උසස් පෙළ …. ඉදිරියේ තීරණය දරුවන්ටයි

student_thinking_exam

සාමාන්‍ය ප්‍රතිඵල නිදහස් වෙන්නත් පෙරාතුවම දරුවන් යොමු වෙන්නේ අම්මා තාත්තාගේ ඉලක්ක සපුරා ගැනීමටයි. ඇත්තටම මේ අවස්ථාව දරුවන්ට නිදහසේ තීන්දු තීරණ ගැනීමට අවස්ථාව ලබා දිය යුතු කාලයක්.

බාල කාලයේදී දරුවාගෙන් අපි මේ වගේ ප්‍රශ්න අහනවා. පුතා ලොකු වුනාම මොනවද කරන්නේ….

දරුවා වෙනුවෙන් අපි හුරු කරන්නේ දොස්තර කෙනෙක් යන වචනය පමණයි. හය හතර නොතේරෙන දරුවා රැකියා ධුරාවලිය ගැන නොදැන හිටියත් අම්මා අප්පච්චිගේ මෙහෙයවීම නිසා  මං ලොකු වුනාම දොස්තර කෙනෙක් වෙනවා… කිව්වත් දැන් අනාගතය ගැන ඉතාම හොඳින් තීරණ ගත හැකි වයසක්. අපි දරුවාට ඉඩ දිය යුත්තේ ඔහුගේ හැකියාවටයි. පසුගිය අගෝස්තු මාසයේ උසස් පෙළ ප්‍රතිඵළ අනුව කලා අංශයේ දිවයිනේ මුල් තැන ලබා ගත් දියනියගේ පියා වෛද්‍ය වෘත්තියේ යෙදුනත් කිසිම දිනක මේ දියනිය වෙනුවෙන්  ඔවුන් බලපෑම් ඇති කළේ නැහැ. ගණිත අංශයෙන් මුල්තැනට පත් දියණිය මුල් කාලයේ ජීව විද්‍යා අංශයෙන් ඉගෙණුම ලබන අතරවාරයේ නැවත ගණිත අංශයට යොමු වුනා. ඒ අවස්ථාවේදී ඇගේ මව නම් මේ තීරණය වෙනුවෙන් සතුටු වුනේ නැහැ. ඒත් ඇය දියණියට බලපෑම් ඇති කළේ නැහැ. දිවයිනේ ගණිත අංශයෙන් තම දරුවා වාර්තා තැබූ දිනයේ මව කියා සිටියේ දියණියගේ තීරණය ගැන ඇය ඇත්තටම සතුටු වෙන්නේ අද දිනයේ බවයි.

ඉහත හැම අවස්ථාවකින්ම පෙනෙන්නේ දරුවන්ගේ අධ්‍යාපනයට අපි  ඔවුන්ගේ ස්වාධීන තිරණයන්ට ඉඩ ලබා දීම වැදගත් බවයි. පවුල් පරම්පරාවේ දොස්තරවරුන් , ඉංජිනේරුවන් කිසිම හිගයක් නැති බව ඇත්ත. ඒත් ඔබේ දරුවා වෙනම අයෙක්. දරුවාටම ආවේණික ස්වාධීනත්වයක් තිබෙනවා. හැකියාවක් තිබෙනවා. ඒ අනුව ඉදිරියට යන නිදහස ඔවුන්ට තිබීම අවශ්‍යයි.

බොහෝ මව්පියන්ගේ ආකල්පය වෙන්නේ විද්‍යාව හැර වෙනත් විෂය ධාරාවකින් ඉගෙණුම නොකලහොත් අනාගතයක් නැති බවයි. එහි කිසිම පදනමක් නැත. විද්‍යා විෂය ධාරාවෙන් ඉහලට යා හැකි බව ඇත්ත. ඒත් හදිසියේවත් මෙම විෂය ධාරාවෙන් අධ්‍යාපනය ලබන විට ඇති වෙන අසීරුතාවයන් නිසා විභාගය සමත්වීමේ අපහසුතාවයක් ඇති වුනොත් වැඩිදුර අධ්‍යාපනයට අවහිරතාවයක් ඇති වෙනවා. මේ නිසා තීරණ ගැනීමට දැන් කාලය එළැඹ ඇත.

දැන් දරුවන් උසස් පෙල වෙනුවෙන් පංති ආරම්භ කරන්නේ සාමාන්‍ය පෙළ අවසානවීමත් සමගයි. මාස හතරක පමණ කාලයක් දැන් ගෙවී ඇත. තමා උසස් අධ්‍යාපනය ලබන්නේ කුමන විෂය ධාරාවෙන්ද යන සංකල්පයක දරුවා පිහිටා ඇත. ප්‍රතිඵලයක් ගැන ලිඛිතව අතට ලැබෙන තෙක් විශ්වාස කිරීම අපහසුයි. මොනතරම් දක්ෂ දරුවෙක් වුනත් අදාල විභාග ශාලාවේදී ගෙවන කාලසීමාවේදී ඔහුගේ ප්‍රතිඵල ගැන තීරණය ලැබෙනවා. එවිට මානසිකව බිඳ වැටෙන්නට ඉඩ දිය යුතු නැහැ.

