ජීවිතයේ රිද්මය අම්මාගේ නැළවිලි ගීතයයි…

mother-singing-lullaby-songs-to-child

ජංගම දුරකථනයක් හෝ ටැබ් එකක් අතට දුන්න ගමන් අද කාලේ හැදෙන බොහෝ දරුවන් නළවා ගන්න පුළුවන්. පුංචි දරුවන්ට බත් කවද්දී අද හුඟක් දෙමාපියන් පාවිච්චි කරන්නේ ටැබ් එකක් නැත්නම් ස්මාර්ට් ජංගම දුරකථනයක්. ලෝකය ගැන නොසංසිඳුනු කුතුහලයක් ඇති පොඩි දරුවනුත් මේ උපකරණ පාවිච්චි කරන්නේ හරියට ඒවාටම වශී වුණු ගානටයි.

පසුගිය දවසක මහනුවර ශික්ෂන රෝහලේ මනෝවෛද්‍ය විශේෂඥ එස්.සී.එස් අරඹේපොල මහත්මිය විසින් දෙමව්පියන්ට ඉතාම වැදගත් කරුණු ටිකක් ප්‍රකාශ කලා. ඇය කියා සිටියේ අපේ දෙමව්පියන් විසින් දරුවන්ට ජංගම දුරකථන, ටැබ් වැනි දුරකථන මෙවලම් දීම ඉතාම අහිතකර බවයි. ඇමරිකා එක්සත් ජනපදය වැනි රටවල වයස අවුරුදු දෙකට අඩු දරුවන්ට මේ වගේ මෙවලම් ලබා දෙන්නේම නැති බව ඇය සඳ හන් කළා. ඉතින් මේ සිද්ධියට සම්බන්ධ තවත් තොරතුරු කීපයක් ඩේලි මේල් වෙබ් අඩවියෙන්ද ලබා ගැනීමට හැකි වුනා.

රජපැටවුන්ට ජංගම දුරකථන තහනම්…

රාජකීය දරුවන් කිව්වාම අපි හිතන්නේ හැම සැප සම්පතක්ම තිබෙන මෙහෙකාරයන්ගෙන් සියලු දේ සිද්ධ වෙන පවුලක් බවයි. ඒත් ඔබ එහෙම හිතනවා නම් වැරදියි. ඩේලි මේල් වෙබ් අඩවියේ සදහන්ව කිබුන එක් කාරනාවක් අපේ අම්මලාටත් ඉතාම වැදගත් වෙනවා. කේට් කුමරිය විසින් ඇගේ දරුවන්ට කිසිම දවසක ජංගම දුරකථනයක් අතට දීලා නැති බව එහි සදහන්ව තිබුණා. ඒ විතරක් නොවෙයි, දරුවන් නලවා ගන්න ඇය ටෙඩ්බෙයාර්, සෙලල්ම් කෝච්චි, මල් , කාර් සහ සතුන් වැනි දේ යොදා ගන්නා බවත් එහි සඳහන්ව තිබුණා. කේට් කුමරිය කියන්නේ “මම දරුවන්ට ආදරෙයි…ඒ නිසා හිතාමතාම මේ දේවල් මම දරුවන්ට දෙන්නේ නැහැ…”

දැන් ඔබට මෙහෙම කියන්න පුලුවන්.. අපේ සමාජයේ දරුවන් වෙනුවෙන්ම නැලවිලි තිබියදී ඔය වෙන වෙන මෙවලම් මොකටද…? ඒක ඇත්ත..

අපේ ජනසාහිත්‍යයේ නැලවිලි ගී වල රිද්මයට දරුවාට නින්ද යනවා . ඒ විතරක් නොවෙයි, මේ නැලවිලි ගී මගින් අනාගත අභියෝගයන්ටත් අවශ්‍ය ශක්තිය ලැබෙනවා.කොටින්ම කියනවා නම් දරුවෙකුගේ කණහෙව වැකෙන මුල්ම ගීතය අම්මාගේ නැලවිලි ගීතය බව ඔබ නොදන්නවා විය හැකියි. නැලවිලි ගීතයේ තිබෙන නාද රටාවේ මිහිරියාවට දරුවා ඉබේටම සුවදායක නින්දක් ලබා ගන්නවා.

දුරකථන දුන්නොත් මොකද වෙන්නේ..?

දුරකතන මගින් නිකුත් වෙන සංඥා කිරණ වැඩිහිටියන්ගේ මොළයට ඇති කරන බලපෑමට සාපේක්ෂව බලන විට එයින් දරුවෙකුට ඇති වෙන බලපෑම විසි ගුණයකින් ඉහලයි. අපි මේ ගැන නොදැන දරුවාට ජංගම දුරකථනය අතට දෙනවා. දරුවා ඒ සමග හැසිරෙන විට අම්මාට කරදරයක් නැතුව දරුවා නින්දට යනවා. ඒ වෙලාවේ අම්මා නිවසේ වැඩපොල සේරම කර ගන්නවා. ඉතින් අම්මාත් බලන්නේ තමන්ගේ පහසුව බව ඇත්ත. ඒ මේ අහිතකර තත්වය ගැන නොදන්නා නිසා …ඒ වුනත්  ඇත්ත තත්වය ගැන නම් දැනගන්නම අවශ්‍ය වෙනවා.

