අපේ සාමාන්‍ය ජනවහරට අනුව නම් යම් දෙයක් වෙනුවෙන් අපේ පෙර සූදානම ඉතාම වැදගත්. කිසිම දෙයක් ආසන්න අවස්ථාවට එන තෙක් බලා සිටීම නුවණට හුරු නැහැ. ඊට හේතුව අන්තිම අවස්ථාවේදී අපි අපේක්ෂා නොකරන අන්දමේ විවිධ ගැටළු සහ කරදර ඇති වෙන්න පුලුවනි. ඒ නිසා හැම දෙයක් වෙනුවෙන්ම පෙර සූදානම ඉතාම වැදගත්. සිංහල අලුත් අවුරුද්ද වෙනුවෙනුත් අපේ කල් තබාම සූදානම් වීම ඉතාම වැදගත්.
- ඒ කොහොමද…තවකල් තියෙනවානේ..
කල් තියෙන බව ඇත්ත.කාලය ගෙවෙන්නේ අපිට උවමනා විදිහට නොවෙයි. ඊටත් අවුරුද්දක් කියන්නේ අපිට අහඹුවෙන් ඇති වෙන අවස්ථාවකුත් නොවෙයි. ඒ නිසා සිංහල අලුත් අවුරුදු සිරිත් ඔබ දන්නවා නම් ඒ වෙනුවෙන් සූදානම මේ වෙන විටත් පටන් ගෙන අවසාන විය යුතුයි.
මුලින්ම ඔබට අවශ්‍ය තෑගි බෝග තෝරා ගන්න. බොහොම දෙනක් මේ අවස්ථාවන් ගැන එතරම් තැකීමක් කරන්නේ නැහැ.තව කල් තියෙනවානේ…කියමින් හිත හදා ගන්නවා.
ඒත් අන්තිමට කටයුතු ගොඩයි. සේරම එකට එකතු වෙලා. දැන් හුස්ම ගන්නවත් වේලාවක් නැහැ කියන මැසවිල්ල නගන්න පටන් ගනන්වා. අනේ තවම අවුරුදුවලට අඳින්නවත් දෙයක් ගන්න ලැබුනේ නැහැ. පොඩි අයටවත් මුකුත්ම ගන්න බැරි වුණා.
ඒත් අපිට අවුරුදු වෙනුවෙන් අලුත් නොවී ඉන්න බැහැ. ඒ නිසා අවුරුදු මිලදී ගැනීම අන්තිම මොහොතේ පටන් ගන්නවා. ඒ වෙනවිට හොඳ ඇඳුම් සේරම අලෙවි වෙලා අවසානයි. අපිත් යන්නේ හදිසියේ බවත් මොනවා තිබුනත් දැන් මිළට ගන්න බවත් වෙළෙඳ ප්‍රජාවත් දන්නවා. ඒ නිසා මිළ වුනත් නොවටිනා විදිහට ගෙවන්න සිදු වෙනවා.
අවුරුදු කටේ තියලා ඇඳුම් මිළට ගත්තොත් ඒවායේ යම් වෙනසක් වුනොත් මාරු කරගනන්වත් බැහැ. සිංහල අලුත් අවුරුද්ද කියන්නේ අපේ ජාතික මහෝත්සවයක් නිසා සතියක් විතර කාලයක් අවුරුදු සමරන කොට නැවත මේ ආයතන විවෘත වෙන්නේ ටිකක් දින ගෙවී ගියාමයි. ඒ නිසා ඔබට යම් වෙනසක් වුනොත් ඒවා මාරු කර ගන්නත් අවස්ථාවක් නැහැ.
- අවුරුදු වෙනුවෙන් කැවිලි හදනවා නම්
ඔබ සමීපයේ ඒ වෙනුවෙන් සැලසුමක් තිබෙනවා. කැවුම් බදිනවා නම් තෙල්, පැණි… වෙනත් කැවිලි හදනවා නම් ඒ වෙනුවෙන් වූ අමුද්‍රව්‍ය තිබෙනවා. අන්තිම මොහොත වෙන තෙක් සිටින විට සමහර අවස්ථාවලදී මේවායේ මිළ ඉහළ යෑම්, අමුද්‍රව්‍ය හිගයක් වැනි නොහිතන සිදුවීම් ඇති වෙන්න පුලුවන්. ඒ නිසා ඔබේ සැලසුමට අනුව කැවිලි පිළියෙල කරන දේවල් වුනත් නිවසේ ගබඩා කර ගැනීමත් ඉතාම වැදගත්.
- කෙසෙල්කැන් ඉදවන්න..
අවුරුදු මේසයට කෙසල්කැන් අනිවාර්යයි. ඒ වගේම කෙසෙල් බොහොම ගුණ පළතුරක්. නමුත් අද කෙසෙල් ඉදවීමට යොදා ගන්නා කාබයිට් නිසා කෙසෙල් ගැනත් තියෙන්නේ බියක්. ඒ නිසා නිවසේදීම කෙහෙල්කැන් ඉදවා ගන්නත් පුලුවනි. එදා මේ කෙසෙල්කැන් ඉදවීම බොහොම විනෝදයක් වුණා. ඒ වෙනුවෙන් දුම් ගැසීම පුංචි අයගේ කටයුත්තක්. එයින් විශාල විනෝදයකුත් ඔවුන්ට ලැබුණා.කෙසෙල්කැනේ ප්‍රමාණයට වලක් සකස් කරලා ඒ වලේ අඩියටම පිදුරු දානවා. දැන් කෙසෙල්කැන මේ වලට බහා එහි මතුපිටට කෝටු වලින් කොටු කොටු වැටෙන සේ කෙසෙල්කැනට පස් නොවැටෙන විදිහට තබනවා. දැන් මේ කෝටු මතට පස් දමන අතර මැදින් මුට්ටියක හිලක් සාදා එය වල මැදින් තබනවා. පිදුරු ආදිය දමා මේ මුට්ටියට දුම් පත්තු කරල ඒවා කෙසෙල්කැන ඇති වලට යන සේ පිඹිනවා. වලෙන් පිටට දුම් එන්නේ නැති විදිහට සකස් කරන්න ඕන. දුම් එන තැන් තිබෙනවා නම් ඒවා නැවත පස් දමමින් වසනවා. මේ විදිහට උදේ හවස දුම් පිඹලා කෙසෙල්කැන ගොඩ ගනිද්දී කහපාට වෙලා. එතැන් පටන් කෙසෙල් කැන ඉක්මනින්ම ඉදෙනවා.
- සමහර යුතුකම් කලින්ම කිරීමටත් පුලුවන්..
අවුරුද්ද වුනත් අපිට කාලය සමග ගණුදෙණුව ඉතාම වැදගත්. ඒ නිසා පවුලෙන් දුරස්ව සිටින දරුවන්ට තමාගේ නිවසේ කටයුතු සමග දුර සිටින දෙමව්පියන් බැලීමට යෑමත් අනිවාරයෙන්ම සිදු විය යුතු වුනත් මේ යුතුකම නොදැනීම මග ඇරෙන්න පුලුවන්. ඒ නිසා තමන්ගේ මව්පියන් දැක බලාගෙන ඔවුන් වෙනුවෙන් අවුරුදු තෑගි බෝග ලබා දීමට දැන් කාලය තිබෙනවා. අවුරුදු අවසානයේදී ඇති තදබදය සම පාරට බහිනවාට වඩා මේ සතිඅන්තවල දෙමව්පියන් බැහැ දකින්න අවස්ථාවක් තබා ගැනීම වඩාත් අගෙයි.
