පුංචි පැටියෙක් ඉන්න ගෙදරක සතුට වගේම කාර්යබහුල බවත් දෙගුණ වෙනවා. අම්මා කෙනෙක්ගේ හැම තත්පරයක්ම ගෙවෙන්නේ මේ දරු පැටියා වෙනුවෙන්. ඒ වගේම දරුවා වෙනුවෙන් කෙරෙන හැම යුතුකමක්ම අම්මා කෙනෙක් නොපිරිහෙලා ඉටු කරන්නේ හරිම සතුටෙන්. අන්න ඒ නිසාම බහුතරයක් මව්වරුන් පහසුව ගැන නම් හිතන්නෙම නැති තරම්. කොයි තරම් වෙහෙස මහන්සි වුණත් දරුවාගේ වැඩ කටයුතු ටික අවසන් වෙනකන් අම්මා කෙනෙක් නින්දට වැටෙන්නේ නෑ. සමහර වෙලාවට ඒ වැඩ කටයුතු සියල්ලක්ම හමාර කරලා අම්මා ඇඳට එනකොට චූටි පැටියා තෙමා ගෙන, නින්දෙන් ඇහැරිලා. කොයි තරම් මහන්සියක් දැනුණත් කොයි තරම් නිදිමත උණත් දරු පැටියාගේ ඒ රාජකාරියත් අම්මා කෙනෙක් සතුටින් ඉටු කරනවා. මේ කොහොම වුණත් අම්මා කියන කෙනාටත් විවේකය අත්‍යවශ්‍යයි. එහෙම නේද? කොයි තරම් සතුටෙන් තමන්ගේ දරු පැටියා වෙනුවෙන් මහන්සි නොබලා අම්මා කෙනෙක් කටයුතු කළත් කොයිම හරි මොහොතක ඒ වෙහෙස අම්මාට නරක විදියට බලපාන්නත් බැරි නැහැ. මොකද වෙලාවට කෑමක් බීමක් ගන්නේ නැතිව දරුවාගෙන් වැඩවලට, වැඩවලින් දරුවා ළඟට දුවන අම්මලා තමන් ගැන නොහිත මෙහෙම වෙහෙස වෙද්දී රෝගාතුර වුණොත් අම්මාගේ අඩුව විශේෂයෙන් පුංචි පැටියටත් ඒ වගේම මුළු ගෙදරටමත් දැනෙනවා. අන්න ඒ නිසාමයි අම්මලා වැඩ පහසු කරගත යුතු වෙන්නේ.
පුංචි දරුවෙක් ඉන්න ගෙදරක එකතු වෙන රෙදි කන්ද ගැන අමුතුවෙන් කියන්න ඕනේ නෑ. දරු පැටියා වෙනුවෙන් ඩයපර භාවිත කරන්න පුළුවන් නම් මේ රෙදි කන්ද බාගෙට බාගයක් අඩු කරගන්න පුළුවන්. ඒත් අම්මලා දරුවන්ට ඩයපර භාවිත කරන්න අකමැතියි. මොකද අම්මා කෙනෙක් නිතරම දරුවාගේ සුව පහසුව උපරිමයෙන් පවත්වා ගන්න කැමතියි. අම්මලා එහෙම හිතුවත් උසස් ලෙස නිපදවෙන ඩයපරයක් මගින් පහසුව සලසන්නේ පැටියට විතරක් නෙවෙයි. අම්මටත් උපරිම සුව පහසුව සලසනවා.
