අනාගතයේදී අත්තම්ලා, සීයලා වෙන්න ඕනෑද…?

“අද මට බත් කන්න බැහැ…කඩෙන් මොනවා හරි ගේන්න…
ඇයි කඩෙන්.. ගෙදර උයපු බතුත් තියෙනවා.. එළවළුවක් හදන්නම්…
අපෝ එපා… මට ගෙදර කෑම ඇති වෙලා… දෝනි කිව්වා..”

එහෙමනම් කඩෙන් මොනවා හරි ගෙනාවා නම් එක අතකට ලේසියි. දැන් ආයේ උයනවාට වඩා අම්මාටත් හිතුනා. මේ අපේ හැම ගෙදරකම දැන් සිද්ධ වෙන සුලබ සිද්ධියක්. ඒත් මේ පිටුපස දිවෙන ඛේදවාචකය ගැන සමහර විට අම්මලාවත් නොදන්නවා ඇති.

දරුවෝ නැති පවුල් …..

ඔන්න ඔය සිද්ධියටම මේ කතාවත් සම්බන්ධ කර ගන්නකෝ… ඉස්සර කාලයේ බොහෝ පවුල්වලට සිද්ධ වුනේ දරුවන් ලැබීම සීමා කර ගැනීමට විවිධ විධි විධාන අනුගමනය කරන්න සිද්ධ වුණා. ඒත් අද මේ තත්වය සම්පූර්ණයෙන්ම වෙනස් වෙලා. දැන් අපිට නිතරම දරුවන් පිලිසිඳගැනීම් පිලිබඳ ගැටළු ගැන නිතරම අහන්න ලැබෙනවා. විවිධ ප්‍රතිකාර, ශාන්තිකර්ම ඔස්සේ ඔවුන් මේ වෙනුවෙන් විසඳුම් බලාපොරොත්තුව මහත් සේ වෙහෙසට පත් වෙනවා. ඒ අතරම පසුගිය දා ඇඩිලේඩ් විශ්ව විද්‍යාලයේ පර්යේෂකයින් පිරිසක් විසින් සිදු කරන ලද මේ අධ්‍යනය නිතරම කඩ කෑම හොයන දරුවන්ට යම් විදිහට හෝ සීමාවක් පැනවීම අවශ්‍ය බව තේරුම් ගැනීමට වැදගත් වෙනවා. ඒ වගේම අම්මලා වුනත් තමන්ගේ දියණිය අනාගත මවක් බවට පත් කිරීමේ බලාපොරොත්තුවෙන් සිටිනවා නම් පුංචි පුංචි සීමාවන් මගින් හෝ ඔවුන්ගේ මේ රැල්ල නැවැත්තුවොත් හොදයි නේද….?

ඇඩිලේඩ් විශ්ව විද්‍යාලයේ ජෙසිකා ග්‍රෙගර් විසින් ඇගේ අධ්‍යනය වෙනුවෙන් විවාහක ජෝඩු 6000 ක් සම්බන්ධ කර ගත්තා. මේ නියැදියට සම්බන්ධ වුනේ ඔස්ට්‍ර්ලියාව,නවසිලන්තය, අයර්ලන්තය සහ මහා බ්‍රිතාන්‍යය වැනි රටවල්වල අඹු සැමියන් පිරිසක්. ඒ අතරින් ජෝඩු 2204 ක් හනිමුන් බේබිලා හෙවත් විවාහයෙන් මාසයක් තුළ දරු පිලිසිඳ ගැනීම් වෙනුවෙන් වාසනාවන්ත නිමිති පහළ කර ගත්තා.මේ පිරිස තවත් වැදගත් ආහාර පුරුද්දක් අනුගමනය කර තිබුනා. ඔවුන් දිනකට අවම වශයෙන් පළතුරු පංගු තුනක්වත් ආහාරයට ගෙන තිබුණා.

දරු නිමිති නැති අයගේ ආහාරය…

දෙවනුව මේ අධ්‍යන කණ්ඩායමේ අවධානය යොමු වුනේ දරු පිලිසිඳ ගැනීම ප්‍රමාද ජෝඩු සම්බන්ධවයි. ඔවුන්ගෙන් ලබා ගත් ආහාර පුරුදු පිලිබඳ දත්ත අනුව මේ පිරිස සතියකට සකස් කළ ආහාර වේල් හතරක් හෝ පහක් ලබා ගත්තා පමණක් නොවෙයි, පළතුරු එළවලු ආහාරයට ගත්තේ ඉතාම අඩුවෙනුයි. පිට්සා, බර්ගර්, සහ සකස් කරන ලද කුකුලු මස් ආහාරයට ගැනීමෙන් දරු පිලිසිඳ ගැනීමට බාධාවක් වීමට ඇති අවස්ථාව 16 % කින් ඉහල යන බව මෙම අධ්‍යනය මගින් තහවුරු වුනා.