දරුවන්ට ජංගම දුරකථන ලබා දීම නිසා අනාගතයේදී මදසරුබව, ප්‍රතිශක්තිය හීන වීම, මොළය සහ ස්නායු ආබාධ ඇති වෙන්න පුලුවන්. ඒ විතරක් නොවෙයි, දරුවා ජංගම දුරකථනය දෙස දිගු වේලාවක් බලා ගෙන සිටීම නිසා ඔවුන්ගේ ධාරණය සහ බුද්ධි වර්ධනය පිළිබද ගැටළු ඇති වෙනවා.

සමාජගත වෙන්න අකමැතියි..

ජංගම දුරකථනය සමග බද්ධ වුන දරුවන් අනාගතයේදී සමාජය සමග සම්බන්ධ වෙන්න කැමැති නැහැ. ඊට හේතුව ඔවුන්ගේ හොඳම මිතුරා ජංගම දුරකථනය පමණයි. මේ නිසා අන්තර් සම්බන්ධතාවයක් ඔවුන් අතර ඇත්තේම නැහැ. තවත් කෙනෙකුට ආදරය දක්වන්න වගේම සමාජය සමග ගණුදෙණු කිරීමට පුරුදු නැති නිසා ඉවසීම වැනි ගුණාංග නොදැනීම දරුවන්ගෙන් ඉවත් වෙනවා. ආවේගශීලී හැසිරීම නිසා දරුවා ඉතාම හිරිහැරකාරී විදිහට හැසිරෙන්න පටන් ගන්නෙත් ජංගම දුරකථනය සමග එදා පටන් පැවැතුන සම්බන්ධතාවය නිසයි.

දරුවාගේ අසමතුලිතබව..

ජංගම දුරකථනයත් සමග පමණක් සම්බන්ධ වෙමින් ගෙවන ජීවිතය නිසා දරුවා පරිසරය සමග කිසිම සම්බන්ධතාවයක් නැහැ. පරිසරයට සංවේදී නැහැ. පරිසරය විදින්න දන්නේ නැහැ. මේ අසමතුලිත දරුවන්ගෙන් සමාජය සමන්විත වුනාම අනාගතයේදී බිහි වෙන අසමතුලිත මිනිසුන් නිසා මේ ගැන අම්මා වඩාත් අවදියෙන් සිටීම වැදගත්.

මේ ගැන අදහස් දක්වන ළමා මනෝවිද්‍යාඥයින් සදහන් කරන්නේ වතුර සීතල බව, ගින්දරට පිච්චෙන බව, අත්දැකීමෙන්ම තේරුම් ගැනීම වැදගත්. සෙල්ලම් බඩුවක් කොටස් විදිහට කඩල එය නැවත සකස් කරන්න දරුවා ඉගෙන ගන්න ඕන..ඒ අත්දැකීම දරුවාට අවශ්‍යයි. කොටින්ම කියනවා නම් දරුවාගේ මොළය වියලි ස්පොන්ජ් එකක්. පරිසරයෙන් මේ ලපටි මනසට බොහෝ දේවල් උරා ගනන්වා. ඒ වෙනුවෙන් පරිසරයෙන් ලැබෙන දායකත්වය ඉතාම වැදගත්.

ඉතින් අන්තර්ජාලය නැතුව ඉදිරියට යන්නේ කොහොමද..?

අන්තර්ජාලය තොරතුරු ගවේෂණයේ වැදගත් මාධ්‍යක් බව ඇත්ත. වෛද්‍ය අරඹේපොල මහත්මිය පෙන්වා දෙන අන්දමට අන්තර්ජාලයට දරුවන් ඇබ්බැහි වීමට තිබෙන ඉඩ ප්‍රස්තාව ඉහලයි. ඒ නිසා කිසිම දවසක දරුවා තනියම නිවසේ සිටිනවා නම් අන්තර්ජාල පහසුකම් විවෘත කිරීම එතරම් සුදුසු නැහැ. මේ පහසුකම් ලබා දිය යුත්තේ මව්පියන්ගේ අධීක්ෂනය යටතේ බව ඇය අවධාරනයෙන්ම පෙන්වා දෙනවා.

ජංගම දුරකථන සහ ටැබ් දරුවා අතට දෙමින් ඔවුන් නිදිකරවන දෙමව්පියන්ට මෙම අධ්‍යනය මගින් පෙන්වා දුන්නේ මේ ක්‍රියාව දරුවාගේ මොළය විදුලි පෝරණුවක දැමීමට සමාන බවයි.ඉතින් ඔබත් මේ තත්වයට සම්බන්ධ නොවී දරුවා ඔබේම නැලවිලි ගීයකින් නලවා ගැනීම මොනතරම් වැදගත්ද බව දැන් ඔබටම හිතේවි…

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here