පුංචි කාලෙදි අපි අහලා තියනවා, ගෑනු ළමයෙක් නම් තාත්තට තමයි වැඩිපුර ආදරේ කියලා. ඒ වගේම පිරිමි ළමයෙක් නම් අම්මට වැඩිපුර ආදරේ කරනවා කියලා. ඇතැම් විට ඒක ඇත්තටම ප්‍රායෝගිකව දකින අවස්ථාත් ඕනෑ තරම් තියෙනවා. හැම පවුලකම දුවෙක් හෝ පුතෙක් ඒහෙමත් නැත්නම් මේ දෙවර්ගයෙන්ම පවුලක් තුළ ඉන්නවා. ඇත්ත වශයෙන්ම ගත්තොත් මේ කාරණය මානසික කාරණාවක්. මොකද සාමාන්‍යයෙන් වැඩි ආදරයක් දක්වන්නේ විරුද්ධ ලිංගිකයන්ට. මේ කාරණාව දරුවාගෙ පෞරුෂ වර්ධනයටත් දැඩිව බලපාන කරුණක් බව කිව යුතුමයි. අන්න ඒ නිසාම පිරිමි දරුවෙක් අම්මටත් ගැහැණු දරුවෙක් තාත්තටත් වැඩිපුර ආදරේ ඇයි කියන කාරණාව ගැන අද අපි කතා කරමු.
දරුවාගේ පෞරුෂ සංවර්ධනය පිළිබඳව කතා කිරීමේ දී මුල් අවුරුදු 05 කාලය තුළ 80% ක් වර්ධනය වන බව මනෝ විද්‍යාඥයින් පෙන්වා දී තිබෙනවා. එහිදී සිග්මන් ෆ්‍රොයිඩ් නම් මනෝ විද්‍යාඥයාට අනුව අවධීන් 05 ක් ඔස්සේ දරුවාගේ පෞරුෂ සංවර්ධනය පිළිබඳ සාකච්ඡා කර තිබෙනවා. එම අවධි වලින් 03 වන අවධිය වන ලිංගරූප අවධිය තුළදී දරුවන් විරුද්ධ ලිංගිකයින්ට ආකර්ෂණය සහ ආදරය දැක්වීම මත ඔවුන් සිය පෞරුෂය සකස් කර ගන්නා බව ෆ්‍රොයිඩ් සඳහන් කරයි. මෙම අවධිය තුළ පිරිමි සහ ගැහැණු දරුවන්ගේ පෞරුෂයන් වෙන වෙනම වර්ධනය වීම යන කාරණය තීරණය වෙනවා.
පිරිමි දරුවෙකුගේ පෞරුෂය වර්ධනය
පිරිමි දරුවෙක්ගෙ පෞරුෂය සංවර්ධනය සදහා බලපාන කරණු පිළිබඳ සොයා බැලීමේදී පිරිමි දරුවෙක් මූලික අවධියේදිම තම පියා සමාන ලිංගිකයෙක් බව හඳුනා ගන්නවා. ඒවිට තමාට විරුද්ධ ලිංගිකයෙකු ලෙස නිවසේ සිටින්නේ මව වන අතරම පිරිමි දරුවා මවගේ සෙනෙහස, ආදරය දිනාගන්නට වෙහෙසෙන විට තම පියාව දකින්නේ ඒ සෙනෙහස දිනාගන්න උත්සාහ කරන තවත් තරගකරුවෙක් ලෙසටයි. ඒතැනදි දරුවා තුල තරගයක් ගොඩනැගෙනවා. එය පසුකාලීනව තරහකාරි චේතනාවන්ට අමතරව වෛරී චේතනාවන්ද පත් විය හැකි තත්ත්වයක්. ඒත් එය ඉතා ආදරණීය, අහිංසක වෛරයක් යැයි කීවොත් වඩාත් නිවැරදියි.
පුතා තමන්ගේ අම්මට දක්වන ආදරය ඊඩිපස් සංකීර්ණය ඒහෙමත් නැතිනම් ඊඩිපස් සම්බන්ධය ලෙස හඳුන්වනවා. මේ ඊඩිපස් සංකීර්ණය එහෙමත් නැතනම් ඊඩිපස් සම්බන්ධය හරහා පිරිමි දරුවෙක්ගේ පෞරුෂය වර්ධනය වෙන ප්‍රධාන කාරණා තුනක් හඳුන්ව දී තිබෙනවා.
