මේ… මේ… ඔයා තාත්තා කෙනෙක් වෙන්නද යන්නේ ?

මේ... මේ... ඔයා තාත්තා කෙනෙක් වෙන්නද යන්නේ ?

ජිවිතය අහස වගේ කිව්වොත් ඔබ පිළිගන්නවද? ගතවෙන හැම තත්පරයක් තත්පරයක් පාසාම ජිවිතේ වෙනස්කම් සිදු වෙනවා. ආපස්සට හැරිලා බැලුවම අද මේ ඉන්නෙ අපිමද කියලත් හිතෙන අවස්ථා කොතෙකුත් තිබෙනවා. පෙර දවසක ඔබේ පෙම්වතිය අද ඔබේ බිරිඳවන්නට ඇත. ඉතින් පීතෘත්වයේ කිරුළට දරන්නට මග බලා ඉන්න සහෝදරවරුන්ටයි මේ ආමන්ත්‍රණය. ඔබේ බිරිඳ ගැබිනියක් නම් ළඟම ළඟම එන පියාගේ භූමිකාව පිළිබඳ ඔබට නිසි අවබෝධයක් තිබිය යුතුමය. ගර්භණීත්වය හා ප්‍රසූතිය කාන්තාවකටම උරුම වූ ජීව විද්‍යාත්මක සංසිද්ධියක් ලෙස සිතා ඔබට සැහැල්ලුවිය නොහැකිය. දරුවා ලැබෙන්නේ ඇයට නොව අපටය යන්න ඔබට සිතිය හැකි නම් සෞභාග්‍යමත් සතුට සපිරි කැදැල්ලක නියමුවා වන්නට ඔබ ඔබට හැකිවනු ඇත.

ගර්භණීත්වය යනු කාන්තාවකගේ ජීවිතයේ සුවිශේෂී සංන්ධිස්ථානයකි. තමන්ගේ කුස තුල දසමසක්ම නව ජීවයකට ඉඩකඩ ලබාදීම යනු භාරදූර කාර්යයකි. ඩිම්බයක් හා ශුක්‍රාණුවක් සංසේචනය වූ මොහොතේ සිටම ඇය  ශරීරිකව මෙන්ම මානසිකවද සිදුවන වෙනස්කම් වලට මුහුණදෙනු ඇත. එයට අනුගත වන්නට නම් ඔබෙන් ලැබෙන අත්වැල ඇයට සවියක් වනු නොඅනුමානය. කුළුඳුල්  දරුප්‍රසූතියට සූදානම් වන ඇය බෙහෙවින්ම වික්ෂිප්ත වනු ඇත. සත්තකින්ම ගර්භණී සමය පුරාම ඇත්තේ සතුට,කුතුහලය හා බිය සංකලනවූ සිතුවිලි සමුදායක් නිසාවෙන් මේ අවදිය සිතට මහා බරක්ය.

පියෙකුගේ කාර්යයභාරය ඇරඹෙන්නේ දරුවා උපත ලැබූ පසු නොව දරුවා කුස තුල පිළිසිඳගත් මොහොතේ පටන්ය . දයාබර සැමියකුවන්නට ඔබට හැකිනම් නිරායසයෙන්ම ආදරණීය පියෙකුවන්නට ඔබට හැකිය.ඔබේ බිරිඳට දරුවකු පිළිසිඳගත් විට ඔබට පවුල යන ඒකකය තුල ඇති වගකිම් සමුදාය තුල යම් බන්ධනයක පටලැවුනු බව සිතෙනු නොඅනුමානය. එය සත්‍යයකි. ඒ සොඳුරු බන්ධනයට ඔබ හදවතින්ම කැමතිවිය යුතුය.

