දරුවන්ට පොත් ලබා දීමේදී මව්පියන් ලෙස අපි දැනුවත් විය යුතු බොහොමයක් කරුණු පිළිබඳව ලිපි කිහිපයකින් ඔබව දැනුවත් කළා මතක ඇති. දරුවන්ට පොත් තෝරා ගැනීමේදී සැලකිලිමත් විය යුතු නිර්දේශවලට අනුකූල පොත් කිහිපයක් හඳුන්වා දීමත් ඒ පොත් මගින් දරුවෙකුට හිමිවන ප්‍රතිලාභ ගැන සකච්ඡා කිරීමත් මේ ලිපියේ අරමුණයි. අපි පළමුව තැනිතලාවේ පිහිටි කුඩා නිවස (little house on the prairie), නපුරු පාලකයෝ තුන්දෙනා නම් වූ පොත් දෙක ගැන කතා කරමු.
1.තැනිතලාවේ පිහිටි කුඩා නිවස (little house on the prairie)
මේ කතා පෙල නාට්‍ය මාලාවක් ලෙසත් අපි කුඩා කාලේ නරඹා තිබෙනවා. 1870 දී පමණ ලෝරා ඉන්ගල්ස් විල්ඩර් නම් වූ ඇමරිකානු කතුවරිය විසින් තම ජීවිත කතාව මෙසේ සටහන් කොට ඇති අතරම ඇය තමා කුඩා අවධියේ සිට විවාහ වී දරුවන් දෙදෙනෙක් ලබන කාලය තෙක් තම ජීවිතයේ අත්දැකීම් රසවත්ව ගොනු කර ඇති අතරම ඇය එයින් බලාපොරොත්තු වන්නේ තමා කුඩා කළ දෙමාපියන්ගෙන් ලද උණුසුම තම දරුවන්ට ද එලෙසම ලබා දීමටයි.
ඇමරිකා එක්සත් ජනපදයේ බටහිරට වෙන්නට පිහිටි විස්කොන්සින් පෙදෙසේ ජීවත් වුණු ලෝරා ඇතුළු පවුලේ සැම තම ජීවිත කාලය තුළ විස්කොන්සින් වනාන්තරයේ සිට තව තවත් බටහිර පැත්තට ගමන් කරමින් ගෙවන ජීවිතයේ අත්දැකීම් මෙසේ පොත් නවයක් ඔස්සේ ඇය අප වෙත ගෙන එනවා.
ජීවිතයේ කිසිදු දිනෙක ඇමරිකාවේ විස්කොන්සින් ප්‍රදේශ දෑසින් දැක ගන්න අවස්ථාව උදා නොවුණත් ලෝරා සමග යන ගමනේදී කතා පොත් පෙලේ ඇතුළත් ඉතාම සුන්දර පරිසර වර්ණනාවන් නිසාම ඒ සුන්දර පරිසරය තුළ සිත් සේ සැරි සරන්නට පොත කියවන කාටත් එහි කතුවරිය අවස්ථාව ලබා දෙනවා. මේ කතා පෙලේ පොත් නමය තුළ මොවුන් ස්ථාන නවයකට ගමන් කරනවා. මේ කතුවරිය එහෙමත් නැත්නම් ලෝරාට තමන්ගේ පවුල සමග අපිට හිතාගන්නවත් බැරි විදියේ ඉතාම කටුක අත්දැකීම් සමුදායකට මුහුණ දෙන්න සිදු වෙනවා. සාගින්න, වසංගත, රතු ඉන්දියානුවන්ගේ බලපෑම, හිම කුණාටු පමණක් නෙවෙයි ආර්ථික දුෂ්කරතා, පාසල් ජීවිතයට ඇති වන බාධක වගේ බොහොමයක් දේ ඔවුන් අත්දකිනවා.
මහා හිම පතන මැද වුවත් තුවක්කු රැගෙන ගොස් ලෝරාගේ පියා සතෙක් දඩයම් කරනවා. එයින් කිසිදු මැසිවිල්ලකින් තොරව හොඳම ආහර වේලක් මව සකසනවා. දරුවෝ අම්මා තාත්තා එක්ව ගිලිමැලයක් අවුලුවා ඒ වටේ රවිකිඤ්ඤය වයලා ලස්සන සිංදුවක් කියනවා.
මේ කතා මාලව තුළ අපි මේ දුෂ්කරතා දකින්නේ සාමාන්‍ය හැලහැප්පීම් ලෙස පමණයි. ලෝරා ජීවිතය දකින්නේ ඒ ආකාරයෙන්. ඒ හරහා ජීවිතය කියන්නේ දුක් ගොඩක් නොවන බවත් එය හැල හැප්පීම් මැද ගලා යන සුන්දර සංචාරයක් බවත් ලෝරා අපට ඒත්තු ගන්වනවා. ලෝරා සැමවිටම කතා කරන්නේ ඉතාම චමත්කාර ජනක සෙනෙහස ආදරය පිරුණු පවුල් ජීවිතයක් පිළිබඳවයි.
