පනීර් – සමහරුන්ට නම් අලුත් කෑමක නමක් වගේ දැනෙනවා ඇත්තේ එයාලා මේවා භාවිතය නැති නිසා වෙන්න පුලුවන්. මම මුලින්ම කියන්න ඕන මම නම් ආසම ආහාර වර්ගයක් තමයි පනීර්. මේවා ඉන්දියන් කෑම වල රස බලන්න කැමති අය නම් ආස කරන කෑමක්. පනීර් කරි එක එක විදියට හදන්න පුලුවන්..ඒ කරියක් එක්ක උනු උනු චපාති, නාන් වගේ රොටී කන්න පුලුවන් බඩ පැලෙනකන්. මෙතරම් පනීර් ලෝලියෙක් වෙච්ච මට, අපේ පොඩ්ඩොන්ට පනීර් හරිම ගුණ බවත්, එක එක ජාතියේ කෑම පනීර් වලින් පොඩ්ඩොන්ට හදල දෙන්න පුලුවන් බවත් දැනගතතේ අපේ බබාට අවුරුද්දකටත් කිට්ටු වෙන්න ආව කාලේදීයි. එදා ඉදන් අද වෙනකන් මම හැකි හැම වෙලාවේම පනීර් බබාගේ කෑමට එකතු කරනවා.
“මොනවද මේ පනීර් කියන්නේ?” කෙනෙක් කල්පනා කරනවා ඇති. “අපෝ ඔය ඉන්දියන් ජරාවල් අපේ ලමයින්ට මොකටද ? මේ ලංකාවේ මෙච්චර කෑම වර්ග තියෙද්දී” තවත් කෙනෙක් කියයි. එහෙම කියන්නේ මේ ආහාරය ගැන තියෙන , මෙහි රස සහ විශේෂයෙන් ගුණ ගැන නොදන්නා කම නිසයි. එහෙනම් මම දන්න කරුණු කීපයක් ඔයාලට කියන්නම්.
පනීර් කියන්නේ ගෙදරදි වුනත් ඉක්මනට හදා ගන්න පුලුවන් සරල චීස් වර්ගයක්. ලංකාවේ සුපිරි වෙළද සල් වලින් පහසුවෙන් ලබා ගැනීමටත් පුලුවන්. නැවුම් එළකිරි වලට එළවලු හෝ පළතුරු වලින් ගන්නා අම්ලයක් (ලෙමන් යුශ වැනි) එක් කර ගැනීමෙන් සකසා ගන්නා, දිය නොවන සුලු චීස් වර්ගයකි. වෙනත් චීස් වර්ග මෙන් මුහුන් එකතු කර දීර්ඝ කාලයක් බලා සිටීමට ද අවශ්‍ය නොවේ. මෙම චීස් කිරි රසයෙන් යුතු අතර එහි තද කුට්ටි ගතිය නිසා නොයෙක් සුප් හෝ ව්‍යංජන සාදා ගන්න පුලුවන් අතර ඒවා රසයෙන් ද ඉහලයි. මෙහි එතරම් ලුනු අඩංගු නොවන නිසාවෙන් පොඩි දරුවන්ට ලුනු රහිත චීස් වර්ගයක් ලෙස දීමට පුලුවන්. මෙය චීස් වර්ගයක් නිසා මේදය ඉහල වන අතර පොඩ්ඩොන් ගේ බර වැඩි කර ගන්නත් උදව් වෙනවා.
පනීර් සෑම විටම භාවිතයට පෙර බැදීමට හෝ පිසීමට අවශ්‍ය නොවේ. එය නැවුම් ලෙස ආහාරයට ගත හැකිය. ඒ නිසා ඔයාලගේ බබාලට ඉක්මණින් හදා ගන්න පුලුවන් කෑම වර්ග රැසක් පනීර් එකතු කර නිමවා ගන්න පුලුවන් වේවි.
පනීර් වියදම අඩුවෙන් ලේසියෙන්ම ගෙදර සාදා ගන්නත් පුලුවන්. මම ඉතා කෙටියෙන් මේවා සාදා ගන්න ක්‍රමය සදහන් කරන්නම්.
- මේ සදහා ඔබට නැවුම් එළකිරි ලීටර් 1ක්, දෙහි හෝ ලෙමන් යුශ එහෙම නැත්නම් විණාකිරි මේස හැදි 1 ක් සහ පිරිසිදු තරමක් ලොකු රෙදි කැබැල්ලක් පමණයි අවශ්‍ය වෙන්නෙ.