ගර්භණීත්වය සමගම ඔබේ බිරිඳට හෝමෝන විපර්යාස මත ආහාර අරුචිය, අසාමාන්‍ය දොළදුක, වමනය ආදිය ඇති විය හැකිය. තමන් පිසින ආහාර අනුභවය අප්‍රියවීම නිසා නිරාහාරව සිටින්නට සිදුවේ. එය ඇගේ පෝෂණයට මෙන්ම කළලයේ පෝෂණයටද බලපෑම් එල්ල කරනු ඇත. නිරන්තරයෙන් ඔබේ අවදානය යොමු විය යුත්තේ එහෙයිනි. ඇයට කන්නට හැකි ආහාරයක් ඔබට පිළියෙල කල හැකි නම් පිළියෙල කර දෙන්න. ඇතැම් විට එයද ඇයට අනුභව කරන්නට නොහැකි වනු ඇත. එහෙත් ඔබ ඇයට දැක්වූ අවදානය, ආදරය ඇයගේ සිතට සැනසිල්ලකි. එහෙයින් ඇයට පෝෂණය සපිරි ආහාර වේලක් සැපයීමේ වගකීමත් නිරායාසයෙන්ම ඔබට පැවරෙනු ඇත. වැලකට ශක්තිය ඇවසි නිසාවෙන් ගහකට එතෙන්නා සේ ඔබේ ආදරණිය බිරිඳ නිරන්තරයෙන් පතන්නේ ඔබේ ආදරය හා රැකවරණය බව අවබෝධ කරගන්නත් අමතක කරන්න එපා. ඇයගේ ශක්තිය ඔබය.

ගර්භණී සමයේ ඔබේ බිරිඳ අත්දකින අමිහිරිතම අත්දැකීම ඔක්කාරය සහ වමනයයි. බොහෝ විට උදෑසන අවදිවූ විට මෙම තත්ත්වය බරපතලය . ඉතින් ඇයට ඔබේ සහයෝගය අවශ්‍යය. විඩාබරව තෙහෙට්ටුවෙන් සිටින ඇයට නිවසේ එදිනෙදා කටයුතු පවා තනිවම කරගන්නට නොහැකිවනු ඇත. ඇයගේ අතපසුවීම් වලට උරණ නොවී ඇයට නිවසේ කටයුතු වලට ඔබේ සහයෝගය ලබාදෙන්න.

මේ සියළු අපහසුතා අතරේ ඔබ දෙපලගේ පුංචි කිරිකැටියා වැඩෙනු ඇත. ඉතින් පුංචි කිරිකැටියාටද ඔබේ සෙනෙහසද ඇවසිය. බිරිඳගේ කුසට ලංව ආදරණීයව ඔබේ පැටියාට අමතන්න. සති 29කින් පමණ පසු පැටියාගේ දැඟලිලි ඔබටම අත්විඳිය හැකිය. ඔබ කරන මේ සුළු දෙයින් ඔබත් ඔබගේ බිරිඳත්  දරුවාත් අතරත් දැඩි මානසික බැඳීමක් ඇතිවන බව අත්විඳ බලන්න. පුංචි කතන්තරයක් පුංචි ගීතයක් කිරිකැටියා වෙනුවෙන් කුසට ලංව කියන්න. ඔබේ ආදරය අත්විඳින්නට අවකාශ සලසා දෙන්න.

සායන වෙත යන විට ඔබත් ඇය සමග වෛද්‍යවරයා මුණගැසෙන්නට යන්නට අමතක නොකරන්න. මේ කුස තුල වැඩෙන්නේ ඔබ දෙපළගේම වස්තුවක්ය. ඉතින් දිනෙන් දින වර්ධනය වන මේ පුංචි අමුත්තාගේ වර්ධනය දකින ඔබට සෙනෙහස උපදින අයුරු ඔබම අත්විඳ බලන්න.