අනවශ්‍ය විදිහට දරුවා ලුහු බඳිමින් ඔබට අවශ්‍ය විෂය ධාරාව වෙනුවෙන් යොමු කිරීම නොකළ යුතුම දෙයක්. ප්‍රතිඵල ඉදිරියේ ගත යුතු තීරණය ගැන තේරුම් කර දීම වරදක් නැත. දැන් දරුවන්ට විශ්ව විද්‍යාල ප්‍රවේශය වෙනුවෙන් ඇති අත්පොත පරිශීලනය කොට තමාගේ අනාගත ඉලක්කය තෝරා ගත හැකියි. මීයක් කඩන්නේ අත ලෙව කන්න නොවෙයි කියන්නා සේ අනාගතය වෙනුවෙන් ඔබ වර්තමානය කැප කරන්නේත් වියදමක් දරන්නේත් අනාගතය සුරක්ෂිත කර ගැනීමේ අරමුණ වෙනුවෙන්ය. ඒ වෙනුවෙන් අද දවසේ ගනු ලබන තීරණය ඉතාම වැදගත් වේ.

1980 දශකයේ විද්‍යා විෂය ධාරාවට යොමු වීමේ ප්‍රවනතාවය බොහෝ සෙයින් අඩු වුනත් 2010 දශකයේ පටන් නැවතත් විද්‍යා විෂය ධාරාවට ඇති යොමු වීම ඉහලය. ඒ අතරම අසමත් ප්‍රතිශතයත් ඉහල යන ලකුණු දැන් දැන් ඉහල නගිමින් පවතී. ඒ අතරම කලා සහ වෙනත් තාක්ෂණ විෂය ධාරාවන්ගෙන් උසස් ප්‍රතිඵල ලබන සමවයසේ දරුවන් අධ්‍යාපනයෙන් සාර්ථකත්වයට පත් වෙන විට ඔබේ දරුවාගේ කනස්සල්ල තවත් වැඩි වේ.

කිසිම දෙයක් බැරුව හිටිය අය දැන් විශ්ව විද්‍යාලයේ…අපේ දරුවෝ ගෙදර…රස්සාවකුත් නැහැ..අපේ අවාසනාව තමා..මේ අන්දමට සිත් වේදනාවෙන් කතා බහ කරන මව්පියන් බොහෝ දෙනෙක් ඔබේ ඇසුරේදීත් මුණ ගැසෙන්නට ඇත.ඇතත්ටම වරද ඇත්තේ මෙතැනයි. අද ජීවිතය ජය ගෙන ඇති දරුවන් පහළ  පංතියේදී  පසුගාමී වුනත්  උසස් අධ්‍යාපනය ඉදිරියේ ඔවුන් තමන්ගේ හැකියාවට ගැලපෙන විෂය ධාරාවට යොමු වී ඇත. එතැන් පටන් ඔවුන් අලු ගසා නැගිට ඇත. ගොඩ සිටන් පීනනන්ට බැරි බව ඇත්ත වුනත් පීනන විට අසීරු නම් නැවත හැරීම වරදක් නැත

දරුවන්ට දැන් කාලය ඇත. යම් හෙයකින් ඔබ කරගෙන යන විෂය ධාරාව අපහසු නම් ගැලපෙන හෝ පහසු විෂයධාරාවක් මුලින්ම තෝරා ගන්න. බොහෝ දෙනා මේ වෙනුවෙන් සිතන්නේද අවසාන අදියරේදීය. එවිට කළ යුත්තක් නොමැත. තමාගේ හැකියාව ගැන දන්නේ තමන් පමණි. බාහිරව බලන අයෙකුට දක්ෂයෙකු ලෙසින් පෙනුනද ප්‍රායෝගිකව ඒ කටයුතු වලින් තෘප්තිමත් බවකින් කටයුතු කළ නොහැකි නම් අධ්‍යාපනය නීරස වෙනු ඇත.

දැන් ප්‍රතිඵල ඔබ ඉදිරියේ ඇත. ඉදිරියට යා යුතු බව ගැන නිදහසේ තීරණ ගැනීමට දරුවාට අවසර දෙන්න. අවශ්‍ය පහසුකම් සලසා දීම වෙනුවට බලපෑම් මගින් මව්පියන්ගේ අරමුණු වෙනුවෙන් දරුවා යොමු කිරීම නිසා ඇති වෙන ප්‍රතිඵල එතරම් සුබදායක නැත. අනවශ්‍ය විදිහට බලපෑම් කොට මව්පියන්ට අවශ්‍ය අන්දමින් විෂය ධාරා තෝරා ගත් දරුවන් යම් හෙයකින් එහිදී අසාර්ථක වුවහොත් ඔවුන් දොස් නගනවා පමණක් නොව මව්පියන්ට වෛර කිරීමට පවා තත්වය දුනු අතට හැරෙනු ඇත. මේ නිසා කරුණු කාරණා මේ යැයි තෝරා දීමෙන් පමණක් ඔබ නිහඩ වෙන්න. යා යුතු මග ඔවුන් ඉදිරියේ ඇත. පාර වැරදෙන විට තෝරා දීම මිස දුෂ්කර මාර්ගයට ඔවුන් යොමු කිරීම එතරම් ප්‍රඥාගෝචර නොවන්නේය.

අපි ඇත්තටම අද අවස්ථාව දිය යුත්තේ මතු රැකෙන ශිල්පය ඉගෙනගැනීමටය. එබැවින් දැන් කාලය එළැඹ ඇත. තීන්දුව දරුවන්ටය. කරුණු පෙන්වා දීම මව්පියන්ටය. ලබන ජයග්‍රහහණය දෙගොල්ලන්ටමය. ඉතාම බුද්ධිගෝචරව අනාගතය දකින මේ තීරණය දරුවාගේ ජිවිතයේ තීරනාත්මක සාධකයක් බව අමතක නොකරන්න.

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here