පවුලක අම්මා,තාත්තා අතර පුංචි පුංචි මත ගැටුම් ඇති නොවෙනවාමත් නොවෙයි. එහෙම නොවෙනවා කිව්වොත් ඒකත් විශ්වාස කරන්න අපහසුයි. නමුත් මේ හැම මත ගැටුමක්ම අතීතයේදී කියන්නා වගේ බත් හැලිය ඉදෙනකම් විතරක් සීමා කර ගන්නවා නම් හොඳයි.සමහර විට ඊටත් පෙරාතුවම විසඳා ගන්න ලැබෙනවා නම් තවත් සුබයි.
අම්මා තාත්තා රණ්ඩු වුනාට කමක් නැහැ දරුවන්ට බලපාන්නේ නැත්නම්…
අම්මා,තාත්තා කියන්නේ පවුලේ වගකිව යුතු චරිත දෙකක්.පවුල නැමැති භූමිකාවේ නියමුවන් විදිහට මේ දෙදෙනා කටයුතු කරද්දී ඔවුන් ඉදිරියේ ඇති වෙන අභියෝග නිසා මතවාද ඇති වීම සාමාන්‍යයි.නමුත් ඒවා නිසා දෙමව්පියන් අතර නිරන්තරව ගැටුම් ඇති වෙන විට එයින් පීඩාවට පත් වෙන්නේ දරුවන් බව අමතක කරන්න එපා.
අපි දරුවන්ට අඩුවක් කරන්නේ නැහැ..මේ සේරම දරුවන් නිසා..
ඇත්ත..ඔබ දරුවන් විෂයෙහි කිසිම අඩුපාඩුවක් කරන්නේ නැහැ. සමහර විට ඔබ සහ සැමියා එහෙම නැත්නම් බිරිඳ අතරේ ගැටුම්වලට මුල පුරන්නෙත් දරුවන්ගේ උවමනාවන් ඉටු කිරීමේදී ඇති වෙන හැලහැප්පිලි විය හැකියි.උදාහරණයක් විදිහට කිව්වොත්..පුතාව අලුත් පංතියකට යවන්න ඕන…ඒ ඔබේ අදහසයි.
ඇයි..? ඔය යවන පංති මදිද..? ඒවාට කොහෙද සල්ලි..මං සල්ලි ගස්වලින් කඩන්නේ නැහැ…තමන්ගේ හැටියට වැඩ කරන්න ඉගෙන ගන්න..
ඔන්න පුංචි අදහස දුර යන ලකුණු පටන් ගත්තා. නමුත් මෙතැනින් ප්‍රශ්නයට කොමාවක් නොව නැවතීමේ තිතක් තබන්න..
දරුවන්ට අවශ්‍ය වෙන්නේ මානසික සතුටයි..
දරුවන්ගේ ලෝකය ආහාරපාන, ඇඳුම් පැළදුම්වලට වඩා සතුටෙන් සුන්දර වෙනවා.ඔවුන්ට නිවස ප්‍රසන්න පරිසරක් විය යුතුයි.එහෙම නැතුව නිවසේ යුධ පිටියක් තිබුනොත් එයින් දරුවන්ගේ සුන්දර ළමාකාලාය නිරපරාදේම විනාශ වෙනවා..
නංගී…තාත්තාට තරහ ගිහින්..
මේ එක් සත්‍ය සිදුවීමක්.මේ පවුලේ පියා තරහ ගිය වේලාවට හැසිරෙන්නේ රා කළ සොලොස පානය කළ නාලාගිරි ඇතා වගෙයි.ඔහුට හසුවෙන හසුවෙන දේ පොළවේ ගසන තරමටම තත්වය දරුණුයි. එක් දිනක් දරුවන් දෙදෙනා සාලයේ සෙල්ලම් කරමින් සිටියදී තාත්තා අම්මා සමග බහින් බස් වෙන බැව් ලොකු දරුවාට තේරුනා. ඔහු වහාම නංගීට කිව්වේ තාත්තාට කේන්ති ගිහිං..සෙල්ලම් බඩු ටික එකතු කරන්න..නැත්නම් මහ විනාශයක් වෙන බවයි.පියාගේ හැසිරීම ඒ තරමටම දරුණු බැව් දරුවන් දන්නවා.
