දරුවාගේ සංවර්ධනය දෙස විමසිල්ලෙන් ඉවසීල්ලෙන් බලන්න

child-start-drowning-on-wall
පෙර පාසල් වයසේ  දරුවන්

දරුවන්ගේ අත් පා වල විශාල මාංශ පේශි වර්ධනය ආරම්භ වෙන විට දරුවා වේගයෙන් දුවන්න, උඩපනින්න, පඩි පෙලක් දිග ඉහලට පහලට යෑමට කැමැත්තක් දක්වනවා. ඒ වගේම සෙල්ලම් ගෙයක සෙල්ලම් කිරීමට, මැටි, වතුර සහ වැලි ඇනීමට දරුවන් දක්වන කැමැත්ත ඉදිරියේ ඔබ ඔවුන්ට බාධා කරන්න එපා. “දුවන්න එපා…වැටෙයි…පඩි පෙලේ ඉහල පහල ගිහින් අත් කකුල් කඩා ගන්නද..?” මේ විදිහට දරුවාගේ නිදහසේ හැසිරෙන රටාවට බාධා නොකළ යුතුයි. එවිට දරුවාට ඇති වෙන්නේ කනගාටුවක්. එක් අතකින් ඔවුන්ගේ මාංශ පේශි වර්ධනයට ඇති හැකියාව නැති වෙනවා. අනිත් පැත්තෙන් තමාගේ ස්වාධීනත්වයට පනවන බාධාවන් නිසා දරුවා බිඳවැටෙන්න පටන් ගන්නවා.මේ කාලයේදී දරුවාට රිසි සේ හැසිරෙන්න ඉඩ වපසරිය සාදා දෙන්න දෙමව්පියන්ට පුලුවනි. එහෙමනම් නිවසේ සිටින අවුරුදු තුනක් පමණ වෙන විට දරුවාට මේ කටයුතු කරන්න අවසර අවශ්‍යයි.

  • දරුවාට බෝලයට පයින් ගැසීමට ඉඩ දෙන්න.
  • පඩිපෙළ ඉහළ පහල යෑමට.
  • ඔන්චිල්ලාව පදින්න.
  • ලොකු රබර් බෝලයක් පෙරලන්න.
  • ට්‍රයිසිකලයක් පදින්න අවසර දුන්නාට වරදක් නැහැ.
තවම කමිසයේ බොත්තම හරියට දා ගන්න බැහැ… දාංගලේ විතරයි..

එකතැන විනාඩියක් නොරැඳෙන දරුවාට කමිසයේ බොත්තම නිවරැදිව දා ගැනීමට සමහර විට ‍නොහැකි වීම ගැන අම්මා , තාත්තා කතා කරන්නේ නොමනාපයෙන්. ඒත් කිසිම විටෙක ඒ විදිහට දරුවා සමග උරන සිත් ගොඩ නගා ගන්න එපා. මුලින් සඳහන් කරන ලද ක්‍රියාකාරකම් වෙනුවෙන් දරුවා දක්වන හැකියාවන්ට හේතු වෙන්නේ ඔහුගේ විශාල මාංශපේශියි. බොත්තම් දැමීම වැනි කටයුතුවලට බලපාන්නේ සියුම් මාංහපේශි නිසා ඒවා වර්ධනය වෙන තෙක් අම්මා තාත්තා බලාගෙන හිටියට බොත්තම් දැමීම වැනි කටයුතුවලට හැකියාවක් ලැබෙන්නේ නැහැ.

අකුරු ලියන්න බල කරන්න එපා…

දරුවාට අකුරු කියවන ලද දිනයේ පටන් අම්මාට තාත්තාට අවශ්‍ය වෙන්නේ තමාගේ දරුවාගෙන් අකුරක් ඉලක්කමක් ලියවා ගන්නයි. ඒත් මේ වෙනුවෙන් දරුවා සූදානම් වෙන තෙක් කිසිම බලකිරීමක් එපා.

