රාජකාරි ජීවිතය අපට වෙහෙසක් වුනොත් එයින් ඇති වෙන පීඩනය නිසාම රැකියාවත් එපා වෙන තැනට පත් වෙනවා. රැකියාව ඇත්තටම දේවකාරියටත් වඩා උතුම් බව ඇත්ත.ඒත් රැකියාව තුළ අපි හැසිරෙන අන්දම අනුව රැකියාව අපට ප්‍රියමනාප වීමට වගේම ඉතාම අප්‍රසන්න අත්දැකීමක් බවට පත් වෙන්න පුලුවනි.තොරතුරු සන්නිවේදන තාක්ෂණ සහ වෙන කුමන හෝ කාර්යාලයීය මෘදුකාංග තිබුනත් අපි සේවය කරන්නේ මිනිසුන් විදිහටයි. මේ සියල්ල හසුරුවන්නේ මිනිසුන් නිසා අපේ සිතුවිලි බොහොම ඉක්මනින් වෙනස් වෙනවා. ඒ වෙනස සෘජු විදිහටම රැකියාවට බලපානවා.එහෙමනම් රැකියාව කරන සේවා ස්ථානය අපට අමිහිරි තැනක් නොවන විදිහට හසුරුවා ගන්නේ කෙසේද…?
- වරින් වර අසුනින් නැගිටින්න…
සේවා ස්ථානයකදි ඔබේ භුමිකාවට අදාල රාජකාරි කටයුතු කිරීම පහසු වීම වෙනුවෙන් ඔබ වෙනුවෙන් වූ ආසනයක් ඇත. ඒත් අද බොහෝ දෙනෙකු මේ ආසනයේම සිටිනු විනා ටිකකට හෝ එහා මෙහා ඇවිදීමට අමතක කරති. සේවා තනතුරට අනුව ලිපිගොණු පවා එහා මෙහා කිරීමට සේවකයන් සිටින නිසා අසුනින් නැගිටීමේ අවශ්‍යතාවයක් ඇති වෙන්නේද නැත.
නමුත් ඇමරිකා එක්සත් ජනපයේ කායික රෝග පිළිබඳ විශේෂඥ වෛද්‍යවරුන් සඳහන් කරන අන්දමට දිගු වේලාවක් හිදගෙන රාජකාරි කිරීම බෝනොවන රෝග තත්වයන්ට හේතු වෙන බවයි. ඒ ගැන අපි දැනටමත් දැණුවත්.
ඒ නිසා ඔවුන් පෙන්වා දෙන්නේ පැය බාගයකට වතාවක් හෝ අසුනින් නැගිට අදාල පරිශ්‍රෙය් හෝ එහා මෙහා ඇවිදීම ඉතා වැදගත් බවයි.එවිට සිරුරේ රුධිර ගමනාගමනය යහපත් වීම නිසා ඔබේ මොළයට හොද ඔක්සිජන් පරිවහනයක් සිදු වෙනවා.
- පරිගණක තිර දෙස කඩින් කඩ බලන්න
අද කාර්යාල සම්පූර්ණයෙන්ම ස්වයංක්‍රියකරණය වීම නිසා පරිගණකගත කිරීමට පත්ව තිබෙනවා. ඒත් මෙ දත්ත ඇතුලත් කිරීම සහ හුවමාරරුව සිදු වෙන්නේ මිනිස් ශ්‍රමයේ ආධාරයෙන්. ඒ නිසා පරිගණකයෙන් තොරව රාජකාරි කිරීම දැන් අපහසු තත්වයක්. ඒත් තැනේ හැටියට අපි හැසිරෙන්න ඕන. පමණට වඩා පරිගණක තිරයට නිරාවරණය වෙනවාට වඩා විටින් විට එයින් මිදෙන්න හැකියාව ඔබ විසින්ම සලසා ගැනීම වැදගත්.
බටහිර වෛද්‍යවරුන් පවා පෙන්වා දෙන්නේ දීර්ඝ වේලාවක් පරිගණකය සමග රැඳී සිටියොත් ඇස් පෙනීමේ දුර්වලතාවයන් ඇති වීමට 50% සිට 60% ක් වැනි සම්භාව්‍යතාවයක් පවතින බවයි.මේ නිසා පරිගණක තිරය ඇස් වලට සෘජුවම නිරාවරනය නොවන විදිහට තිරයක් යොදා ගැනීම ඉතාම වැදගත්.
- සෘජුව වාඩි වෙන්න
අද බොහෝ විට අපි රාජකාරියට මුල් තැන දෙනවා මිසක පුටුවේ වාඩි විමේ ඉරියව්ව ගැන එතරම් සැලකීමක් නැහැ.නමුත් මුලින්ම තමුන්ගේ සෞඛ්‍ය ගැන වැඩි තැනක් ලබාදීමත් ඉතාම වැදගත්.
නිතරම පුටුවේ සෘජුව වාඩි වෙන්න. එහෙම නැති වුනොත් පසුකාලීනව කොන්ද ආශ්‍රිත ආබාධ ඇති වෙන්න පුලුවන්.
- ජලය පානය කරන්න
අද කාර්යාල ජීවිතයේදී බොහෝ දෙනෙක් වතුර පානයට යොමු වීමක් නැහැ. වැඩට ගියාම ඒවා අමතකයි කිව්වත් කිසිම විදිහකින් තමන්ගේ ශරීර සෞඛ්‍ය තත්වය අමතක කරන්න එපා. විශේෂයෙන් වායුසමීකරණ තැන්වල සේවය කරන අය වෙනත් අයටත් වඩා වතුර පානය කරනවා නම් වඩාත් හොදයි.
පුද්ගලයෙක් විසින් දිනකට ජලය වීදුරු 8 සිට 10 ක් අතර ප්‍රමාණයක් පනාය කිරීම වැදගත්. එහෙම නැති වුනොත් විජලනය ඇති වීම නිසා විවිධ රෝග තත්වයන්ටත් මග කියන්න පුලුවනි.
පුන්‍යා චාන්දනී ද සිල්වා