ඔවුන්ගේ කම්පනය මොනතරම්ද..?
සෙල්ලම් වයසේ සිටින වයස අවුරුදු හත,අටක් වුන මේ දරුවන්ගේ හිතේ නිතරම ඇති බිය,සැක මොනතරම්දැයි ඔබට තේරුම් ගත හැකියි.පියා ආවේශ වෙන වෙලාවට දරුවන් සීරුවෙන් සිටින්නේ එහි පසුවිපාක දන්නා නිසයි.ඒ නිසා සාමාන්‍ය පුද්ගලයෙකු ලෙසින් ඔබටත් කේන්ති යන බව සැබෑය. එහෙත් එහි දරුණු ප්‍රතිචාර දරුවන් ඉදිරියේ ප්‍රදර්ශනය කිරීම නම් කොහෙත්ම සුදුසු නැහැ.
දරුවන් පිටින් කේන්තිය පිට කිරීම..
සාමාන්‍යයෙන් වතුර ගලන්නේ මිටි තැනින්නේ..ඒ වගේම පවුලේ සිටින කුඩාම ඒකකය සහ ඔබට අවශ්‍ය අන්දමින් හසුරුවන්න පුලුවන් හැකියාව ඇති දරු පැටවුන් ඉදිරියේ ඔබේ කේන්තිය පිට කරන්න එපා.ඔබ හිතට තට්ටු කරන්න. කී දවසක් ඔබ සැමියාගේ හෝ බිරිදගේ කේන්තිය දරුවන් ඉදිරියේ පිට කර තිබෙනවාදැයි ඔබේ හිතෙන් අසන්න.සමහර විට බඩු මුට්ටු පොළවේ ගසන කේන්තිකාරයෝ සිටිනවා. කේන්තිය නිවුන පසුව ඔවුන් තමන් විසින් සිදු කළ ක්‍රියාවේ අලාබය ගැන දැනගන්නවා.නමුත් ඔබේ කේන්තිය නිසා දරුවාට සැර වැර කිරීම,ඔවුන් පලවා හැරීම (යනවා යන්න..මට වැඩක් කරගන්න දීලා ..මං දැන් කෝටුවක් ගත්තොත්..) ඔවුන්ට පහර දීම නිසා සිදු වෙන මානසික අලාබය නම් තක්සේරු කරන්න බැහැ.
දෙමව්පියන් විවේචනය කරන්න එපා..
ඔබ අතර ඇති වෙන ගැටුම සමග කේන්තිය පිටකිරීමට කිසිම දිනක සැමියා,බිරිඳ දරුවන් ඉදිරියේ විවේචනය කිරීම කිසිසේත්ම සුදුසු නැත.
- තාත්තා මහ බොරුකාරයෙක්..හැමදාම ඉතිං වංචාව තමයි..
- අම්මා දන්නේ ගෙදරට වෙලා මම ගෙනත් දෙන දේ විනාස කරන්න තමයි..ඊට වඩා මොනවද එයා කරන්නේ…
මෙවැනි විවාදාත්මක ප්‍රශ්න දරුවන් ඉදිරියේ තැබීම සුදුසු නැහැ.ඔබ මෙවැනි ප්‍රකාශ කරන්නේ සැමැයි බිරිඳ මුල් කර ගත් ක්ෂනික කෝපය නිසා බැව් සැබෑය. එහෙත් දරුවන්ගේ හිතේ තමාගේ මව,පියා මුල් කර ගෙන ගොඩ නැගෙන සිතුවම එතරම් සුබවාදී නැහැ.ඇත්තටම තාත්තා වංචාකාරයෙක්ද..?අම්මා විනාසකාරියක්ද..?යන අපැහැදිලි සිතුවම් නිසා මව,පියා මුල් කර ගත් ගෞරවණීය සංකල්ප දරුවාගේ හිතෙන් බැහැර වීමට ඉඩ තිබේ.
පවුල් ගහ එපා..
ඔබට යම් ප්‍රශ්නයක් මුල් කර ගෙන මතවාදයක් හෝ ගැටුමක් ඇත්නම් එය ඒ ප්‍රශ්නයට පමණක් සීමා කරන්න.ඒ වෙනුවෙන් පවුල් ගස සම්බන්ධ කර ගන්න එපා.
