දරුවා සමඟ Puzzles භාවිතයේ වැදගත්කම ඔබ දන්නවාද?

දරුවාගේ වයසට සරිලන ලෙස අධ්‍යාපනික මෙවලම් සොයන ඔබ දැනුවත්ව හෝ නොදැනුවත්ව දරුවන් හට Puzzles මිල දී ගනිති. නමුත් එහි ඇති වටිනාකම හා වැදගත්කම ඔබ නොදන්නවා විය හැකිය. ඒ නිසා අද අපි සාකච්ඡා කරන්න යන්නේ ඒ පිළිබඳවයි.

Puzzles යනුවෙන් හදුන්වන්නේ යම්කිසි පින්තුරයක් කොටස් කර තිබෙන හා එම කොටස් නැවත එකට එක් කර අරමුණු ගත පින්තුරය නැවත සෑදීමට හැකියාව පවතින මෙවලමකි. මෙම Puzzles ලී වලින්, ප්ලාස්ටික් වලින් හෝ කාඩ්බෝඩ් වලින් ද ඔබට තොරා ගත හැකිය. තවද බොහෝ Puzzles සරල සිට සංකීර් න දක්වා විහිදෙන අතර දරුවාගේ වයසට ගැලපෙන පරිදි ඔබට තෝරා ගත හැකිය. Puzzles මගින් දරුවාගේ දියුණු වන කුසලතා අතර,

  1. අවධානය දියුණු වීම

දරුවාගේ වයසත් සමඟ අවධානය පවත්වා ගත යුතු කාල පරාසයන් වෙනස් වේ. කුඩා දරුවන් මිනිත්තු 2-5 අතර කාලයක්, වයස අවුරුදු 03 පමණ වන විට මිනිත්තු 6-15 අතර කාලයක්, අවුරුදු 04 පමණ වන විට මිනිත්තු 8-20 අතර කාලයක් අවධානය පවත්වා ගත යුතු වේ. ඒ අනුව වයසත් සමඟ Puzzles තෝරා ගැනීම තුළින් දරුවා හට එම Puzzles සකසන විට ඊට අවධානය දී එම අවධානය පවත්වා ගැනීමට නිතැතින් ම පුරුදු කරවයි.

  1. අවකාශය පිලිබඳ අවබෝධය දියුණු වීම

Puzzles හදන දරුවා නිතැතින් ම තම අවකාශය පිලිබඳ ඇති අවබෝධය දියුණු කර ගනු ඇත. මන්ද, Puzzles වල ඇති කොටස් සකසන විට තැබිය යුතු නිවැරදි තැන පිලිබඳ අවබෝධය, එය නිවැරදි නොවන තැන තැබූ විට සිදුවන දෙය දරුවා මේ තුළින් අවබෝධ කර ගනු ලබයි.

  1. අරමුණු ගත දැනුම දියුණු වීම

ඇතැම් Puzzles යම්කිසි තේමාවක් යටතේ ගොඩ නැගුවකි. උදාහරණ ලෙස සිතියම්, ශරීර කොටස්, සත්ව ලෝකය ආදිය පෙන්වා දිය හැකි අතර මෙවන් Puzzles සැදීම තුළින් දරුවා ට Puzzles එක පදනම් කරගත් දැනුම ලැබෙනු ඇත.

  1. සියුම් චාලක කුසලතා දියුණු වීම

Puzzles සාදන විට එහි ඇති කොටස් කුඩා වීම, විශාල වීම හෝ ඇල්ලීමට කොටසක් (knob) තිබිය හැකිය. මේවා ඇල්ලීම තුළින් දරුවාගේ සියුම් චාලක කුසලතා දියුණු වීම, පන්සල ඇල්ලීමට හුරු වීම, දෑත් වලින් කුඩා චලන සිදු කිරීමට පුරුදු වීම ආදිය පුහුණු වේ.

