ජලය මිනිසාගේ ජීවයයි. ආහාර නොමැතිව ජීවත්වීම අපහසු වුනත් අපිට ජලය නොමැතිවිම ජීවත්වීම ඉතා අසීරුයි. මේ නිසා ජලය ආරක්ෂා කර ගැනීමේ වැදගත්කම ගැන දරුවන් දැණුවත් කළ යුතු අතරම මව්පියන් නිතරම ඔවුන්ට ආදර්ශයක් වීම අවශ්‍ය වේ.ජලය දරුවන්ට ඉතා ප්‍රබල ලෙසින් බලපාන බව අමතක කළ යුතු නැතබොහෝ අවස්ථාවල දරුවන් මරණයට පත්වන්නේ විජලනය හෙවත් ජලය නොමැති වීමේ අතුරු විපාකයක් ලෙසින්ය. වමනය , පාචනය වැනි අවස්ථාවන්හිදී දරුවාට අවශ්‍ය ජලය ලබා නොදුනහොත් ඔවුන් විජලනයට පත්ව මරණය වැනි අවාසනාවන්ත තත්වයක ගොදුරු බවට පත් වේ. මේ නිසා වමනය , පාචනය වැනි අවස්ථාවලදී දරුවා විජලනයට පත් නොවන සේ ජලය ලබා දීම වැදගත් වෙනවා.
අපිරිසිදු ජලය පරිහරණය සහ ප්‍රමාණවත් මූලික සනීපාරක්ෂක පහසුකම් නොමැති වීම නිසා වසරකට ලෝකය පුරා මිලියන 2. 2 ක් දෙනා මිය යන අතර ජලය නිසා වැළ‍ෙඳෙන රෝගාබාධයන්ගෙන් සෑම සතියකම මිනිසුන් 42,000 ක් මිය යන අතර එයින් 90%ක්ම වයස අවුරුදු පහට අඩු දරුවෝ වෙති.ඒ වගේම අවුරුදු පහට අඩු වයසේ දරුවන්ගේ මරණයන්ට හේතු වෙන තුන්වැනි රෝගය අතීසාරයයි.
ජලය නිසා දරුවන්ට රෝග වැළඳීමට තිබෙන අවදානම ඉහලයි. ජලය මොනතරම් ගුණදායක වුනත්, සිරුරට අවශ්‍ය වුනත් ජලයෙන් වැළ‍ඳෙන රෝගාබාධයන්ද අධිකයි. මේ නිසා දරුවන්ට ජලය ලබා දෙන විට පිරිසිදු පානීය ජලය ලබා දීම ඉතාම වැදගත් වෙනවා. ලෝක ජනගහනයෙන් මිලියන දෙදහසකට අධික පිරිසක් පිරිසිදු පානීය ජලය නොමැතිවීමේ අ‍ඳෝනාවෙන් හඬ නගනවා. මේ පිරිසට දරුවන්ද ඇතුලත් වෙනවා. මේ විදිහට අපිරිසිදු ජලය නිසා අපට වැළ‍ඳෙන රෝග සහ ඒ වෙනුවෙන් වූ රෝග කාරක ක්ෂුද්‍ර ජීවින් සිටිනවා.
- බැක්ටීරියා – සැල්මොනෙල්ලා, ෂිගෙල්ලා, කොලරාවෛරස්-ඇඩ්නොවයිරස්, පෝලියෝ වෛරස්, එකොවෛරස්, හා හෙපටයිටිස්වෛරස්
- ප්‍රොටසෝවා – ඇමීබා,ගියාර්ඩියා,ක්‍රිස්ටොස්පිරීඩියම්
- හෙල්මින්ග් – කොකු පණුවා, වටපණුවා, කිරිපණුවා
ඊකෝලායි බැක්ටීරියාව ජලයට එක් වීමෙන් රෝග බෝවෙන අතර ජලයේ තිබෙන ෆොලරයිඩ්, සයනයිඩ්,නයිට්රේට,කැඩිමියම්, රසදිය, ක්‍රෝමියම් , ආසනික්, තඹ ආදි බැර ලෝහ අධි සාන්ද්‍රණයක් තිබුනොත් එයින්ද සෞඛ්‍යට අහිතකර බලපෑම් ඇති වෙනවා.
