දරු පිළිසද ගැනීමකට සඳහා කාන්තාවකගේ මෙන්ම පුරුෂයාගේත් සරු බව මූලික කරුණක් බව අපි හැමෝම දන්නවා. අන්න ඒ නිසාම ශුක්රාණුවල නිරෝගී බව ඉතාම වැදගත් සාධකයක් බව අමුතුවෙන් කිව යුතු නැහැ. අද අපි ඒ පිළිබඳව දැනුවත් වෙමු.
සාමාන්‍ය නිරෝගී ශුක‍්‍රාණුවක් ඕව්ලාකාර හිසකින් හා දිගු වලිගයකින් යුක්තයි. ශුක‍්‍රාණු නිපදවන්නේ වෘෂණ කෝෂ තුළයි. කලාතුරකින් කෙනෙකුට එක් වෘෂණ කෝෂයක් පමණක් තිබුණද එය පුරුෂයාගේ සරුභාවයට බාධාවක් නොවේ. එක් වෘෂණ කෝෂයක් පමණක් ඇති විට ශුක‍්‍රාණු නිෂ්පාදනයේම මුළු බර එම වෘෂණ කෝෂය බාරගනී. සමස්ත නිෂ්පාදනය ස්වල්පයක් පමණක් අඩු වුනත් එය දරුවන් බිහි කිරීමට කිසිසේත්ම බාධාවක් වෙන්නේ නැහැ.
වෘෂණ කෝෂ පිහිටා ඇත්තේ උදර කුහරයෙන් වෙන්වී එල්ලා වැටෙන ලෙසටයි. ඒ ශුක‍්‍රාණු නිෂ්පාදනයට උෂ්ණත්වය බාධා වන නිසාය. උදරයේ අවයව තුළ පවත්නා උෂ්ණත්වය ශුක්රාණුවල පැවැත්මට අහිතකර වන අතරම සිරුරෙන් පිටතට එල්ලා වැටෙන ආකාරයට වෘෂණ කෝෂ පිහිටා තිබීම මගින් ශුක්රාණුවල උෂ්ණත්වය 70F කින් පමණ අඩුයි.
එවර්ණ දේහාත්මකව බැලූ විට සෑම ශුක‍්‍රාණුවක්ම පුරුෂ ලිංගිකත්වයක් දරන්නේ නැහැ. මේ ශුක්රාණුවල X වර්ණදේහ මෙන්ම Y වර්ණදේහ ද පිහිටයි. ස්තී‍්‍ර වර්ණදේහ රැගත් ශුක‍්‍රාණු ශක්ති සම්පන්න බව හඳුනාගෙන ඇත. මෙහි අරුත වන්නේ X වර්ණදේහයකින් ගැබ් ගැන්වීම Y වර්ණදේහයකින් ගැබ් ගැන්වීමට වඩා පහසු බවයි. පුරුෂයා Y වර්ණ දේහයකින් දායක වීමෙන් උපදින්නේ පිරිමි දරුවෙකි. පුරුෂයා සපයන වර්ණදේහය X නම් උපදින්නේ ගැහැනු දරුවෙකි.
ශුක‍්‍රාණු පිළිබඳව තව දුරටත් පැහැදිලි කරනවා නම්,
ශුක‍්‍රාණු අඩංගු වන්නේ ශුක‍්‍ර තරලය තුළයි. බොහෝ විට මෙම තරලයේ ප්‍රෝටීන, විටමින,ඛනිජ ලවණ, කැල්සියම්, ක්ලෝරින්, සිට්රික් අම්ලය, පෘක්ටෝස්, ලැක්ටික් අම්ලය, මැග්නීසියම්, නයිට‍්‍රජන්, පොස්පරස්, පොටෑසියම්, සෝඩියම්, විටමින් C, B12 හා සින්ක් අඩංගු වේ. මෙහි ඇති ප්‍රෝටීන, ඛනිජ ලවණ, මේද අම්ල සහ අනෙක් සංයෝග මගින් ශුක‍්‍රාණුවේ චලනයට හා ඩිම්බය තුළට ඇතුළු වීමට අවශ්‍ය ශක්තිය සපයයි.
වෘෂණවල ශුක‍්‍ර තරලය නිෂ්පාදනය කර ඒවා වෘෂණයෙහි ගබඩා කර තැබෙන අතරම මෙහි ඇති අම්ල, ඛනිජ ලවණ හා ප්‍රෝටීන මගින් ශුක්රාණුවල සෞඛ්‍යමත් බව පවත්වා ගෙන යයි. තරලයෙන් වැඩි කොටසක් ඇත්තේ පෘක්ටෝස් නම් සීනි වේ. මෙය ඉන්ධනයක් ලෙස ක‍්‍රියා කරන අතරම ශරීරය හරහා ගමනට වැදගත් වේ. ශුක‍්‍ර තරලයේ ඇති තරලයෙන් 25% පුරස්ථි ග‍්‍රන්ථිය මගින් නිෂ්පාදනය කරයි. Zinc යනු මෙහි වඩාත් වැදගත් ඛනිජ ලවණ වර්ගයයි. එමගින් ශුක‍්‍රාණුවේ ඇති DNA ස්ථාවර කරයි. එසේම Zinc මගින් ශුක‍්‍ර තරලයේ පැහැය හා රසය ඇති කරයි. පුරස්ථි ග‍්‍රන්ථිය මගින් ශුක‍්‍ර මෝචනයෙන් පසුව ඒවා ඉතා තුනී තරල බවට කැඩීමට දායක වන ශුක‍්‍ර තරලයේ ඇති PSA නම් ප්‍රෝටීනය සෑදීමට දායක වේ. ශුක‍්‍රාණු ස්වභාවයෙන්ම ඝනකමින් යුක්ත වන අතර එය ගැබ්ගෙලෙහි ඇලීමට දායක වේ. PSA මගින් ශුක‍්‍ර තරලය තුනී කොටස්වලට කැඩීමෙන් ශුක‍්‍රාණු නිදහස් වීම සිදුවේ.
