පුතු පැටියාගේ ඇඳුම් පිරිසිදු කිරීම මට ගැටලුවක් නොවුනේ මේ නිසයි

පුතා ලැබෙන්න ඉද්දි හැම අම්මා කෙනෙක්ගේ හිතේ වගේම මගේ හිතේත් දාහක් ගැටලු තිබුණා. එයා මගේ පළවෙනි දරු පැටියා. ප්‍රසූතිය ගැන මගේ හිතේ තිබුණෙත් පුංචි බයක්. ඒත් සැමියාගේ සහයෝගයත් සොයා බැලීම් ආදරය එක්ක මගේ හිත වැටෙන හැම වෙලාවකම මම හිත හයිය කරගත්තා. අපි දෙන්නත් එක්ක එකතු වෙලා පුතාට අලුතෙන්ම ගත්ත රෙදි පිළි සේරම සෝදලා, පිරිසිදු කරලා,  මැදලා බොහොම  පිළිවෙළට රෝහලට ගෙන යන බෑග් එක සූදානම් කරගත්තා. ඒ වගේම මගේ ඇඳුම් බෑග් එකත් අපි සූදානම් කරගත්තා. 

පුතා ලැබිලා මුල් සති දෙක තුන මට රෙදි සෝදන්න අයන් කරන්න අපහසු වෙයි කියලා දන්න නිසාම ඒ වෙනුවෙන් අවශ්‍ය සියලු කළමනා සූදානම් කළා. මොකද මට අපහසු වෙලේ ඒ වගකීම දරන්න වෙන්නේ එක්කෝ මගේ සැමියට, නැත්නම් අපි දෙන්නාගේ අම්මලාට සහ තාත්තලාට. ඉතිං එයාලට මේ කාර්යය වෙහෙස කර වුණත් එයාලා බොහොම ආසාවෙන් පැටියා වෙනුවෙන් ඒ දේවල් කරන්න බලාගෙන හිටියා. අත්තම්මලා සීයලා කෙහොමත් මුණුපුරු මිණිපිරියන්ගේ වැඩ එයාලා අතින්ම කරන්න ආසයිනේ. ඒ නිසා මම එයාලට අවශ්‍ය සියලු දේ රෝහල්ගත වෙන්න කලින්ම සූදානම් කළා. ඒ වගේම මිඩ්වයිප් මිස් කියලා දීපු විදියට දරුවාගේ රෙදි හෝදද්දි දැන ගන්න ඕනේ කරුණු ගැනත් නිකං කතා බහ කරන වේලාවල්වල එයාලට කිව්වා. ඕනෙම අලුත උපන් දරුවෙක්ගේ ඇඳුම් ටික හොඳින් පිරිසිදු කරලා මැදලා ආරක්ෂිතව අසුරන්න විශ්වාසවන්ත කෙනෙක් නම් ඉන්නම ඕනේ. 

මගේ පුංචි පුතාගේ ඇඳුම් සෝදන්න මම සූදානම් කළ දේවල්

• සේදුම්කාරක

මම සබන් කුඩු ගෙනාවේ නැහැ. මොකද සබන් කුඩු කොයිතරම් හේදුවත් රෙදි වල රැදෙනවද කියලා සැකයක් තියෙනවා. ඉතිං එ්වා  නිසා පුතාගේ සමට ආසාදනයක් ඇති වුණොත් කියලා බයක් මට දැණුනා. ඒ නිසා මම පුතාගේ රෙදි හෝදන්න ගත්තේ බේබි සබන් සහ දරුවන් වෙනුවෙන්ම සැකසුණු රෙදි සෝදන දියර.  එ් වගේම මම රෙදි සුමුදු කරන කන්ඩිෂනර් එකක් ගත්තත්, ඒක නම් ඉතාම සුළු ප්‍රමාණයක් තමයි පාවිච්චි කරන්න හිතුවේ. මොකද සුවඳ තියෙනවා කියන්නේ යම් රසායනිකයක් තියෙනවා කියන එක කියලා මම අහලා තිබුණු නිසා මම අම්මලාටත් කිව්වා රෙදි වල සුවඳ යනකම්ම හොඳින් සෝදන්න කියලා. 

• පියන සහිත භාජන දෙකක්

පුතාගේ චූ රෙදි සහ කක්කා රෙදි වෙන වෙනම දාන්න තමයි මම මේවා දෙකක් ගත්තේ. පියන තියෙන නිසා කූඹි වගේ පොඩි පොඩි සතුන්ට ඇතුළු වෙන්න බැහැ. මේ විදියට වෙන් කරලා දැම්මම ඒවා සෝදද්දි හරිම පහසුයි. කොහොමත් රෙදි සේරම එකට දාලා සෝදන්න හොඳ නැහැ. 