මේ ලෝරා මොන තරම් ලස්සනට තමන්ගේ ජීවන කතාව ජීවන රිද්මය මේ හරහා කියලා තියෙනවද. අපිට හිතෙන්න පුලුවන් අපේ ජීවිතය හරි දුෂ්කරයි. අපි පොඩි වෙනසකට අකමැතියි. නමුත් ඇය මුළු ජීවිතේම සංචාරයක් කරගෙන මේ පවුල හැමදාම සතුටින් හිටිය විදිය මේ පොත් මාලාවෙන් කියවන්න පුළුවන්. ඇත්තටම මේ පවුල ගැන කියවද්දී ලොකු සතුටක් සැනසිල්ලක් අපේ සිතට එකතු වෙනවා. පරිකල්පන හැකියාව මනා ලෙස වර්ධනය කරවන මේ පොත් පෙළ හරහා ජීවිතය සතුටින් විඳින්න අපට උගන්වනවා. අන්න ඒ නිසාම මම මේ පොත් පෙළ දරුවෙකුට කියවන්න ඉතාම සුදුසු පොත් පෙලක් ලෙස නිර්දේශ කළ හැකියි. (මුල් කෘතියේ රසය නොනැසෙන සේ ඉතාම රසවත්ව මේ පොත් පෙල සිංහල භාෂාවට ද පරිවර්තනය කර ඇත)
2.නපුරු පාලකයෝ තුන්දෙනා
මේ පොත යූරි ඔලේෂා නම් වූ රුසියානු සාහිත්‍යකරුවාගේ නිර්මාණයක්. රුසියානු සාහිත්‍ය ශ්‍රී ලංකාවට ගෙන ඒමේ ගෞරවය බොහෝ විට හිමිවන්නේ දැදිගම ඒ රොද්‍රිගෝ පරිවර්තක තුමාට. එතුමා දැන් ජීවිතුන් අතර නැති වුණත් රුසියානු සාහිත්‍ය, ලංකාවේ ජනප්‍රිය කරන්න එතුමා අනුපමේය මෙහෙවරක් ඉටු කළා. රුසියාව, සාහිත්‍යයෙන් ඉතාම පරිණත වුණු වගේම සාහිත්‍යය ඉතාම ඉහළින් අගය කළ රටක්. රුසියාව කින්නේ මහා විප්ලව ඇති කළ රටක්. පළමුව විප්ලවය ඇති කළ යුත්තේ මිනිසුන්ගේ සිත් තුළ බවත් ඉන්පසුව ඔවුන් රට තුළ විප්ලව ඇති කරන බවත් රුසියාවේ ගත් කතුවරු විශ්වාස කළා. අන්න ඒ නිසාම ඔවුන් කුඩා වියේ පටන්ම දරුවන් විප්ලවය හුරු කළ යුතු බව විශ්වාස කළා. විප්ලවයක් ලෙස අප හඳුන්වන්නේ උද්ඝෝෂණයක්, රැළියක්, පවතින දේශපාලන ප්‍රවාහයට එරෙහිව යෑමක්, සමාජ සාධාරණත්වය සහ යහපත උදෙසා පෙළ ගැසීමක්. අන්න ඒ අරමුණ උදෙසා ලියවුණු පොතක් විදියට නපුරු පාලකයෝ තුන්දෙනා කියන පොත හඳුන්වන්න පුළුවන්.
නපුරු පාලකයන් යනු රටේ සිටින ධනවත්ම පුද්ගලන් තුන්දෙනා. ධනයෙන් 90%ක්ම ඔවුන්ට අයිති වුණත් ඒ ධනයේ පැවැත්ම රඳා පවතින්නේ ඉතිරි 10% සිදුකරන ක්‍රියාකාරකම් මත. මේ කණ්ඩායම් දෙක අතර ගැටුම් ඇති වෙනවා. කතුවරයා එක ආදර්ශමත් චරිතයක් ගොඩනගනවා. ඇය සුවනි. වයස අවුරුදු අටක පමණ දැරියක්. මෙච්චර පුංචි දැරියක් මානව හිතවාදීව තමාගේ සමාජ යුතුකම අවබෝධ කරගෙන මුළු රට වෙනුවෙන් ඉදිරිපත් වෙන්නේ කොහොමද කියලා මේ කතාව තුළින් කියවෙනවා. මේ වන විටත් මහජනයා වෙනුවෙන් පෙනී සිටින ප්රොස්පෙරෝ සහ ටිබුල් යන ජනතා වීරයෝ දෙදෙනා අත්අඩංගුවට පත්ව පෝරකයට නියම වී අවසන්. ඒ දෙදෙනා මරා දැමුණොත් මුළු රටේම අසරණ ජනතාව තවත් අසරණ වෙනවා. සුවනි ලොකු උපක්‍රමයක් අනුගමනය කරමින් තම ජීවිතය ද අවදානමේ හෙලමින් නපුරු පාලකයෝ තුන්දෙනාගේ මාලිගාවට ගොස් ප්රොස්පෙරෝගේ ජීවිතය බේරාගන්න ඉදිරිපත් වෙනවා.
