හිතුවොත් සල්ලි හොයන්න ඇයි බැරි?

ජීවිතේ කියන්නේ ලියලා ඉවර කරන්න බැරි පොතක්  වගේ. හැම දවසක්  ආරම්භයේම අලුත් පිටුවක් ලියන්නට පටන් ගන්න අපි දවස අවසානයේ  ඒ පිටුව ලියලා අවසන් කරන්නේ තවත් දවසකට මතු සම්බන්ධයක් තියලා. ් වෙලාවකට තිත්ත වෙලා වහකදුරු වගේ හිතෙන යන මේ ජීවිතය වෙලාවකට ආදරෙන් විඳින්න හිතෙනවා නේද? ඉතින් අපි හැමෝගෙම ජීවිත ඇදගෙන යන්න අපි දරන්නේ පුංචි පහේ මහන්සියක්ද නේද? ඔය අස්සේ පෝසත් ,දුප්පත්, ටිකක් දුප්පත් ,දුප්පත්ම දුප්පත් ජීවිත සමාජය තුල බොහොමයි. මම මේ කියන්න යන්නේ නම් සල්ලි නිසා ඇති වෙන දුප්පත්කම ගැන . විශ්වාස කරන්න දුප්පත්කම අපිම තමයි ළං කරගන්නේ. ඒ කොහොමද?

සල්ලි අපේ ජීවිත වල සතුට නිර්මාණය කරන අපූරූම දේයි. ඉතින් ඒ අපූරූ දේ නිකන් ඔබේ දෝතට වඩියි කියලා බලා හිටියට පලක් නැහැ. සල්ලි ඔබේ අතට එන මාර්ගයක් එළි පෙහෙලි කරගන්න ඕනී.  ඇත්ත කතාවක් කියන්න යන්නෙ

ඔන්න ඉන්නවා කිරි එළදෙන්නු කිහිප දෙනෙක් සහ හරක් කිහිප දෙනෙක්ගෙ අයිතිකාරයෙක්. කිරි දොවලා විකිණීම තමයි රැකියාව. ඉතින් මේ ගව ගාල පිටිපස්සෙ තියෙන්නෙ පුරන් වුණ වෙලක්. ගව ගාලේ ගොම සේරම කඳු කඳු ගොඩ ගහලා. මේ මනුස්සයට පුතාල දෙන්නෙකුත් දුවෙකුත් තමයි ඉන්නෙ. එක පුතෙක් රැකියාවක් කරනවා. අනිත් පුතා ගවගාලේ වැඩ. උදේට කිරි දෙව්වට පස්සෙ හවස් වෙන කල් එයාලාට වැඩක් නැහැ. මේ මිනිස්සු දුප්පත්. ඇත්තටම මේ මිනිස්සු දුප්පත් වෙලා තියෙන්නෙ කම්මැලිකම නිසා නේද? කඳු ගහගෙන ඉන්න ගොම ටික වේලලා පැකට් කලොත් හොඳ ආදායමක් උපයන්න පුලුවන්. අර පුරන් වුණ කුඹුරෙ එළවලු ටිකක් පලා ටිකක් වැවිවොත් එදිනෙදා පරිභොජනයට ගන්න පුලුවන්. ඒත් ඒ ගැන වගක් නැති මේ මිනිස්සු දුප්පත් වෙලා ඔහෙ දුක් විඳිනවා.

අපි හැමෝටම උපයන්න මොකක්ම හරි මාර්ගයක් සොයා ගන්න පුලුවන්. මගේ යහලුවෙක් සිටියා. ඉගෙන ගන්න කාලේ එයා එයාගේ වියදම හොයා ගත්තේ රෑට පීට්සා ඩිලිවර් කරන්නෙක් විදිහට වැඩ කරලා. ඔයාලා දන්නවද අද එයා පිළිගත් විගණන ආයතනයක හිමිකරුවෙක්.

මේ කියන්න යන දේ ගැන නම් ඇත්තටම ඔයාලා ටිකක් විතර පුදුම වේවි. මේ දරුවගෙ වයස අවුරුදු නමයයි. මගේ පුතා ඒ කියන්නෙ තරුකගේ වයසම එයාගෙම පන්තියෙ ඉගෙන ගන්නේ. දන්නවද පොඞ්ඩා බිස්නස් එකක් කරනවා. කඩදාසී භූමරංග රුපියල් 10, කඩදාසී රොකට් රුපියල් 5, කඩදාසී හුලං කාක්කො රුපියල් 5. දවසක් මේ නිර්මාණ තුනම අපේ පුතා ගෙදර අරගෙන ආවා. හැබැයි ඉතින් නොමිලේ දීලා තිබුනෙ ව්‍යාපාරය කරගෙන යන්න මේවයේ මිල ගණන් තීරණය කරලා දිලා තිබුණෙ අපේ පණ්ඩිතයා නිසා. මම ඉතින් පහුවෙනිදම මේ ව්‍යයාපාරිකයා හමුවෙන්න ගියා.”හැමදේටම අම්මගෙනුයි තාත්තගෙනුයි සල්ලි ඉල්ලන්න බැහැනේ. පොත් ගන්න, බිස්කට් කන්න අයිස්ක්‍රීම් කන්න මට මේ සල්ලි වලින් පුලුවන්. ආ තව මම ගෙදර එකතු වුණ මගේ පරණ පොත් වලිනුත් බෑග් හදලා විකුණන්නත් හිතාගෙන ඉන්නෙ. ඒ අදහස නම් දුන්නෙ තරුක”.ව්‍යාපාරිකයා මට අදහස් දැක්වුයේ ඒ විදිහට. ඇත්තටම මේ පොඩ්ඩා දවසක හොඳ ව්‍යාපාරිකයෙක් වෙයි කියලා මට හිතුනා.මේ පොඞ්ඩගෙන් අපේ ජීවිත වලට ගන්න පුලුවන් පාඩමක් තියෙනවා නේද? පුංචි වුනක් සිතුවිලි පුංචි නැති පොඞ්ඩෙක්.

