පුංචි පැටවුන්ට දිගින් දිගටම රෑට කිරි පෙව්වොත් වෙන්නේ මොකද?

පුංචි පැටවුන්ට දිගින් දිගටම රෑට කිරි පෙව්වොත් වෙන්නේ මොකද?

අලුත ඉපදුණු පුංචි පැටියෙක්ට සාමාන්‍යයෙන් මාසයක් වගේ වෙනකන් පැය 2-3 ට වරක් කිරි පොවන්න. ඒක දිවා රාත්‍රී කියලා වෙනසක් නැතුව කරනවා. ඒත් දිගින් දිගටම රාත්‍රී කාලයේත් මේ විදියටම කිරි දෙන්න ඕනෙද කියලා ගැටළුවක් අපේ අම්මලාට තියෙනවා. මුල් මාසය වගේ ගෙවුනම මේ විදියට පය 2 – 3 කට වරක් කිරි දීම අත්‍යවශ්‍ය වෙන්නේ නැහැ. මොකද ඒ වෙද්දී දරුවෙකුට හොඳ නින්දක් ලබා ගැනීමට අවස්ථාව දීම තමයි වැඩියෙන් වටින්නේ. ඒ නිසා මාසයක් පමණ ගත වුනාට පස්සේ රාත‍්‍රියට වැඩිපුර නිදාගන්න දරුවට ඉඩ දෙන්න ඕනේ.

රාත‍්‍රියට පැය 5 ක පමණ අඛණ්ඩ නින්දක් දරුවාට දීමට උත්සහ කළ යුතුයි. දරුවාගේ බර වැඩිවීම වැඩිපුර සිදු වන්නේ නිදාගත් කාලය තුළයි. ඒ නිසයි හොඳ නින්දක් වඩා ප‍්‍රයෝජනවත් වෙන්නේ. දරුවාට රාත‍්‍රියට කිරි පෙවීම අවම මට්ටමක තබාගන්නත් දරුවා අවදි වු විගස කිරි පෙවීමට වඩා නිදි කිරිමට උත්සහ ගත යුතුයි. දරුවා අවදි කර කිරි පෙවීමට උත්සහ කිරීම අනවශ්‍යයි. රෑ තිස්සේ දරුවෙකුට කිරි දීමේදී පුංචි පුංචි ගැටලු ඇති වෙන්නත් බැරි නැහැ.

රාත‍්‍රිය පුරා කිරි පෙවීමේ අහිතකර ප‍්‍රතිඵල

  • දරුවාගේ කායික වර්ධනයට බලපෑම් ඇති කර බර වැඩි වීම අඩු වේ.
  • දරුවාට හා මවට නින්දක් ලැබීමට කාලයක් නොමැති වීම.
  • මවට තෙහෙට්ටුව හා මානසික පීඩනය.
  • දරුවාගේ උදරය අනවශ්‍ය ලෙස පුරවා දමයි. මෙම අපහසුව නිසා ඊලඟ දිනයේ කිරි ප‍්‍රතික්‍ෂෙප කිරීම.
  • දත් එන කාලයේදී ඉදිරිපස දත් දුඹුරු පැහැවී පසුව කළු පාට වී කැඩි යයි.
අනවශ්‍ය ලෙස කිරි පෙවීමෙන්….

  • දරුවා නිතර වමනය කිරීම. මෙම වමනය පිට උගුරේ යාම. (උත්ස්වසනය- Aspiration) නිසා මරණය පවා සිදු විය හැක.
  • දවස තුළ වැඩි වාර ගණනක් මලපහ වීම, මල බුරුල් තත්ත්වයක් ගනී. කිරි පොවන හැම විටම මලපහ කරයි. කොළ පැහැයට හුරුව මල පිටවිය හැක.
  • දරුවාගේ බඩ පුරවා දමා හුස්ම ගැනීමට අපහසු වීම.
  • දරුවාගේ බර අධික ලෙස වැඩි වීම.
  • දරුවා ප‍්‍රධාන ආහාර වේල් ප‍්‍රතික්‍ෂෙප කිරීම.
  • වරින් වර කිරි උගුරට ඒම නිසා කැස්සද, එම කිරි නාසය තුළට යාම නිසා නාසය සිරවීමද ඇති විය හැක.
දරුවාට ප‍්‍රමාණවත් පරිදි කිරි පෙවේ නම්…

  • දිනකට වාර 8 කට වඩා වැඩි වාර ගණනක් මුත‍්‍රා පිට කිරීම.
  • කිරි ඉරීමෙන් පසු පැය 3 ත් පමණ දිගටම නිදා ගැනීම.
  • කිරි පෙවීමෙන් පසු බඩ පිරුණු ආකාරයක් නිරීක්‍ෂණය කළ හැක.
  • මුල් මාස කිහිපය තුළ දිනකට 25ට බැගින් බර වැඩි වීම.
කිරි පෙවීමේ ක‍්‍රම

පළමු ක‍්‍රමය : 

  • දරුවා මවගේ පියයුරු මට්ටම දක්වා ඔසවන්න.
  • ඉන්පසු දරුවා සම්පූර්ණයෙන් හිස සමග මව දෙසට හරවන්න. මවගේ පපුව හා දරුවාගේ පපුව සමග ස්පර්ශ විය යුතුය.
  • දරුවාගේ හිස මවගේ අත්ල මතද නිතඹ මවගේ වැලමිට මත ද රඳා පැවතිය යුතුය.
  • මවගේ අනික් අත පියයුර දරුවාට ලං කර දීමට හා අල්ලා සිටීමට භාවිත කරන්න.

