20 වන සියවස තෙක් ක්ෂය රෝගය සඳහා ප්‍රතිකාර නොතිබුන අතර 1944 වසරේදී ප්‍රංශ ජාතික වෛද්‍යවරුන් වන කාල්මට් සහ ගුවේනි විසින් BCG එන්නත සොයා ගැනීමත් සමග මෙම එන්නත භාවිතා කිරීම සිදු විය. අදටත් දරුවෙකු වෙනුවෙන් ලබා දෙන මුල්ම ප්‍රතිශක්තිකරණ එන්නත වන්නේ BCG එන්නතයි.
BCG එන්නත
දරුවෙකුගේ උපත ලැබීමත් සමග මුලින්ම ලබා දෙන BCG එන්නත මගින් ක්ෂය රෝගයට එරෙහිව දරුවාගේ සිරුරේ ප්‍රතිශක්තිකරණය ගොඩ නගනවා. නව ජන්ම දරුවා රෝහලෙන් පිටත් වී යෑමට පෙරාතුව මෙම එන්නත ලබා දෙනවා.වම් අත උඩට ලබා දෙන මෙම එන්නත දරුවාට වේදනාවක් නැහැ. උණ තත්වයක් ඇති වෙන්නේ නැහැ.සති 4-8 ක් අතර කාලයේදී පැසවා හෝ පැසවන්නේ නොමැතිව ගැටිත්තක් ලෙසින් දකින්න ලැබෙනවා. මෙම එන්නත ලබා දීමෙන් පසු දරුවා නාවන්නත් වුනත් පුලුවනි. සමහර දරුවන්ගේ මේ එන්නත ලබා දුන් ස්ථානය පැසවන්නේ නැහැ. නමුත් ඒ ගැන අනවශ්‍ය කලබලයක් ඇති කර ගැනීමත් අවශ්‍ය නැහැ. මේ ස්ථානය පැසවීමක් සිදු නොවුනොත් මාස අටකින් පමණ නැවතත් BCG එන්නතක් ලබා දෙනවා.
BCG එන්නත ලබා නොදෙන අවස්ථා තිබෙනවාද…?
සමහර දරුවන්ගේ උපතේදී ඇති වෙන විවිධ සංකුලතාවයන් තිබෙනවා. එවැනි දරුවන්ට ප්‍රතිජීවක (^ antibiotic & ලබා දෙන අවස්ථාවන්හිදී බී.සී.ජී එන්නත ලබා දීම ප්‍රමාද කරනවා.
අඩු බර දරු උපත් සහිත දරුවන්ට එන්නත ලබා දීමට බාධාවක් නැහැ.
ක්ෂය රෝග විෂබීජය
ක්ෂය රෝග විෂබීජය “ මයිකොබැක්ටීරියම් ටියුබර්කියුලොල්සිස් නොහොත් AFB යනුවෙන් හැඳින්වෙනවා. වාතය මගින් බෝවන මෙම රෝගය නිසා නිරෝගි පුද්ගලයෙක් වුනත් ඉතා ඉක්මනින් ආසාදිත වීමට හැකියාව තිබෙනවා. විෂබීජය ශරීරගත වූ පමනින් ආසාදිතයෙක් වෙන්නේ නැහැ. සමහර පුද්ගලයන්ට විෂබීජයට ඔරොත්තු දීමේ හැකියාවක් තිබෙනවා. නමුත් සමහර විට ශරීරගත විෂබීජය යම් අවස්ථාවක මතු වෙන්න පුළුවනි. සමහර විට ජීවිත කාලයටම මෙම විෂබීජයෙන් ඒ පුද්ගලයා ආසාදිත නොවන්නත් පුළුවනි.
ක්ෂය රෝගය කී විට අපේ සිහියට නැගෙන්නේ පෙනහැල්ල මුල් කර ගෙන යම් රෝග තත්වයක් වුනත් අපේ ශරීරයේ පහත දැක්වෙන ඉන්ද්‍රියන් මුල් කර ගෙනත් ක්ෂය රෝග තත්වය ඇති වෙන්න පුළුවනි.
- ස්නායු පද්ධතිය ( මොළය සහ සුෂුම්නාව )
- වකුගඩු
- මුත්‍රාශය
- වසා ගැටිති
- බඩවැල්
- සම
සමහරුන් ක්ෂය රෝගයට ඔරොත්තු දෙන්නත් තවත් අය ආසාදිත වෙනනත් ඇයි…?
ක්ෂය රෝග වෛරසය ක්‍රියාත්මක වන්නේ පුද්ගලයාගේ ප්‍රතිශක්තිය අඩු වුන විටයි. ඒ නිසා ක්ෂය රෝගය ඇති වීමට අවදානම් පුද්ගලයන් මේ අන්දමින් දක්වන්න පුළුවනි.
- දුම්පානය
- ප්‍රතිශක්ති ඌනතාවය සහිත පුද්ගලයින්
- දියවැඩියාව වැනි නිදන්ගත රෝග
- ඒඩ්ස් ආසාදිතයන්
- මන්ද පෝෂණය
රෝග ලක්ෂණ මොනවාද…?
