එදා නිරෝධායනය

ඉස්සර කාලයේ මාර්තු මාසය වෙන විට පැපොල, සරම්ප,සහ කම්මුල්ගාය වැනි බෝවන රෝග ඉතා සුලබයි. අද වගේ පුර්ව ප්‍රතිශක්තිකරණ එන්නත් ලබා නුදුන්  නිසාම මේ රෝගවලින් වැලකී සිටීම අපහසුයි. ඒත් මේ කතාවේ තිබෙන වැදගත්ම තත්වය නම් නිවසේ එක් සාමාජිකයෙකුට මේ රෝගය වැළඳුනාට නිවසේ අනිත් අය ඒ රෝගයට ගොදුරු වුනේ නැහැ.

  • කොහොමද…?

බෝවෙනවාය කියන ඉහත රෝගය හැදුන පුද්ගලයා කවුරු වුනත් ඒ කියන්නේ තාත්තා,අම්මා,දුව, පුතා වුනත් ඒ තැනැත්තාව වෙන් කරනවා. රෝගියා වෙනුවෙන් පිඟාන, කෝප්පය පවා වෙනම තැබුවා.ඒ වගේම මේ රෝග ‘‘දෙවියන්ගේ ලෙඩ “ විදිහට සලකනු ලැබුවා.දෙවියන්ගෙන් ලැබෙන දඬුවමක් විදිහට මේ රෝග සැලකුන අතර දෙවියන්ට ගරු කිරීමක් විදිහට ආහාරවලට තෙල්, කහ එකතු කලෙත් නැහැ.නිවසේ පදිංචි හැම දෙනාම මේ පිලිවෙත් අනුගමනය කළා. රෝගියාගේ අතේ පෙරුම්කායම් බැන්දා.නිදන ඇතිරිල්ල යට කොහොඹ කොළ අතුරා තිබුණා.

 

රෝගීන්ට කණ්ණාඩියෙන් මුහුණ බලන්න අවසර දුන්නෙත් නැහැ.මෙතැන මානසික සාධකයක් තිබෙනවා.මුහුණේ තිබෙන වතුර බිබිලි දුටුවාම රෝගියාට යම් කම්පනයක් ඇති වෙනවා.ඒ නිසා කණ්ණාඩියෙන් මුහුණ නොබලා සිටීම මානසික පැත්තෙන් වඩාත් සුදුසු නිසා කණ්ණාඩිය පවා රෙද්දකින් ආවරණය කරනවා.

  • රෝග පැතිරීම වලක්වා ගත්තේ..

ඒ වගේම නිවසට එන අයට තමන්ගේ නිවසේ බෝවෙන රෝගියෙක් සිටිනවා නම් ඒ බව දැනගැනීමට කොහොඹ අත්තක් නිවසේ දොරකඩ එල්ලා තබනවා.එය ඉතා හොඳ සන්නිවේදනයක්.දෙවියන්ගේ ලෙඩ වැළදුන රෝගින් බලන්න පවා ගියේ් නැහැ.රෝගියාගේ නිවසේ අයත් මේ කාලයේදි මලගෙවල්, දරු උපත් සහ මල්වර දැරියන් සිටින නිවෙස්වලට ගියේ නැහැ.මේ නිසා තමන්ගේ ආරක්ෂාව සලසා ගන්නට අවස්ථාව  ලැබුණා.

නෑවේ දින හතක් ගෙවුනාම

දින හතක් ගෙවුනාම රෝගියා ස්නානය කරනවා.ඒත් නාන තොටකට, පොදු ළිදකට යෑම වෙනුවට නිවසේ බොහොම පාන්දරින්ම ස්නානය කලා.ඉරිදාට නවය වැනි දිනයක් යෙදී තිබුනොත් එදිනට නෑවේ නැහැ. නවය නපුරුයි යන අදහසක් තිබුනා.රෝගියා ස්නානයෙන් පසුව නැවත පරිසරයට නිරාවරනය වෙන්න පෙරාතුව දේවාල වෙත ගොස් ආශිර්වාද ලබා ගැනීම නිසා මානසික ශාන්තිය ලැබෙනවා.

  • පිරිත් දේශනා

ඒ වගේම ගමේ දායකයෙක් රෝගි වුනාම පන්සලේ හාමුදුරුවන්ට ආරංචි වුනාම උන්වහන්සේ නිවසටම වැඩම කොට රෝගියාට සෙත් පිරිත් දේශනා කොට පිරිත් නූල් ගැට ගසා පිරිත් පැන් පානයට දුන්නා.විසාලා මහනුවර තුන්බිය ඇති වුන විට ‘‘රතන සූත්‍රය “දේශනා කිරීමෙන් රෝග,මරණ සහ අමනුස්ස බිය පහව ගිය බැව් පිරිතේ ආනිශංසයයි.මේ දිනවල වසංගතයක්ව පැතිරෙන කොරෝනා වෛරස ආසාදිතයන් හෙට අනිද්දාට කෙසේ වෙතත් තවමත් මහනුවර,මාතලේ සහ නුවරඑළිය යන දිස්ත්‍රික්කවලින් වාර්තා වී නැහැ.මේ වෙනුවෙන් හේතුවක් විදිහට පසුගිය 19 වැනි දින පටන් 25 වැනි දින දක්වා විසිහතර පැයේම මහනුවර දළදා මාලිගාවේ මගුල් මඩුවේදී භික්ෂුන් වහන්සේලා විසින් රතන සුත්‍රය සජ්ජායානා කිරීමත් විය හැකියි.

ඒ නිසා ඔබ හැම දෙනාටම බෞද්ධයන් නම් පිරිත් සජ්ජායනාවක් වගේම වෙනත් ආගමිකයන් නම් ඔවුන්ගේ ආගමික යාඥාවන් මගින් ලෝකයටම සෙත් ශාන්තිය ඉල්ලා සිටින්න පුලුවනි.

ආයුබෝවන්..

අතීතයේදී මග තොට මුණ ගැසුන හැම දෙනාටම අයුබෝවන් යන ආමන්ත්‍රණයෙන් සදහන් වුනේ ආයුෂ බොහෝ වේවා යන්නයි.මෙය නිතර නිතර කියැවෙන විටත් යම් ශාන්තියක් ලැබුණා.මෑත කාලයේදී සිප වැළදගෙන හිතවත්කම් පෙන්වීම වෙනුවට එදා දෑත් එකතු කර ‘‘ආයුබෝවන්“ කීම සිංහල සංස්කෘතියයි.දැන් නැවතත් සමාජ දුරස්ථබව ආරක්ෂා කිරීම සමග අපේ ආචාර විධි ඉතාම වැදගත්.

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here