දක්ෂ දරුවෙක් වෙන ගති ලක්ෂණ නැති වුනොත්…

smart-child

දරුවෙක් විදිහට දක්ෂ කියන ගති පැවැතුම් නැති වුනොත් මොනද වෙන්නේ…මේ ගැන මේ ගැන අදහස් ඉදිරිපත් කරනු ලැබුවේ රජරට විශ්ව විද්‍යාලයේ සෞඛ්‍ය ප්‍රවර්ධනය පිළිබඳ ජ්‍යෙෂ්ඨ කථිකාචාර්ය වෛද්‍ය මනෝජ් ප්‍රනාන්දු මහතා.

අධ්‍යාපනය අඩාලයි

දක්ෂ දරුවා හැමදාම පාසලට එන්න පෙරාතුව අද කළ යුතු දේ ගැන සොයා බලනවා. ඒ විතරක් නොවෙයි, ඊයේ උගන්නපු දේ ගැනත් ආවර්ජනය කරනවා. සමහර විට ඊයේ පාඩමේ ඔහුට නොතේරෙන දෙයක් තිබුනොත් ඒ ගැටළුවත් කොහොම හරි දන්නා කෙනෙක්ගෙන් අහගෙන හෝ නිරවුල් කර ගන්නවා. ඒ නිසා දරුවාට අද දවස කිසිම වෙහෙසක් නැහැ.නමුත් අදක්ෂ දරුවාට මේ සියලු ගැටලු සමග ඉදිරියට යෑම අපහසුයි. ඒ නිසාම ඔහු නොදැනීම පසුගාමී චරිතයක් බවට පත් වෙනවා.

අප්‍රසන්න චරිතයක්

ප්‍රසන්න චරිතයක් වීම ආලේපන වලින් බැහැ. තරහ නැති, ක්‍රෝධය අඩු, දුක නැති දරුවා ප්‍රසන්නයි. එතකොට මිනිස්සු ඒ වගේ දරුවන්ට කැමැතියි. මත්ද්‍රව්‍ය නිසා හම, තොල් කළු පැහැ ගැනෙවා. අද වෙන විට ‍මිනිසුන්ගේ ජීවිතයට බලපාන අහිතකර රසායන 4000 ක් පමණ හදුනාගෙන තිබෙනවා. සිගරට්වල තිබෙන “ෆෝමැන්ඩි හයිඩ්” රසායනයට නිරාවරන වුනාම හම රැලි වැටෙනවා…ඇස් බොර පාටයි…දත් දුඹුරුයි…පාසලේ කිසිම කෙනෙක් ප්‍රිය නැහැ. ඒ වගේම මේ දරුවන් අතර අනාගතයේදී ලිංගික බෙලහීනතාවයත් ඇති වෙනවා.

හැම දෙනාම අකමැතියි

ඉගෙණුමට උනන්දුව දක්වන දරුවාට ගුරුවරුන් ආදරෙයි. ගුරුවරයා වුනත් කැපවීමෙන් කටයුතු කරනවා. ඒත් ඉගෙනුමට උනන්දු නැති දරුවා පංති කාමරයෙනුත් ප්‍රතික්ෂෙප වෙනවා. විවාහයේදී වුනත් සහකාරියක් හොයා ගැනීම අපහසුයි.ඒ වගේ අයත් සමග ජීවිතය ඉදිරියට ගෙනයන්න බැහැ. ඔබේ ගතිතුණ වෙනුවෙන් සහකරු අකමැති නම් එතැන ගැටුමක්. ඒ වගේම නිතරම දුකින්, නුරුස්නාවෙන් ඉන්න චරිතයකට කිසිම කෙනෙක් ප්‍රිය නැහැ. දුමට , මතට ඇබ්බැහි වුනොත් අනාගතයේ බොහෝ දේවල් අහිමි වෙනවා.

හොඳ රැකියාවක් ලැබෙන්නේ නැහැ

රැකියාවක් වෙනුවෙනුත් ආකර්ශනය බලපානවා. අනාගතයේදී රැකියා වෙළඳපොළ බොහොම සීමිතයි. ඒ නිසා පුද්ගලික අංශයටත් යොමු වීමට අනිවාර්යෙන්ම සිද්ධ වෙනවා. පුද්ගලික අංශයේදී අධ්‍යාපන සුදුසුකම්වලටත් වගේම දක්ෂයාට වැඩි අවධානයක් දක්වනවා. ඒ නිසා අනාගත රැකියා වෙළඳපොළ වෙනුවෙන් වර්තමානයේ පටන්ම දරුවන් දක්ෂතාවයන් ගොඩ නගා ගැනීම ඉතාම වැදගත්.

පවුල් ජීවිතය අසාර්ථකයි

දරුවෙක් විදිහට දක්ෂයෙකුගේ ගති ගුණ ගොඩ නගා ගත්තොත් අනාගතයේදී පවුල් ජීවිතය සාර්ථකව ගෙවන්න පුලුවනි. එසේ නොහැකි වුනොත් පවුල් සංස්ථාවන් ඇතුලත ගැටුම් බොහොමයි. ඊට හේතුව පිරිමින් විසින් බිරිඳ පහත් සේ සැලකීමයි. විවාහය කියන්නේ ජීවිතයේ එක්වරක් පමණක් ගත යුතු වැදගත් තීරණයක්. විවාහය වෙනුවෙන් වූ තීරණය වයස අවුරුදු 18 ට කලින් ගත්තොත් ඒ තීරණය පවුල් ජීවිතයට ඉතාම අහිතකර විදිහට බලපානවා.