මෙම බැක්ටීරියා වෛරස මගින් වැළ‍ඳෙන රෝග මේ විදිහට දක්වන්න පුළුවනි.
- බැක්ටීරියා උණ සන්නිපාතය, බඩවැල් රෝග, අතීසාරය, කොලරා
- වෛරස්-පෝලියෝ , මොලයේ උණ, බෝවෙන සෙංගමාලය, පාචනය
- ප්‍රොටසෝවා-රක්තාතීසාරය
- කැඩ්මියම්– වකුගඩු හානි
- ෆ්ලොරයිඩ්– දත්දිරා යෑමමේ නිසා දරුවන් මුල් කර ගෙන පානීය ජලය ලබා දෙන විට ඉහත කරුණු ගැනත් අවධානය යොමු කිරීම වැදගත් වෙනවා.
ඒ වගේම දරුවන්ට බාල කාලයේ පටන්ම ජලය පිරිමැස්මෙන් පරිහරණය කිරීමට උපදෙස් ලබා දෙන්න.
නිවසේ වතුර කරාමයක් ඇරී වතුර ගලනවා නම් එය වහන්නට උපදෙස් දෙන්න. එවිට ජලය අපතේ යෑම වෙනුවෙන් ඔවුන්ට හදවතෙන්ම හැඟීමක් ඇති වේ.
නිවසේ නාන කාමරයේ ස්නානය කරන අතර එම ජලය අනවශ්‍ය ලෙසින් ඉවතට යෑමට නොදෙන්න. සබන් ගාන තෙක් වතුර මල හෝ ජල කරාමය වසන්න.
ජලය ගබඩා කරන ටැංකියේ වතුර උතුරා යෑම ආසන්න වෙත්ම නැවතුම් කරාමය වසන ලෙස දරුවා දැණුවත් කරන්න.
නිතරම උතුරවා නිවා ගත් ජලය පානයට දරුවා දැණුවත් කළ යුතු අතර නිවසේ තේ පැන් වෙනුවෙන් උතුරවන ලද කේතලයේ ඉතිරි ජලය නැවත වාරයක් උතුරවනු වෙනුවට එම ජලය පානය වෙනුවෙන් වෙනම ඉවත් කොට තබන ලෙස දරුවා දැණුවත් කරන්න.
වැසි කාලයේදී ජලය ගබඩා කර ගෙන මල් සහ එළවළු පාත්ති වලට මෙන්ම රෙදි සෝදා ගැනීමට භාවිතා කළ හැකි බව කියා දෙන්න. වැසි ජලයෙන් රෙදි සේදූ විට එහි දීප්තිමත් පැහැයක්ද ලැබෙනවා.
ඒ වගේම මල් පැල සහ එළවළු පැල වෙනුවෙන් වතුර දමන විට මල්බාල්දියක් හෝ හෝස් පයිප්පයක් පාවිච්චි කිරීමට උපදෙස් දෙන්න. හෝස් පයිප්පයේ ජලය අපතේ නොයන සේ නිතරම ජල කරාමය ගැන අවධානයෙන් සිටින්නට දරුවා දැණුවත් කරන්න.රෙදි සෝදන මැෂිමට අවශ්‍ය තරම් රෙදි නොමැති නම් කෙසේ හෝ එහි ධාරිතාවට ගැලපෙන රෙදි සූදානම් කර ගැනීමට උපදෙස් දෙන්න. ගවුමක් , කමිසයක් වෙනුවෙන් මැෂිම ක්‍රියාත්මක කිරීම නිසා බොහෝ සෙයින් ජලය අපතේ යන බව දරුවාට තේරුම් කර දෙන්න.
