දරුවන් යනු දෙමවුපියන් හට ඇති වටිනාම වස්තුවයි. ඒ නිසාවෙන් ම අද වන විට දෙමවුපියන් දරුවන්ගේ කුසලතා පිලිබඳ අවශ්‍යයෙන්ම දැනගත යුතු කරුණු පිලිබඳ වඩාත් දැනුවත්. දෙමවුපියන් හා දරුවා අතර ඇති සබඳතාවය ද (Parent Child Interaction) එවන් එක් වැදගත් කරුණක් බව කිව යුතුය.
ඔබේ දරුවා හා ඔබ අතර ඇති සම්බන්ධතාවය කෙබදුද? ඇතැම් විට දෙමවුපියන් දෙදෙනාම ඉතාමත් කාර්‍යබහුල විය හැකිය. දරුවා සමඟ ගත කිරීමට ඇති කාලය ඉතාමත් අල්ප විය හැකිය. නමුත් දරුවාගේ කුසලතා දියුණු වීම කෙරෙහි මෙම සම්බන්ධතාවය වැදගත් වන බව පරියේෂණ වලින් සොයා ගෙන ඇත. තවද මේ පිළිබද ව සුවිශේෂී ක්‍රමවේද (Approach) ද හදුන්වා දී ඇත.විශේෂයෙන්ම විශේෂ අවශ්‍යතා සහිත දරුවන්ගේ කුසලතා දියුණු කිරීම සදහා ද මෙම ක්‍රමවේද වඩාත් සුලබව යොදා ගනු ලබයි.
- දෙමවුපියන් හා දරුවා අතර ඇති සබඳතාවය යනු කුමක්ද?
මෙය පරියේෂණ මත පදනම් ව ගොඩ නැගු තවත් එක් ක්‍රමවේදයකි. මෙම ක්‍රමවේදය හරහා දරුවා පදනම් කර ගනිමින් දරුවා හා දෙමවුපියන් අතර සබඳතාවය ගොඩ නගා ගන්නා ආකාරය සවිස්තරව විස්තර කරනු ලබයි. මේ තුලින් දෙමවුපියන් ට Parenting techniques වගේම දරුවන් තුල ඇති විය හැකි ගැටළු ආදියට කටයුතු කල යුතු ආකාරයත් සවිස්තරව විස්තර කරනු ලබයි.
- මෙම ක්‍රමවේදය වැදගත් වන්නේ අයි?
මේ තුලින් දෙමවුපියන් හට තම දෙමවුපියභාවය ට අවශ්‍ය වන වැදගත් කරුණු දන ගත හැකි අතර තම දරුවා සමඟ වඩාත් හොදින් කටයුතු කිරීමට අවශ්‍ය ලෙස පසුබිම සකසා ගැනීමට පහසුවක් සලසයි. උදාහරණ ලෙස දරුවා රැකබලා ගන්නා අකාරය, දරුවාගේ කුසලතා දියුණුවට අවශ්‍ය ලෙස දරුවාගේ පරිසරය සකස් කරන ආකාරය, විශේෂ අවශ්‍යතා සහිත දරුවෙකු නම් එම දරුවා සමඟ කටයුතු කරන ආකාරය හා දෙමවුපියන්ගේ වගකීම ද මේ හරහා විස්තර කරනු ලබයි.
- දෙමවුපියන් හා දරුවා අතර ඇති සබඳතාවය ගොඩ නගා ගැනීමට මෙම ක්‍රමවේදයේ විස්තර කර ඇති techniques මොනවාද?
මෙම සම්බන්දතාවය නිවැරදි ලෙස ගොඩ නගා ගනීමට අවශ්‍ය ලෙස දෙමවුපියන් විසින් අනුගමනය කල යුතු techniques මෙම Parent Child Interaction Approach හි මනාව විස්තර කර ඇත.
- අගයන්න. (Praise)
දරුවා කරන සෑම හොද දෙයක්ම ඇගයීමට ලක් කිරීම හා දරුවා ධනාත්මකව ප්‍රශංසා කිරම පළමු පියවරයි.
- නැවත බලන්න. (Reflection)
දරුවා සමඟ හොද සන්නිවේදනයක් ගොඩ නගා ගැනීමට මෙය වැදගත් වේ. දරුවාගේ වචන දෙමවුපියන් විසින් නැවත ප්‍රකාශ කිරීම, ඊට දේවල් එකතු කිරීමට ද මෙහිදී දෙමවුපියන් ව උනන්දු කරවයි.
- අනුකරණය කරන්න. (Imitation)
දරුවා අනුකරණයෙන් බොහෝ දේ උගනි. එමෙන්ම ඔබ දරුවා අනුකරණය කිරීම දරුවා හට ඔබ අනුකරණය කිරීමට මඟ පාදයි. එමනිසා එකිනෙකා අනුකරණය කිරීම ද ඔබට කල හැකි දෙයකි.
- විස්තර කරන්න. (Description)
දරුවා කරන දෙය සරලව පිළිවෙලට විස්තර කිරීම, දරුවා කරන දෙයට අදාළ ව ඊට අදාළ කරුණු සාකච්චා කිරීම තුලින් දරුවා හා ඔබ අතර සබඳතාවය ගොඩ නැගෙන අතර දරුවාගේ වාග් මාලාව දියුණු වීමට ද එය උපකාරී වේ.
- සතුටින් කල් ගත කරන්න.(Enjoyment)
දරුවා කරන සෑම හොද දෙයක් ම අගයනවා මෙන්ම දරුවා සමඟ ගත කරන කාලය ඉතාමත් ප්‍රීතිමත් ව ගත කරන්න. නිත ඔබේ සතුට දරුවාට පෙන්නුම් කරන්න.
- මෙම ක්‍රමවේදය විශේෂයෙන් ම දෙමවුපියන් ට වැදගත් වන්නේ ඇයි?
මේ තුල ධනාත්මකව දෙමවුපියන් හා දරුවා අතර සබඳතාවයක් ගොඩනගා ගන්නා ආකාරය විස්තර කරන අතර ඒහරහා දරුවාගේ කුසලතා දියුණු කරගන්නා අකාරයද විස්තර කරනු ලබයි. විශේෂයෙන් ම හැසිරීම් ගැටළු ඇති දරුවන්ගේ දෙමවුපියන් හට එම හැසිරීම් ගැටළු මග හැර ගැනීමට ද මෙම ක්‍රමවේදය ද උදවු වෙයි.
- මේ පිලිබඳ දැනුම ලබා ගත හැක්කේ කාගෙන් ද?
ළමා රෝග පිලිබඳ වෛද්‍යවරුන්, කථන හා භාෂා චිකිත්සකවරුන් ආදී බොහෝ සෞඛ්‍ය වෘත්තීකයන් මේ පිලිබඳ දැනුවත් බැවින් ඔබට ගැටලුකාරී අවස්ථා වල ඔවුන්ගෙන් ඔබට දැනුවත් විය හැකිය.
තවද විශේෂ අවශ්‍යතා සහිත දරුවන් හට බහුලව භාවිත කරන ක්‍රමවේදයක් වුවද සාමාන්‍ය දරුවන් සමඟ ද කටයුතු කරන දෙමවුපියන් වශයෙන් මෙම සංකල්ප පිලිබඳ දැනුවත් වීම ඔබට වඩාත් පහසුවක් වනු ඇත.
කථන හා භාෂා චිකිත්සක සජිනි පෙරේරා මහත්මිය විසිනි.
