මුරණ්ඩු පැටියන් සමග ගණුදෙනු කරමු..

පුංචි පැටවුන්ගේ ලෝකය හරිම හුරතල්..ඒත් මේ හුරතල් අස්සේ පුංචි පුංචි මුරණ්ඩුකමුත් නැත්තේම නැහැ.පොඩි වුනත් මේ අයටත් කැමැති ,අකමැති දේවල් තිබීම සාධාරණයි. නමුත් ඒවා ලබා ගැනීමට  කරන අරගලයන්හිදී දක්වන ගති පැවැතුම් ගැන නම් සමහර වේලාවට සතුටු වෙන්න බැහැ.

පොඩ්ඩන්ගේ මුරණ්ඩු ගති පැවැතුම් දැන ගන්නේ කොහොමද…?

සාමාන්‍යයෙන් පුංචි පොඩිත්තන්ගේ ගති පැවැතුම් බැලු බැල්මට පේන්නේ නැහැ. කොකාගේ සුද පෙනෙන්නේ ඉගිලෙන විට වගේ ඒවා ප්‍රදර්ශනය වෙන වේලාවක් තිබෙනවා.

  • තමන් කැමැති දේ ලබා ගන්න.
  • අකමැති දේ නොකර ඉන්න.
  • සමහර වේලාවට දරුවා දන්නෙත් නැති හේතු වෙන්නත් පුලුවනි.

මේ වගේ වෙලාවට දරුවාගේ හැසිරීම..

දරුවන්ගේ මුරණ්ඩු ගති පැවැතුම් හැම දරුවෙකු සම්බන්ධයෙන්ම එක සමාන නැහැ.එක එක දරුවාගේ ප්‍රතිචාර වෙනස්

  • අඩන්න /කෑගහන්න/යටිගිරියෙන් කෑ ගහන්න
  • පොළවේ හැපෙන්න/ඇදුම් ඉරාගන්න/දෙමව්පියන්ට පහර දෙන්න
  • බඩු මුට්ටු පොලවේ ගහන්න/තමන්ව හපා ගන්න
  • රවාගෙන ඉන්න
  • කතා නොකර සිටීම
  • ආහාර වර්ජනය

ඔන්න ඔය විදිහට එක එක දරුවා තමන්ගේ මුරන්ඩුකම් පෙන්වන්නේ වෙනස් වෙනස් විදිහටයි.

දරුවාගේ මුරණ්ඩුකම් සමග දෙමව්පියන්ගේ ගණුදෙණුව කොහොම විය යුතුද..?

පොඩි එකා මුරණ්ඩුයි කියලා අහක දාන්නයැ. පැටියා සමග ජීවිතය ඉදිරියට ගෙන යන්නම ඕන. ඊටත් අද දවසේ හයක් හතරක් නොතේරෙන නිසා මුරණ්ඩුකම් ප්‍රදර්ශනය කළත් හෙට වෙද්දී ඕවා ඇරිලා යාවි කියලාම නිශ්ශබ්ද වෙන්නත් බැහැ. දරුවෙකු මේ හය හතර නොතේරෙන වයසේදී ප්‍රදර්ශනය කරන ගතිගුණ සමග හෙට දවසටත් ගමන් කරනවා. ඒ නිසා නියපොත්තෙන් කඩන්න ඇහැකි දෙය පොරවෙන් කපන තැනට පත් කර ගත යුතුත් නැහැ.

අකමැති දේ නොදී හිටියොත්..කැමැති දේ දුන්නොත්..

ඔබගේ වාසියට එසේ කළත් එයින් වාසියට වඩා සිදු වෙන්නේ අවාසියක්.දරුවා අකමැති දේ නොදී සිටීම ඔබට පහසුවක් විය හැකියි. ඒත් කවදා හෝ දරුවා මේ අකමැති දේ සමගත් ජීවත් විය යුතුයි.උදාහරණයක් විදිහට දරුවා දත් මදින්න අකමැතියි. යුද්ධය පටන් ගන්නේ එතැනදී..ගේ වටේ දුවනවා..අඩනවා.ඒත් දරුවාගේ දත් නොමැද ඉන්න පුලුවනිද..? කොහොමටත්ම එය කරන්න බැහැ. ඒ නිසා අකමැති දේ වුනත් නොකර ඉන්න බැරි අවස්ථාවන් අපේ ප්‍රායෝගික ජීවිතයේදී ඕනෑ තරම් තිබෙනවා.ඒ නිසා අකමැති දෙය ඉදිරියේ දරුවා කැමැති කරවා ගැනීම මිසක ,ඔහු අකමැති දේ නොකර සිටින්නට ඉඩ දීම කිසිසේත්ම විසදුම නොවෙයි.

