ගැහැණියක් විදියට ඔයා ගැන කොහොමද හිතාගෙන ඉන්නෙ? දුර්වලයි කියලද? බොළඳ යි කියල ද? එහෙමත් නැත්තම් ජීවිත් වෙන්නෙ ලොකු කළකිරීමකින්ද?
එහෙනම් මේ කතාකරන්නෙ ඔයාටමයි. අලුත් වෙන්න, වෙනස් විදියට හිතන්න, සරල වෙන්න , සතුටින් ජීවිතේ ගෙවන්න මේ ලිපිය උපකාරී වුණොත් ඒක තමයි මේ ලිපියෙන් මම බලාපොරොත්තු වෙන දේ.
ඔයා කියන්නෙ කව්ද?
ගෙදර වැඩයි, බබාලගෙ වැඩයි, හස්බන්ඩ් ගෙ වැඩයි, ඔෆිස් වැඩයි කර කර ජීවිතේ කළකිරීමෙන් මිරිකිලා ඉන්න කෙන්කද?
එහෙමත් නැත්තම් උග්‍ර නැන්දම්මා ලේලි හබයකට මැදිහත් වෙලා විදවන කෙනෙක්ද?
එහෙමත් නැත්තම් ඔයා බලාපොරොත්තු වෙන ආදරය, රැකවරණය, අගය කිරීම ඔයාගෙ හස්බන්ඩ් ගෙන් ලැබෙන්නෙ ගොඩක් අඩුවෙන්ද?
එහෙමත් නැත්තම් තමන්ගෙ කියල හිතින් අල්ලගෙන ඉන්න ඒත් ඔයා බලාපොරොත්තු වෙන මට්ටමටම ඔයා ගැන හොයල බලන, ඔයාට කතාකරන සහෝදර සහෝදරියන් නෑදෑයන් නැති කෙනෙක්ද?
බොහෝ දෙනෙකුට මෙයින් එකක් හෝ කීපයක් තමන්ගෙ ජීවිතයට සමීප ගැටලුවක් වෙලා ඇති.
ඔයා දන්නවද අපි පිලිගන්න කොයි තරම් අකමැති වුණත් ඔයාගෙ හිතේ තියන ඔය කළකිරීම නැතිකරන්න ඔය කළකිරීමට හේතු පාදක වුණ කරුණු වලටවත්, ඒවට මුල් වුණ අයටවත් පුලුවන් කමක් නෑ කියන එක තමයි ඇත්ත. ඒකට හේතුව එයාලගෙ දෝෂයක් වත් ඔයාගෙ දෝෂයක් වත් නෙවෙයි. කළකිරීමේ විදවීමේ ප්‍රමාණය තීරණය වෙන්නෙ ඔයා ඒක අල්ලගන්න විදිය අනුවමයි.
ටිකක් වෙනස් විදියට හිතන්න පුරුදු වුණොත් ඔයාට සතුටින් සැහැල්ලුවෙන් ඉන්න ලබෙනවාමයි. ඔයා හිතන්න ඔයාගෙ සතුට නිර්මාණය කරන්න පුලුවන් ඔයාටමයි. ඒක කරන හැටි තීරණය කරන්නත් ඕන ඔයාමයි.
හිතන්න ඕන එකම දේ මේ ලෝකෙ කිසිම කෙනෙක් වත්, දෙයක්වත් අපි කැමති විදියට වෙනස් වෙන්නෙ නෑ, අපියි වෙනස් වෙන්න ඕන.
මේ උදාහරණ එකින් එක කියවල ඒක ඔයාගෙ ජීවිතේට ගලපගන්න. බලන්න මේ විදියට එක සතියක් හිතල. කොයිතරම් සැහැල්ලුවක් ඔයාගෙ හිතට දැනෙනවද කියල.
හිතින් දුක් විද විද එක එක්කෙනාට චෝදනා කරන එක පොඩ්ඩකට නවත්තන්නකෝ.
මුලින්ම සතුටින් ඉන්න මාර්ග හොයාගනිමු.
ඔයා ඔෆිස් ගිහින් බබා නිසා අමාරුවෙන් හිත හදාගෙන ගෙදර නැවතුන කෙනෙක් නම් මේ විඩියට දුක හිතෙනව වෙන්න පුලුවන්.
“හස්බන්ඩ් වෙනද වගේ ආදරේ නෑ වගේ දැනෙන්න පුලුවන්”
“නිකන් කුස්සි අම්මෙක් වුණා වගේ හැගීමක් දැනෙන්න පුලුවන්”
“ඉගෙන ගත්ත සේරම වතුරෙ ගියා වගේ හිතෙන්න පුලුවන්”
“මිනිස්සු කවරුත් වෙනද වගේ ගනන් ගන්නෙ නෑ වගේ හිතෙන්න පුලුවන්”
උදේ ඉදන් රෑ වෙනකන් මේකම හිත හිත ඔහේ දුක් වෙනවනම් කවදාවත් සතුට නම් ලං කරගන්න වෙන්නෙ නෑ.
කුස්සි අම්ම කෙනෙක් වෙනවද එහෙම නැත්තම් සාම්ප්‍රදායික 8-5 රැකියාවෙන් ඉවත් වුණ එක විතරයි ජීවිතේ වුණ වෙනස කියල කියන්න පුලුවන් වටිනාකමක් සහිත මවක් වෙනවද කියන එක තීරණය කරන්න පුලුවන් ඔයාටම විතරයි.
රස්සාවෙන් අයින් වුණා කියල කවුරු හරි ඔයාට කිව්වද උදේ ඉදන් රෑ වෙනකන් වැරහැලි දැලි රෙද්දක් ඇදගෙන, නොකා නොබී, කුණු ගාගෙන, හොටු පෙරාගෙන ඉන්න කියල නෑ නේද?