නිතර රෝගී වීම සහ මරණය ඉක්මන්

දක්ෂ විදිහට ජීවිතය ගොඩ නගා නොගැනීම නිසා දැන් ඔහුට වන්දි ගෙවන්නත් වෙලා. දරුවෙක් විදිහට ඉගෙන ගත්තේ නැහැ. මත්පැන් මත්ද්‍රව්‍ය වලට යොමු වෙලා ජීවිතය විනාශ කර ගත්තා. දැන් විවිධ ලෙඩ රෝගත් ඇවිත් ජීවත්වෙන්න තිබෙන බර මදිවාට ලෙඩ දුක් සේරමත් වැලඳිලා. හදවත් රෝග, අක්මාරෝග, පෙනහලු රෝග මේ වගේ මෙකී නොකී බොහෝ මාරාන්තික රෝගාබාධයන්ට ගොදුරක් වෙලා අවසානයි. ඒ නිසා මරණ වරෙන්තුව බොහොම කලින් ලැබෙනවා.

ඔබ දක්ෂ දරුවෙක් විදිහට ජීවිතය ගොඩ නගා ගන්න තවමත් ප්‍රමාද නැහැ.එහෙම නම් දක්ෂ දරුවෙක් වීමට යොමු වෙන්නේ කොහොමද…?

  • තමා ගැන හිතන්න. ඔබ ගැන ඔබ තරම් දන්නා කෙනෙක් නැහැ. ඒ නිසා ඔබේ ගතිගුණ ගැන හිතන්න.
  • ඔබේ දුර්වලතා දකින්න…ඒවා ඔබ විසින්ම දකින විට නිවරැදි කර ගැනීම ඉතාම පහසුයි.
  • දුර්වලතාවයන්ට හේතු ඔබේ හිතෙන් විමසන්න…එවිට ඒ වෙනුවෙන් වූ හේතු ඔබටම පෙනේවි.
  • දැන් මේ හේතු වෙනස් කරන්න උත්සාහ ගන්න.
  • එතැනින් නවතින්න එපා…වෙනස් කළ යුතු හේතු වෙනස් වුනා දැයි බලන්න.
දක්ෂ දරුවෙක් විදිහට අධ්‍යාපනයට යොමු වෙන්නේ කොහොමද…?

පාසල් දරුවෙක් ලෙසින් ඉගෙණුම ලබන කාලය තුළ ඔබ සාර්ථක චරිතයක් නොවුනොත් අනාගතය තුළ මුහුණ දීමට සිදු වෙන ගැටළු බොහෝය. ඒ නිසා අනාගතය මුල් කර ගෙන ඔබ වර්තමානයේ ඉගෙණුම වෙනුවෙන් කැපවීමෙන් කටයුතු කරන්න.ඒ වෙනුවෙන් මේ පිලිවෙත් අනුගමනය කරන්න.

  • රූපවාහිනී නරඹන කාලය අඩු කරන්න.
  • විනාඩි දහයක් පමණ යොදවා දවසේ කළ යුතු දේ ගැන හිතන්න.
  • ඉගෙන ගන්නා වේලාවට ප්‍රශ්න අසා ඒ ගැන ඇති ගැටලු නිරවුල් කර ගන්න.
  • මාසයක් අවසානයේදී ගෙවුන මාසයේදී ඉගෙන ගත් දේ ආවර්ජනය කරන්න.
  • මත්ද්‍රව්‍ය, මත්පැන් ගැන අසන්න ලැබෙන යම් තොරතුරක් වෙතොත් ඒ බව වැඩිහිටියන්ට දන්වන්න.
  • එලවලු, පළතුරු , ධාන්‍ය ඇතුලත් සමබල ආහාරයක් වෙනුවෙන් යොමු වෙන්න.
  • පැණිබීම වෙනුවට වතුර, කැඳ වැනි පානවර්ග වෙත යොමු වෙන්න.
  • ක්‍රීඩා කරන්න.
  • පොත් කියවන්න.
  • වයස අවුරුදු 18 වෙන තෙක් ප්‍රතිවිරුද්ධ ලිංගිකයන් සමග සබඳතාවයන් ගොඩ නගා ගැනීමෙන් වලකින්න.
  • තමන්ට ඇති වෙන අතවර හෝ අතවර පිළිබද යම් සලකුණක් දැනුනොත් දෙමව්පියන්ට, ගුරුවරුන්ට එසේත් නැත්නම් හිතවතෙකුට හෝ කියන්න.
  • දෙමව්පියන්ට ආදරයෙන් ආමන්ත්‍රණය කරන්න. හොදින් සලකන්න.
  • දරා ගැනීම, තිරණ ගැනීමේ හැකියාවන් දියුණු කර ගන්න.
  • දරුවෙක් විදිහට අද දවසේ මේ ගුණාංග ගොඩ නැගුනොත් අනාගතයේදී දක්ෂ දරුවෙක් විදිහට ඔබ සමාජයට ආශිර්වාදයක් වේවි.
හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here