දරුවා කේලම් කීමෙන් මුදවාගන්න

kids_speaking

ඒ තුන්වන වසරේ ඉගෙනගන්නා හරිනි ගේ අවසාන වාරයේ නිවාඩු දෙන දිනය.හැබැයි හරිනි ගෙදර ආවේ නම් සතුටින් නෙමේ.එයාගේ පන්තියේ යාලුවෙක්  එයාට තියෙන අකමැත්තක් නිසා පාසල ත් මාරු කරන්න යනවා කියලා එයාට අනික්  යාලුවන්ගෙන් දැනගන්න ලැබුනා.හරිනි ගේ අම්මා මේ ගැන කිව්වේ වෙනම කතාවක්.“මම මගේ දුවට පැහැදිලි කරන්න කොච්චර උත්සාහ කලාද ඒ දරුවා පාසල මාරු කරන්නේ එයාගේ දෙමව්පියෝ ගේ මාරු කරන නිසා කියල.කෝ ඒත් මේ ළමයා පිළිගන්නෙම නැහැනේ ඒක”

නරක හෝ හොඳ වේවා  කටකතා කියන දේ හුඟක්ම පතුරුවන්න පටන් ගන්නේ  ළමා කාලයේ වයස අවුරුදු 8 ත් 10 ත් අතර පටන් කියලා ඔබ දන්නවද? මේ වයස්වල ළමුන් හුඟක්ම මේ වගේ කේලම්,කටකතා පතුරුවන්න හිතන්නේ එයාලට අනික් අය අතරේ තියෙන බලය,ශක්තිය කොයිතරම් ද කියල පෙන්වන්නයි.අන් අයගේ අවධානය දිනාගන්න ඕනේ වුනාමත් මේ  විධියට ඔවුන් වවිධ කටකතා පතුරුවන්න බොහෝ උත්සාහ ගන්නවා.එහෙත් මෙවැනි මවාපෑම්,රඟපෑම් ආදිය දෙමව්පියන් වන ඔබට යි නැවැත්විය හැක්කේ…

කටකතා සහ හානිදායි නොවන දිගු කතා වෙනකොට හඳුනාගන්න

සාමාන්‍යයෙන් ළමයා යන පුද්ගලයා බොහෝ අනික් යහළුවෝ එක්ක එදිනෙදා වන දේවල් සහ සිය අත්දැකීම් බෙදාහදා ගන්න එක පාසලට හෝ පන්ති කාමරයට පමණක් සීමා කරන්නේ නැහැ.එක් පර්යේෂණයකදී හතර වසරේ ඉගෙනුම ලබන ගැහැණු ළමුන් 60 දෙනෙකු යුගල බැගින් බෙදා විනාඩි 15ක් නිදහසේ සෙල්ලම් කරන්න ඉඩ දීලා තිබෙනවා.ඒ වෙලාව තුල ඔවුන් විවිධ පුද්ගලයන් 24 දෙනෙකුටත් වැඩි ප්‍රමාණයක් ගැන විවිධ ඕපාදුප කතාකර තිබෙනවා.එයින් බොහෝ කාරණා කිසිවකුටවත් හානිදායි ඒවා වුනේ නැහැ. (උදාහරණ විධියට අද මම භානු ලඟින් තමයි ඉන්ටර්වල් එකේදී වාඩි වුනේ)ඒ වගේම අන් අයව අගය කරන අවස්ථා ත් බොහෝ තිබුනා.නමුත් ඒ අතරේම සෘණාත්මක සිතුවිලි ඇතිකරන කතාත් සිදු නොවුනාම නෙමේ.(අනේ එයා හිතන් ඉන්නේ නම් එයා ලොක්කා කියලා ) මෙන්න මේ වගේ කතාබහ අතරදී වන වචන හිත් රිදවීම් වෙන ඒවාද නැද්ද කියන දේ ගැන ටිකක් හෝ හඳුනාගන්න ඔබේ දරුවාට ඔබ කියා දීම වැදගත් දෙයක්.ඔබේ දරුවා පවසන යමකදී හෝ වෙනත් දරුවකු ඔබේ දරුවාට පවසන යමකදී හෝ තවකකුට හෝ තමන්ට හෝ අවැඩක් වන යමක් තිබේදැයි බලන්න දරුවාට පුරුදු කරන්න.”පුතේ,කාගේවත් දේවල් කාත් එක්කවත් කියන්න එපා…ඔයා ගැන වෙන කවුරුහරි නරකක් කිව්වොත් ඒක ඔයා දැනගත්ත දවසට ඔයාට ටිකක් හරි දුකක් එනවා නේ.අන්න ඒ වගේ තමයි අනික් අයත්.ඒ වගේම කිසි කෙනෙක් කාගේවත් දේවල් ඔයා එක්ක කිව්වා කියල ඔයා ඒවා ඔලුවට ගන්න එපා.ඔයාට බැන්න අරයා කියල කියන් ආවත් ඔයා ගණන් ගන්න එපා.මොකද අපි ඇත්ත බොරුව හරියට දන්නේ නැති නිසා.ඒක නිසා හොඳම දේ තමයි තමන්ගේ පාඩුවේ සුහදව අනික් යාළුවො එක්ක ඉන්න එක.මෙන්න මේ වගේ සරල,පුංචි දේවල් තමා ඔබේ දරුවා ව යහපත් කරන්නේ.ඒත් ජිවිතේ මේ පුංචි දේවල් අපට මඟහැරී යාම නිසා මානසික අවපාත වලට ගොදුරු වී රෝගී වන දරුවන් ද සිටින බව ඔබ දන්නවාද?