- මුලින්ම කිරි ටික භාජනයක දාලා රත් වෙන්න තියන්න. සැරින් සැරේ කිරි උතුරණ කල් හැදි ගාමින් රත් කරන්න.
- කිරි ටික බුබුලු දමමින් උතුරන විට ලෙමන් යුශ හෝ විණාකිරි ටික එකතු කරන්න.
- යම් අවස්තාවක කිරි කැටි වෙන් වීමට පටන් ගෙන පැහැදිලි වතුර ක් සෑදෙන තෙක් හොදින් හැදි ගාන්න. පසුව ලිප ගින්දර වසා දමන්න.
- දැන් මේ දියරය පිරිසිදු රෙදි කෑල්ල භාවිතයෙන් පෙරා රෙදි කෑල්ලට කිරි කැට ටික එකතු කර හිමින් මිරිකා ගන්න.පසුව රෙදිවලින් ඔතා ඇති චීස් පැය 2-3 ක් චීස් වතුර තව දුරටත් බේරෙන්න උඩින් එල්ලා තබන්න.
- දැන් පනීර් එක ලෑස්තියි. ශීතකරණයේ හොදින් ආවරණය කර තබා ගන්න.
පනීර් බබාලට හඳුන්වා දෙන්න පුලුවන් මාස 8, 9 ක් වගේ කාලයේදී. මුලින්ම පොඩ්ඩ පොඩ්ඩ ලබා දී බබා එයට හුරු වූවායින් පසු තරමක ලොකු කෑල්ලක් බැගින් කෑම වලට එකතු කර ගන්න පුලුවන්. සතියකට 2-3 වතාවක් දුන්නාට කමක් නැහැ.
දරුවන්ට පනීර් ලබාදීමේ වාසි බොහෝ තියෙනවා. මම කෙටියෙන් කිහිපයක් මෙසේ සඳහන් කරන්නම්.
- පනීර්හි විවිධ ප්‍රමාණවලින් විටමින් විශාල ප්‍රමාණයක් අඩංගු වේ. දරුවාට ශක්තිමත් ප්‍රතිශක්තිකරණ පද්ධතියක් ලබා දීමේදී මේවා වැදගත් කාර්‍යභාරයක් ඉටු කරයි.
- අස්ථි කාටිලේජ සෑදීමේදී විටමින් බී ප්‍රධාන කාර්‍යභාරයක් ඉටු කරයි. එය පනීර්හි ඉතා හොඳ ප්රමාණයකින් පවතින බැවින්, එය ළදරුවාගේ ශරීරය තුළ ගොඩනැගීමේ ක්‍රියාකාරිත්වයට සහාය වේ.
- පනීර් හි ප්‍රෝටීන් සහ මේද හොඳ ප්රමාණයකින් පවතින බැවින් ළදරුවාගේ වර්ධනයේ මුල් වසරවලදී අවශ්‍ය සියලුම තීරණාත්මක පෝෂණය ලබා දීමට මෙය උපකාරී වේ.
- පනීර් හි කැල්සියම්, පොටෑසියම්, මැග්නීසියම් සහ ප්‍රෝටීන වැනි ඛනිජ විශාල ප්‍රමාණයක් අඩංගු වන අතර එය අතිශයින්ම පෝෂ්‍යදායී වේ.
- දරුවන් ගේ සම සහ හිසකෙස් වල පෝශණයට අව්ශ්‍ය වන පෝශණය පනීර් වලින් ලබා දේ.
ඔන්න දැන් තමයි ඔයාලා බලාගෙන හිටපුම මාතෘකාවට එන්නෙ..කොහොමද බබාලත පනීර් දෙන්නේ? ඔව් ආකාර ගොඩක් තියෙනවා.. හැමදාම කියනවා වගේ අලුතින් ටිකක් හිතුවොත් රෙසිපි ඕන තරම් හදා ගන්න පනීර් උදව් වේවි. මම ඔයාලට යම් අදහසක් දෙන්නම්..
- පනීර් බත් සමග
සාමාන්‍ය විදියට බබාට බත් උයද්දී බත ඉදිලා අවසානයේ ලිපෙන් බාගන්න කලින් පොඩි කෑලි වලට කපා ගත් පනීර් ටිකක් එකතු කර ගන්න පුලුවන්. නැත්නම් පනීර් වල තද ගතිය නිසා බබාට කන්න අමාරු නම් ටිකක් බ්ලෙන්ඩ් කරල බත් එකට එකතු කර ගන්නත් පුලුවන්.
