හොඳ දෙමව්පියන්ගේ ලැයිස්තුවට එක් වෙන්න

දරුවන් තරම් සම්පතක් දෙමව්පියන්ට තවත් නැහැ.ඒ නිසාම දරුවන් වෙනුවෙන් තමන්ගේ ජීවිතය වුනත් දෙන්න තරම් දෙමව්පියන්ගේ කැපවීම විශිෂ්ටයි. ඒත් ඔබ නොදැන සිදු වෙන යම් යම් වැරදි නිසා ඇත්තටම ඔබ හොද දෙමව්පියන්ගේ ලැයිස්තුවට ඇතුලත් කරන්න අපහසු වෙනවා.

 

පමණට වඩා ආධිපත්‍යත් එපා

දරුවන් වෙනුවෙන් දෙමව්පියන්ගේ පාලනයක් අවශ්‍ය බව සැබෑ වුනත් මෙය අනවශ්‍ය අන්දමින් ඒකාධිපති පාලනයක් නොවිය යුතුයි.දරුවන්ටත් තමන්ගේ අදහස් උදහස් බෙදා ගැනීමට හැකි ,ඔවුන්ගේ අවශ්‍යතාවයන් නොබියව පැවසීමට සහ දුක වේදනාව බෙදා හදා ගැනීමට සූදානම් දෙමව්පිය න් සැබෑවටම හොඳ ලැයිස්තුවට ඇතුලත් වෙනවා.

 

මුදල් පාලනය ගැන කියා දෙන්න

දරුවන්ට මුදල් ගැන කිසිම වටිනාකමක් නැහැ. ඒ නිසා නාස්තිය ඔවුන්ගෙන් පටන් ගැනීමට පෙරාතුව නිසි විදිහට මුදල් කළමනාකරණය කරන අන්දම ගැන දරුවන්ට කියා දීම ඉතාම වැදගත්. මේ ආදර්ශය දරුවා ඉගෙන ගන්නේ අම්මා තාත්තාගේ මුදල් හසුරුවන රටාව ගැන ලබන අත්දැකීමෙන් නිසා සාර්ථක දෙමව්පියන් ලෙස ඔබ දරුවන්ට මුදල් කළමනාකරනයේ මුල් පාඩම් ගැන දැණුවත් බව ලබා දීම ඉතාම වැදගත්.

 

පක්ෂපාතීත්වය එපා

දෙමව්පියන්ට තමන්ගේ ලෙසින් මසින් සදන දරුවන් එක සමානවම වැදගත්.ඒ නිසා කිසිම වියෙක එක් එක් දරුවන් වෙනුවෙන් විවිධ විශේෂතාවයන් පෙන්වන්න එපා.සමහර විට පොඩි දරුවාට..එහෙම නැත්නම් පරපුර ගෙනියන්න සිටින පුතාට විශේෂතාවයන් දැක්වීම මව් පිය චරිතයට ගැලපෙන්නක් නොවෙයි. ඒ නිසා ඔබ නිතරම කිසිම දරුවෙකු වෙනුවෙන් විශේෂත්වයක් දක්වන බැව් දරුවාට දැනෙන්න ඉඩ තබන්න එපා. දරුවෙකුගේ හදවතේ එවන් සිතුවිලි ගොඩ නැගෙනවා යනු ඔබ හොද මව්පිය භුමිකාවක් නිර්මානය නොකල බවට සාක්ෂියක්.

 

නොසලකා හැරීම

ඉතිං ඔබ මේ නොසලකා හැරීම  කරන්නේ හිතා මතා නොවෙයි.සමහර විට මේ ගැන ඒ තරම් සැලකිය යුතු දෙයක් තිබෙන බවත් ඔබට නොසිතෙන්න ඇති.සමහර විට දවසේ වෙහෙස මහන්සිය නිසාම වෙන්නත් පුලුවනි.එහෙම නැත්නම් තවත් බාල දරුවන් වෙනුවෙන් යොමු වෙද්දී වැඩිමහල් දරුවා ඔබට කරදරයක් ලෙස දැනෙන්න පුලුවනි. නමුත් ඔබ විසින් දරුවා නොසලකා හරිනවා නම් ඔබ හොඳ දෙමව්පියන්ගේ ලැයිස්තුවෙන් ඉවත් වෙනවා.

 

වාචසික අපයෝජනය

දරුවන් අපයෝජනයට පත් වෙන්නේ  ශාරිරිකව පමණක් නොවෙයි.වාචසික වශයෙන්ද දරුවන් අපයෝජනයට පත් වෙනවා. සමහර විට ඔබ මේ වචන කියන්නේ හදවතින් නොවෙන්න පුලුවනි. ඔබේ වචන දරුවාගේ හදවත පසාර කර ගෙන යන්න තිබෙන ඉඩ ගැන දෙමව්පියන් විදිහට ඔබ දන්නේ නැහැ. ඒ නිසා නිතරම දරුවා වාචසික ලෙසින් අපයෝජනයට පත් කරන දෙමව්පියන් හොදයි කියලා කියන්නේ කොහොමද..?

වැරදි ආදර්ශ

අම්මා, තාත්තා වැරදි කරමින් දරුවන් යහමගට යොමු කරන්න බැහැ.ඒ නිසා නිතරම වචනයෙන් කියන්නා වගේ දෙමව්පියන්ගේ ආදර්ශය අවවාදයට වඩා උතුම්.ඒ නිසා දෙමව්පියන් විදිහට නිතරම දරුවන්ට ආදර්ශමත් වීම වැදගත්.ඇදුම් පැළඳුම්, කථා බහ, ආචාරශීලිත්වය යන හැම අතින්ම දරුවන්ට ආදර්ශමත් වීම ඉතාම වැදගත් දරුවන්ට ආදර්ශමත් නොවන දෙමව්පියන් අයත් වෙන්නේ නරක යන ලැයිස්තුවටයි.

 

දරුවන් විශ්වාස කිරීම

දරුවන් සියයට සියයක් විශ්වාස කිරීමට අපහසු බව ඇත්ත. ඒ වුනත් දෙමව්පියන් විදිහට ඔවුන් විශ්වාස කරන බවත් ඒ විහ්වාසය ආරක්ෂා කිරීම දරුවන්ගේ යුතුකම බවත් පැහැදිලිව කියා දෙන්න.එසේ නොමැතිව මම ඔයාව විශ්වාස කරන්නේ නැහැ..යන සංකල්පයෙන් දරුවා දෙස බැලීම එතරම් සුදුසු නැහැ.ඒ නිසා දරුවා විශ්වාස කරන බව පෙන්වීම සමග වටපිටාවෙන් මේ ගැන විපරම් කිරීම හොඳ දෙමව්පියන්ගේ හැකියාවක්.

 

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here