පෞද්ගලිකත්වය ආරක්ෂා කරන්න ඔබ දරුවාට ආදර්ශයක් වෙන්න

ඕනෙම දරුවෙක් හැමදෙයක්ම දකින්නේ,ඉගෙනගන්නේ එයාගේ අම්මා තාත්තාගෙන්.මොකද ඉපදුන දවසේ ඉඳන් එයා හොඳින් දන්නේ,විශ්වාස කරන්නේ,අනුගමනය කරන්නේ..කොටින්ම කිව්වොත් අනුකරණය පවා කරන්නෙත් එයාගේ දෙමාපියන් ව ම තමයි.ඒ නිසා අනුන්ගේ පුද්ගලිකත්වය ආරක්ෂා නොකරන ඔබ කෙසේද ඔබේ දරුවාට ආදර්ශවත් වෙන්නේ?

“මේ ඔයා දන්නවද අනේ.අර චන්දි? එයා එච්චර හොඳ කෙනෙක් නෙමේලු අනේ.යන යන තැන ප්‍රශ්න.එයාට මම හිතන්නේ මොකක්හරි අප්සට් එකක් තියෙනවා.එහෙම කතාවක් මට රම්‍යා කිව්වා.කියන්නත් එපා කිව්වා කාටවත්.ඒත් ඉතින් මම ඔයාට කිව්වේ නොකියා බෑ වගේ නිසා” චන්ද්‍රිකා සිය යෙහෙළියට මෙහෙම කියද්දී ඔය කතාව අහන් ඉන්නේ ඇගේ දරුවා.ඉතින් ඇය සිතන්නේ තව කෙනෙක්ගේ දේවල් කිව්වා කියලා ප්‍රශ්නයක් නොවන බවයි.ඒ වගේම තව අයෙකුගේ පෞද්ගලිකත්වයට හානි කරන එක දරුවා ත් වැඩිවියට ආවම පුරුද්දකට වගේ පටන් ගැනීම  තුල ඔබ බිහිකරන්නේ සාමජයට යහපත් ආකල්පයක් බව ඔබ සිතනවද?
ඇත්තටම පාසලේදී වුනත් යහළුවකුට ලැබුණු දඬුවමක් ගැන,යහළුවෝ රණ්ඩු කරගැනීම ගැන ළමුන් අතරේ කතාවිම ඔවුනට සාමාන්‍ය දෙයක් වගේ පෙනෙන්න පුළුවන්.ඒත් දෙමව්පියන් විධියට,ගුරුවරුන් විධියට ඔබ මෙය සරලව හිතල බැහැ.මන්ද හැමවිටම අපි තව අයකුට කියන නරකක්,කරන අයහපතක් අපට වුනොත් දැනෙන හැඟීම හා සමාන හැඟීමක් අනිකා ට ත් දැනෙන බව දරුවන්ට දැනවීම අවශ්‍ය වන්නේ දරුවා තුල මානුෂීය හැඟීම් වර්ධනය වීම රටක අනාගතයට සෘජුවම බලපාන බැවිනි.

