ගණිතය, විද්‍යාව ඉංග්‍රිසි මිසක් රචනා ලියන්නේ මොකටද..?
සමහර දරුවන් රචනා ලියන්න හරිම කම්මැලියි. කොටින්ම ගණිතමය බුද්ධිය ඉහළ මටට්මක ඇති දරුවෙක් පවා රචනාවක් ලියන්න කිව්වාම ටිකක් අදි මදි කරනවා. නමුත් රචනා ශෛලීය බාල කාලයේ පටන් ප්‍රගුණ කර නොගතහොත් උසස් අධ්‍යාපනය ලබන අවධියේදී පවා මේ දරුවන්ගේ ඉගෙනුම් ඉගැන්වීම් ක්‍රියාවළිය සම්බන්ධයෙන් විවිධ ගැටළු ඇති වෙනවා.
ඇත්තටම රචනා ලියන්න දරුවන් කම්මැලි ඇයි…?
රචනාවක් ලියන්න කිව්වට දරුවා රචනාව ලියන්න කම්මැලි ඇයි කියන මූල බීජය ගැනත් අපි ටිකක් අවධානය යොමු කරමු. බොහෝ දරුවන්ට රචනාවක් ලියන්න තරම් කරුණු ඔවුන්ගේ දැණුමේ නැහැ. වට පිටාවෙන් ලබා ගත් දැණුම නැති නිසා ඔවුන්ට රචනාවක් ලියන්න ගිය විටෙක සෑහෙන ගැටලුවක් ඇති වෙනවා.
ලේඛන හැකියාව නැති නිසාත් දරුවන් රචනා ලියන්න උදාසීනතාවයක් දක්වයනවා. ලේඛන හැකියාව ලිවීමෙන්ම ප්‍රගුණ කර ගැනීම අවශ්‍යයි. ලේඛනයට පසුගාමී වුනොත් එවැනි දරුවන් තුළ ලියන කලාව නිර්මානය වෙන්නේ නැහැ.
සමහර දරුවන් දිගින් දිගට ලියන්න කම්මැලියි. ගණිතමය සමීකරණයක් විසඳනවාට වඩා රචනාවක් ලියන්න ඔවුන් කම්මැලියි. ගණිතමය සමීකරණයක තිබෙන ආදේශ කිරීමේ ක්‍රිවාවලිය රචනාවක් වෙනුවෙන් යොදා ගැනීමට අපහසුයි. ඒ නිසා රචනාවක් කියන සැනින්ම මුහුණ පුළුටු කර ගන්නා දරුවන් සිටිනවා.
ඒ වගේම අකුරු ලිවීමේ ඇති පසුගාමී බව නිසාත් රචනාවක් ලියන්න කම්මැලි දරුවන් සිටිනවා. ඔබ අතරත් එවැනි දරුවන් ඇති. ඔවුන් සමග කථා කරන විට අපුරු අදහස් තිබෙනවා. ඒවා ඉතාම නිර්මානශීලියි. ඒ වුනත් රචනාවක් ලියන විට අකුරු ලිවීමේ ඇති අපහසුතාවය නිසා එවැනි දරුවන්ට ඔවුන්ගේ නිර්මානශීලී අදහස් ඉදිරිපත් කිරීමේ හැකියාව නැහැ.
රචනාවකදී කාලකළමනාකරණය අවශ්‍ය වෙනවා. අදාල වචන හෝ ලබා දෙන කාලය තුළ තුළ තමන්ගේ අදහස් නිර්මානශීලීව ඉදිරිපත් කිරීම වැදගත්. සමහර දරුවන්ට කාලය තුළ ලියන්න දෙයක් නැති නිසා පෑන කටේ ගහගෙන කල්පනා කරනවා මේ අතර සමහර දරුවන්ට කාලයට අනුව අවශ්‍ය දේ ගලපා ගෙන ඉදිරිපත් කිරීමේ හැකියාව නැහැ. ඒ නිසා ඔවුන් ප්‍රශ්නයෙන් පිට පිලිතුරු ලිවීම නිසා සාර්ථක නිර්මානයක් බිහි වෙන්නේ නැහැ.
ඉතිං රචනා ලියන්න අවශ්‍යද…?
අපේ දෙමව්පියන් වුනත් ගණිතය, විද්‍යාව වැනි විෂයන්ට දරුවන්ගේ අවධානය යොමු කරනවා විනා රචනා ලියන්න වැඩි අවධානයක් දක්වන්නේ නැහැ. ගණිතය, ඉංග්‍රිසි සහ විද්‍යාව වගේ උසස් අධ්‍යාපනයේදී රචනා ලියන්න අවශ්‍ය නැහැ කියලා ඔබ හිතනවා නම් එය අදම සිතින් ඉවත් කර ගන්න.