දරුප්‍රසූතිය යනු මොලොව ඇති වේදනාව උපරිම අවස්ථාව යැයි කිසිඳු සැකයක් නැත. දැඩි වේදනාව තුලින් සිත වෙලා ගන්නා බිය තව තවත් ඇයව විඩාවට පත් කරනු ඇත. කවුරුන් ළඟ සිටියද ඇයට අවශ්‍යවන්නේ ඔබ පමණක්මය. පැය ගණනක ප්‍රසූත වේදනාවෙන් පසුව ඔබේ බිරිඳට ඔබ වඩාත් අවශ්‍ය වේ. ඉතින් ඒ මොහොත ඔබේ ජිවිතයට ආපසු නොපැමිණේවී. ඇය සනසන්නට ඔබේ ආදරයට හැකිය.පැය ගණනාවක වේදනාබර කාලයෙන් පසු ඔබේ දෝතට පත් වන කිරි කැටියා ඔබට ඇති අමිලම සම්පතය. ඒ සම්පත ඔබට ලබා දෙන්නට ඔබේ බිරිඳ කෙතරම් වේදනාවක් දැරුවාද? දැන් ඔබේ වාරයයි. ඇයට විවෙික ගන්නට පහසුව සලසා දෙන්න. මේ අපූරුත අවස්ථාවේ ඇය අසලින්ම හිඳින්න. එය ඇයට විශාල ශක්තියකි. අලුත උපන් බිළිඳා හා බිරිඳ දකින ඔබ ඔබට කරන්නට දෙයක් නැතැයි සිතන්නට එපා. ඔවුන්ට ඔබව වඩාත් අවශ්‍ය බව මතක තබා ගන්න.

එකෝමත් එක දවසක

දඟකාර  නුඹේ නෙතු මත

මගේ ජීවිතයම නතර විය…

දෑඟිලි රන් හුයෙන් බැඳ

පෝරූ මස්ථකයේ ආසිරි ගී මැද

අපි අපේම විය…

දවසක් දා මගේ ලඟටවිත්

රහසින් වෙව්ලමින්

අපේ ආදරයේ ප්‍රතිමුර්තිය

නුඹෙ කුස තුලැයි කියු සඳ

ජිවිතයට නිම නොවන

වසන්තයක් උදා විය…

මා දෙහිවල උසස් තාක්ෂණ ආයතනයේ උසස් ජාතික ගණකාධිකරණය ඩිප්ලෝමා පාඨමාලාව (ව්‍යපාර වාණිජවේදී උපාධියට සමානය) සහ ශ්‍රී ජයවර්ධනපුර විශ්ව විද්‍යාලයේ ව්‍යපාර පරිපාලන උපාධිය හදාරා වසර නමයක කාලයක් සහකාර ගණකාධිකාරිණියක් වශයෙන් වෘත්තීමය නියැලුනෙමි. උසස් පෙළ හා උසස් අධ්‍යපනයෙන් පසුව වෘත්තිමය වශයෙනුත් මා ගණුදෙනු කලේ ගිණුම් වල හර බැර අතර වුවද සංසාර පුරුද්දට මා ලද ප්‍රාග්ධනයක් ලෙස යමක් සුන්දරව දැකීමටත් ,සිතීමටත් ඒ සිතුවිලි අකුරු වලට පෙරලන්නටත් හැකියාව මා සතුවිය. කාන්තාවකට මෙලොව දිනිය හැකි ඉහළම කිරුළට උරුමකම් කියන මා පුතුන් දෙදෙනෙකුගේම අම්මාය. විශ්වයේම ඇති සොඳුරුතම ස්ථානය නිවහනය. එහි සාමය සතුට සෞභාග්‍යය රැඳවිය යුත්තේ අම්මාය. එනිසාවෙන්ම මගේ පුංචි පැටවුන්ගේ රැකවරණය වෙනුවෙන් මා වෘත්තියෙන් සමුගත්තෙමි. මුළුගැන්වී තිබූ ලිවීමේ හැකියාවට පන්නරය ලැබුණේ ඉන් පසුවය. අම්මා පුවත් පතෙහි විශේෂාංග ලේඛිකාවක වශයෙන් ලේඛණ කලාවට පිවිසි මා ලේඛණ කලාවෙන් ඉදිරියට යන්නට අපේක්ෂා කරමි.

LEAVE A REPLY

Please enter your comment!
Please enter your name here