සංගීතය යනු විශ්ව භාෂාවකි. පර්යේෂකයන් පවසන ආකාරයට මිනිසකු මෙම විශ්ව භාෂාවට අත් පොත් තබන්නේ මවගේ ගර්භාෂයේ සිටමය. එම අත් දැකීම් ඔවුන් මෙළොවට බිහි වූ පසුවද අත්‍යවශ්‍යවේ. ළදරුවකුගේ ප්‍රථම ගායිකාව අම්මාය. දරුවන් නැලවීමට දරු නැලවිලි ගී ගායනා කිරීම තුලින් එහි රිද්මයත් මිහිරි බවත් හේතූ කොට ගෙන දරුවාට සුවදායක නින්දක සුව ලබා දෙන්නට එදා අපේ අම්මාවරුන්ට හැකි විය. එහෙත් වර්තමානයේ කාර්්‍යය බහුල අම්මාවරුන්ගේ මුවින් නැලවිලි ගී ගිලිහී ගොස් ඇත. මමද නූතන යුගයේ මවක් ලෙස මගේ කුළුදුල් පුතු නළවන්නට දැන හුන්නේ නැලවිලි ගී කිහිපයක් පමණි. ඒවා මෙසේය,
ඔන්න බබෝ ඇතින්නියා
ගල් අරඹේ සිටින්නියා
ගලින් ගලට පනින්නියා
බබුට බයේ දුවන්නියාපුතා මගේ හරි හපනා
දවසට කොළඹට යනවා
පවුම් තිහක් පඩි කනවා
ඉන් පවුමක් මට දෙනවාඋඹෙ අම්මත් ඉතා කළුයි
නුඹෙ අප්පත් ඉතා කළුයි
නුඹ නලවන මාත් කළුයි
නුඹ විතරයි තල එළළුයි
එදා ගැමි සමාජය තුලද කාන්තාවන් ඉතා කාර්ය බහුල විය. තම ගෙදර දොරේ ඉවුම් පිහුම් කටයුතු මෙන්ම හේනේ, කුඹුරේදී ස්වාමියාට සහය දීම මෙන්ම තමා දරුවන් රැක බලා ගැනීමද ඇය අතින් නොපිරිහෙලා සිදු විය. තම අත්දැකීම හා එදිනෙදා ජීවිතයේ සිදුවීම් අලලා සෙනෙහෙබර හැගුම් රිද්මයකට වදන් කොට තම බිළිදා නළවන්නට දරු නැළවිලි ගී ඇය ගයා ඇත. ඒවායේ වචනාර්ථයන් ළදරුවාට නොවැටහෙන නමුත් නාද රටාවේ ඇති මිහිරියාව ළදරුවා නළවන්නට සමත් විය. සත්තකින්ම ඔවුන්ගේ නිර්මාණශීලීත්වය කෙතරම් අපූරුද කිවහොත් එම දරු නැළවිලි ගී අදද අප සමාජය තුල නොනැසී පවතියි.
එහි සුන්දර රිද්මයක් හා පද ගැලපුමක් තිබුන නිසාම ම පුතු වෙන්නුවෙන් මගේම නැලවිලි ගීයක් මමද අත්හදා බැලීමි.
පුළුන් වළා රොදක් අරන්
මගේ පුතා සතපවමි
දුර අහසේ පා කරවා
දේදුන්නෙන් එතෙර වෙලා
සුරංගනා ලොවක් කරා මගේ පුතා ගෙනියනවා
සුරංගනාවන් ඇවිදින්
මගේ පුතා නළවාවී
ටිකිරි මුවින් කිරි සිනහා පපා
මගේ පුතා සැපට නිදී
හ්ම් හ්මිහු හ්ම් හ්ම් හ්මිහු හ්ම් හ්ම් හ්මිහු හ්ම් හ්ම් හ්මිහු හ්ම්
මවිසින්ම නිර්මාණය කර ගත් මේ නැළවිලි ගීයට පුතා තුල විශේෂ උනන්දුවක් පැවති බව ඔහුගේ හැසීරීමෙන් මා හැඳින ගතිමි.
අන්න පුතේ අවරගිරෙන් ඉර සඟවා
හඳ මාමා ඇවිදිල්ලා
ආකාසේම තරු විසි කර
කළුවර රෑ හැඩ කරලා
සුවඳ කරයි දසන්තයම
සමන් පිචිච, සේපාලික මල් පිපිලා
බකමූණන් මාවවුලන් අවදි වෙලා
ඔන්න ඉතින් නිදා ගන්න මගේ පුතේ
අද දවසත් නිමවීලා
මගේ නිර්මාණයට පුතු උනන්දු වූ නිසාවෙන්ම රාත්‍රිය විස්තර කරන්නට මා ඔහු වෙනුවෙන්ම මෙම පද ටිකද එකතු කොට කීවෙමි. වයස අවුරුදු පහක් පමණ වන තුරු ඔහුට නිදන්නට පෙර මගේ ස්ව නිර්මාණ අසන්නටම ඇවසිවිය.
දරු නැලවිලි ගී ගයන විට එදා අම්මාවරුන් තම දරුවා ගුණයහපත් දරුවකු වන්නට යෑයි නිරතුරු ප්‍රාර්ථනා කරමින් ඔවුන්ව ආරක්ෂා කර දෙන ලෙස දෙවියන්ගෙන් ඇයද සිටීම කවිවලට නගා ඇති අයුරු ඉතාමත් සුන්දරය.
