උඳුවප් මාසයේ සීතල සුලං සමග අප වෙතට පැමිණෙන්නේ නත්තලේ සුබ පණිවිඩයයි. දෙව්පියාණන්ගේ උපත සිහිපත් කිරීම වෙනුවෙන් වූ ලෝකයක් සැරසෙන අසිරිමත් උපත සමරන සැබෑම නත්තල මෙවර අපට සමරන්නට සිදු වී තිබේ.
ලෝකය පාපයෙන් ගලවා ගනු පිනිස උපන් ජේසු බිලිඳාගේ උපත සිදු වූයේ බෙත්ලෙහෙමේ ගව ලෙනකයි. එතුමාගේ පියා වඩු කර්මාන්තයේ නියැලුන ‘‘ජුසේ‘‘ තුමාය.දෙවියන් වෙනුවෙන් දැඩි භක්තියෙන් සිටි මරියතුමිය එතුමාගේ මවයි.
දිලිඳු අඹුසැමි යුවලකට දාව ජේසු බිලිඳාගේ උපත සිදු වූයේ ගවලෙනකයි. ඒ දෙවියන්ගේ කැමැත්ත අනුවයි. උන්වහන්සේගේ සැලැසුම එයයි. දිලිඳාු පවුලක උපත ලද ජේසුස් නම් දිව්‍ය පුත්‍රයා උන්වහන්ස්ගේ ජීවිතගමන සම්පූර්නයෙන්ම ගත කලේ උන්වහන්සේගේ සුඛ විහරනය සඳහාම නොවේ.උන්වහන්සේ සිය ජීවිතය කැප කරනු ලැබුවේ දෙවියන්වහන්සේ විසින් තමා වෙත පවරන ලද කාර්යය ඉටු කිරීමටයි.
මේ වෙනුවෙන් උන්වහන්සේ සමාජ තරාතිරම නොබලා විවිධ පුද්ගලයන් ඇසුරු කළහ. දේවවචනය සමාජගත කිරීම සඳහා ගම් නියම්ගම් පුරා සැරි සරන ලද සේක.උන්වහන්සේ විසින් දේශනා කරන ලද “කන්ද උඩ දේශනාව ” මගින් දේව ධර්මය ජනතාවට තේරුම් කර දුන් අතර දෙවියන්වහන්සේ මුල් කර ගත් විශ්වාසය නිසා ජනතාව දිනෙන් දින කතෝලික ධර්මය වෙත ආකර්ශනය වූහ.
ඔබේ සිත ගවලෙනක් මෙන් දුප්පත් කර ගන්න…
ජේසුස් වහන්සේ ලෝකයට පෙන්වා දුන්නේ මිනිසාගේ ආධ්‍යාත්මික ජීවිතයේ වටිනාකමයි. ඒ නිසාම ජේසු නම් දේව පුත්‍රයා මෙලොවට වඩින දිනය වෙනුවෙන් අපි ආධ්‍යාත්මිකව සූදානම් විය යුතුය. සැබැවින්ම ලෞකික සැප සම්පත් අත් හළ යුතුය. එහෙත් අද නත්තලේ සැබෑ අර්ථය අද මිථ්‍යාවක් බවට පත් වී තිබේ. අනවශ්‍ය අන්දමින් විය පැහැදම් කරන ඇඳුම් පැළඳුම්, ආාහරපාන මගින් තමන්ගේ තරාතිරම ප්‍රදර්ශනය කිරීමට දරන තරඟකාරී උත්සාහය මත මිනිසුන් මං මුලාවට පත්ව සිටින යුගයක් බවට අද නත්තල පත්ව තිබේ.
සැබෑම නත්තලේ සංකේතයක් වුන නත්තල් සීයා
නත්තල් සීයා යනුවෙන් හඳුන්වන්නේ ශාන්ත නිකුලස් පියතුමාය. 3 වන සියවසේදී ලියාහි අගනුවර වන පතාරාහි සාන්ත නිකුලස්තුමා උපන් බව පිළිගැනේ. එතුමන්ගේ මව්පියන් වූයේ එෆ්ෆෙනියන් හා නොන්නාය. මහත් වූ දේපලකට උරුමකම් කීවත්, බාල වියේදීම මව්පියන් අහිමි වීම නිසා ශාන්ත නිකුලස් ජීවිතයේ අතරමං වූයේය. නමුත් මව්පිය උරුමයෙන් ලද ධනය කළමනාකාරණයකින් හැසිරවීම සඳහා කිතුදහම අනුව තමන්ගේ සේවය ලෝකයාට ලබා ඔහු දීමට තීරණය කලේය.