දුප්පත්කමට සාප කර කර නැති බැරිකම කිය කියා හඬා වැලපෙන වෙලාවේ දුප්පත්කම එළවන්නට පුලුවන් සල්ලි හොයන මාර්ගයක් ගැන සිතන්න අපි පුරුදු වුණොත් හොඳයි නේද? උදේ ඉඳන් ටෙලිවිෂනයේ රන් පැයවල් ඔබෙන් උදුරාගන්නේ ඔබේ වටිනා කාලයයි.

 “ව්‍යාපාර පටන් ගන්න ලොකු මුදලක් වැය කරන්න වෙනවා.”

ඔව් ඇත්ත ඒත් ඔබ ඔබ ලඟ ඇති සම්පත් වලින් පෝසතෙක් වන්නට ආරම්භ කරන්න. ගෙවත්තෙ ඉඩ කඩ ඇත්නම් එළවලු පලතුරු වවන්න. ඔබේ පරිභෝජනයට වගේම අතිරික්තය විකුණා ආදායමක් සරි කරගන්නට හැකිය. පේපර් කුයිලින්ග් කලාව කියන්නෙ මේ වන විට වෙළෙඳ පොලේ හොඳ ඉල්ලුමක් ඇති කලාවකි.ඔබ නිර්මාණශීලී නම් සුභ පැතුම්පත් නිර්මාණය කරන්නට හැකියි. ඇඳුම් මසන්නට දක්ෂ නම් ඔබට අඩු මුදලක් වැය කොට කුඩා ඇඳුම් මසන්නට හැකිය. ඔබට කටට රසට උයන්නට හැකි ආහාර පැකට් කර නම් විකිණිය හැකිය. විශේෂයෙන්ම කල් තබා ගෙන කන්නට හැකි අච්චාරු,පොළොස්, කැකිරි. සීනී සම්බල්, වැනි දෑ පිරිසිඳුව සකසා බෝතල් කොට විකිණිය හැකිය. මේ දැක් වූයේ උදාහරණ කිහිපයක් පමණි.

කොහොමද වෙළෙඳ පොළ හදාගන්නෙ. අද වන විට විකල්ප බොහෝමයක් ඇත. ඔබ නිතරම සැරිසරන මුහුණු පොත FB එක තුලම ඔබේ නිෂ්පාදන සඳහා වෙළෙඳ පොලක් සකසා ගත හැකිය. ඔබ දන්නන කියන අයට කියන්නට හැකියි. ඔබේ නිවසට යාබද කඩ වලට ඔබේ නිෂ්පාදන හඳුන්වා දිය හැකිය. සිත ඇත්නම් කල නොහැක්කේ කුමක්ද? සල්ලි නෙමේ ජීවිතය යැයි කීවාට සල්ලි නැතිව ජීවත්විය නොහැකි බව තේරුම් ගන්න. රූප පෙට්ටියේ රඟන නිළියන්ගේ ප්‍රශ්න ගැන සන්තාප නොවී ආර්ථික වශයෙන් ශක්තිමත් වන්නට ඔබ කල යුත්තේ කුමක්දැයි මේ මොහොතේම මේ දැන්ම තීරණය කරන්න.

මා දෙහිවල උසස් තාක්ෂණ ආයතනයේ උසස් ජාතික ගණකාධිකරණය ඩිප්ලෝමා පාඨමාලාව (ව්‍යපාර වාණිජවේදී උපාධියට සමානය) සහ ශ්‍රී ජයවර්ධනපුර විශ්ව විද්‍යාලයේ ව්‍යපාර පරිපාලන උපාධිය හදාරා වසර නමයක කාලයක් සහකාර ගණකාධිකාරිණියක් වශයෙන් වෘත්තීමය නියැලුනෙමි. උසස් පෙළ හා උසස් අධ්‍යපනයෙන් පසුව වෘත්තිමය වශයෙනුත් මා ගණුදෙනු කලේ ගිණුම් වල හර බැර අතර වුවද සංසාර පුරුද්දට මා ලද ප්‍රාග්ධනයක් ලෙස යමක් සුන්දරව දැකීමටත් ,සිතීමටත් ඒ සිතුවිලි අකුරු වලට පෙරලන්නටත් හැකියාව මා සතුවිය. කාන්තාවකට මෙලොව දිනිය හැකි ඉහළම කිරුළට උරුමකම් කියන මා පුතුන් දෙදෙනෙකුගේම අම්මාය. විශ්වයේම ඇති සොඳුරුතම ස්ථානය නිවහනය. එහි සාමය සතුට සෞභාග්‍යය රැඳවිය යුත්තේ අම්මාය. එනිසාවෙන්ම මගේ පුංචි පැටවුන්ගේ රැකවරණය වෙනුවෙන් මා වෘත්තියෙන් සමුගත්තෙමි. මුළුගැන්වී තිබූ ලිවීමේ හැකියාවට පන්නරය ලැබුණේ ඉන් පසුවය. අම්මා පුවත් පතෙහි විශේෂාංග ලේඛිකාවක වශයෙන් ලේඛණ කලාවට පිවිසි මා ලේඛණ කලාවෙන් ඉදිරියට යන්නට අපේක්ෂා කරමි.

LEAVE A REPLY

Please enter your comment!
Please enter your name here