උසස් අධ්‍යාපනයේදී මොකද වෙන්නේ….?
රචනා ශෛලීය අධ්‍යාපනය සමග බද්ධයි. පුංචි පංතිවල ලියන වගන්තියේ පටන් උසස් අධ්‍යාපනයේදී ඔබ විසින් සපයන රචනා ශෛලියේ ප්‍රශ්න පිලිතුරුවල දක්වාම රචනා තුළින් ඔබ ලබා ඇති හැකියාව වැදගත්. නමුත් අද දවසේ පශ්චාත් උපාධිය හදාරන සිසුන් අතර පවා රචනා ලිවීමේ හැකියාව නොමැති බැව් අධ්‍යනයක් මගින් පෙන්වා දෙනවා.
මේ පිලිබඳව අධ්‍යනයක් මලාවි විහ්ව විද්‍යාලයේ පැවැත්වූවා. ‘‘ඇප්ටා සෙලිමාමි “එහි ප්‍රධානී ලෙසින් කටයුතු කළා.පශ්චාත් උපාධි නිබන්ධන ඉදිරිපත් කරන සිසුන්ගේ නිබන්ධන ඇසුරින් මෙම දත්ත ලබා ගත්තා. එහිදී පෙනී ගිය අන්දමට මෙම සිසුන්ගෙන් 85% ක්ම මීට ඉහත සිදු කරන ලද නිබන්ධනයන්ගේ තොරතුරු cut & paste ක්‍රමයට ලබා ගෙන තිබුණා. බොහෝ සිසුන් තමන්ගේ ස්වාධීනව අදහස් ඉදිරිපත් කිරීමට උනන්දුවක් දක්වා තිබුනේ නැහැ. අනුන්ගේ නිගමන සහ යෝජනා ලබා ගෙන නිබන්ධනය සම්පූර්ණ කොට විභාගයේ ප්‍රතිඵල ලබා ගත්තා මිසක අලුත් යමක් සමාජයට ඉදිරිපත් කිරීමට උනන්දුවක් දක්වා තිබුන් නැහැ.
නිර්මානශීළී නැහැ…
පශ්චාත් උපාධියක් ලබා ගැනීම දක්වා යන ගමනේදී සියලු කඩඉම් ජය ගැනීමට තරම් මෙම සිසුන්ගේ බුද්ධි මටට්ම ඉහළින් තිබෙන බැව් අවිවාදයෙන්ම පිලිගත යුතුයි. නමුත් ඔවුන් අනුන්ගේ අදහස් සොරකම් කර ගැනීමට යොමු වුනේ ඇයි කියන සිදුවීම ගැනත් පසුවිපරම් කිරීමේදී මෙම තොරතුරු අනාවරනය කර ගැනීමට හැකි වී තිබෙනවා.
- ලියන්න වෙලාවක් නැහැ
- ලියන්න කම්මැලියි
- ලිවීමේ හැකියාව නැහැ.
ඉතින්..අනාගතයේදී එබේ දරුවා උසස් අධ්‍යාපනය ලබන දිනක් එනු ඇති. එදාට ඔහු හෝ ඇය ක්‍රමයට අනුගත වීමට ඉඩ දෙන්න එපා. ඒ නිසා බාල කාලයේදී පටන්ම රචනා ලියන හැකියාව ගැනත් දරුවා උනන්දු කරන්න.
- දවසේ සිදුවීම් අලලා පුංචි පුංචි වගන්ති ලියන්න දෙන්න.
- ළමා පුවත් පතකට හෝ වෙබ් පිටුවක දරුවාගේ නිර්මාණ පළ කරන්න
- නිතරම පොත් පත් ඇසුරින් දැනුම ලබා දෙන්න.
- අසා ලිවීම සහ පිටපත් ලිවීම මගින් දරුවාගේ අකුරු ලියන හැකියාව ටිකෙන් ටික දියුනු කරන්න.
- පුස්තකාල පාඪක සමාජ මගින් සංවිදානය කරන සාහිත්‍ය ඉසව් වෙනුවෙන් දරුවා සම්බන්ධ කරන්න.
කිසිම දිනක දරුවන්ගේ කියන ලියන කලාව ඔවුන්ගෙන් දුරස් කරන්න එපා. නිර්මානශිලී සිතුවිලි දරුවාගේ පැවැත්මට වගේම ඔවුන්ගේ අධ්‍යාපනයටත් හේතු සාධක වෙන බැව් දැන් ඔබට හොඳින්ම ඒත්තු ගැනෙනු ඇති.
