අද සමාජය තුල පවුල කියන ඒකකය න්‍යෂ්ටික පවුල් රටාවට අනුගතව ඇත. එනිසා පවුල් වශයෙන් හුදකලා වන අපට සියලුම කටයුතු සිදු කරගන්නට සිදුවන්නේ තනිවම හෝ සේවක සේවිකාවන්ගේ සහයෙන්ය. එහෙත් එදා සමාජය තුල පැවති විස්තෘත පවුල තුළ දරුවන්,ඔවුන්ගේ දරුවන් හා දෙමාපියන් වශයෙන් පරම්පරා තුනක සාමාජිකයින් සිටි නිසාවෙන් එකිනෙකා අවශ්‍යතාවන් පවුල තුලින් සපුරා ගත හැකි විය.න්‍යෂ්ටික පවුල් බිහිවීමත් සමග අනෙකුත් ඥාතීන්ගෙන් දුරස්වීම සිදුවිම නිසාත් රැකියා කටයුතු වලින් කාර්ය්‍ය බහුල වන දෙමාපියන්ට දහවල් කාලයේ තම දරුවන් රැකබලා ගැනීම ගැටලුවකි. ඇතැම් දරුවන් අත්තම්මලා අත්තලාගේ රැකවරණයට පත් වේ. තවත් දරුවන් ආයම්මලා යටතට පත් වේ. ඒ පිළියම් දෙකම නැති තැන දරුවව දිවා සුරැකුම් මධ්‍යස්ථානයකට යොමු කරන්න සිදු වේ. එක් අතකින් එය රැකියාවක නිරත දෙමාපියන්ට සහනයකි. එහෙත් ළමා අපයෝජන වගේම ළමා හිංසනයත් වැඩි වෙලා තිබෙන නිසාවෙන්ම දරුවා දිවාසුරැකුම් මධ්‍යස්ථානයකට යොමු කරනවා නම් දෙමාපියන් වශයෙන් තම දරුවාගේ පූර්ණ සුරක්ෂිතබාවය, සෞඛ්‍යාරක්ෂිතබව හා සැපපහසු බව පිළිබඳව දැඩි අවධානය යොමු කළ යුතුමය.
දරුවා දිවා සුරැකුම් මධ්‍යස්ථානයකට යොමු කිරීමට සැලසුම් කරනවා නම් ඔබේ හිත මිතුරන් ඔවුන්ගේ දරුවන් දිවාසුරැකුම් මධ්‍යස්ථාන වෙත යොමු කර ඇත්නම් ඔවුන්ගෙන් උපදෙස් හා නිර්දේශ ලබා ගත හැකිය.ඒ කෙසේ වුවත් අවම වශයෙන් මාස දෙක තුනක්වත් හොඳ දිවාසුරැකුම් මධ්‍යස්ථානයක් සොයා ගැනීමට ඔබේ කාලය මිඩංගු කල යුතුමයි.
දිවා සුරැකුම් මධ්‍යස්ථානයක් නිරීක්ෂණය කරන්නට ඔබ යන්නේ නම් කිසිඳුූ විටක එම ආයතනය පෙර දැනුම් දීමකින් තොරව යන්න. එවිට ඔවුන්ට පෙර සූදානමක් නොමැති නිසා ඔවුන්ගේ ආයතනයේ පාලන රටාව, එම මධ්‍යස්ථානයේ සුරක්ෂිතතාවය වගේම පිරිසිඳුකම ගැනත් ඔබට නිවැරදි අවබෝධයක් ලබා ගත හැකිය.
දරුවාට දිවාසුරැකුම් මධ්‍යස්ථානයක් තෝරා ගැනීමේදී ඔබ දෙදෙනා සේවය කරන කාර්්‍යාල වලට ආසන්න ස්ථානක් වීමද ඉතා වැදගත්ය. එවිට හදිස්සි අවස්ථාවක පහසුවෙන් හා ඉක්මණින් ඔබේ දරුවා වෙත යාමට මෙන්ම ඔබට අවශ්‍ය විටෙක දරුවා බලන්නට යන්නත් පහසුය.