මගේ පුතා නැලවෙන්නේ
නැලවි නැලවි නිදියන්නේ
තොටිල්ල තාලෙට යන්නේ
සැම දෙවියනි රැකදෙන්නේඋත්තම ගුණ ඇති වේවා
ලත් තැන වැඩ සෑදේවා
උවදුරු බයකුත් නේවා
රෑ සඳ නුඹ රැකදේවා
අනතුරුව මට අවැසි වූයේ පුතුට දේශාභිමානය දනවන නැලවිලි ගී ගයන්නටය. එයට මට උපකාරී වූයේ ඇස්.මහින්ද හිමියන් විසින් රචිත ජාතික තොටිල්ල හෙවත් දරු නැලවිල්ල කෘතියයි. ජාතික තොටිල්ල හෙවත් දරු නැවිල්ල කෘතියේ උන්වහන්සේගේ අරමුණ වී ඇත්තේ ළදරු වියේ සිටම ස්වකීය රට දැය ආගම පිළිබඳව දරුවන් තුල හැඟීමක් ඇති කරලීමයි. ඉතාමත් සරල බසින් ලියවී ඇති එම කෘතියේ මා බෙහෙවින්ම ප්‍රිය කල කවි කිහිපයකි මේ.
මුනි සිරිපා සිඹිමින්නේ
සමනොළ ගිරි පෙදෙසින්නේ
මඳ සුළඟයි මේ එන්නේ
මගේ පුතා නිදියෙන් නේලක්වැසියන් කෙරෙහි නැමී
අරහත් මහ මිහිඳු හිමී
පෙව්වෙ උතුම් සදහම් මී
පුත නුඹටත් පොවමි එ මීනිදහස මහ මුහුදක් වේ
එහි උල්පත පුත නුඹ වේ
ඒ බව සිහිකොට මෙලොවේ
යුතුකම ඉටු කළ යුතු වේසිංහල රන් කිරි කට ගා
මගෙ පුතු හෙට ලොකු වෙනවා
රට රකින්න රන් අසිපත
පුතුගෙ අතට මම දෙනවාජාතික රණ දෙරණ මතේ
ගැටී වැටී මළ මොහොතේ
සුන්දර සුරඹුන්ගෙ අතේ
නැළවෙන බව සිතනු පුතේ
ළදරුවන්ට නැලවිලි ගී ගායනා කිරීම තුලින් දරුවන්ට සුව නින්දක් ලබා දීම හා ළදරුවන් නළවා ගැනීම හැරෙන්නට එම ශබ්ද රසය දරුවාගේ විඥානයට ඇතුලුවීම තුලින් දරුවා රිද්මය උගනී. පෙර දැක්වූවා සේම කුස තුල සිටින ළදරුවා තමන්ගේම චලන තුලින් මෙන්ම මෙළොවට බිහි වූ පසු මවගෙන් කිරි උරා බොන්නේද තම ශරීරය චලනය කරන්නේද රිද්මයානූකූලවය. ඒ සෑම රිද්මයකම සංගීතයක් ඇතියි මා විශ්වාස කරමි. දරුවාකුගේ සවන් දීමේ කුසලතාවයේ ළදරු වියෙහිදීම වර්ධනය කළ හැකිය. ඒ සඳහා දරුවා තුල සවන් දීමේ හුරුව ඇති කළ යුතුය. එහි මුලීක අඩිතාලම මවගේ දරු නැලවිලි ගී තුලින් ලැබේ. හොඳ සවන් දෙන්නෙක් හොඳ ධාරණය සහිත තැනැත්තෙකි. එනම් ඔබේ දරුවා කුඩා අවදියේ සිටම හොඳින් සවන් දෙන්නෙකු වූ විට දරුවා අධ්‍යාපන කටයුතු කරන විට හොඳින් ධාරණය කරගැනීම තුලින් ඔබට දක්ෂයකු බිහි කරගත හැකිය. දරු නැලවිලි ගී තුලින් දරුවාගේ ශබ්ද කෝෂයට නව වචන හඳුන්වා දීමක්ද සිදුවේ. පර්යේෂණවලින් අනාවරණය වී ඇත්තේ, සංගීතය ශ්‍රවණය තුලින් ළමා මනස දියුණු වන බවයි. එය, දරුවාගේ මනසට සුවයක් සහ බුද්ධි වර්ධනයට මනා පිටිවහලක් බව ඔවුන්ගේ මතයයි.
එසේම බොහෝ විට දරුවා නැලවිලි ගී ශ්‍රවණය කරනු ලබන්නේ මවගේ උණුසුම ලබන නුදුරින්ය. ඒතුලින් දරුවාත් මවත් අතර ඇති සබඳතාවය ශක්තිමත්වේ. මවගේ ආදරය රැකවරණය සමගම දරුවාට තම සුරක්ෂිතබාවය පිළිබඳ සැකයක් ඇති නොවේ. ඔබේ දරුවා වැඩිහිටියකු වූ කල ජීවිතයෙහි සෞන්දර්යාත්මක ඉසව්වක සැරිසරන්නට ජීවිතය විඳින්නට ළදරු වියෙහි ඔවුන් ශ්‍රවණය කරන දරු නැලවිලි ගී බෙහෙව්න්ද ඉවහල්වේ. මොහොතක් ඔබේ ආදරණීය දරු පැටියා වෙනුවෙන් කාලය මිඩංගු කරන්න. දවසට එකවරක් හෝ ඔබේ ආදරණීය හැඟුමන් මුසු කොට ඔබේම හඬින් දරු නැලවිලි ගීයක් කිරි කැටියා වෙනුවෙන් ගයන්න. එයින් ඔවුන් විඳින රසාස්වාදය තුලින් ඔවුන්ගේ අනාගතය පැහැබර වනු ඇත.
