“මගේ පුතා හැමවේලේම වැඩ කරන්නේ වම් අතින්. අකුරු ලියන්නේ කැම කන්නේ පවා වම් අතින්. මේ පුරුද්ද නැති කරගන්න මොකද කරන්නේ… ? පුතාව දකුණු අතට හුරු කරන්න ඕනේද …? වම් අතින් වැඩ කරන එක හොද නැද්ද?..”
මිනිසුන් 100කින් 90 කටම තම වැඩ කටයුතු සඳහා හුරු අත වන්නේ දකුණු අතයි. 10%ක් පමණ කොටසකට තමන්ට හුරු අත වන්නේ වම් අතයි. සංස්කෘතියත් සමග බැඳුණු ඉතිහාස කතා පවා දකුණු අත භාවිතය පිළිබඳව පැවතුනු බව කියවෙන අතරම අතිතයේදී වමත හුරු වමතින් වැඩ කටයුතු කරන පුද්ගලයන් දුර්වලයින් ලෙස ද හංවඩු ගසා ඇති බව කියවේ. දරුවෙකු වම් අතින් කටයුතු කරයි නම් එම දරුවාව දෙමාපියන් නිසි ලෙස වර්ධනය කොට නොමැති බව එක්තරා අවස්ථාක ප්ලේටෝ නම් දර්ශිකයා පවා සඳහන් කොට ඇත. ඇතැම් ආසියාතික රටවල් වල මේ අදහස්වල එළැඹ සිටින පිරිස් අදටත් නැතුවාම නොවේ.
නමුත් නවතම සමීක්ෂණ වාර්තාවලට අනුව වම් අත භාවිතයට හුරු දරුවන් කිසිසේත්ම දකුණු අත භාවිතයට හුරු නොකර යුතු බව කියවේ. අපේ ශරීරයේ මොළය තුළ ක්‍රියාකාරිත්වය සලකා බැලීමේදී මොළයේ වම් අර්ධ ගෝලය භාෂාව ගණිතය විද්‍යාව පර්යාය /රටා පිළිබඳ කටයුතු කරයි. මොළයේ දකුණු අර්ධ ගෝලයේ නිර්මාණශීලිත්වය, මනකල්පිත හැකියාව, කලා හැකියාවන් පිළිබඳව කටයුතු කරයි. මොළයේ වම් පැත්ත ආධිපත්‍ය දරයි නම් දරුවන් දකුණු අතට ද සහ මොළයේ දකුණු පැත්ත ආධිපත්‍යය දරයි නම් වම් අතටද හුරු වේ. බොහෝ දරුවන් අත භාවිත කිරීමට හුරුවන්නේ ගර්භාෂයේ සිටිනා කාලයේ සිටය. ඔවුන් ගර්භාෂයේ සිටම ඇඟිලි උරයි.
බොහෝ විට මෙය දරුවාගේ ජාන මගින් හෝ ජීවත්වන පරිසරය මගින් හෝ සංස්කෘතිය මගින් ඇති වන තත්ත්වයකි. උදාහරණයක් ලෙස මව/පියා හෝ මව් පිය පාර්ශවවල නෑදෑයන් වම් අත භාවිත කරයි නම් දරුවාද වම් අත භාවිත කිරීමේ හැකියාව පවතී. එය ජානමය තත්ත්වයකි. සමහර අවස්ථාවල ජානමය බලපෑම් ගති ලක්ෂණ සහ පරිසරය මගින් වෙනස් කළ හැක. සමහර අවස්ථාවල ගුරුවරුන් දෙමාපියන් බලහත්කාරයෙන් හුරු කිරීම මගින් වම් අත භාවිත කරයි. තවත් විටක රටේ සංස්කෘතියය මගින් හුරු වීම් ඇති වේ. නිදසුන් ලෙස ජපානය චීනය වැනි රටවල වම් අතින් ලියන ප්‍රතිශතය 2%ක් පමණ වේ.
වම් අතේ සිට දකුණු අතට දරුවන් හුරු කිරීම සුදුසුද?
වම් අතේ සිට දකුණු අතට බලහත්කාරයෙන් හුරු කිරීමකදි දරුවන්ට අහිතකර ප්‍රතිවිපාකවලට මුහුණ දීමට සිදු විය හැකිය. ඒවා නම්,
- අවලස්සන අත් අකුරු
- කියවීමේ දුෂ්කරතා
- මතක ශක්තිය දුර්වල වීම
- අක්ෂර වින්‍යාස දුර්වලතා ඇති වීම
- ප්‍රකෝපකාරී හැසිරීම්
- ශරීරික සහ මානසික විඩාව
ගුරුවරුන් දෙමාපියන් බලහත්කාරයෙන් දකුණු අත හුරු කිරීමෙන් අධ්‍යාපනය පවා සම්පූර්ණයෙන් අඩාල විය හැක. දරුවන්ට සහජයෙන් ලැබී ඇති දෑ වෙනුවෙන් දෙමාපියන් කළ යුත්තේ එවා නැති කිරීම හෝ යට පත් කිරීම නොව එවා වැඩි දියුණු කිරීමට සහයෝගය ලබාදීමයි. උදාහරණයක් ලෙස ඔබේ දරුවා වමතින් කටයුතු කරන්නේ නම් ඔහු කලා කටයුතු, ක්‍රිඩා කටයුතු , නිර්මාණශීලි අංශ සදහා වැඩි වශයෙන් යොමු කළ හැක. සමහර අවස්ථාවල දරුවන්ට කුඩා කාලයේදී බලහත්කාරයෙන් දකුණු අත හුරු කළත් පසු කලීනව දරුවා විසින්ම වම් අත හාවිත කරයි. එහෙයින් වම් අත හුරු දරුවන් කිසිසේත්ම දකුණු අත බලහත්කාරයෙන් හුරු කිරීම වගකීමක් සහිත දැනුවත් දෙමාපියන් වශයෙන් ඔබ නොකළ යුත්තකි.
ලංකා හොස්පිට්ල්ස්හි ළමා රෝග විශේෂඥ වෛද්‍ය ප්‍රියන්ති මොල්ලිගොඩ මහත්මිය සමගින් සාකච්ජා කර සසිනි අරවින්දි විසින් සකසන ලද ලිපියකි.