ගෙදර ඉන්නව කියල ඔහේ මොකක් හරි කර කර ෆෝන් එක ඔබ ඔබ, බබා එක්ක දවසම ඇදට වෙලා නිදියගෙන, ජීවිතේ කම්මැලිකම වගා කරන්න කියල කවුරු හරි කිව්වද? නෑ නේද?
හම්බකරන්නෙ හස්බන්ඩ් විතරයි ඒ හින්ද වෙනද වගේ ලස්සනට අදින්න කරන්න බෑ කියල හේතු හදාගත්තෙ ඔයාමයි නෙද? පිරිසිදුව ලස්සනට ඉන්න අලුත් ඇදුම්, මේක් අප් නැතුවට තියන එකක් හරි ලස්ස්නට ඇදල, ඔලුව පීරල මනුස්සයෙක් වගේ ඉන්න පුලුවන් නේද කියල අමතක කලේ ඔයාමයි නේද?
ගෙදර තියන දේවල් අරපිරිමැස්මෙන් පාවිච්චි කරල, අලුත් අලුත් ලෝකෙ සල්ලි ඉතුරු කරන්න මොනවද කරන්න පුලුවන් කියල හොයල බලල, සල්ලි හම්බනොකෙරුවත් සල්ලි පරෙස්සමට පාවිච්චි කරලත් හස්බන්ඩ් හම්බකරන එක නාස්ති නොකර ඉන්න පුලුවන් නේද කියලත් අමතක කලේ ඔයාමයි නේද?
තමන්ගේ ම අම්මගෙන් බලාපොරොත්තු වෙනව වගේම සමාන ආදරයක් ලේ නෑ කමක් වත් නැති පිටස්තර නැන්දම්මා කෙනෙක්ගෙන් බලාපොරොත්තු වෙලා හිත රිද්වගන්න තරම් බොලද වුණේ ඔයාමයි නේද?
පොඩි පොඩි අතපසුවීම්, අමාරුකම්, හිත් රිදවීම් වුණත් ලෝකෙ ඉන්න දාහක් අතරින් තමන්වම කසාද බැදගත්ත හිතේ ඔයා ගැන කොයිතරම් ආදරයක් ඇතිද?, ඇයි මම මේ බොළඳ දේවල් පස්සෙ පන්නන්නෙ කියල හිතන්න බැරිවුණේ ඔයාටමයි නේද?
කාලසටහනකට, ඉලක්කයකට, සකසුරුවමින්, කඩිසරකමින් වැඩ කරල දවසේ වැඩ ටික එපා නොවෙන්න, පටලවාගන්නෙ නැතුව කරන්න බැරි නෑ නේද කියල හිතුනෙ නැත්තෙ ඔයාටමයි නේද?
අවශ්‍ය දේට කතාකරල,හොයල බලල, අනවශ්‍ය දේවල් කතා නොකර පාඩුවෙ තම්න්ගෙ දෙයක් කරගෙන හිටියනම් ඔය පවුල් ආරවුල් නෑදෑයන්ගෙ සහෝදර සහෝදරියන්ගෙ එක්ක තියන ගැටුම් ගොඩාක් අඩු කරගන්න පුලුවන්කම තිබුණ නේද කියල මතක් නොවුනෙ ඔයාටමයි නේද?
හිතින් හිත හිතා දුක හපයක් කරගෙන ඒකම හප හප රසවිදින එකට වඩා තමන් ආස විනෝදාංශයක් කරල, එහෙමත් නැත්තම් තමන් රස්සාව කරන් තැන පාඩුවෙ රස්සාව කරල, ගෙදර ඉන්නව නම් ගෙවල් දොරවල් ලස්සනට තියාගෙන, තැන් තැන් වල ඕප දූප කතාකරන කාලෙ ගෙදර ඉදන් හරි දෙයක් කරල සල්ලි කීයක් හරි හොයාගන්න පුලුවන් නේද කියල මතක් නොවුනෙ ඔයාටමයි නේද?
දකින දකින බඩුව, ප්ලාස්ටික් කෑල්ල, ඇදුම, මෙකී නොකී සියලු දේම අස්සක් මුල්ලක් නෑර ගොඩගහගෙන ගේ අපායක් කරගෙන කොච්චර අස් කලත් ඔච්චරයි කිය කිය, මූණ ත් එල්ලගෙන, ගෙදර මිනිස්සුන්ටත් බැන බැන ඉන්න වෙලේ ඇත්තටම තමන්ට ජීවත් වෙන්න , අදින්න පළදින්න, උයන්න පිහන්න, ඕන මොනවද කියල හිතල අත්‍යාවශ්‍යම දේවල් ටික විතරක් පාවිච්චි කරල සරල ජීවිතයක් ගත කළානම් ගේ අපායක් වෙන්නෙ නෑ නේද කියල හිතන්න බැරි උනේ ඔයාටමයි නේද?
මෙන්න මේ දේවල් ටික හිතල, කල්පනා කරල අද ඉදන් වෙනස් වෙන්න. අලුත් වෙන්න.
කුස්සි අම්මෙක් වගේ මොට නොවී ලෝකෙත් එක්ක හැප්පිලා, ඔප වැටිල ඉස්සරහටම යන යකඩ ගැහැණියක් වෙන්න. ඔයාටම අභියෝග දෙන්න. ඔයාගෙ සතුට ඔයාම හොයාගන්න. සතුටින් ඉන්න මේ ටික කරල බලන්න.
ඒ දැනෙන වෙනස අත්විඳින්න.