- පුතා, තම පියා ලිංගික වෛරක්කාරයෙක් ලෙස දැකීම
- විරුද්ධ ලිංගිකයෙක් වෙත ආදරයක් ඇතිවෙද්දි ඒ පාර්ශවයෙනුත් තමන්ට ඒ බලාපොරොත්තු වෙන ආදරය සෙනෙහස ලැබිය යුතු වුවත් තම මවගෙන් එහෙම අනුබලයක් නොලැබෙනවා පමණක් නොව මවගෙන් හිමිවන්නේ ඒ් ආකාරයේ ආදරයක් නොවෙයි. මවගෙන් ලැබෙන ආදරය මව්සෙනෙහස හා බැඳුණු ආදරයක්. අන්න ඒතැනදි පිරිමි දරුවා දැනෙන්න පටන් ගන්නවා මවගෙන් මේ කාරණාවේදී අනුබලයක් නොලැබෙන බව සහ ඒතැන් පටන් දරුවා ඒය වටහා ගැනීම ආරම්භ කරනවා.
- දරුවා ක්‍රමයෙන් පරිණත වීමේදී වර්ධනය විමේදී ඔවුන් තත්ත්වය වටහා ගන්නවා.
මෙන්න මේ ක්‍රියාවලිය සිද්ධවෙන ආකාරය සහ මේ කාරණා දරුවෙකුගේ පෞරුෂය වර්ධනයට ඉවහල් වන කාරණා ලෙස හදුනාගෙන තියනවා.
ක්‍රමයෙන් පිරිමි දරුවාගේ පෞරුෂ වර්ධනය සිදුවන විට තමන් බලාපොරොත්තු වුන ආකාරයට දේවල් සිදුනොවුන නිසා පියා තමාට සිටින තරගකරුවෙක් නොවන බව දරුවා වටහා ගන්නවා. ඒ් වගේම තම මවගෙන් බලාපොරොත්තු වු ආකාරයේ ආදරය නොලැබීම මත පිරිමි දරුවන් තම පියා අනුකරණය කිරීමට පටන් ගන්නවා. පිරිමි දරුවෝ තාත්තා වගෙ අදින්න, කොන්ඩෙ පීරන්න කැමතියි කියලා අපි අසා තිබෙනවා. ඒ වගේම මව දරුවාගෙන් ඈත්වීම කියන කාරණාවත් පිරිමි දරුවන්ගෙ පෞරුෂය නිසි පරිදි වර්ධනය නොවීමටත් බලපාන කාරණාවක් බව මේ වන විට සොයාගෙන තිබෙන කරුණක්.
කෙසේ වුවත් මේ කුමන ආකාරයකින් හෝ දරුවෙකුගේ පෞරුෂය නිසි කාලය තුළ නිසි පරිදි සංවර්ධනය නොවීම දරුවා වැඩිවියට පත්වෙද්දි පෞරුෂය සම්බන්ධයෙන් ගැටලු මතුවිය හැකියි.
නිසි කලට නිසි පරිදි මනා පෞරුෂවර්ධනයක් සිදු නොවන දරුවන් ස්වයංවින්දනයට වැඩි කැමැත්තක් දක්වන බව වගේම මව සහ පුතා අතර බැදීම කියන කාරණාව වර්තමාන සමාජ තත්ත්වයන් තුල දික්කසාදය, පවුල් ආරවුල් ඇති වීම සඳහාත් ප්‍රධාන හේතුවක් වන බවත් මේ තත්ත්වයට හේතු ලෙස පිරිමි දරුවා, පියා සමග එකගතාවයන් ඇතිකර නොගැනීම ආදි කරුණු බලපාන බව පර්යේෂකයන් පවසනවා.