පිරිමි දරුවන්ටත් අවදානමක් තිබෙනවා…

දැන් ඉතින් පුතාලා ඉන්න  අම්මලා සැනසුම් සුසුම් හෙලයි.. මොකද… ගැහැණු දරුවන්ට නේද ?…මේ අනතුරු දැන්වීම අපි මොකට බයවෙනවාද ? කියලා… ඒත් මද සරුබවට ගැහැණු දරුවා විතරක් නොවෙයි, පිරිමි දරුවාටත් දායකත්වයක් තිබෙනවා.මේ  ආහාර ගැනීම නිසා පිරිමි දරුවන්ගේ ශුක්‍රාණු ගිණුමේ සක්‍රියතාවයට වගේම පරිමාවටත් බලපාන බව මෙහිදී පෙනී ගිය බව අධ්‍යනයේ කර්තෘ ජෙසිකා ග්‍රෙගර් (Jessica Grieger) විසින් සඳහන් කර තිබෙනවා.

දරු සම්පතක් ලබා ගන්න නම් හොදින් ආහාර ගන්න…

මේ අධ්‍යනයට තවත් අතුරු තොරතුරු එක් කරමින් නිව්යෝක් ලෙනොක්ස්හිල් රෝහලේ නාරි සහ ප්‍රසව වෛද්‍ය ජෙනිෆර් වූ සඳහන් කරන්නේ මනා පෝෂණය දරුවන් පිලිසිද ගැනීම වෙනුවෙන් බලපාන ප්‍රබල සාධකයක් බවයි. වෛද්‍ය ජෙනිෆර් සඳහන් කරන්නේ නිවරැදි ලෙසින් මේ සංසිද්ධිය තහවුරු කර ගැනීමට නම් නියැඳිය තව දුරටත් පුලුල් කළ යුතු බවයි. ඒ නිසා තවත් ගැබ්ගත් සහ මද සරු කාන්තාවන් මේ අධ්‍යනයට සම්බන්ධ කර ගත්තා.

තරබාරුවත් ගැටලුවක්…

වෛද්‍ය “ජෙනිෆර් වූ” විසින් ලබා ගත් දත්ත විශ්ලේෂනයේදී පෙනී ගියේ තරබාරු සහ අධික බර ඇති කාන්තාවන්ගේ ඔසප් චක්‍රය අක්‍රමවත්ව පැවැති බවයි. ඔවුන්ගේ ආහාර රටාවත් උක්ත අධ්‍යනයට සම්බන්ධ කාන්තාවන්ගේ ආහාර රටාවටම සමාන වුනා.

ගැබ්ගත්තාට පසුව ආහාර ගැන සැලකිලිමත් වුනාට බැහැ…

මේ දත්ත විශ්ලේෂනය කරමින් වෛද්‍ය “ජෙනිෆර් වූ” සඳහන් කරන්නේ බොහෝ කාන්තාවන් පෝෂණය ගැන වෙහෙසෙන්නේ දරු පිලිසිඳ ගැනීම සිදු වුනාට පසුවයි. එතෙක් ඔවුන් තමන්ගේ ආහාර ගැන එතරම් සැලකිල්ලක් දක්වන්නේ නැහැ.එතෙක් මේ කාන්තාවන්ගෙන් අපි ඇහුවොත් මොනවද ආහාරයට ගන්නේ කියලා ඔවුන්ගේ පිලිතුර වෙන්නේ ෆ්‍රයිඩ් චිකන්, ෆ්‍රෙන්ච් ෆ්‍රයිස්, පිට්සා වැනි විවිධ ආකාරයේ මේද බහුල ආහාර ගැන විතරයි. කිසිම කෙනෙක් පළතුරු ,මාළු, අලුත් එළවලු ගැන කියන්නේම නැහැ.

අම්මලාටත් පණිවිඩයක් තිබෙනවා…

එක අතකින් ආහාර පුරුදු එක රැයකින් ගොඩ නගන්න බැහැ. ඒත් අහිතකර විදිහට ආහාර වෙනුවෙන් ආකර්ශනයට නම් කාලයක් යන්නේ නැහැ. අද තරුණ පරම්පරාව යොමු වෙලා තියෙන්නේ මේ අහිතකර තත්වයට පමණයි. ඔවුන්ගේ ආහාර ‍අතර පළතුරු, පලා සහ එළවලු ඇත්තේම නැහැ.ආහාර ගුණ දන්නා අම්මලාට වුනත් මේ රැල්ල නවත්වා ගන්න බැරි තැනට අද ඇවිත් තිබෙන වසංගතයක් වෙලා. අනුකරනයට වඩා අපේ තියෙන්නේ අන්ධානුකරනයක්. අපි කන්නේ බොන්නෙත් වැඩියෙන්ම අනුන්ට අවශ්‍ය විදිහට වගේම තවත් අයට ප්‍රදර්ශනය කරන්න. ඒත් අන්තිමට එයින් අමාරුවේ වැටෙන්නෙත් අපිම බව තවමත් අපි දන්නේ නැහැ. ඒ නිසා දරුවන් ඉන්න අම්මලා තාත්තාලාට අනාගතයේදී අත්තම්ලා, සීයලා වෙන්න අවශ්‍ය නම් දැන් ඉතින් මේ ගැනත් ටිකක් හිතල බැලුවොත් හොදයි. මේ අධ්‍යන වාර්තාව ඔවුන් “Human Reproduction” මගින් ප්‍රකාශයටත් පත් කර තිබෙනවා.

CNN පුවත් සේවයේ Want to increase fertility? Try dropping fast food ලිපිය ඇසුරින්