ඔබේ දරුවා කුඩා කාලයේම පොත් කියවීමට හුරුකරන අයුරු

mother-reading-with-child
පොත් කියවන චූටි දඟයෙක් නුඹටත් ඉන්නවාද ……..?

මාතෘකාව දුටු සැනින් මුවගට සිනහා නැගුණේ නුබේ දඟයා මතක් වීද? ඇතැම් විට පොත් මග හරිනා චූටි පැටියා නිසා ඔබ විඩාපත් වෙලාද? මගේ බොහෝ යෙහෙළියන්ගේ මැසවිල්ලද පොත් නොබලනා දරුවන් ගැන වේ.

කුඩා විශිෂ්ට කියවන්නකු, නුඹට අවැසි නම් පහත කරුණු අනුගමනය කල හැක.

  1. දරුවාගේ කුඩා වයසට ගැලපෙන පොත්පත් ලබාදෙන්න.
  2. – කුඩාම අවදියේදී කලු සුදු රූප අඩංගු සැන පත් (flash cards) හා පොත්
    – Board books, Waterproof books, වර්ණවත් රූප අඩංගු පොත්
    – විවිධ සංගීත, ශබ්ද, අඩංගු පොත්
    – විවිධ රෙදි වර්ග හා කඩදාසි අලවා අලංකාර කල පොත්
    – විවිධ ක්‍රියාකාරකම් ඇතුලත් වූ පොත්

    මෙමගින් දරුවා තුල පොත් කියවීමට ආශාවක් ඇති කළ හැකිය. පොත් කියැවීම දරුවාගේ පලමු මාසයේ සිටම අරඹන්න.

  1. දරුවාට පොත් බැලීමට, පිටු පෙරලීමට අවස්ථාවක් ලබා දෙන්න. එමඟින් ඔහු තුල ආත්ම විශ්වාසය ගොඩ නැගේ, පොතපතට නැඹුරු වේ.
  1. දරුවාගේ කාමරයේ ඔහුගේ උසට සරිලන පොත් රාක්කයක් තබා එහි ළමා පොත් තබන්න. සිත් ඇද ගන්නා පුටුවක්, ඡායාරූපයක් එහි ප්‍රියජනක බව වැඩි කරාවී. ඉවතලන පෙට්ටි, ලී ආධාරයෙන් පහසුවෙන් මෙය සාදා ගත හැකිය. එසේම ඔහු කැමති පොතක් තෝරා ගැනීමටත් ඔබ ලබා දෙන පොත කියවීමටත් දරුවා යොමුකල හැකිය.
  1. දවසේ නිශ්චිත වේලාවක එහි රැඳී සිටීමටත් දරුවා සමඟ එක්වී පොත් බැලීමටත් ඔබේ කාලය වෙන් කර ගන්න. පොත් කියවීම අතරතුර දරුවාගේ හිස අත ගෑම, සිප ගැනීම තුලින් දරුවාට සුන්දර කාලයක් ලබාදීමට උත්සහ කරන්න.
  1. පොතේ ඇති චරිත රඟ දැක්වීම, කවි සින්දු ගායනය, කටහඩ වෙනස්කිරීම් ආදියෙන් දරුවාගේ පූර්ණ අවධානය ඔබ වෙත ලබා ගත හැක. මෙවැනි ක්‍රියාකාරකම් තුළින් දරුවා පොත් කෙරෙහි නැඹුරුවක්  පෙන්වයි.
  1. ඔබේ දරුවාගේ රුචිකත්වයට අදාළ පොතපත මිලදී ගැනීමෙන්ද, දරුවා පොත් වලට ලැදි කළහැක.
    – දරුවා සතුන්ට කැමති නම් එවැනි රූප ඇතුලත් පොත්
    – වාහනවලට කැමති නම් එවැනි රූප ඇතුලත් පොත්
  1. කුඩා දරුවන් නිතරම වැඩිහිටියන් අනුකරණය කිරීමට උත්සාහ කරන බැවින් ඔබද අවස්ථාවක් ලද විට පොත් බැලීමට උනන්දු වන්න. නිතරම ඔබේ අතේ ඇත්තේ ජංගම දුරකතනය නම් දරුවාට අවශ්‍ය වන්නේද එයයි. පොතපතට නිවසේ වැදගත් සථානයක්  ලබා දීම තුලින් දරුවා නිරායාසයෙන් ඒ කෙරෙහි නැඹුරු වේ.
  1. පොත් කියවීමට හෝ එවැනි ක්‍රියාකාරකමකට කිසිවිටක දරුවාට බලපෑම් නොකරන්න. ඔහු ඒ සඳහා පොලබවා ගැනීම ඔබගේ ඉවසිලිවන්තබව හා ධනාත්මක චර්යාව මත රඳා පවතී.
  1. දරුවා කිසියම් දෙයකට මුරණ්ඩු වී සිටිනා විට දඬුවමක් ලෙස පොත්පත් සමඟ තනි නොකරන්න. එවිට දරුවා පොත් වලට ආදරේ නොකරාවී.ඔහු ප්‍රීතියෙන් සිටිනා විට පොත් බැලීම ප්‍රියජනක  අවස්ථාවක්  කරගන්න.
  1. දරුවා පොත් ඉරා දැමීම කලහොත් එයට දඬුවම් කිරීම නොව ඔබ ඒ පිලිබඳව කනගාටුවන බව පවසන්න.