ලිංගික සංසර්ගයේදී ශුක‍්‍රානු පිටවීමට පෙර තරලයක් (Pre-cam) පිටවේ. මෙය ලිංගික සංසර්ගයට සූදානම් වීමේදී නිපදවන අතර මෙම ශ්ලේෂ්මලය ශිෂ්ණයේ පූර්ව කොටස (මුදුන) උත්තේජනය කිරීමට උපකාරී වේ. තවද එමගින් මුත‍්‍ර මාර්ගය හරහා මුත‍්‍රා පැමිණීමද වළක්වයි. මෙයට ආවේණික ගන්ධයක් පවතින නමුත් එය ගන්නා ආහාර හා පුද්ගලයාගෙන් පුද්ගලයාට පවතින නිරෝගී බව හා පිරිසිදු බව අනුව වෙනස් වේ. එසේම කුරුදු, අන්නාසි, පැපොල්, දොඩම් වැනි සමහර ආහාර වර්ග මගින් ශුක‍්‍ර තරලයේ රසය වැඩි කරයි. එනම් ආම්ලික ගතිය අඩු කරයි. එසේම තිත්ත රසයක් ගෙන දීමට සුදු ළුෑණූ, ලූණු, ගෝවා, බ්‍රොකොලි, මස් වර්ග, කිරි නිෂ්පාදන, මත්පැන්, සිගරට්, කෝපි උදව් වේ. මෙහි pH අගය 7.26 – 8.40 පමණ වේ. එසේම සමහර පර්යේෂණ මගින් ශුක්රාණුවල මානසික අවපීඩනය අඩු කිරීමේ ගුණයක් දැකිය හැකි බව පවසයි. එමගින් ලිංගික සංසර්ගයෙන් පසුව මානසික අවපීඩනය අඩු කිරීමටද හේතු වේ.
ශුක‍්‍ර තරලය මිලි ලීටර 1 ක ශුක‍්‍රාණු මිලියන 15 – 200 වඩා වැඩි ප‍්‍රමාණයක් පවතින බව පැවසේ. ශුක‍්‍රාණු විශ්ලේෂණයේදී ශුක‍්‍රාණු ප‍්‍රමාණය, ශුක්රාණුවල හැඩය හා ශුක්රාණුවල චලනය ගැන සලකා බලනවා.
ශුක්රාණුවල ප‍්‍රමාණය අඩු වීමට හේතු
- ආරය
- පෙර කරන ලද ශල්‍යකර්ම
- ලිංගික සම්පේ‍්‍රෂණය වන රෝග
ශුක්රාණුවල ප‍්‍රමාණය අඩු වීමට ප‍්‍රතිකාර ලෙස,
- ශුක‍්‍ර නාල අවහිරතා ශල්‍යකර්ම මගින් නිවැරදි කිරීම
- ප‍්‍රතිජෛවක ලබාදීම (බැක්ටීරියා ආසාධනයකදී ශුක‍්‍රාණු ප‍්‍රමාණය අඩු විය හැකි නිසා)
- උපදේශන (ලිංගික සංසර්ගයේදී ශුක‍්‍රානු ඉක්මණින් පිටවීම හෝ ලිංගික බෙලහීනතාවය)
ශුක‍්‍රාණු ප‍්‍රමාණය වැඩි කිරීම සඳහා පහත ආහාර වර්ග වලින්ද පිටුවහලක් ලබා ගත හැකියි
- පැඟිරි පලතුරු
- ධාන්‍ය
- මාළු
- විටමින් D අධික කිරි හා කිරි නිෂ්පාදන
- සුදු ළුණු
- කෙසෙල්
- නිවිති
- බ්‍රොකොලි
ශුක‍්‍රානු ප‍්‍රමාණය අඩු වීමට හේතු,
- දුම්පානය
- මත්පැන් භාවිතය
- ඇතැම් ඖෂධ වර්ග (ප‍්‍රතිජෛවක ඖෂධ)
- ආතතිය
- අධික බර
මේ අනුව දරුවෙකු බිහිකිරීමේ ක්‍රියාවලියේදී ගැහැණියකගේ ප්‍රජනන පද්ධතිය මෙන්ම පුරුෂයන්ගේ ප්‍රජනන පද්ධතිය ද සුවිශාල කාර්ය බාරයක් ඉටු කරන බව ඔබට වනු නිසැකය.
විශේෂඥ මතය, අදහස සහ මූලික සටහන:
ක්‍රිෂාන්ති ගංගා කුමාරිහාමි මහත්මිය
නවජ සූති දැඩි සත්කාර ඒකකයේ සූතිකා පුහුණු හෙද නිලධාරිනි (1 ශ්‍රේණිය)
පළාත් මහා රෝහල, කුරුණෑගල