ක්ෂය රෝග තත්වය ඇති විට රෝගියා වෙතින් දක්නට ලැබෙන රෝග ලක්ෂණ කීපයක් තිබෙනවා…
- සති තුනකට වඩා පවතින කැස්ස
- සවස් කාලයේ ඇති වෙන මද උණ
- කැස්ස සමග ලේ පිටවීම
- ශරීර බර අඩු වීම
- ආහාර අරුචිය
- වෙහෙසකර බව
රෝගය හඳුනා ගැනීම…
ඉහත රෝග ලක්ෂන ඔබ වෙතින් හෝ පවුලේ සාමාජිකයෙකු හෝ වෙනත් ඇසුරු කරන පුද්ගලයෙකු වෙතින් දක්නට ලැබෙනවා නම් වෛද්‍ය උපදෙස් ලබා ගැනීම වැදගත්. වෛද්‍යවරයා විසින් සිදු කරන යම් යම් පරීක්ෂණ මගින් රෝග තත්වය තහවුරු කර ගැනීමට පුළුවනි.
ක්ෂය රෝග විෂබීජය විසින් ආසාදනය කරන අවයවය අනුව රෝග ලක්ෂණ ඇති වෙනවා.ස්නායු පද්ධතිය ආශ්‍රිත ක්ෂය රෝග තත්වයක් ඇති වුනොත්..
- හිසරදය
- ආලෝකය දෙස බැලීමේ අපහසුතාවය
- වලිප්පුව
- වමනය
- සිහිමද ගතිය
කොඳු ඇට පෙළ…
ඒ වගේම යම් රෝගියෙක් නිතරම කොන්ද වේදනාව ගැන පැමිණිලි කරනවා නම් හෝ කොන්ද ක්‍රමයෙන් ඇද වෙන තත්වයක් දක්නට ලැබෙනවා නම් එය කොන්ද ආශ්‍රිත ක්ෂය රෝග තත්වයක් විය හැකියි.
මුත්‍රාශය සහ වකුගඩු…
අපේ මුත්‍රා පද්ධතිය ආශ්‍රිත ක්ෂය රෝග තත්වයක් ඇති විට මුත්‍රා දැවිල්ල, මුත්‍රා සමග රුධිරය පිටවීම සහ මුත්‍රා කිරීමේ අපහසුතාවය වැනි රෝග ලක්සණ ඇති වෙනවා.
උදරයේ නම්
යම් රෝගියෙක් උදරය ආශ්‍රිත ක්ෂය රෝග තත්වයකින් පසුවෙනවා නම්
- පාචනය සහ රුධිරය මිශ්‍ර පාචන
- උදරය ඉදිමීම
- උදරයේ ගෙඩි ඇති වීම
ක්ෂය රෝගය සම්පූර්ණයෙන්ම සුව කිරීමට පුළුවනි…
ක්ෂය රෝගය සම්පූර්ණයෙන්ම සුව කළ හැකි රෝග තත්වයක්. ඒ නිසා වෛද්‍ය උපදෙස් මත නිසි ප්‍රතිකාර ලබා ගැනීම ඉතාම වැදගත්. ක්ෂය රෝග තත්වයේදී මාස හයක් පුරා ප්‍රතිකාර ර ලබා ගැනීමට වෛද්‍යවරුන් විසින් ලබා දෙන උපදෙස් අනුගමනය කිරීම ඉතාම වැදගත්. යම් ලෙසකින් අදාල කාලයේදී නිසි ප්‍රතිකාර ලබමින් සිට අතරමගදී නවතා දැමු විට යලිත් රෝග තත්වය ඇති වීමට පුළුවනි. ප්‍රතිකාර ලබන කාලයේදී බොහෝ විට රෝග ලක්ෂණ නොමැති වන නිසා බොහෝ රෝගීන් ප්‍රතිකාර නවතා දැමීම සිදු කළත් එය සුදුසු නැහැ.
බොහෝ අවස්ථාවලදී ක්ෂය රෝගයට ගොදුරු වන්නේත් ප්‍රතිශක්ති ඌනතාවය සහිත පුද්ගලයින් වීම බැව් මුලින් සඳහන් කළා. ඒ වගේම ප්‍රතිකාර ලබා ගැනීමේදීත් මත්ද්‍රව්‍ය භාවිතයේ යෙදන, සමාජ විරෝධී කටයුතුවල නිරත , බන්ධනාගාරගතව සිටින සහ වෙනත් විවිධ හේතූන් නිසා ප්‍රතිකාර මග හරින රෝගින් සිටිනවා.
ප්‍රතිකාර අවසාන කරන විට නැවත එක්ස්රේ පරීක්ෂණයක් සහ සෙම් පටල පරීක්ෂණයක් සිදු කරනවා. රෝග කාරක තත්වයක් නොමැති නම් ප්‍රතිකාර නතර කිරීමට වෛද්‍යවරුන් විසින් තීරණය කරනවා. එතෙක් ප්‍රතිකාර ලබා ගැනීම රෝගියාගේ වගකීමක්.
විශේෂඥ මතය, අදහස සහ මූලික සටහන:
ජ්‍යෙෂ්ඨ වෛද්‍ය නිළධාරි රවින්ද උඩගමගේ මහතා.
ගම්පහ දිස්ත්‍රික් රෝහල
