අපේ ළමයි පරිප්පු කන්නේම නැහැ…

dall-curry

“අපේ ළමයි පරිප්පු තිබ්බොත් බත් පිගාන දිහා බලන්නෙත් නැහැ. ඔව් ඉතින් හැම එකටම පරිප්පුනේ අපි හදන්නේ…”

ඇත්තටම පරිප්පු අපේ ආහාර රටාව තුළ නැතුවම බැරි තැනට පත්ව තිබෙන්නේ විවිධ හේතුන් නිසා. පරිප්පු ඕනෑම ආහාරයක් සමග ගැලපෙනවා. කොටින්ම කිව්වොත් පාන්, බත්, ඉදිආප්ප, රොටී වැනි ඕනෑම ආහාරයක් සමග පරිප්පු ගැලපෙනවා. ඒ වගේම පිළියෙල කර ගන්නත් පහසුයි. වියදම පැත්තෙන් බැලුවත් බොහොම සාධාරණ මුදලකින් ආහාර වේලක් සම්පූර්ණ කර ගන්න පුලුවන්.මේ හැම දෙයටම වඩා පරිප්පු වලඇතිපෝෂණ ගුණය ගැන ඔබ සමහර විට නොදන්නවා වෙන්න පුලුවන්.

පරිප්පු රනිල කුලයට අයත් අතර “lens esculenta” යන උද්භිද විද්‍යාත්මක නාමයෙන් හදුන්වනවා. මෙහි ඉතිහාසය දිගු අතීතයකට හිමිකම් කියන අතර චරක සංහිතාව වැනි වේද ග්‍රන්ථයන්හි පවා පරිප්පු ගැන සදහන් වෙනවා.මයිසූරයේ ද්‍රවිඩ වෙළෙන්දන් විසින්ලංකාවට එවන ලද රතු පරිප්පු විශේෂය අපි “මයිසූර්” යනුවෙන් හැදින්වුවත් එහි නියම උච්චාරනය “මසූර්” ලෙසින් වෙනස් විය යුතුයි.

කිරට, මිරිසට, සුදට වගේම මැල්ලුමක් විදිහට පවුලේ අයගේ රුචි අරුචිය අනුව පරිප්පු පිලියෙල කර ගන්න අම්මාට නිදහස තිබෙනවා. කුඩා දරුවන්ට පිළියෙල කරන විට මිරිස් නොදමා අමුමිරිස්, කහ, කරපිංචා සහ තුනපහ යොදා ගෙන කිරට පිසගගන්න පුලුවන්.පතෝල, නිවිති, සාරණ සහ කොහිල දලු වැනි එළවලු සමග සංයෝගයක් විදිහටත් පරිප්පු යොදා ගන්න පුලුවනි. සුප් පිලියෙල කරන විට පරිප්පු එක් කර ගැනීමෙන් රසය වගේම ගුණය ඉහලින්ම ලබා ගත හැකියි.

පරිප්පු ග්‍රෑම් 100 ක පෝෂණය

පෝෂණය ප්‍රතිශතය
ශක්තිය ග්‍රෑම් 343
තෙතමනය ග්‍රෑම් 12.4
මේදය ග්‍රෑම් 0.7
කාබොහයිඩ්රේට ග්‍රෑම් 59.0
ඛණිජ මිලිග්‍රෑම් 4.8
කෙදි මිලිග්‍රෑම් 1
කැල්සියම් මිලිග්‍රෑම් 69
පොස්පරස් මිලිග්‍රෑම් 295
කැරොටින් මයික්‍රොග්‍රෑම් 275
තයමින් මයික්‍රොග්‍රෑම් 450
රිබොක්පැක්ස් මයික්‍රොග්‍රෑම් 200
නයසින් මිලිග්‍රෑම් 2.6

මීට අමතරව කහ පැහැයෙන් යුක්ත තෝර පරිප්පු විශේෂය නිවර්තන හා උපනිවර්තන කලාපයන්හි වගා වෙනවා. රතු පරිප්පු ඉක්මනින් තැම්බුනත් තෝර පරිප්පු තම්බා ගැනීමට කාලය ගත වෙන නිසා පිසින්නට පෙරාතුව තෝර පරිප්පු පොගවා ගන්නවා.ඒත් පීඩන උදුනක ඉතාම පහසුවෙන් තැම්බෙන නිසා පොඟවා  ගැනීම අවශ්‍ය නැහැ.

මෑතකදී පරිප්පු පිලිබඳව ඇමරිකා එක්සත් ජනපදයේ මැනිසෝටා විශ්ව විද්‍යාලයේ පර්යේෂකයන් විසින් අධ්‍යනයක් සිදු කරනු ලැබුවා. මෙම අධ්‍යනයේදී පර්යේෂකයන් විසින් මීයන්ට පරිප්පු ආහාරයට ලබා දුන් අතර එම මීයන්ගේ අධිරුධිර පීඩන රෝග තත්වය පාලනය වීමට අවශ්‍ය පරිසරය ඔවුන්ගේ සිරුරෙන්ම ඇති වී තිබුනා. එහිදී රෝගී මීයන්ගේ වෙනස්කම් පාදක කර ගෙන පරිප්පුවල ගුණ පිලිබදව සහතිකය පහසුවෙන් ලබා ගැනීමට හැකි වුණා. මෙම අධ්‍යනයට සම්බන්ධ වුන මීයන්ගේ පාද වෙත රුධිරය ගමන්ගන්නා ධමණියක් අවහිර වී තිබුන අතර පරිප්පු මිශ්‍රණයක් සමග ආහාර ලබා දීමෙන් අනතුරුව එම රෝගී මීයන්ගේ පාද දක්වා රුධිරය ගමන් කිරීමේ තිබුන අවහිරතාවයන් ඉවත් වුණා.මෙම අධ්‍යනයේ ප්‍රධානී විදිහට කටයුතු කරනු ලැබුවේ විශේෂඥ වෛද්‍ය පීටර් සහරංකා විසින්. ඔවුන් විසින් අනාවරනය කර ගත් තොරතුරු ඇමරිකා එක්සත් ජනපදයේ ටෙක්සාස් ප්‍රාන්තයේ පැවැති ඇමරිකානු හෘද රෝග සංගමය් වාර්ෂික සම්මේලනයට ඉදිරිපත් කරනු ලැබුවා.

අධිරුධිර පීඩනය නිහඩ මාරයෙක් සේ සැලකෙන නිසා අපි කවුරුත් මේ ගැන අවධානයෙන් සිටීම වැදගත්. ඒ නිසා පරිප්පු ආහාරයට ගැනීමෙන් කිසියම් සහනයක් ලැබෙනවා නම් අපි ඒ ගැන අමතක කිරීමට අවශ්‍ය නැහැ. පරිප්පු කන්න බැහැ කියලා ගෝරනාඩු තිබෙනවා නම් සුප් පිළියෙල කරන විට පරිප්පු එක් කරන්න අමතක කරන්න එපා. එයින් පෝෂණ ගුණය දරුවාට නොදැනෙන විදිහට ලබා දෙන්න පුලුවන්.පවුලේ දරුවන්ගේ ආහාරයට පරිප්පු එක් කර ගැනීමට අම්මලා ටිකක් උනන්දු වුනොත් හොදයි නේද…?

-Daily Express ඇසුරින්-

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here