දරුවන් දෙමාපියන්ගේ පුරුදු අනුගමනය කරන බව ඔබ දන්නවා වන්නට පුලුවන. ඔබ ආදර්ශමත් දෙමාපියකු ලෙස හැසිරෙන්නේද? ඔබ තුල අයහපත් ගුණාංග ඇත්නම් දරුවන් වෙනුවෙන් ජීවිතයේ යම් යම් වෙනස්කම් කිරීමට ඔබ සූදානම් විය යුතුය.
දරුවන්ගේ පළමු ගුරුවරයා වන්නේ මා පිය දෙපළයි. ඔබේ දරුවන් නිතරම ඔබගේ හැසිරීම අධ්‍යයනය කරමින් යම් දෙයක් ඉගෙන ගැනීමට තැත් කරයි. ජීවිතයේදි ඔබ විවිධ අවස්ථාවලදී කටයුතු කරන ආකාරය, අන් අය සමඟ සමාජ සම්බන්ධතා පවත්වන ආකාරය හා සෞඛ්‍යමත් පුරුදු අනුගමනය කරන ආකාරය කෙරෙහි ඔබගේ දරුවා විමසිල්ලෙන් පසුවෙයි. මෙසේ වැඩිහිටි ජීවිතයෙන් පාඩම් ඉගෙන ගන්න දරුවා අනාගතයේදි වගකීමක් දැරිය හැකි සමාජයේ බුද්ධිමත් පුරවැසියෙකු බවට පත්වේ.
කිසිදු පුද්ගලයෙකු 100% සුදන නොවේ. ඒත්, දෙමාපියකු ලෙස දරුවන්ගේ හැසිරීම් කෙරෙහි බලපෑ හැකි ඔබගේ අයහපත් පුරුදු හඳුනා ගෙන ඒවායින් බැහැර වීමට උත්සාහ ගැනීම මනාය. ඔබ දෛනික ජීවිතයේ මෙසේ සිදුකරනු ලබන සුලු වෙනස්කම් තුලින් ආදර්ශමත් දෙමාපියකු ලෙස කටයුතු කල හැකිවේ.
ඉලෙක්ට්‍රොනික උපාංග සමඟ කටයුතු කිරීම.
නූතන ඉලෙක්ට්‍රොනික් උපාංග දැන් අපේ ජීව්තයේ එක් අත්‍යවශ්‍ය අංගයක් බවට පත්ව ඇත. එහෙත් ඔබගේ දරුවා මෙම උපාංග වලට ඇබ්බැහිවීමෙන් වලක්වා ගැනීම දෙමාපියකු ලෙස ඔබ සතු වගකීමක් වේ. ඔබ දරුවා සමඟ කාලය ගත කරන විට හැකි පමණ ඉලෙක්ට්‍රොනික උපාංග ඈත් කොට සමාජ සම්බන්ධතා කෙරෙහි දරුවාව පොළඹවන්න. පවුලේ සැම එක්ව දරුවන් සමඟ දාම්, චෙස්, ස්ක්‍රැබල් වැනි බෝඩ් ගේම් ක්‍රීඩාවක නිරත වීම හෝ පොතක් කියවීම, ස්මාට් ෆෝනයේ කැන්ඩි ක්‍රශ් ක්‍රීඩාවේ නියැලෙනවාට වඩා ඵලදායි වේ.
ආත්ම විශ්වාසය වැඩි දියුණු කිරීම.
ආත්ම විශ්වාසය යනු සාර්ථක ජීවිතයක් සඳහා ඕනෑම පුද්ගලයෙකු ප්‍රගුණ කල යුතු ගුණාංගයකි. දෙමාපියන්ටත් තමා තුල ඇති යහපත් ගුණාංග ඉස්මතු වන ලෙස හැසිරීමෙන් හා ඒ පිලිබඳ දරුවාට පැවසීමෙන් දරුවා තුල ආත්ම විශ්වාසය ගොඩ නැගෙන අයුරින් හැසිරිය හැකි වේ. ඔබ තුල ඇති වැරදි පෙන්නුම් කරනවා වෙනුවට, යහපත් ගුණාංග කෙරෙහි අවධානය යොමු කරන්න. ඔබ ජීවිතයේ ජයගත් අවස්ථා දරුවන් සමඟ එක්ව සමරන්න. මේ තුලින් දරුවා තමාගේ දක්ෂතා හා හැකියාවන් අගය කරන්නටත්, ආතම විශ්වාසයෙන් කටයුතු කිරීමටත් පෙළඹේ.
මිතුරන් හා පවුලේ සාමාජිකයින් ගැන ඕපා දූප කතා කිරීම.
හිස් කතා බස් වල නියැලීම දරුවා කෙරෙහි අයහපත් බලපෑමක් ඇති කල හැකි වැඩිහිටි පුරුද්දකි. මෙම හැසිරීමට ගොදුරු වීම ඉතා පහසු වන නමුත් ඉන් ගැලවීම අසීරු කාර්යයකි. ඔබ අනෙකුත් පවුල් සමඟ සතුටු සාමිචියේ යෙදීමේදි, හැකි පමණ විනෝදජනක දේවල් පිළිබඳ කතා බස් කරන්න, අන් අයව අගය කරන්න, වැඩිහිටි සාකච්ඡා වලින් දරුවන්ව ඈත් කරවන්න.
ඔබගේ සැමියාට/බිරිඳට ගරු නොකිරීම.
