වයස අවුරුදු තුන හතර පමණ වන ඇතැම් දරුවන් රාත්‍රිය පුරා මුත්‍රා පිටකිරීමේ අවශ්‍යතාවයක් නොමැතිව සම්පූර්ණ නින්දක් ලබාගනී. තවත් දරුවන් පිරිසක් නින්දෙන් ඇහැරී තම අවශ්‍යතාවය මව්පියන්ට දැනුම් දී කාර්යය ඉටුකරගනී. තවත් දරුවන් පිරිසක් නින්දේදී නොදැනුවත්වම ඇඳ මත මුත්‍රා පිටකරයි. නමුත් වයස අවුරුදු පහට වැඩි දරුවෙකුහට රාත්‍රි නින්දේදී නොදැනුවත්වම මුත්‍රා පිටවීම සැළකෙන්නේ අසාමාන්‍ය තත්ත්වයක් ලෙසයි. මේ තත්ත්වය එකම පවුලේ සාමාජිකයන් කීපදෙනෙකුට තිබිය හැකි අතරම දෙමාපියන් කුඩා කාලයේදී මේ තත්ත්වයට මුහුණ දුන්නේ නම් ඔවුන්ගේ දරුවන් මේ තත්ත්වයට මුහුණ දීමට වැඩි ප්‍රවණතාවයක් ඇත.
රාත්‍රියේ නින්දේදී නොදැනුවත්වම මුත්‍රා පිටවීමට හේතු,
- ඉතා තද නින්දට වැටීම – මෙහිදී අවශ්‍යතාවය දැණුනද තද නින්ද නිසා යටපත් ගොස් නොදැනුවත්වම මුත්‍රා පිටවෙයි.
- මුත්‍රාශයේ පරිමාව කුඩා වීම – වැඩි මුත්‍රා ප්‍රමාණයක් රඳවා තබාගත නොහැකි නිසා මුත්‍රා නොදැනුවත්වම පිට වෙයි.
- රාත්‍රී කාලයේ දී අසාමාන්‍ය ප්‍රමාණයක් මුත්‍රා නිපදවීමයි.
මේ තත්ත්වයට බලපෑ වෙනත් හේතු ඇති දරුවන්,
- වර්ධනය ප්‍රමාද දරුවන්
- අවධානය අඩු දරුවන්
- ස්නායු ආබාධ සහිත දරුවන්
- අධි ක්‍රියාකාරිත්යෙන් පෙලෙන දරුවන්
- මුත්‍රා ආසාධනයක් ඇති දරුවන්
මේ තත්ත්වයට හේතු විය හැකි මානසික බලපෑම්,
- මව්පියන්ගෙන් වෙන්වීම
- තමා ප්‍රිය කළ පාසල/යහළුවන් මාරුවීම
- පාසැලේදී අන් අයගේ උසුළු විසුළුවලට ලක්වීම/යහළුවන් අතර කොන් වීම
මෙවැනි තත්ත්වයන්ට මුහුණ දෙන දරුවන්ට රාත්‍රියේදී පමණක් නොව දහවල් කාලයේදීද මෙම ලක්‍ෂණ දැකිය හැකිය. එනම්,
- විටින් විට වැඩි වාර ගණනක් මුත්‍රා කිරීම
- දිවා කාලයේද නොදැනුවත්ම මුත්‍රා පිටවීම
රාත්‍රීයේදී නින්දෙන් මුත්‍රා පිටවීම නිවැසියන්ට පමණක් නොව දරුවාටද විශාල පීඩනයකි. දෙමාපියන් තරයේ සිතට ගත යුතු කරුණ වන්නේ මෙය දරුවා ඕනෑකමින් කරන දෙයක් නොවන බවයි. දරුවන් මේ තත්ත්වය නිසා විහිලුවට, සිනහවට හෝ ඇනුම් බැනුම්වලටද ලක්වීම කිසිසේත්ම සුදුසු නොවේ. ඇඳ නොතෙමු රාත්‍රීයක් ඇත්නම් ඒ තත්ත්වය පිළිබඳව දරුවා අගය කළ යුතුය.
මේ තත්ත්වයට විවිධ ප්‍රතිකාර ,
- රාත්‍රි කාලයේදී පැණිරස හා ලුණු අධික කෑම වර්ග නොදීම
- රාත්‍රී නින්දට පෙර වරක් හෝ දෙවරක් මුත්‍රා කිරීමට හුරු කරවීම
- රාත්‍රී කාලයේදී දරුවා ඇහැරවා මුත්‍රා කිරීමට සැලැස්වීම
වයස අවුරුදු පහට වැඩි දරුවෙක් නොකඩවා මේ තත්ත්වයට පත් වේ නම් හෝ පෙර මෙවැනි පුරුද්දක් නොමැතිව සිටි දරුවෙකුහට එසේ සිදු වෙයි නම් වෛද්‍ය උපදෙස් ලබාගැනීම වඩාත් සුදුසුවේ. ප්‍රතිකාර ක්‍රම හමුවේ වුවද මෙම තත්ත්වයෙන් මිදීමට ඇතැම් විට දරුවෙකුට වසර කීපයක් වුවද ගතවිය හැක.
කොළඹ, පවුල් සෞඛ්‍ය කාර්යාංශයේ පාසැල් සහ නව යොවුන් සෞඛ්‍ය ඒකකයේ ලේඛකාධිකාරී ප්‍රජා වෛද්‍ය එස්.ජේ. සේනානායක මහතා සමග සකසන ලද ලිපියකි.