• රෙදි සෝදන්න බේසම් දෙකක්

රෙදි සෝදද්දී නම් බේසම් කීයක් තිබුණත් මදි කියලා හිතුණේ පුංචි පුතාගේ ‍රෙදි මුලින්ම සෝදන්න ගත්ත දවසේ. වතුර දාලා රෙදි ටික තෙමන්න බේසමක් වගේම සබන් ගාලා දාන්න බේසමක් මට ඕනේ වුණා. බබාගේ නැපි හොඳට දිග ඇරලා සෝදන්න ඕනේ. එකම බේසමේ තියාගෙන ඒක කරන්න බැහැ. ඒ නිසා මම බේසම් දෙකකුත් ගත්ත. ඒක කරන කෙනාගේ අවශ්‍යතාවය මත තමයි තීරණය වෙන්නේ.

• රෙදි වේලන්න රැක් එකක් සහ අයන් කළ රෙදි අසුරන්න කබඩ් එකක්

අපි ජීවත් වෙන්නේ ජනාකීර්ණ ප්‍රදේශවල. ඉතිං ගමේ ඉන්න කාලේ වගේ ගස් අතර වැල් බැඳලා ඉර අව්ව හොඳට වැටෙන මැස්සෝ වගේ සත්තු නැති තැන් සොයාගන්න මෙහේ නම් ටිකක් අමාරුයි. ඒ නිසා පුතාගේ රෙදි වේලන්න මම රැක් එකක් මිලට ගත්තා. තාප්පේ උඩ, ගස් අතු උඩ, ගල් උඩ විතරක් නෙවෙයි පුටු උඩ දාලා පුංචි පැටියාගේ රෙදි වේලන්න හොඳ නැති නිසා තමයි මම එයා වෙනුවෙන් ඒක ගත්තේ. මොකද පුංචි දරුවෙක්ගේ රෙදි හරිම පරිස්සමට වේලගන්න ඕනේ. මම රැක් එකක් ගන්න තීරණය කළේ ඉර එළිය බොහෝ විෂබීජ ඉවත් කරන නිසා හොදින් ඉර එළිය වැටෙන තැනක පුතාගේ රෙදි ටික හොඳින් වේලගන්න රැක් එක අපට අවශ්‍ය තැනට ගෙනියන්න පුළුවන් නිසයි. ඒ විතරක් නෙවෙයි, රැට වගේම වැස්සක් ආවත් ඉක්මනින් ගේ ඇතුළට ගන්න පහසුත් නිසයි. රෑට දරුවෙක්ගේ රෙදි නිවසින් පිටත තියන්න සුදුසු නැහැ. මොකද අපි දන්නේ නැති වුණාට එක එක කෘමි සත්තු, කුරුල්‍ලෝ මේ රෙදි රැක් එක උඩට එනවා වෙන්න බැරි නැහැ. ඉතිං ඒ නිසා ඒ සතුන් අරන් එන විෂබීජ දරුවාගේ රෙදි වලටත් එනවා. ඒක අවදානමක් නිසා රැක් එක රෑට ගෙට ගන්න එක හැම අතින්ම හොඳයි කියලා මම හිතනවා. පුංචි දරුවන්ගේ විතරක් නෙවෙයි වැඩිහිටි අපේ වුණත් රෙදි රෑට ගෙට ගන්නවා නම් ඒක වඩාත් සුදුසුයි. 

ඒ වගේම පුතාගේ සෝදලා අයන් කළ රෙදි අසුරන්න මම එයා වෙනුවෙන් පුංචි කබඩ් එකක් ගත්තා. එහෙම බැරි නම් හොඳ තත්ත්වයේ ටිකක් ලොකු ප්ලාස්ටික් බොක්ස් එකක් එහෙමත් නැත්නම් බෑග් එකක් ගන්නත් පුළුවන්. ඒක තමන්ගේ කැමැත්ත සහ හැකියාව මත කරන්න පුළුවන් දෙයක්. මේ හාහාපුරා කියලා අපේ පවුලට එන පුංචි පැටියා නිසා ආච්චිලා සීයලා විතරක් නෙවෙයි මාමලා නැන්දලා පුංචිලත් හරි හරියට හැම පැත්තෙන්ම උදව් කළා.

