මාතෘ නිවාඩු

maternity-leave

මාතෘත්වය යනු මෙළොව ඇති උතුම්ම පදවියයි. දරුවකු කුස පිළිසිඳ ගත් දා සිට අනේක විධ ශාරීරික හා මානසික වෙනස්කම් දරාගනිමින් මෙලොවට නීරෝගී දරුවකු දායාද කිරීම සෑම මවකගේම පැතුමය. නූතන සමාජය තුල රැකියා කේෂත්‍රය තුල කාන්තාවගේ භූමිකාව ක්‍රමයෙන් පුළුල්ව ඇත. දරුවන් ලැබුන පසුද තම රැකියාව කිරීම සාමාන්‍ය තත්ත්වයකි. එනිසාවෙන්ම  රැකියා වල නියුතු මව්වරුන් උදෙසා රජය විසින් නොයෙකුත් අණපනත් හඳුන්වා දී ඇත. මෙම අණපනත් පිළිබඳ ඔබ අවබෝධයෙන් සිටීම වැදගත්ය. එනිසාවෙන්ම ඔබටත් ඔබේ දරුවා වෙනුවෙනුත් මෙම අණපනත් හරහා ලැබෙන් ප්‍රතිලාභ පිළිබඳව අප ඔබ දැනුවත් කරන්නෙමු.

සජීවී දරු ප්‍රසූතීන් සඳහා නිවාඩු

පළමු හා දෙවන සජීවී දරු ප්‍රසූතීන් සඳහා වැටුප් සහිතව මාතෘ නිවාඩු දින 84 ක් එනම් සති 12ක් සම්මත කොට ඇත. මෙම නිවාඩු දින 84 හිමිවන්නේ වැඩ නොකරන දින, පෝය නිවාඩු සහ ව්‍යවස්ථාපිත නිවාඩු දිනයන් හැරය. මෙම සති 12න් සති 2 ක් දරු ප්‍රසූතිය සිදුවන දිනයද ඇතුළුව දරු ප්‍රසූතියට පෙර ලබා ගත හැකි අතර ඉතිරි සති 10 දරු ප්‍රසූතිය සිදු වූ දිනයෙන් පසු ලබා  ගත හැකිවේ.

මළදරු උපතකදී හෝ කළල රූපයක් බිහි වූ විට

මෙබඳු දරු ප්‍රසූතියක් සිදුවූ අවස්ථාවක ඇයට හිමි වන්නේ දින 42ක ප්‍රසූතිකාධාර නිවාඩුවක් පමණයි. මෙම කාලය ද ගණනය කරන්නේ ඉහත සඳහන් දින ගණනය කල පරිද්දෙන් සියලූම නිවාඩු දිනයන් ඉවත්වන ලෙසයි.

ආයනයේ ස්ථිර තාවකාලික සහ අභ්‍යාසලාභීන් වෙතද මෙම නිවාඩු හිමිවේ. රාජ්‍ය අංශයේ නියුතු  මවකට ඉහත දින අවසන් වූ පසුව අඩ වැටුප් සහිතව දින 84ද වැටුප් රහිතව තවත් දින 84ද ලබා ගත හැකිය. එහිදි දින ගණනය කරනු ලබන්නේ සියලු නිවාඩු දිනයන්ද ඇතුලත්වය.

මාතෘ ප්‍රතිලාභ ආඥා පනත අනුව දරුවාට වයස අවුරුදු 1 ක් වන තුරු වැඩ කරන දිනයක පැය 9 ක කාල පරිච්ඡේදයක් තුළදි අවම වශයෙන් විනාඩි 30 ක් බැගින් කාල පරිච්ඡේද 2ක් කිරි දීම සඳහා ලබා දෙනු ලැබේ.දරුවන්ට කිරි දීම සඳහා අවශ්‍ය පහසුකම් සේවා යෝජකයා විසින් සේවිකාවන් හට ලබා දිය යුතු වේ. සේවායෝජකයා විසින් ඒ සඳහා සුදුසු ස්ථානයක් සපයා දිය යුතුය. ආහාර හෝ විවේකගැනීම සඳහා ලබා දෙනු ලබන විරාම කාලයට අමතරව කිරි විවේක කාලය ලබා දිය යුතු අතර එම කාලය, සේවය කළ කාලයන් ලෙස සලකනු ලැබේ.