ඒ වුනාට බිත්තියේ බලිරූප ඇඳල විනාසයි…

අකුරු ලියන්න සූදානම් නැතැත් බොහෝ දරුවන් පැන්සලකින් බිත්තියේ එහෙම නැත්නම් පොළවේ විවිධ කුරුටු බලි ඇඳීමට පටන් ගන්නවා. එයින් පෙනෙන්නේ දැන් අකුරු ලිවීමට සූදානම් බවයි. නිවසේ අලංකාරයට හානි සිද්ධ වෙන නිසා දරුවාගේ නිදහස් බලි රෑප වෙනුවෙන් පුංචි වුනත් ඉඩ පරිසරයක් වෙන් කර දෙන්න.

අවුරුදු හතරක් විතර වුනාම තවත් වැඩ පටන් ගන්නවා

දැන් ඔවුන්ග් සියුම් මාංශපේශි වර්ධනය වෙලා තිබෙනවා. ඒ නිසා ඇගිලි හසුරුවා මැටි ගුලි අනන්න, රබර් බෝල මිරිකන්න, කඩදාසි කපන්න, චිත්‍ර  අදින්න පුලුවනි. ඉතින් ඔබට මේ විදිහට දරුවාට හවුල් වෙන්න පුලුවන්

  • නිවසේ ඉවත දමන කාඩ්බෝඩ් වලින් හැඩ කපන්න සහ පැස්ටල් හෝ පැන්සල් ආධාරයෙන් චිත්‍ර අදින්න ඉඩ දෙන්න.
  • සී සෝ වැනි ක්‍රිඩාවන්හි යෙදෙන්න පුලුවනි.
  • අලියා , හාවාගේ ගමන් ඉරියව් අනුකරනය කිරීමට කියා දෙන්න.
  • ටයර් පදවන්න.
  • කං කං බූරු වැනි සමූහ ක්‍රිඩාවන් කරන්න ඉඩ දෙන්න.
දරුවන්ගේ බුද්ධිය වර්ධනය කිරීමටත් හොඳම කාලය දැන්

හොවාර්ඩ් ගාර්ඩ්නර් සදහන් කරන අන්දමට පුද්ගලයෙකු තුළ විවිධ හැකියාවන් තිබෙනවා. දරුවෙක් විදිහට ඔබ ඇසුරේ සිටින මේ පුංචි ජීවියාගේ හැකියාවන් ඔප් නැංවීමට දැන් හොඳම තෝතැන්නයි. දරුවා තුළ සැගවී සිටින මේ යෝධ හැකියාවන් අවදි කරන්නේ කොහොමද….?

නිර්මාණාත්මක හැකියාවන් : 

දරුවාට කඩදාසි කපන්න, පතරොමක් තබා එය වටා අදින්න, රවුමට පිටින් නොයන සේ පාට කිරීම, පින්තූරයක වටට රූපයට හානි නොවන සේ කැපීම වැනි කටයුතු වෙනුවෙන් නිදහස ලබා දෙන්න.

ගණිතමය හැකියාවන් :

මේ කාලයේදී පයිතගර්ස්ගේ මට්ටම බලාපොරොත්තු වෙන්න එපා. ලොකු සහ පොඩි, දිග සහ කොට වගේම රවුම, හතරැස් කොටුව, ත්‍රිකෝණය හැඩය අනුව තෝරා ගැනීමට නිදහස දෙන්න. හැඩතල කපා දෙමින් මේ කාර්යයට සහයෝගය දක්වන්න පුලුවන්. මේ වෙන විට ඔවුන්ගේ මොළය සහ ස්නායු වර්ධනය සිදු වී තිබෙන නිසා ඇඟිලි හොදින් හසුරුවන්න පුලුවන්. කොළයක් සමානව දෙකට නැවීම වැනි කටයුතු මගින් ඇස් , මොළය සහ අත යන ඉන්ද්‍රියන් තුනම එකවර ක්‍රියාත්මක වෙනවා.