දැන් ඉතිං පුතා ගෙදර ආවම තාත්තට වගේම අත්තම්මලා සීයලාටත් මේ රෙදි වගකීම පැවරෙනවා. ඉතිං මම එයාලට සායනයේදී කියා දුන්නු මේ කරුණු ගැනත් කිව්වා. කොහොමින් කොහොම හරි පුත‍ා ලැබිලා  ගෙදර ආවම තමා තේරුණේ රෙදි කොයිතරම් ප්‍රමාණයක් එයා වෙනුවෙන් දවසකට වුවමනා වෙනවද කියලා. රෑට වැඩි ප්‍රමාණයක් රෙදි එකතු වුණා. චු රෙදි කක්කා රෙදි වෙන් වෙන්ව දාපු නිසා හෝදද්දි අයෙම කාලේ ගත කරගෙන රෙදි වෙන් කරන්න අවශ්‍ය වුණේ නැහැ. චූ තැවරුණු ඇදුම් සෝදන එක අපහසු නැති වුණත් මලපහ තැවරුනු නැපිවල කහට පැල්ලමක් වගේ තියෙන නිසා ඒවා ටිකක් අතුල්ලන්න වෙනවා. ඉතිං උදේම චූ රෙදි ටික පිරිසිදු කරලා රැක් එකට දාද්දිම අර කක්කා තැවරුණු රෙදි ටික කක්කා ඉවත් කරලා පෙ‍ෙඟන්න දාලා ටික වේලාවකින් තමයි අම්මා සේදුවේ. ඒ භාජනයට විශබීජ නාශක දියර බිංදු කීපයක් දාන්න මම යෝජනා කළත් අපේ අම්මා ඒ ගැන වැඩි කැමැත්තක් දැක්වුවේ නැත්තේ හිතකර විෂබීජත් ඒකෙන් විනාෂ වෙයිද කියලා අදහසක් එකතු කරමින්. කොහොම වුණත් සායනවලදීත් විෂබීජ නාෂක යොදන්න කියලා නම් අපට උපදෙස් දුන්නේ නැහැ. ඒ නිසා රෙදිවලට උණු වතුර ටිකක් දාන්න හිතුවා. 

බබාගේ රෙදි සෝදන එක ලොකුම ලොකු වැඩක් වුනු නිසාද මන්දා බබාගේ තාත්තට නම් ඕනේ වුණේ වොෂින් මැෂින් එකට දාලා රෙදි ටික ඉක්මනින් සෝදලා ගන්න. ඒත් මේ පුංචි පැටියෙක්ගේ සුමුදු රෙදි හරිම ඉක්මනට නාස්ති වෙන්න පුලුවන් වොෂින්මැෂින් එකට දැම්මොත්. ඒ අතරේ රෙදි ඇඹරුවොත් බබත් ඇඹරෙන්න ගන්නවා කියලා කතාවකුත් ඇදිලා ඇවිත්. විද්‍යාත්මක සත්‍යයක් නැති වුණත් බබාගේ රෙදි තදින් මිරිකන්න, අඹරන්න එපා කියනවා ඇත්තේ නම් ඒ සිනිදු රෙදි නාස්ති වෙන නිසා වෙන්න පුළුවන්. බබෙක් ඉතිං කොහොමත් ඇඹරෙනවනේ. එයාට වෙන දෙයක් කරන්න බැහැනේ. මම ඒක ගැන හිතුවේ ඒ විදියට.

ඒ කොහොම වුණත් ඉතිං අපි තිරණය කළා බබාට මාස හයක්වත් වෙනකන් එයාගේ රෙදි ටික අතේ සෝදන්න. මොකද එන්න එන්නම මමත් සුව අතට හැරෙන නිසා මේ වැඩ කටයුතු මටම කරගන්නත් ඉදිරියේදී පුළුවන්කම ලැබෙනවානෙ. 

ඉතිං මම මගේ රෙදි සේදුවෙත් බබාගේ සේදුම්කාරකවලින්ම තමයි. පුතා මගේ ඇඟට තුරුළු වෙලා ඉන්න නිසා මගේ ඇඳුම් එයාගේ සමේ තැවරෙනවනේ. එතැනදී ඒක පුතාට නරකක් නොවෙන්න ඕනේ නිසා මම මගේ ඇඳුම් ටිකටත් පුතාගේ සබන්ම පාවිච්චි කළා. ඇඳ ඇතිරිලි, කොට්ට උර, නෙට් එක, දොර රෙදි, ජනෙල් රෙදි හරිම පිරිසිදුවට පිළිවෙළට තියාගන්නත් ඕනේ. ඒ විතරක් ද ජනෙල් දොරවල්, කාමරේ බිම  දූවිලි පිසදමලා පාපිසි අව්වට දාලා පිරිසුදුවට තියාගන්න එක පුංචි පුතාගේ නිරෝගී පැවැත්මට හරිම වැදගත් වෙනවා. අම්මලා තාත්තලා විදියට අපි හැමදේම කරන්නේ අපේ දරුවන් වෙනුවෙන්. අපිට කිසිම දවසක එයාලගේ අත් අතහරින්න බැහැ. අපේ පුතා ලැබුණු මේ වෙලාවෙත් අපි දෙන්නාගේම අම්මලා තාත්තලා අදටත් අපිත් එක්ක සිටීම ඒකට හොඳ උදාහරණයක්. ඉතිං අපිත් කවදාහරි ඒ වගේම වෙයි. හැම නිතරම පසුතැවීමක් ඇති නොවෙන විදියට වැඩකටයුතු සැලසුම් කරගත හැකිනම් නිදුක් නිරෝගී ජීවිතයක් අපි කාටත් උරුම කරගත හැකියි. 

විශේෂඥ මතය, අදහස සහ මූලික සටහන:

ක්‍රිෂාන්ති ගංගා කුමාරිහාමි මහත්මිය

සූතිකා පුහුණු හෙද නිළධාරිනි (I ශ්‍රේණිය)

නවජ සූති දැඩි සත්කාර ඒකකය

පළාත් මහ රෝහල, කුරුණෑගල