සුවනිට සතුන්ගේ ගඳ දැනුනා… ඇය සතුන්ගේ සුවඳ හඳුනනවා.. ඉස්සර සර්කස් කණ්ඩායමත් එක්ක සිංහයෝ තුන්දෙනෙකුයි ලොකු බල්ලෙකුයි සතුන් මෙල්ල කරන්නෙකුයි තැනින් තැන ගියා. පටු මග අගට කොටුවක වගේ හිස් බිමක්. වටේට කලු පාට ගෙවල් වල කුඩු… සතුන්ගේ කූඩු… සුවනි හෙමින් කිව්වා. අ‍ැගේ හදවත ගැහෙන්න පටන් ගත්තා. සුවනි සතුන්ගේ කූඩු ළඟට ආවා. ප්රොස්පෙරෝ මොන කූඩුවේද? ඇය කැළඹුණා. ඇය ලැන්තෑරුම උස්සලා කූඩුවෙන් කූඩව බැලුවා. හැම කූඩුවක්ම හරිම නිහඬයි. ලැන්තෑරුමේ එළිය කූඩුවට වැටුණා. කූඩුවේ හරස් පොලුවලින් ඇති වෙන හෙවනැලි සතුන්ගේ ඇඟට වැටෙනවා……
සුළු අත්වැරදීමකින් මුරකරුගේ වෙඩි පහරට හෝ සිංහයන්ගේ/කොටියන්ගේ ග්‍රහණයට හෝ සුවනි නතු විය හැකි වුවත් ඒ අවධානම ඇය නොගත හොත් ඔවුන්ගේ ජනතා වීරයා එල්ලා මරා දමනවා.
අවුරුදු අටක දැරියක් මෙවැනි වීරවරියක් වෙන්නේ, තමන්ගේ ජීවිතයට වඩා මහජනතාවගේ පැත්ත ගන්නෙ ඇයි? යම් කිසි කෙනෙක් තමන්ගේ ජීවිතයේ වගකීම අදුර ගත් සැබෑ මානව හිතවාදියෙක් නම් එයාට තමන්ගේ ජීවිතය පවා දෙවැනියි. හැම වෙලාවෙම රට, මහජනතාව තමන්ගේ කියන හැඟීම සිත තුළ ගොඩනැගෙනවා. රටට වගේම ඔබේ මිනිසුන්ට ඔබව අවශ්‍ය වෙන වෙලාවක් තියෙනවා. ඒ වෙලාවට ආත්මාර්ථකාමී වෙන්න එපා…. ඔබ පරාර්ථකාමී වෙන්න.… එවැනි පුද්ගලයෝ ජනතා වීරයෝ ලෙස සදාතනිකව මිනිස්සුන්ගේ සිත් තුළ වැජඹෙන බව ඒ ආදර්ශමත් චරිතය තුළින් ඔහු අපිට වගේම මේ පොත කියවන දරුවාටත් කියනවා. චරිතයේ වීරත්වය පොත කියවන දරුවාටත් ආරෝපණය වෙනවා.
ලොව අංක එකේ රටක් බවට පත්ව සිටි රුසියාවේ යම් කාලයක මෙවැනි දරු පරපුරක් සිටියා. රුසියාව ඒ තැනට පත් වුණේ සැබවින්ම ඔවුන්ගේ සාහිත්‍ය නිසයි. මෙවැනි කතා අපේ දරුවන් කියැවීම වගේම අප විසින් දරුවන්ට ලබා දීමත් අවශ්‍යයි. අද වෙද්දී අපේ දරුවෙක්ට ජනතා වීරයෙක් නිදහස් කරන්න අවස්ථාවක් ලැබෙන්නේ නැහැ. ඒත් පොඩි දරුවෝ හැමෝටම අවස්ථාවක් එනවා රට ගැන හිතන්න. එදාට අපේ දරුවන් තුළ සුවනි දුන් ආදර්ශය තියෙනවා නම් සුවනිට ඇති වුණු කම්පනය දරුවා තුළත් තියෙනවා නම් අපේ දරුවනුත් එදාට අපිට කලින් රට ගැන හිතනවා. එවැනි දරු පරපුරක් බිහි කිරීම අද වන විට ජාතික අවශ්‍යතාවයක් යැයි කීවොත් නිවැරදියි.
විශේෂඥ මතය, අදහස සහ මූලික සටහන:
රේණුකා තෙන්නකෝන් මහත්මිය
ශ්‍රී ලංකා පදනම් ආයතනයේ කාථිකාචාර්ය
