- Advertisement -

කාල රාමුව වගේම වැඩ රාමුවත් වැදගත්.

අපි නිතරම දරුවන්ට කාලසටහනකට අනුව කටයුතු කිරීමට යොමු කිරීම ගැන කතා කරනවා. ඒ වගේම උනන්දු වෙනවා. දරුවන් පමණක් නොවෙයි, වැඩිහිටියන් පවා බොහෝ විට වැඩ කරන්නේ කාල රාමුවක් අනුවයි. උදාහරණයක් විදිහට කිව්වොත් කන්තෝරුවක කාල රාමුව උදේ අටයි තිහේ සිට හවස හතරයි පහලොව එහෙම නැත්නම් උදේ නවයේ සිට හවස පහ දක්වා විදිහට වෙන් වෙනවා. පාසල් කාලය උදේ හතයි තිහේ පටන් හවස එකයි තිහ දක්වා බැව් අපි දන්නවා. ඒ වගේම කාලපරිච්ඡේදයක් විනාඩි හතළිහකට සීමා වෙනවා. දරුවෙක් එක් විෂයක් වෙනුවෙන් රදවා ගැනීමේ කාලයක් විදිහට විනාඩි 40 වෙන් වීම සම්මතයක්.ඉතින් මේ කාලරාමුව තුළ අපේ වැඩ රාමුව ගලපා ගැනීමට හැකියාවක් තිබෙනවාද…?

වැඩක් පටන් ගත්තොත් එය අවසාන කිරීම වැදගත්….

- Advertisement -

පුද්ගලික අංශයේ නම් බොහෝ විට දවසේ ඉටු කළ යුතු වැඩ කොටසක් තිබෙනවා. දවස තුළ ඔවුන් අදාල වැඩ කොටස අවසාන කිරීම වැදගත්.එතැනදී ඔරලෝසු පැය එතරම් වැදගත් නැහැ.ඒ නිසාම අද දවසේ ඉටු කළ යුතු වැඩ කොටස හෙට දිනයට කල් තැබීම අවශ්ය වෙන්නේ නැහැ. ඒත් අපි ඔරලෝසු රාමුවට සිරගත වුනොත් අද දවස පස්වරු පහට අවසානයි නම් ඒ කියන්නේ ඔබ කන්තෝරුවෙන් පිට වීමේ කාලය නිසා අදාල වැඩ කොටස අවසාන කිරීමට නොහැකි වුනොත් හෙට දවස පටන් ගැනීමට සිදු වෙන්නේ අද ඉටු කිරීමට නොහැකි වුන තැනින් බැව් ඔබ දන්නවා. ඒ නිසා ඔබට දවස එතරම් නැවුම් බවක් නැහැ. ඉතින් කාල රාමුවට වඩා ඔබ විසින් අද කළ යුතු දේ හෙටට කල් තැබීමට වඩා එය අද දවසේම අවසාන කිරීම නිසා තවත් දවසකට අලුත් බවකින් මුහුණ දීමට හැකියාවක් ලැබෙනවා.

කාලරාමුව පටන් ගන්න…

පුංචි දරුවන්ට දවස යම් කාලසටහනකට අනුව කටයුතු කිරීමට ඔබ හුරුකරනවා. එය දරුවාගේ ජීවිතයේ යම් සැලසුමක් වෙනුවෙන් වැදගත්. එවිට දරුවාගේ වේලාවට වැඩ කිරීමට වගේම දවස විවිධාංගිකරණයකින් ගත කිරීමට පටන් ගන්නවා. නමුත් දෙමව්පියන් විදිහට ඔබ කාලරාමුව ගැන පමණක් වෙහෙසෙන්න එපා.දරුවාට කාල සටහනකට අනුව කටයුතු කිරීම වගේම අදාල කාල සටහන තුලින් නිම කළ යුතු වැඩ කොටස් නිම කර ගැනීමේ වැදගත්කම ගැනත් කියා දෙන්න.

වැඩ රාමුව ගැන උනන්දුවක් නැහැ…

නමුත් දරුවන් කාල රාමුවක් තුළ සිරගත වුනොත් ඔවුන් අදාල කාලය ගැන මිසක කළ යුතු වැඩ කොටස ගැන එතරම් උනන්දුවක් දක්වන්නේ නැහැ. උදාහරණයක් විදිහට දවසේ පාඩම් වැඩ වෙනුවෙන් පැයක කාලයක් ලබා දුන්නොත් දරුවා ඔරලෝසුවේ කටු අනුව පැය ගත කිරීමට වැඩි උනන්දුවක් දක්වනවා. ඒ නිසා අම්මා විසින් නියම කළ පැයක හෝ විනාඩි තිහක කාලයක් ගෙවා දැමීමෙන් ඔහු ජයග්රහණයක් ලබා ගත් බව දරුවා සිතනවා. සැබැවින්ම එය දරුවා ලද ජයග්රහණයක් නොව ඔවුන් විසින් දෙමව්පියන්ගේ අණසකට අනුකූලව කටයුතු කිරීමක් සිදු කලා පමණක් බැව් අමතක කරන්න එපා. 

අදාල වැඩ කොටස් ගැන අවධානයක් දැක්වීම

අපි වගේම දරුවන්ටත් අද කළ යුතු වැඩ කොටස අදම අවසාන කිරීමට උපදෙස් ලබා දෙන්න. බොහෝ විට දරුවන් නිදිමත, බඩගින්න, හිසරදය, බඩ රිදුම වැනි විවිධාකාරව නිදහසට කරුනු දක්වමින් ඔවුන් විසින් කළ යුතු වැඩ කොටස් හෙටට කල් තබන අවස්ථා තිබෙනවා. නමුත් ඒ අන්දමින් වැඩ කල් තැබීම හෙවත් වැඩ රාමුව නොසලකා හැරීම නිසා දරුවාගේ වැඩ කටයුතු පිලිබඳව ඇති වෙන පසුගාමී බව ගැනත් පැහැදිලිව කියා දෙන්න.

දරුවාගේ ඉගෙනුම් කටයුතුවලදී අදාල විෂය නිර්දේශයක් නියමිතව තිබෙනවා. එය එක් රැයකින් නොව කාලච්චේද අනුව බෙදා වෙන් කළ සහ එක් එක් විෂය වෙනුවෙන් නියමිත කාලයක් තිබෙනවා. පංති කාලසටහනට අනුව අදාල කාලය ලබා දෙනවා.මේ අන්දමින් සිදු වෙන ඉගෙනුම් ඉගැන්වීම් ක්රියාවලියේදී දරුවා තමාගේ අදට නියමිත වැඩ කොටස අදම අවසාන කිරීමට හුරු කරන්න. අද බොහෝ දරුවන් විබාගයට මාස දෙක තුනක් තිබියදී පාඩම් කිරීමට සූදානම් වුනත් ඔවුන්ට විෂය නිර්දේශය සාර්ථක ලෙසින් අධ්යනය කිරීමට අදාල කාලය ප්රමාණවත් නොවනු ඇත. එහෙත් ඔවුන් දවසේ කළ යුතු වැඩ කොටස් නිසි ලෙසින් නිම කර ගෙන සිටියොත් විභාගය සහ සූදානම අතර කාලය ගලපා ගැනීම එතරම් අපහසු කාර්යක් නොවනු ඇත.

 

LEAVE A REPLY

SUBSCRIBE කරන්න ⇢

165,796FansLike
12,900SubscribersSubscribe
- Advertisement -
- Advertisement -

More article