  1. ඇස අත සමායෝජනය (Eye Hand Coordination) දියුණු වීම

දරුවන් පෙර පාසල් යන වයසට පැමිණෙන විට පැන්සලින් ලියන විට, පැන්සල සමඟ ඇස ගෙනයාම ට ඇති හැකියාව තිබිය යුතුය. මේ සඳහා අවශ්‍ය වන ඇස අත සමායෝජනය Puzzles සැදීම තුළින් දියුණු වනු ඇත.

  1. ගැටළු විසදීමේ කුසලතා (Problem solving skills) දියුණු වීම

Puzzles යනු එක් ආකාරයක ගැටළුවකි. මන්ද එහි කොටස් ඉවත් කල පසු නැවත සැදීම ගැටළුවකි. එහි කොටස් නිසි තැන නිසි අයුරින් තැබීම තුළින් එම ගැටළුව විසදා ගැනීමට හැකියාව ලැබේ. ඒ සඳහා දරුවා නිවැරදි තීරණ ගත යුතුය. යම් හෙයකින් එය වැරදුනහොත් නැවත සැදිම ද තවත් ගැටළුවකි. ඒ අයුරින් Puzzles තුළින් දරුවන් ගැටළු නිරාකරණය ට නිතැතින්ම පුහුණු කරවනු ඇත.

  1. භාෂාව ගොඩ නගා ගැනීම

Puzzles විවිධය. ඒ හරහා දරුවාගේ වාග්  මාලාව දියුණු කිරීමට හැකියාව පවතී. උදාහරණ ලෙස පලතුරු, එළවලු, ශරීර කොටස්, හැඩතල, අකුරු, ඉලක්කම් ආදී එක් එක් කාණ්ඩ වලට අයත් වචන ඇතුලත් Puzzles දැක ගත හැකි අතර ඒ තුළින් දරුවා ට වචන ඉගැන්වීමේ හැකියාව පවතින අතර ම එය එක් ව සැදීම තුළින් සන්නිවේදනය කිරීමට කුඩා සංවාදයක් ද ගොඩ නගා ගැනීමට හැකියාව පවතී.

  1. දරුවාගේ මතකය දියුණු වීම

Puzzles දරුවාගේ මතකය ක්‍රියාකාරී කරවයි. මෙමගින් දරුවාගේ කෙටි කාලින මතකය දියුණු කරවයි. තවද Puzzles නැවත නැවත සෑදීම තුළින් දරුවා ඒ සදහා ගනු ලබන කාලය අඩු වීම හා වේගය වැඩි වීමද දරුවාගේ මතකය වැඩි වන බවට පෙන්නුම් කරන සාක්ෂි වේ.

  1. සාමාජිය කුසලතා දියුණු වීම 

දරුවන් එක් ව Puzzles සැදීම තුළින් එකිනෙක ට උදවු කිරීම, බෙදා හදා ගැනීම, යහපත් ලෙස තරගකාරිත්වයක් ගොඩ නගා ගැනීම ආදී සමාජීය කුසලතා ද දියුණු කර ගත හැකිය.

  1. දරුවාගේ ආත්ම විශ්වාසය දියුණු වීම

ඇතැම් විට දරුවා ට අපහසු Puzzle එකක් සෑදු විට  “ඔව් මම එක හැදුවා” (yes I did it) යන ආත්ම විශ්වාසය ද මේ තුළින් ගොඩ නැගෙනු ඇත.

ඒ අනුව දරුවන් හට Puzzles සෑදීමට දීම කොතරම් වටිනවාද යන්න දැන් ඔබට වැටහෙනු ඇත. ඒ නිසා දරුවාගේ සෙල්ලම් බඩු හා අධ්‍යාපනික මෙවලම් අතර ට Puzzles ද එකතු කර ගැනීම වඩාත් සුදුසු වනු ඇත.

 

කථන හා භාෂා චිකිත්සක සජිනි පෙරේරා මහත්මිය විසිනි.

 

අප වෙබ් අඩවියට වරින් වර ලිපි සපයන බාහිර ලියුම්කරුවන්ගේ ලිපි සියල්ල මෙම පොදු profile එක හරහා පල කෙරෙනු ඇත.

LEAVE A REPLY

Please enter your comment!
Please enter your name here