- ‘ඔයාගේ අම්මා තමයි මේ සේරටම මුල..එයා අපේ ගෙදර ඇවිත් ගියොත් විනාසයි..
- ඇයි අර ඉන්නේ මහ ලොකු අක්කණ්ඩි..එයා තමයි ඔය අදහස් ඔළුවට දාලා අපේ පවුල විනාස කරන්නේ..
- ඔව් අපේ පවුල තමයි වැරදි..ඔයාගේ පවුලේ ඉන්නේ බෝධිසත්වයෝ..නිකම් ඉන්න මං දන්නේ නැති පවුල..
ප්‍රශ්නය ඇත්තේ ඔබේ නිවසේ.නමුත් අහලකවත් නැති අයත් පටලවා ගෙන ඔබේ මේ බහින්බස් වීම් දරුවාගේ මනසට මහත් අපහසුතාවයක් ගොඩ නගන්නට හේතු වේ..
පවුලේ අරගල දරුවාට බලපාන්නේ කොහොමද..?
අම්මයි,තාත්තායි නිතරම රණ්ඩු සරුවල් වෙන විට දරුවාට නිවස ආරක්ෂිත පරිසරයක් නොවන තැනට පත් වෙනවා. කොයි මොහොතේ තාත්තා දුම්මල වරම අතට ගනීද..? අම්මාගේ ශබ්දකෝෂය කොයි මොහොතේ දිග හැරෙයිද..? වැනි හිතේ ඇති නොසන්සුන්තාවය නිසා දරුවාට නිවස එතරම් ප්‍රසන්න තරනක් බවට පත් නොවේවි.
- සමීපතාවය දුරස් වීම
තාත්තාට කේන්ති ගිය වේලාවට දරුවා ඔහුට සමීප වෙන්නේ නැහැ. කේන්තිකාර මානසිකත්වය නිසා තාත්තාගේ ලෝකයේ දරුවන් සමීප කර ගෙන සිඹ සුරතල් කරන්න තරම් සුදුසු වාතාවරණයක් නැහැ. ඒ නිසා දරුවා නිතරම දෙමව්පියන්ගෙන් දුරස් සාමාජිකයෙක් බවට පත් වෙනවා.
- බියෙන් ජීවත්වීම
සාමාන්‍යයෙන් මත්පැන් පානය නිසා පවුල්වල අරගල ඇති වෙනවා කිව්වත් ,මත්පැන් නොබොන පියවරුන්ගේ අඩන්තේට්ටම්ද සුලුපටු නැහැ. ඔවුන්ගේ කේන්තිය දින ගනන් පැසවන තරම් දිගින් දිගට යනවා. අම්මාත් දෙවැනි වෙන්නේ නැහැ. උදේ තේ කෝප්පය පවා දරුවා අත යවද්දී එය සැනින් අරගෙන කෝප්පය කුඩු පට්ටම් කරන පියවරුත් අපේ නැතුවා නොවේ.මෙවැනි අවස්ථාවක දරුවා පියට පත් වීම සාමාන්‍යයි.කෝපප්ය කැට කැබිලිති වුන වේගයෙන්ම පියාගේ ආවේගය දරුවාට තේරුම් ගත හැකියි. ඒ නිසා ඔහුගේ හිතේ ඇති වෙන බිය අනාගතයටත් ගමන් කරන නිසා අම්මාගේ,තාත්තාගේ රන්ඩු සරුවල් සමග පවුලේ ගනුදෙණුවලට දරුවන් හවුල් කර ගැනීමත් සුදුසු නැහැ.
එහෙමනම් ඔබේ පුංචි පුංචි මතගැටුම් දරුවාගේ ජීවිතයට මොනතරම් අහිතකර අන්දමින් බලපානවාදැයි තේරුම් ගන්න.සැමියා බිරිද යනු එකිනෙකාට නොදෙවෙනි විය යුතු චරිත නොව,එකිනෙකා තේරුම් ගත යුතු වගකිව යුතු චරිත බව හිතන්න.ඔබ දෙදෙනා දරුවන්ගේ දෙවියන්ය…ඔබේ ප්‍රසන්න නිවස අප්‍රසන්න පරිසරයක් බවට පත් කර ගත යුතුම නැත
