අපි සමහර දරුවන් දිහා බලලා මේ විදිහට කියනවා උණ පුරුකේ දැම්මත් බලු වලිගේ ඇඳ අරින්න බැහැ වගේ තමයි මේ ළමයා මොන විදිහටවත් හදන්න බැහැ. ඒ වගේම සමහර දරුවන් ගැන මේ විදිහටත් අදහස් කියැවෙනවා. අනේ පුංචි කාලේ මලක් වගේ හිටිය දරුවා දැන් විනාස වෙලා… ඉතිං මේ විදිහට දරුවන්ගේ ගති පැවතුම් අපිට කොටස් දෙකකට බෙදන්න පුලුවන්. ඒ මේ විදිහටයි.
- දරුවා මුල් කර ගෙන ඇති වෙන ගැටළු
- සමාජය නිසා ඇති වෙන ගැටළු
දරුවා මුල් කර ගෙන ඇති වෙන ගැටළු
දැන් අපි බලමු දරුවන්ගේ ගැටළු මොනවාද කියලා. අපි කියන්නා වගේ “ආරේ ගුනේ නෑරේ…” ඒ කියන්නේ ජානමය ස්වභාවයන් අනුවත් දරුවන්ගේ ගති පැවතුම් සකස් වෙනවා. සමහර විට මේ දරුවා මුල් කර ගත් ගැටලු ජානමය පාර්ශවයෙන් ඇති වෙන්න පුලුවන්. අපි වචනයට කියන්නා වගේ තාත්තා වගේම ආවේග තිබෙන්න පුලුවන්. ඒ නිසා ජානමය විදිහටත් දරුවන්ගේ ගැටළු ඇති වීම මෙහි එක් අවස්ථාවක්.
රෝග තත්වයන්
දරුවන් විවිධාකාර මානසික රෝග තත්වයන්ට පත් වුන විට ඔවුන්ගේ හැසිරීම වෙනස් වෙනවා. මෙතෙක් ඉතා සතුටින් සිටි දරුවාගේ හැසිරීම වෙනස්කම්වලට යොමු වෙන්න පුලුවන්. ඉස්සර වගේ විනෝදයෙන් සිටීම අඩුයි. නිතරම හුදෙකලා වීමට බලනවා. ඒ වගේම ආහාරපාන වෙනුවෙන් වූ උනන්දුව අඩුයි නම් දරුවා කුමන හෝ මානසික ගැටුමක සිටින බව අමතක කරන්න එපා.
බුද්ධිය අඩුවීම
පාසල් වයසේ යන දරුවන්ගේ හැසිරීමට බලපාන බොහෝ හේතුන් අතර ඔවුන්ගේ බුද්ධිය බලපානවා. සමහර දරුවන් බුද්ධියෙන් ඉතාම ඉහළ වුනත් තවත් පිරිසක් තුළ ඒ අන්දමින් බුද්ධිමත්බවක් නැහැ. පංතියේ කියවීම, ලිවිම, සවන්දීම , සහ කථනයේ ඇති වෙන අපහසුතාවයන් ඔවුන්ගේ හැසිරීමට ඉතා ප්‍රබල ලෙසින් බලපානවා. ඒ නිසාම දරුවාට ඉගෙණුම එපා වෙන තරමටම තත්වය බරපතල වෙන්න පුලුවනි.
- සමාජය නිසා ඇති වෙන ගැටළු
දෙමව්පියන්
දෙමව්පියන්ගේ ගැටළුත් දරුවන්ගේ හැසිරීමට බලපානවා. එදා නම් දරුවන් මුහුණ දුන්නේ තාත්තා බීමත්ව ඇවිත් නිවසේ අම්මාට පහරදීම, දරුවන්ට තලා පෙලා හිරිහර කිරිම වැනි තත්වයන් පමණයි. ඒත් අද මේ තත්වය ඊට වඩා වෙනස්. මෑතකදී හොඳින් දන්නා හදුනන පවුලක තරුණ දියණියක් සිය දිවි හානි කර ගත්තේ ඇගේ මව නැවත ගැබ් ගැනීම නිසයි. මේ තත්වය අතීතයේදී නම් කිසිම විදිහකින් දරුවන්ට බලපෑමක් නොකලත් අද දරුවන්ගේ තිබෙන දරා ගැනීමේ ශක්තීන් නිසා මේ වගේ අවාසනාවන්ත තත්වයන්ට පත් වෙන බවත් අපි අමතක කළ යුතු නැහැ.