ඔහු අසරණයන්ට පිහිට වීමට වඩාත් අවධානය යොමු කරන ලද්දේ ‘‘ මයිරා ‘‘ නගරයේ බිෂොප් තනතුරට පත් වීමෙන් පසුවය. එක්තරා දුගී පියෙකුට තමාගේ දියණියන් විවාහ කර දීමට වත්කමක් නොමැතිව කල් ගෙවද්දී නිකුලස් තුමා රන්කාසි ගෙන ගොස් දුගියාට හොරෙන් නිවසේ ජනේලයෙන් විසි කොට ඇත.මෙම මුදල් ලබා දුන්නේ කවුදැයි ඔවුන් නොදත්හ. දිනක්…ලෝගුවකින් විත් කාසි දමන අමුත්තෙක් දුටු අතර ඔවුන් මේ අමුත්තා අල්ලා බලන විට ඔහු වෙන කිසිවෙකුත් නොව ශාන්ත නිකුලස්තුමා බව දැන ගත්හ. මෙම සිද්ධිය රහසක් සේ තබා ගන්නා ලෙස ඉල්ලා සිටියත් පසුකලෙක ඒ නිකුලස්තුමා බැව් හෙලි විය.ශාන්ත නිකුලස්තුමා දියණිවරුන් වෙනුවෙන් මුදල් දමන ලද්දේ දුම් කවුළුවේ එල්ලා තිබුන රතු මේස් කකුලකටය. ඒ නිසා රතු මේස් කකුලටත් නත්තල් සැසිලි අතර වැදගත් තැනක් හිමි වී තිබේ.
දැන් වෙනස් වීමට කාලය ඇවිත්..
ඇතැම් සිදු වීම් ඕපපාතිකව කාලය විසින් සීමා කරන යුගයක් දැන් අප ඇස් ඉදිරිපිට මැවී තිබේ. තමාට මෙන්ම අසල්වැසියාටත් ප්‍රේම කළ යුතු යුගය අප ඉදිරියේය.ජීවිතය ආර්ථික දුෂකරතාවයන් නිසා සමාජගත සම්බන්ධතාවයන්ගෙන් දුරස් වුනත් අසල්වැසියාට ප්‍රේම කිරීමට ගැලපෙනම අවදිය මේ නත්තලයි.‘‘මාත් මගේ අමුවත් රැකුනොත් මදිද..‘‘? යන සංකල්පය වෙනුවට මාත් ආරක්ෂා වී අසල්වැසියන්ද සුරක්ෂිත කිරීමට ඇවැසි යුගය අප ඉදිරියේ දැන් තිබේ.
ගතින් දුරස් වුනත් සිතින් ලං විය හැක…
වෙනදා මෙන් සාප්පු යන්නට. සමූහ ලෙසින් එක්ව විනෝදවන්නට අපට හැකියාවක් නැත.ආර්ථික අපහසුතාවයන් නිසා ස්වයංවාරණයන් අප විසින්ම පනවා ගත යුතුය. නමුත් අපට එකිනෙකාට උදව් වීම අපහසුවක් නොවේ. සැබෑ මානව දයාව ඇත්තේ එතැනයි.
. නත්තල් ගසේ තෑගි ලබන්නට පුංචි දරු පැටවුනට වෙනදා මෙන් අවස්ථාවක් නැත.නමුත් ඔබට සැබෑම නත්තල උදා වන්නේ මෙම වසරේදීය. එය මර්සිලිනු ජයකොඩි පියතුමාගේ කවියක දැක් වෙන සැබෑම නත්තල වෙනු ඇත.
මගෙ නත්තල දුගියා බත් කන දාය
මගෙ නත්තල වැරහැලි නැති වෙන දාය.
මගෙ නත්තල ඔබ දුක සැනසෙන දාය
මගෙ නත්තල පව පල්ලිය යන දාය
එතුමාගේ කවියට තවත් ඌනපුරණයක් කරමින් අපෙ නත්තල අප හැම දෙන බත් කන දාය..යැයි ප්‍රාර්ථනා කරමු.