ගැහැනු දරුවෙකුගේ පෞරුෂ වර්ධනය
ඊඩිපස් සම්බන්ධය පිරිමි දරුවෙකුගේ පෞරුෂ වර්ධනයට බලපෑ ආකාරයටම ගැහැනු දරුවන්ට බලපානු ඇත. ගැහැනු දරුවනුත් පියාගේ ආදරය ලබාගන්න මවත් සමග තියන තරගකාරීත්වය ඉලෙක්ට්‍රා සම්බන්ධය ලෙස හදුන්වනවා. මේ තත්ත්වය තුල ගැහැනු දරුවෙකුගේ පෞරුෂය සංවර්ධනයට ප්‍රධාන කරුණු දෙකක් බලපාන බවට සදහන් වෙනවා.
- පියාගෙන් අනුබලයක් නොලැබීම
- පරිණත වීමත් සමගම ගැහැනු දරුවන් පියාගෙන් අපේක්ශා කරන සෙනෙහස ක්‍රමයෙන් පෞරුෂ සංවර්ධනයට අදාලව හැඩගස්සවා ගන්නවා.
සාමාන්‍යයෙන් මේ තත්ත්වයේදී පියාගේ ආදරය සඳහා වු තරගයෙන් පසුව ගැහැනු දරුවෙක් තම මව අනුකරණයට පෙළඹෙනවා. අම්මා අදින විදිය, මේකප්, සපත්තු සියල්ල අනුකරණය කිරීමට ගැහැනු දරුවන් පෙළඹෙනවා. ඉහත සඳහන් කරන ලද කාරණා නිසි පරිදි ඉටු නොවුනොත් ගැහැනු දරුවෙකුගේ වුවද පෞරුෂය නිසි පරිදි සකස් නොවිය හැකියි.
මව ළඟ නොමැති වීම/ මවගේ චරිතය දුර්වල වීම/මවගේ පෞරුෂය නිසි පරිදි සකස් නොවී තිබිම වැනි කරුනු ගැහැනු දරුවෙකුගේ පෞරුෂය තුළ යම් යම් අඩුලුහුඩුකම් ඇති වීමට හේතු විය හැකියි. උදාහරණ ලෙස සමලිංගික සේවනය, ගැහැණුකම නොමැති විම පෞරුෂයේ දුර්වලතා ඇති ගැහැනු දරුවන් තුළ දැකිය හැකියි. ඒනම් ඔවුන් පෙන්නුම් කරන්නේ අසාමාන්‍ය ගති ලක්ෂණයි. මෙවැනි තත්ත්වයන් ඇති ප්‍රධාන හේතුව ලෙස වයස අවුරුදු 3 – 6 කාලයේදී ලබන ඉලෙක්ට්‍රා සම්බන්ධය ඔස්සේ ගැහැනු දරුවෙකුගේ පෞරුෂය සංවර්ධනය නොවීම දැක්විය හැකියි.
කුඩා වියේ සිටම දරුවෙකුගේ පෞරුෂ වර්ධනයට අදාල අත්දැකීම් නිසි පරිදි හිමි වීම ඉතාම වැදගත් වන්නේ දරුවෙක් වැඩිවියට පත්වෙද්දි පෞරුෂ සංවර්ධනයට අදලාව ඉතිරිව ඇත්තේ 15% – 20% වැනි සුළු ප්‍රමාණයක් වන අතරම වැඩි ප්‍රමාණයක් සිදු වන්ගේ වයස අවුරුදු 3 – 6 වැනි කුඩා වියේ වීමයි. නිසි වයස් සීමාවේදී නිසි ලෙස පෞරුෂ වර්ධනය සිදු නොවිම මත වැඩිවියට පත් වන දරුවා පෞරුෂ අඩුපාඩු ඇති පුද්ගලයෙක් ලෙස සමාජගත වීම කණගාටුවට කරුණක්. රටට අවශ්‍ය වන හොද පෞරුෂයක් සහිත පුද්ගලයෙක් බිහිකරන්නට නම් දෙමාපියන් වන ඔබ පූර්ව ළමා විය නිසි පරිදි සංවර්ධනයකිරීමෙහිලා නිසි අවධානයක් යොමු කිරීම ඉතාම වැදගත් වේ.
විශේෂඥ මතය, අදහස සහ මූලික සටහන:
නිලානි අලුත්ගේ මහත්මිය
මනෝවිද්‍යා උපදේශිකා