මව හෝ පියාගේ වෙන්වීම මරණය
දරුවා ආදරය කරන ඔහුගේ ආරක්ෂාව සලසන ආරක්ෂකයා අහිමි වීම නිසා දරුවා මානසිකව හුදෙකලාවට පත් වෙනවා. මව , පියා මරණයට පත් වීම පාලනය කළ නොහැකි තත්වයක් වුනත් සමහර පවුල් සංස්ථාවන්හි මව හෝ පියා පවුල හැර යෑම නිසා ඇති වෙන පසුබිමෙන් වඩාත්ම පීඩාවට පත් වෙන්නේ දරුවන් බව ඔවුන් අමතක කරනවා. ඒ නිසා දරුවාගේ හැසිරීම යහපත්ව පවත්වා ගැනීමට නම් දෙමව්පියන්ගේ ආදරය, ආරක්ෂාව සහ රැකවරනය අවශ්‍යයි.
මිතුරන් සහ සම වයස් කණ්ඩායම්
පාසල් යන වයසේ පසුවෙන දරුවන් හැසිරීමේ වෙනස්කම්වලට ඔවුන් මුහුණ දෙන අත්දැකීම් බලපානවා. පාසලේදී ඇති වෙන තර්ජන නිසා ඇති වෙන මානසික කම්පනය නිසා ඉතාම බියගුළු සහ පසුගාමී චරිත බවට පත් වෙනවා. ඉහළ පංතිවල පමණක් නොව සමවයස් කණ්ඩායම් විසින් මේ අන්දමින් තර්ජනය කිරීමෙන් ඇති වෙන බලපෑම දරුවන්ගේ හැසිරීම් රටාව මුලුමනින්ම උඩුයටිකුරු කිරීමට හේතු වෙනවා.
අපචාර
අද දරුවා අපචාරයන්ට පත් වීමට තිබෙන අවස්ථාවන් නිසා ඔවුන්ගේ හැසිරීම් බොහෝ සේ වෙනස් වෙනවා. පිටස්තරව නොවෙයි, නිවසේ ඇතුලත සිටින අයගෙන්ම දරුවා අපි නොදැනීම අපචාරයන්ටත් පත් වෙන නිසා ඔවුන්ගේ හැසිරීම වෙනස් වීමට පුලුවන්.
ඇබ්බැහිවීම
අම්මා තාත්තා වැඩ නිසා විවිධ දේ වෙනුවෙන් ඇබ්බැහි වීම. මත්ද්‍රව්‍යට පමණක් නොවෙයි, අන්තර්ජාලයට පවා මේ නිසා නිදහස් අන්තර්ජාල පහසුකම් සපයා දිය යුතු නැහැ. එපා. එය දරුවාට පාලනයක් නැහැ. එදා සිගරැට් වුනත් අද ගංජා පාවිච්චිය තදින්ම තිබෙනවා. පංතියේම දරුවන් පාවිච්චි කරන තරම්මට තත්වය වැඩියි. ඒ වගේම විවිධ ඖෂධ පාවිච්චි කිරීමෙන් මත් ද්‍රව්‍ය ආදේශක දරුවන් හොයා ගෙන ඉන්නවා. කැස්සට, මානසික රෝගවලට ලබා දෙන ඖෂධ වර්ග මේ වෙනුවෙන් භාවිතා කරනවා.
මලක් වගේ හිටිය දරුවාගේ ගති පැවැතුම් දැන් වෙනස්නම් දෙමව්පියන් විදිහ ඔබ දරුවා ගැන අවධානය දක්වන්න. ඔබ නොදැනම වුනත් දරුවාගේ වෙනස්කම් වෙනුවෙන් ඉහත දැක්වෙන හේතු බලපාන්න පුලුවනි.