දරුවා ඉදිරියේදි ඔබේ සහකාරියට, සහකරුට අගෞරව කිරීම, දෙමාපියකු ලෙස ඔබට කල හැකි බරපතල වැරැද්දකි. දරුවා ඔබ අතර සිදුවන වචන හුවමාරු, වාද කෙරෙහි අවධානයක් යොමු නොකරනවා යැයි ඔබට සිතෙන්නට පුලුවන් නමුත් ඇත්තටම දරුවා ඔබේ හැසිරීම් පිළිබඳ විමසිල්ලෙන් පසුවෙයි. ඔබ බිරිඳ හෝ සැමියා සමඟ කටයුතු කරන ආකාරය දරුවාගේ අනාගත විවාහ ජීවිතය කෙරෙහි දැඩි ලෙස බලපායි. අසභ්‍ය වචනෙන් බැන වැදීම, අන් අය පහත් කොට කතා කිරීම වැනි හැසිරීම දරුවාගේ සිත් තුල කාවදියි, ඔහු/ඇය එය අනුගමනය කරන කාලය එන තෙක් ඔබ බලා නොසිට එකිනෙකාට ගරු කරමින් තමාගේ දරුවන්ට ආදර්ශමත් වන ලෙස හැසිරීම යහපත්ය. ඔබගේ මතයට සහකාරිය/සහකරු එකඟ නොවූවද, පරුෂ වදනින් බැන වදිනවා වෙනුවට සංයමයෙන් හා පරිණතව කටයුතු කිරීම නුවණට හුරුය.
වාහනය ධාවනය කිරීමේදි විමසිල්ලෙන් පසුවීම.
ඔබ වාහනය ධාවනය කිරීමේදි දුරකතනය භාවිතා කරන්නේද? කෑම කෑම, අනෙකුත් ධාවකයින්ට බැන වැදීම් වැනි අයහපත් රියදුරු හැසිරීම් ඔබගේ දරුවාගේ අනාගත ජීවිතය කෙරෙහි දැඩි ලෙස බලපායි. ඔබගේ දරුවාගේ ජීවිතය ඔබ සතු උතුම් දායාදය බව මතක තබා ගන්න. වාහයන ධාවනය කරන අතරතුර ඔබට හදිසි දුරකතන ඇමතුමක් ගන්නට හෝ පණිවිඩයක් යැවීමට අවශ්‍ය නම් අසල ඇති ආරක්ෂිත ස්ථානයක වාහනය නතර කරන්න. වෙහෙස නිවා ගන්නට ගමන අතර තුරදී භෝජන ශාලවක් වෙත යන්න. මෙවැනි පුරුදු සුරක්ෂිත ජීවිතයක ඇති වටිනාකම ගැන දරුවාට කියා දේ.
අයහපත් ආහාර රටාවන්.
ඔබ නිතරම පිටින් කන පුද්ගලයෙක්ද? ඔබ අසහනකාරිව පසුවන වේලාවන්හිදි අධික තෙල් හා සීනි සහිත ආහාර ගන්නට පුරුදු වී සිටිනවාද? ඔබ කෑම මේසයේදි යම් එළවලුවක් ප්‍රතික්ෂේප කරන්නේ නම් ඔබේ දරුවාත් ඔබව අනුගමනය කරමින් අයහපත් ආහාර රටාවන් වලට ගොදුරු වීමට ඉඩ ඇත. WebMed ට අනුව බලෙන් අනුභව කල යුතු කෑම තීරණය කරනවා වෙනුවට, සෞඛ්‍යමත් ආහාර රටාවකට ඔබේ පවුලේ සියලු දෙනාවම හුරු කරවීම යහපත් ය. එලවලු හා පලතුරු මිලදී ගැනීමේදි මෙන්ම මුලුතැන්ගේ කටයුතු වලට දරුවාව සහභාගි කරවන්න. කෑම කන විට පිළිපැදිය යුතු යහපත් පුරුදු දරුවාට උගන්වන්න.
ක්‍රියාශිලිමත් ජීවිතයක් ගත කිරීම.
ඔබ දෛනික ජීවිතයේ කෙතරම් කාලයක් ශරීර සෞඛ්‍යයේ ක්‍රියාශීලිත්වය සඳහා යොදවන්නේද? ඔබ දිනපතා ව්‍යායාම් වල යෙදෙන්නේ නම්, එම යහපත් පුරුද්ද ඔබේ දරුවා ද තම ජීවිතයට එකතු කර ගනියි. .Bumblebee ට අනුව ඔබ අනුගමනය කරන ව්‍යායාම් මාලාව දරුවාට ක්‍රමවත් කියාශීලි ජීවිතයක් ගත කිරීම සඳහා ආදර්ශයක් ලෙස ක්‍රියාත්මක වේ. දරුවන් තමා කැමති ක්‍රීඩාව හෝ ව්‍යායාමය තෝරා ගැනීමට ඉඩ දීමෙන් ඔහුට/ඇයට එය විනෝදජනක අත්දැකීමක් බවට පත් කල හැකි වේ. ව්‍යායාම් වලට අමතරව, ඔබගේ දරුවන්ව එළි මහනේ සෙල්ලම් කිරීමට පොළඹවන්න. අමතර ව්‍යායාම් සමඟ පැය භාගයක පමණ කාලයක් එලි මහනේ සෙල්ලම් කිරීමෙන් දරුවාගේ ක්‍රියාශීලිමත් ජීවිතයේ දැඩි වෙනසක් සිදු කල හැකි වේ.