දිවාසුරැුකම් මධ්‍යස්ථානයේ ප්‍රමාණවත් ලෙස දරුවන් රැක බලාගැනීම සඳහා කාර්්‍යය මණ්ඩලයක් සිටිනවාද යන්න සොයා බලන්න. සාමාන්‍යයෙන් එක් පුද්ගලයෙකුට අවුරුද්දකට පහළ දරුවන් තුන් දෙනෙකු හෝ හතර දෙනෙකු රැක බලා ගත හැකි අතර අවුරුදු 2 ත් 3 අතර දරුවන් තුන් දෙනෙකු හෝ හතර දෙනෙකු එක් අයෙකුට රැක බලා ගත හැකිය. එසේම ඔබේ දරුවා භාර ගන්නා පුද්ගලයාගේ සුදුසුකම් පිළිබ`ුදවද අවදානය යොමු කරන්න. ඔබේ දරුවා බලාගන්නා පුද්ගලයා හැරෙන්නට සහයක කාර්ය මණ්ඩලයේ සංඛ්‍යාව හා ඔවුන්ගේ ස්ත්‍රී පුරුෂ භාවයත් තම දරුවාට ප්‍රවේශ විය හැකි පුද්ගලයන් පිළිබඳ දැනුවත් වීම ඉතා වැදගත්ය.
එසේම දිවාසුරැකුම් මධ්‍යස්ථාන වල අය කරනු ලබන ගාස්තුද ඉතා වැදගත්ය. එය ඔබට දැරීමට හැකි විය යුතුය.
ඔබ දිවාසුරැකුම් මධ්‍යස්ථානයක් තෝරා ගැනීමට ගිය විට, කිසිඳු පැකිලීමකින් තොරව ඔබට අවශ්‍ය සෑම කාරණාවක් පිළිබඳවම ප්‍රශ්න කරන්නට ඔබට අයිතියක් ඇත. එවැනි අවස්ථාවක ඔවුන්ට ඔබව කරදරයක් ලෙස හැසිරෙනවා නම් වහාම එම දිවාසුරැකුම් මධ්‍යස්ථානය කපා හරින්න. තොරතුරු විමසීමේදී දරුවාට හදිස්සි අවස්ථාවකදී ආරක්ෂාව සඳහා අනුගමනය කරන ක්‍රියාපටිපාටිය හා ප්‍රථමාධාර සඳහා පිළියෙල කර වැඩ පිළිවෙල පිළිබඳව දැනුවත් වීම වැදගත්ය. ඇතැම් දිවාසුරැකුම් මධ්‍යස්ථාන ජංගම වෛද්‍ය සේවා ආයතන සමග ගිවිසුම් අත්සන් කර ඇත. එවැනි දිවාසුරැකුම් මධ්‍යස්ථානයක් තෝරා ගන්නවා නම් වඩාත් සුදුසුය.
දිවාසුරැකුම් මධ්‍යස්ථානයේ නිවාඩු පිළිබඳ තොරතුරු පිළිබඳවද විමසීම වැදගත්ය. එවිට නිවාඩු දිනවල ඔබේ දරුවාගේ රැකවරණය කල් තියාම සැලසුම් කල හැකිය.
අදාල දිවාසුරැකුම් මධ්‍යස්ථානයෙන් සේවය ලබා ගත් හා සේවය ලබා ගන්නා පුද්ගලයන්ගේ එම මධ්‍යස්ථානය පිළිබඳව තොරතුරු ලබා ගැනීම ඔබට ඉතා වැදගත් වනු ඇත. එනිසා ඒ පිළිබඳව අවදානය යොමු කරන්න.
ප්‍රථම නිරීක්ෂණයෙන්ම තීරණයක් නොගන්න. කිහිප වාරයක් ඔබ එම ආයතනය වෙත ගොස් නිරීක්ෂණය කරන්න. ඒ සෑම විටම එම ආයතනයට නොදන්වා යන්න.
හොඳ නිර්දේශ හා ස්ථාන පිළිබඳ සම්පූර්ණ තොරතුරු ලබා ගැනීමෙන් ඔබේ දරුවාට ගැලපෙන හොඳ දිවාසුරැකුම් මධ්‍යස්ථානයක් තෝරා ගත හැකිවනු ඇත. දිවාසුරැකුම් මධ්‍යස්ථානයට ඇතුලත් කල පසු සෑම විටම දරුවා සතුටින් හා සුරක්ෂිතව කාලය ගෙවනවා දැයි අවබෝධයක් ලබා ගැනීමට දරුවාගේ හැසිරීම දිනපතාම නිරීක්ෂණය කරන්න. නිවසට පැමිණි පසු දරුවා වෙනුවෙන් පමණක්ම කාලයක් වෙන් කරගන්න. එහිදී දරුවාගෙන් සුහදව ආදරයෙන් තොරතුරු ලබා ගන්න.