    “ඔයා වගේ හොඳ ළමයෙක් මේ පොත ඉරුවම මට ගොඩාක් දුක හිතුණා… , ඔයා පොතට ආදරේ කරනවනම් මං හරි කැමතියි…”

    දරුවාට ඇති ආදරය නොවෙනස්ව තබාගෙන වරද තේරුම් කිරීමෙන් ඔබ නොසිතූ හොඳ ප්‍රතිපලයක් ලැබෙනු ඇත. එසේම ඉරුනු පොත් ඇලවීම සඳහා ඔහුගේ සහය ලබාගන්න. එය අමාරු කාර්යක් බවත් හැගීමට ඉඩ දෙන්න.

    දිගින් දිගටම පොත් ඉරීම සිදු කරනා විට පොත් ඉවත් කර හැඩුවත් නැවත ලබා නොදෙන්න. ඔහුටම වැරැද්ද අවබෝධ කර ගැනීමට ඉඩ දෙන්න. පොත් ඉරා දැමීම පොඩි දරුවන් කරන ක්‍රියාවක් බව සාධාරනීකරනය නොකරන්න. නිසි වයසට ගැලපෙන පොත් ලබා දීම තුලින් එය මගහරවාගත  හැක. කුඩා කල සිටම පොත පත කෙරෙහි ගෞරවයක් ගොඩ නැගිය යුතුය.

බොහෝ දෙමව්පියන් දරුවන්ට ඉතා මිල අධික සෙල්ලම් බඩු ලබා දී ලාබ පොත්  ගෙනවිත් දෙනු මා අත් දැක   ඇත. නමුත් කුඩා අවදියේදී පොත් සමඟ මනා සබඳතාවයක් පෙන්වන දරුවන් තුල කියවීම පිලිබඳ යහපත් හැඟීම් ජනිත වේ.  එමගින් දරුවා වර්ධනය වීමේදී කියවීම පුරුද්දක් බවට පත් වෙයි.

ඉතින් ඔබගේ දරුවාට වටිනා පොත් කට්ටලයක් තෑගි දීමටත් ඔබගේ කාලයෙන් මදවේලාවක් දීමටත් මැලි නොවන්න….

පේරාදෙණිය විශ්ව විද්‍යාලයේ විද්‍යා වේදී ගෞරව උපාධිධාරිනියක හා මානව සම්පත් කළමණකරණය පිලිබද වෘත්තීය සුදුසුකම් ලාභිනියක වන මා වෘත්තීයෙන් මානව සම්පත් කලමණාකාරවරියකි. අර්ධකාලීනව සේවයේ යෙදෙන මාගේ කාලය වැඩි වශයෙන් යොදවනු ලබන්නේ මාගේ දියණිය වෙනුවෙනි. මවක් ලෙස මුහුණු පෑමට සිදුවන අනේක විද අභියෝග සාර්ථකව ජය ගැනීමත් එම දැනුම බෙදා ගැනීමත් මගේ අරමුණයි.

LEAVE A REPLY

Please enter your comment!
Please enter your name here