් කියවන්නේ එය ඉක්මනින් අවබෝධ කර ගැනීමට බැවින් සරල බස් වහරකින් යුක්ත පොත් පත් කියවා ඔබේ පුර්ව පාසල් අවධියේ සිටින දරුවා තේරුම් ගන්න පුලුවන්.
දරුවන්ගේ මානසිකත්වය පිලිබඳව තොරතුරු නිරන්තරව යාවත්කාලීව වීම අවශ්‍යයි. මේවා පර්යේෂණ මට්ටමින් සිද්ධ වෙන අතර ඒ ප්‍රතිඵල අනුව අපේ දරුවන් හැඩ ගසා ගැනීමට පුලුවනි. ඉස්සර කාලයේ සමාජයේ තිබුන අදහස වුනේ දරුවන්ට කෝටුවට බය කර ගෙන සිටියේ නැත්නම් වගේම දඬුවම් නොකර සිටියොත් ඔවුන් නොමග යන බවයි. ඒත්අද තිබෙන පිලිගැනීමට අනුව දරුවන්ට අනවශ්‍ය විදිහට වෙහෙසකර දඬුවම් ලබා දීම ඒ තරම් සුදුසු දෙයක් නොවන බවයි. ඒ විතරක් නොවෙයි, ඉස්සර කිව්වේ දරුවන්ට ආදරය පෙන්වීම එතරම් හොඳ දෙයක් නොවන බවයි. ඒ වුනාට අද කියන්නේ දරුවන්ට ආදරය දැනෙන් කළ යුතු බවයි. මේ වගේ අදහස් අපි දැනගැනීමට නම් පොත් පත් කියවීම අත්‍යවශ්‍යයි.
මේ නිසා හදිසියේවත් පොත් සාප්පුවකට යන ඔබ පුර්ව පාසල් අවධියේ සිටින දරුවාගේ අනාගත හැඩගැස්ම ගැන කරුණු කාරනාවන් දැන ගැනීම කියැවිය යුතු පොත් කිහිපයක් පහත දැක්වෙනවා. මේ පොත් වලට අමතර මෙතැන සටහනක් නොවුනත් වටිනා පොත් තිබෙන්නත් පුලුවනි. ඒ වගේම අම්මලා විදිහට ඔබත් වටිනා පොත් පත් කියවා ඇති. ඒ නිසා ඔබ කියවන ලද හොඳ පොත් ඒ කියන්නේ දරුවෙක් හදා වඩා ගන්නේ කෙසේද යන්නට ගැලපෙන පොත් ලැයිස්තුත් මෙතැනට ඉදිරිපත් කරන්න. අපි ඒ අත්දැකීම් බෙදා ගනිමු. මේ පොත් සමහර විට ඔබත් කියවා ඇති.
- පෙර පාසල් අධ්‍යාපනය හා මුල් ළමා විය සංවර්ධනය – වයඹ පූර්ව ළමාවිය සංවර්ධන මධ්‍යස්ථානය
- ළදරු පාසල්වලට ඉගැන්වීමේ ක්‍රම -දයා රෝහණ අතුකෝරල
- ළමා මනසට සුව ඔවදන් – වෛද්‍ය විජිනි ජයවර්ධන
- ළමා මනෝ විද්‍යාව -සුගතමුනි ඤානසිරි
- පූර්ව පාසල් දරුවා සහ මනෝ විද්‍යාව -යූ. පී. ජී. කාරියවසම්
- ළමා මනෝවිද්‍යාව -ටී. එස්. එස් කාරියවසම්