අණපනත් වලින් ලැබෙන වෙනත් සහන

  • ගැබිණි බව හේතු කොටගෙන ලබා ගන්නා ප්‍රසූතිකාධාර නිවාඩු කාලය තුලදී සේවයට නොපැමිණීම හෝ වෙනත් කිසිඳු කරුණක් මත සේවායෝජකයා විසින් එම සේවිකාවට සේවයෙන් පහ කිරීමේ නිවේදනයක් දීමද කල නොහැක්කකි.
  • තමන් ගර්භණියක් බව සේවායෝජකයා වෙත දැන්වූ විට, දරු ප්‍රසූතියකට මාස 3 කට පෙර ඇයට හෝ ඇයගේ දරුවාට හානි සිදු විය හැකි ආකාරයේ කිසිදු ක්‍රියාවක ඇයව යෙදවීම තහනම් වන අතර දරු ප්‍රසුතියෙන් මාස 3ක් ගත වන තුරු ඇයව හානිදායක කාර්යයන් වල යෙදවීමද කල නොහැකිය.
  • ප්‍රසූතිය හෝ දරුවෙකු පිළිසිද ගැනීම නිසා ඇතිවන රෝගී තත්වයක් නිසා සේවයෙන් පහ කිරීම තහනම් වේ. එසේම ප්‍රසූත නිවාඩු සිටින කාලය තුලදී සේවයෙන් පහකිරීම සම්බන්ධයෙන් දැන්වීම තහනම්වේ.

මෙම ප්‍රතිලාභ  සියල්ල හිමිවන්නේ මාතෘ ප්‍රතිලාභ ආඥා පනත හා සාප්පු හා කාර්යාල සේවක පනත යටතේය.

මා දෙහිවල උසස් තාක්ෂණ ආයතනයේ උසස් ජාතික ගණකාධිකරණය ඩිප්ලෝමා පාඨමාලාව (ව්‍යපාර වාණිජවේදී උපාධියට සමානය) සහ ශ්‍රී ජයවර්ධනපුර විශ්ව විද්‍යාලයේ ව්‍යපාර පරිපාලන උපාධිය හදාරා වසර නමයක කාලයක් සහකාර ගණකාධිකාරිණියක් වශයෙන් වෘත්තීමය නියැලුනෙමි. උසස් පෙළ හා උසස් අධ්‍යපනයෙන් පසුව වෘත්තිමය වශයෙනුත් මා ගණුදෙනු කලේ ගිණුම් වල හර බැර අතර වුවද සංසාර පුරුද්දට මා ලද ප්‍රාග්ධනයක් ලෙස යමක් සුන්දරව දැකීමටත් ,සිතීමටත් ඒ සිතුවිලි අකුරු වලට පෙරලන්නටත් හැකියාව මා සතුවිය. කාන්තාවකට මෙලොව දිනිය හැකි ඉහළම කිරුළට උරුමකම් කියන මා පුතුන් දෙදෙනෙකුගේම අම්මාය. විශ්වයේම ඇති සොඳුරුතම ස්ථානය නිවහනය. එහි සාමය සතුට සෞභාග්‍යය රැඳවිය යුත්තේ අම්මාය. එනිසාවෙන්ම මගේ පුංචි පැටවුන්ගේ රැකවරණය වෙනුවෙන් මා වෘත්තියෙන් සමුගත්තෙමි. මුළුගැන්වී තිබූ ලිවීමේ හැකියාවට පන්නරය ලැබුණේ ඉන් පසුවය. අම්මා පුවත් පතෙහි විශේෂාංග ලේඛිකාවක වශයෙන් ලේඛණ කලාවට පිවිසි මා ලේඛණ කලාවෙන් ඉදිරියට යන්නට අපේක්ෂා කරමි.

LEAVE A REPLY

Please enter your comment!
Please enter your name here