දෙවන ක‍්‍රමය :

  • දරුවාගේ හිස වැලමිට මතද, නිතඹ අල්ල මතද සිටින ලෙස දරුවා වඩා ගන්න.
  • දරුවා පියයුරු මට්ටම දක්වා ඔසවන්න. සම්පූර්ණ පපුවට පපුව ගෑවෙන ලෙස සමීප කරන්න.
  • මවගේ අනික් අත, පියයුර ඔසවා තන පුඩුව කටට ඇතුළු කිරීමට භාවිත කළ හැක.

තෙවන ක‍්‍රමය :

  • දරුවා පාපන්දු බෝලයක් මෙන් කිහිල්ල යටට ගන්න. දරුවාගේ පා පිටුපසට සිටින ලෙස හා දරුවාගේ මුව තන පුඩුව දෙසට හරවා දරුවා අල්වා ගන්න.

සිව්වන ක‍්‍රමය :

  • මව ඇඳ මත හාන්සි වී දරුවා තමන් දෙසට හරවා කිරි පෙවීම කළ හැක. මෙහිදී මව නිදාගැනීම නොකළ යුතු වන අතර නින්ද ගියහොත් දරුවා මවගේ ශරීරයට යට වීමට ඉඩ ඇත.
ගුඩුස් යැවීම

කිරි පෙවීම අවසානයේදී ගුඩුස් යැවීම කළ යුතු අතර එසේ නොවුනහොත් වමනය වීම නිසා කිරි පිට උගුරේ යා හැක. කිරි පෙවීමේදී වාතය ඇතුළු වීම නිසා මෙම ගුඩුස් යැවීම කළ යුත්තේ එම වාතය ඉවත් කිරීමට වේ.

පළමු ක‍්‍රමය :

  • දරුවා මවගේ උරහිස මට්ටම දක්වා ඔසවා උරහිසට හේත්තු කරගන්න. දැන් දරුවාගේ බඩ මවගේ උරහිස මත රැඳේ. ඉන්පසු පිටට සෙමින් තට්ටු කරන්න. අනෙක් අත දරුවා ඇල්ලීමට භාවිත කරන්න.

KandyMatara@199

දෙවන ක‍්‍රමය :

  • දරුවාගේ හිස මවගේ වම් කකුල මත සිටින ආකාරයට හා බඩ දකුණු කකුල මත රඳන ආකාරයට තබාගන්න. සෙමින් පිටට තට්ටු කරන්න.

img02

තෙවන ක‍්‍රමය :

  • දරුවා උකුල මත වාඩි කරවා තබාගෙන පිට සෙමින් පිරිමදින්න. වම් අත දරුවාගේ පිට කෙලින් තබාගැනීමට භාවිත කරන්න. දකුණු අතින් බඩ සෙමින් තද කරන්න.

img03

කරාපිටිය, ශික්‍ෂණ රෝහලේ වෛද්‍ය ආර්. එම්. එන්. කේ. රණතුංග මහතා සහ හෙද නිලධාරිනී ක්‍රිෂාන්ති ගංගා කුමාරිහාමි මහත්මිය සමග සකසන ලද ලිපියකි.

 

Previous article චූටි පැටියට කිරි දෙද්දී ඔබටත් මේ ගැටලු ඇති වුණාද?
Next article ඔබත් කැමතිද මේ පුංචි බලු සුරතලා ගැන දැනගන්න
අධ්‍යාපනික අතින් කොයිතරම් උසස් මට්ටමක හිටියත් අම්මෙක් වුණාම ඇති වන ගැටලූවලට අපි ළඟ පිළිතුරු නෑ. මව්පදවියත් එක්ක දහසකුත් එකක් ප්‍රශ්න මටත් ඇති වුණා. ඔය අතරෙදියි මව්වරුන් වෙනුවෙන්ම වෙන්වුණු පුවත්පතක සංස්කාරකවරිය විදියට සේවය කරන්න මට අවස්ථාව ලැබුණේ. අම්මා කෙනෙක් විදියට මට ඇති වෙන ගැටලූ අධ්‍යාපනය අතින්, මිල මුදල් අතින් ඉහළ, පහළ ඕනෑම තරාතිරමක හැම අම්මා කෙනෙක්ටම පොදුයි කියලා ඔය අතරෙදි මම තේරුම් ගත්තා. මගේ අත්දැකීම්, දරුවන් ගැන මට තියෙන ගැටලූ ගැන වෘත්තීමය සුදුසුකම් සහිත පුද්ගලයන් එක්ක සාකච්ඡ කරලා, සටහන් කරන්න මම හිතුවේ දහස් ගණනක් මව්වරුන්ට නිවැරදිම මගපෙන්වීම අවශ්‍ය බව දැණුනු නිසා.

LEAVE A REPLY

Please enter your comment!
Please enter your name here