භාෂාමය හැකියාවන් : 

මේ කාලයේදී දරුවාගේ වාග්කෝෂය එතරම් පුලුල් නැහැ. ඒ නිසා ඇතැම් වස්තූන් හදුන්වා දෙන්න ඔවුන් විසින්ම වචන යොදා ගන්නවා. සමහර විට තමාව ආමන්ත්‍රනය කිරීමටත් ඔවුන්ට දෙමව්පියන් ආමන්ත්‍රණය කරන වචනම යොදා ගන්නවා. “දුව” එහෙම නැත්නම් “පුතා”, “නංගී” විදිහට තමාව හඳුන්වා ගන්නවා. කාලයත් සමග තමන් දකින අයට නැන්දා, මාමා, අක්කා, අයියා විදිහට ආමන්ත්‍රණයටත් හැකියාව ලබනවා. “බැසිල් බර්න්ස්ටයින්” නැමැති සමාජ විද්‍යාඥයා පෙන්වා දෙන අන්දමට දරුවා සමග වැඩිපුර වැඩිහිටියන් කතා කරන තරමටම ඔවුන්ගේ කතා කිරීමේ හැකියාවන් වර්ධනය වෙන බවයි. මේ නිසා දරුවන් සමග “ඔව්/නැහැ” වැනි කෙටි සංවාද වෙනුවට ඔවුන් සෑහීමට පත් වෙන සේ සංවාදයන් සමග අලුත් අත්දැකීම් ලබා දෙන්න. එවිට දරුවාගේ භාෂාමය හැකියාවන් නොදැනීම සංවර්ධනය ලබාවි.

අනුකරනයට දක්ෂයි :

පුංචි දරුවන් අනුකරනයට හරිම දක්ෂයි. තමාගේ ඇසුරේ සිටින අය අනුකරනය කරන නිසා හොඳ වගේම නරක වෙනුවෙනුත් යොමු වීමට තිබෙන ඉඩ ප්‍රස්ථාව ඉහලයි. ඒ නිසා හොඳ පුරුදු වගේම නරක පුරුදු ඉතාම පහසුවෙන් ග්‍රහනය කර ගන්නවා. ආහාර පුරුදු, ආගමික වතාවත් , තැනට ගැලපෙන සේ හැසිරෙන අන්දම ගැන දරුවන්ට හුරු කිරීමට හොඳම කාලය දැන් ඔබ ඉදිරියේ තිබෙනවා.

දරුවෙකුගේ වර්ධනය සිද්ධ වෙන්නේ ඉතාම සෙමින්. මේ කාලය තුළ දෙමව්පියන්ගෙන් ලැබෙන ආදරය, ආරක්ෂාව සහ රැකවරනය නිසා ඔවුන් ශාරිරිකව මෙන්ම මානසිකවත් ශක්තිමත් වීමට අවශ්‍ය පරිසරය ලැබෙනවා. ඒ නිසා කාර්යබහුල ජීවිතයේ තිබෙන හැල හැප්පීම් නිසා දරුවාගේ නොදරුකම් ඉදිරියේ කෝප නොවී ඉවසීමෙන් කටයුතු කරන්න. මේ කාලයේදී ඔබගෙන් ලැබෙන අමිහිරි අත්දැකීම් නිසා දරුවා මානසික ආතතියට පත් වෙනන් පුලුවනි. එහෙනම් මල් පෙත්තක් බදු මේ පුංචි හිත් නොරිදවන සේ කටයුතු කරමින් ඔවුන්ගේ හැසිරීමට අද උරන නොවී සිටියොත් හෙට දවසේ ඔබේ දරුවා ලෝකයටම සුවිශේෂී චරිතයක් බවට පත් වෙනු ඇත.

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here