කැමැති දේ දුන්නොත්…

දරුවා කැමැති දේ ලබා දීම දරුවාගේ වයස සමග එතරම් අපහසුවක් නොවෙන්න පුලුවනි.ඔවුන්ගේ පුංචි ලෝකයේ තියෙන්නේ පුංචි පුංචි ඉල්ලීම්.නමුත් මේ ඉල්ලීම් වුනත් ඉල්ලන පමාවෙන් ලබා දීම සුදුසු නැහැ.සමහර විට දරුවාගේ මුරණ්ඩුකම් ප්‍රදර්ශනය පටන් ගැනීමට පොරාතුව විසඳුමක් විදිහට ඔබ මේ විදිහට දරුවා අවශ්‍ය දේ, අවශ්‍ය වේලාවට ලබා දෙන්න පුලුවනි.

දරුවා කැමැත්තක් දක්වන ආහාර පමණක් දීමෙන් ඔහු සනසවා ගන්නා සුත්‍රය ඔබ දන්නවා. ඒ නිසා දරුවා ”මට බිත්තරයක් ඕන”…. කිව්වොත් එය නොපමාව ලබා දීම එතරම් ගැටළුවක් නොවෙයි. ඒත් ඔහු හෙට ඔහු අහසේ තිබෙන ඉර,හඳ, තරු ඉල්ලා  සිටියොත් ඔබට එය ගෙන දිය හැකිද..?

ඉර,හඳ, තරු දෙන්න පුලුවන් වුනත් ලබා දීම ප්‍රමාද කරන්න..

ඔබට දරුවා ඉල්ලන දෙය ඉල්ලන පමාවෙන් ලබා දීමට හැකි වුනත් ඔවුන් එය ඉල්ලා සිටින ස්වරය අනුව ඉල්ලන සැනින් ලබා දීම සුදුසු නැහැ. එවිට ඔවුන්ට අවශ්‍ය ලෙසින් දෙමව්පියන් හැසිරවිය හැකි බැව් තේරුම් ගන්නවා.ඒ නිසා මුරණ්ඩු ගතියෙන් නොව සාමකාමී ලෙසින් තමන්ගේ ඉල්ලීම් ජයගත හැකි බැව් දරුවන්ට ඒත්තු ගන්වන්න.

මම නම් ටවුමට එක්කගෙන යන්නේ නැහැ..

ඔබ සමග නගරයට පැමිණෙන දරුවා නගරයේ දකින දකින දෙය ඉල්ලා කරන සටන දෙමව්පියන් ලෙසින් දරා ගැනීම පහසු නැත. ඒ නිසා ඔබ දරුවා නිවසේ තබා යෑම පුරුද්දක් කර ගෙන ඇති.සැබැවින්ම එය විසදුමක් නොවේ.ඊට හේතුව එහිදී සිදු වෙන්නේ ඔවුන්ගේ මුරණ්ඩු ගති පැවැතුම් අඩු වීමක් නොව,දරුවා ලෝකයට නිරාවරනය නොවී සිටම පමනි.

දැක්කොත්නේ ඉල්ලන්නේ…

ඒක ඇත්ත.නමුත් කවදා හෝ දිනක ඔවුන් සමාජයට සම්බන්ධ විය යුතුයි. එවිට පසුගිය කාලය පුරාවට නුදුටු ලෝකය දරුවා දකිනු ඇත. එතැනදී ඇති වෙන ගැටුම තවත් දරුණු අතට හැරෙන්න පුලුවනි. ඒ නිසා නිතරම දරුවා සමාජය සමග සම්බන්ධ කරන්න. දකින දකින දෙය ඉල්ලා වැලපෙන්නට දරණ උත්සාහය ඔබට සීමා කර ගත වන්නේ ඔවුන් සමගම සමාජය වටහා ගැනීමෙන් පමණි.

මුරණ්ඩුකම් පාලනය කළ යුත්තේ ඇයි…?

අද ඔබ සමග ගෙවන විසිතුරු ලෝකයම හෙට දිනයේ දරුවා ඉදිරියේදී ලැබෙන්නේ නැහැ.ඔවුන්ට එහිදී වඩාත් සංකීර්ණ ලෝකයක් සමග ගනුදෙණු කිරීමට සිදු වේවි.අද දවසේ තමන්ගේම කැමැත්තට ,තමන්ට අවශ්‍ය අන්දමට පුංචි පවුල් ඒකකය පාලනය කර ගත් නමුදු හෙට දවසේ ආගන්තුක ලෝකය ඔවුන් වෙනුවෙන් එලෙස ප්‍රතිචාර දක්වන්නේ නැත.එහිදී ඔවුන්ට හමු වෙන්නේ විවිධ ගති පැවැතුම් ඇති පුද්ගලයන්. ඒ සියලු දෙනා සමගම සහජීවනයෙන් කටයුතු කිරීමට සිදු වේ.

එහෙමනම් මොකද කරන්නේ..

ඔබ නිතරම දරුවාට අකමැති දේ සමග මෙන්ම කැමැති දේ සමගත් කටයුතු කරන ආකරය පෙන්වා දෙන්න.ඔවුන් අකමැති දෙය වසා තබා කැමැති දෙයට පමණක් නිරාවරනය නොකරන්න.කැමැත්ත සහ අකමැත්ත සමග ජීවත් වෙන පාඩම දරුවා ඉගෙනගන්නේ එවිටය.

 

 

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here