- තම්බගත්ත එළව්ලු එකක් හෝ කීපයක් සමග
කෝලිෆ්ලවර්, කැරට්,අල, බ්‍රොකොලි වගේ එලවලු ජාති එක්ක පනීර් එකතු කරගත්තම හරිම රසයි. බ්ලෙන්ඩ් කරල හරි පුංචියට ග්‍රේට් කරගෙන හෝ කපාගෙන තඹපු එලවල්‍ය් එක්ක පොඩි කරල කවල බලන්න.
- පළතුරු සහ පනීර්
ඇපල්, පෙයාස්, අඹ, කෙසෙල් , ගස්ලබු වගේ පළතුරු පනීර් එක්ක හොදට ගැලපෙනවා. තවත් ඕන තරම් ඇති පළතුරු ජාති. ඔයාලා අත් හදල බලන්න
- නිවිති සමග පනීර්
මේ විදියට නම් ලොකු අයත් කනවා. හරිම රස කරි එකක් හදා ගන්න පුලුවන් නිවිති සහ පනීර් එකතුවෙන්. බබලටත් සරලවම මේ දෙක එකතු කරල දෙන්නයි තියෙන්නෙ.. පොඩ්ඩක් දෙක එකට තෙම්පරාදු කලොත් වඩා රසයි.
- පනීර් කරියක් ආකාරයෙන් සාදා රොටී හෝ බත් එක්ක
මම කෙටියෙන් සදහන් කලොත් ලොකු අපිට වගේ නෙමෙයි පොඩ්ඩොන්ට කුලුබඩු අපි දාන්නේ අඩුවෙන්. මම මගේ පොඩි රෙසිපි එකක් දෙන්නම් කරි එකකට. ඔයාලා නාන්, චපාති වගේ පොඩි රොටියක් මේ කරි එකත් එක්ක බබාලට කවල බලන්න. බත් එක්කත් හොදයි.
මේකට ඕන වෙනවා : –
- පොඩියට කපාගත් හෝ ලියාගත් පනීර් ටිකක්
- එළකිරි හෝ උකු පොල් කිරි
- කජු ගෙඩි කීපයක් අඹරලා හදා ගත්ත පේස්ට් චුට්ටක්
- තක්කාලි ගෙඩි 1/4 හෝ 1/2 ක්
- ලූනු ගෙඩියක් හෝ භාගය්ක්
- සුදුලූනු සහ ඉගුරු පොඩ්ඩ පොඩ්ඩ
මුලින්ම ලූනු, ඉගුරු, සුදුලූනු එකට බ්ලෙන්ඩ් කරගන්න. වෙනම තක්කලිත් බ්ලෙන්ඩ් කරගන්න. තෙල් ටිකක් හට්ටියකට ලිප තියලා ලූනු පේස්ට් එක තෙම්පරාදුවට දාන්න.කජු පේස්ට් එකත් පොඩ්ඩක් දාන්න. පස්සේ තක්කාලි පේස්ට් එකත් දාන්න. ටිකක් වෙලා උකු වෙනකන් උයා ගන්න. පස්සෙ පනීර් ටිකත් එකතු කරන්න. ටිකක් ඉව්වට පස්සෙ එළකිරි හෝ උකු පොල්කිරි ටික ඔයාට අවශ්‍ය ප්‍රමාණයක් එකතු කරගෙන කරි එක උකුවට හදා ගෙන ලිපෙන් බාන්න. බබාට වයස අනුව අවශ්‍ය නම් ලිනු සහ මිරිස් කුඩු එකතු කරන්න (කිරි එකතු කරන්න කලින්)
දැන් ඔයාලට පනීර් කියන්නේ තවත් එක අමුතු කෑමක් නොවෙයි කියල මම හිතනවා. මම පුලුවන් විදියට මම දන්න දේවල් ගොඩක් මෙහි සදහන් කලා. ඔයාලට ප්‍රයෝජනවත් වෙයි කියල පහත රෙසිපි කීපයක් සදහා සබැදි කීපයකුත් මෙතනටම අමුනනවා. ඔයාලාට වඩාත් හොද පැහැදිලි කිර්‍රීම් සහිතව තව අලුත් කෑම රෙසිපි කීපයක් බලා ගන්න පුලුවන් වේවි.
අඹ සහ පනීර්:-
නිවිති එක්ක පනීර්