ඒත් දැන් ඔබ හිතනවා ඇති, “ඩයපර නිසා දරුවන්ගේ සුමුදු සමේ ආසාත්මිකතා, අවපැහැ වීම්, ගොරෝසු වීම්, කැපීම් තුවාල වගේ දේවල් ඇති වෙනවා. ඉතිං කොහොමද පැටියට ඩයපරවලින් සුවයක් ලැබෙන්නේ” කියලා. මේ කරුණු විතරක් නෙවෙයි, “ඩයපර ඇන්දුවාම කකුල් බකල් වෙනවා, අස්ථි පද්ධතිය හොඳින් හැදෙන්නේ නැ, දරුවාගේ වර්ධනය අඩාල වෙනවා” වගේ එක එක විදියේ මිත්‍යා මතත් අම්මලා අතරේ තියෙනවා. අන්න ඒ නිසාම දරුවාට අවශ්‍ය උපරිම සුව පහසුව සලසන ඩයපරයක් තෝරාගැනීමට මව්පියන් ලෙස ඔබ සැලකිලිමත් විය යුතුයි. එසේම ඩයපරයක් තෝරාගැනීමේදී, එය විශ්වසනීය වෙළඳ නාමයක් යටතේ වෙළඳපොළට එන උසස් නිෂ්පාදනයක් ද යන්න පිළිබඳව ඔබ මූලිකව අවධානය යොමු කළ යුතුය. එසේ නොවන්නට සැබවින්ම ඩයපරය ඔබටත් පැටියාටත් පහසුවක් නොවිය හැකිය.
ඔබ තෝරාගන්නා ඩයපරය,
- උපරිම උරාගැනීමේ හැකියාවකින් සමන්විත විය යුතුය
- ඝනකමින් අඩු විය යුතුය
- මතුපිට සුමුදු විය යුතුය
- ඩයපරය හරහා වාතාශ්‍රය ගමන් කිරීමේ හැකියාව තිබිය යුතුය
- දරු පැටියාගේ ක්‍රියාකාරකම්වලට මෙන්ම වර්ධනයට බාධාවක් නොවිය යුතුය
ඩයපර භාවිතයෙන් දරු පැටියාට සැලසෙන වාසි
- දරුවාගේ වටපිටාව තෙත් වීම අපිරිසිදු වීම වැළකේ
- සුමුදු බව නිසා දරුවා උපරිම සුවපහසුවෙන් කාලය ගත කරයි
- නොකඩවා දිගු නින්දක් ලබා ගනී
- දෛනික ක්‍රියාකාරකම්වලට බාධා ඇති නොවේ
- සුව පහසුව නිසා දරුවා හැම මොහොතක්ම සතුටින් ගත කරයි
- හොඳින් ආවරණය කර සුරක්ෂිතව අසුරා ඇති නිසා විෂබීජ ඇතුළු වී දරුවාට ආසාදන ඇති නොවේ
දරු පැටියා වෙනුවෙන් ඩයපර භාවිතයෙන් මවකට සැලසෙන වාසි
- එක් වරක් භාවිත කොට ඉවතලන නිසා සේදීමට/වේලීමට සහ මැදීමට ඇති රෙදි ප්‍රමාණය අවම වීම
- රාත්‍රියේදී සුව නින්දක් ලබා ගැනීමේ හැකියාව
- නිවසින් පිටතට දරුවා රැගෙන යන අවස්ථාවලදී තෙමා ගැනීම් නිසා අපහසුතාවයට පත් නොවීම
- දවස පුරා විටින් විට ඇඳුම් මාරු කිරීමට සිදු නොවීම
- මුත්‍රා නිසා මෙට්ටවල මෙන්ම නිවස තුළ ඇතිවන දුර්ගන්ධය වළක්වා ගත හැකිවීම
- විශේෂයෙන්ම වැසි සමයේදී රෙදි වේලීමට ඇති අපහසුවෙන් මිදීමට හැකිවීම
විශ්වසනීය වෙළඳ නාමයක් යටතේ වෙළඳපොළට එන උසස් නිෂ්පාදනයක් තෝරාගන්නට ඔබ සමත් නම්, ඩයපර ඇන්දවීම ඔබටත් ඔබේ දරුවාටත් උපරිම සුව පහසුවක් ළඟා කරදෙනු ඇත.