යහපත් ලෙස යහළුකම් වර්ධනය කරගන්න දරුවාට උපදෙස් දෙන්න…

ඔබට කේන්ති යාවි.ඇත්තටම යහළුවන් නැති තැන ඔවුන්ගේ වැරදි කියන එකෙන් අන් අය අතරේ විශේෂ අවධානයක් තමන් වෙත යොමුවෙනවා යයි ළමුන් සිතීම වරදක් වුනත් ඒ අවධානය ඔවුන්ට ලැබීම ප්‍රයෝගිකව සිදුවන දෙයක්.වැඩිපුර ගොසිප් හදන ළමයින්ට අනික් අය ලංවෙනවා.යහළුකම් ඇතිකරගන්න උත්සාහ කරනවා.ඉතින් මෙය හොඳ වැඩක් යයි සිතා දරුවන් එසේ කටකතා පැතිරවීමට උත්සාහ කරන එක අතිශය සාමාන්‍ය දෙයක්.නමුත් දැනුම් තේරුම් තිබෙන වැඩිහිටි වූ අපට හැකිවෙන්න ඕනේ ඕනෙම දෙයක හොඳ නරක දෙපැත්තම දරුවාට කියා දෙන්න.

මෙතැනදී ඔබ දරුවාට පැහැදිලි කලයුතු දේ තමයි යහළුකම් ඇතිකරගැනීම කෙසේ හෝ කල යුතු නැති බව.නිසි යහළුවෙක් නැතත් යහළුකම් හදාගන්න තව අයකුගේ ඕපාදුපයක් කියා යහළුවන් ලං කරගත්තත් ඒ වැනිම කටකතා තමන් ගැනත් අන් අයට පැතිරවිය හැකි බව.තමන් කියූ කටකතා ව ම තමන්ට කැරකිලා එන්න පුළුවන් බව.යහළුකම් හදාගත යුත්තේ ඕපාදුප,කටකතා හෝ කරදර කිරීම් වලින් නොවන බව.මෙන්න මේ පුංචි දේවල් ටික ඔබට පුළුවන් නේද දරුවන්ට කියල දෙන්න?

පැතිරවීම නවත්වන්න

ඇතැම් දරුවන් කලාතුරකින් කටකතා පැතිරුවත් ඔවුන් ඒවා අහන් ඉන්න විශේෂ කැමැත්තක් දක්වනවා වෙන්න පුළුවන්.ඇහුම්කන් දුන්නත් කටකතා කිව්වත් වරදේ කිසිදු වෙනසක් නැති බව පහදන්න ඔබට හැකියි.ඒනිසා තවකෙකු පිලිබඳ කියන හොඳ හෝ නරක වේවා අන් අය අතරේ එය පැතිරවීමෙන් වැලකි තමන්ගේ වගකීම් ඉෂ්ට කිරීම ට සහ අධ්‍යාපනය ට ක්‍රීඩාවට සහ විශේෂයෙන්ම ගුණධර්ම වලට මුල් තැන දී කටයුතු කිරීමයි වැදගත් වන්නේ.අප පතුරුවන යම් කටකතා වෙයිද,එයින් අන් අයට අපහාස සිදුවිය හැකි බවත් කටකතා නිසා කෙනෙකු මානසිකව අවපීඩනයට ලක්වෙන්න හැකි අවස්තාව වැඩි බවත් සරලව ඔබේ දරුවාට කියා දෙන්න ඔබට හැකියි.කොච්චර කාර්යබහුල වුනත් මවක්,පියෙක්,ගුරුවරයෙක් විධියට දරුවන්ට මේවා ගැන අවවාද උපදෙස් දීම තුල අනාගතය යහපත් වන්නේ ඔවුන්ගේ පමණක් නොවේ මුළු සමාජයේමයි.ඒ නිසා ඔබ දරුවා වෙනුවෙන් සොයන වෙලාව තුලදී මේවා කියා දෙන්න අමතක කරන්න එපා.

දරුවන් අපේ අනාගතයයි. ඔවුන් ගේ යහපත ලෝකයේම යහපතයි….

 

මේ සත්‍යා. කුඩා දරුවන්ට ඉංග්‍රීසි උගන්වන ගුරුවරියක් ලෙස ඇය දැනට කටයුතු කරනවා. කවදා හෝ නීතිවේදිනියක් වී අසරණ මිනිසුන්ට උපකාර කිරීමට බලාපොරොත්තුවෙන් ඇය නීතිය විෂයක් සේ හදාරනවා. රාජ්‍ය නොවන සංවිධාන වෙනුවෙන් ස්වෙච්චා භාෂා පරිවර්තන කටයුතු කරනවා. දැනට ඇය ජපන් භාෂාව පිලිබඳ අධ්‍යයනය කරමිනුයි සිටින්නේ.

LEAVE A REPLY

Please enter your comment!
Please enter your name here