අද වනවිට කාර්ය බහුල ජීවන රටාවකට හුරුව සිටින අපි වැරදි ආහාර රටා මෙන්ම කෘතිම ආහාර ජීවිතයට එක්කර ගනිමින් බෝ නොවන රෝග රාශියකට ඇරයුම් කරමින් සිටී. ලෝක සෞඛ්‍ය සංවිධානයේ 2002 වාර්තාවට අනුව ශීඝ්‍රයෙන් ඉහළ යන බෝ නොවන රෝගවලට ප්‍රධාන හේතුව පාරම්පරික ආහාර රටාවෙන් ඉවත් වීමයි. අන්තර්ජාලය ඔස්සේ ලබාගත් තොරතුරුවලට අනුව ලෝකයේ රටවල් 100කට අධික ප්‍රමාණයක් සහල් වගාකරයි. එසේම ලෝක ජනගහනයෙන් භාගයක පමණ කොටසකගේ ප්‍රධාන ආහාරය බත්ය. සංවර්ධනය වෙමින් පවතින රටවල 27% දෛනික ශක්ති අවශ්‍යතාව ද, 20% දෛනික ප්‍රෝටීන් අවශ්‍යතාවයද, 3% දෛනික මේද අවශ්‍යතාවය ද සහල් මගින් සැපයේ.
ශ්‍රී ලංකාවටම ආවේණික වූ පාරම්පරික සහල් වර්ග 2000ක් පමණ තිබී ඇති අතරම අදවන විටත් පෝෂණයෙන් ඉහළ දේශීය සහල් වර්ග මිලදී ගැනීමට තිබියදීත් මේ අලූතින්ම අපේ ජීවිතවලට එක් වූ ගැටලූව වී ඇත්තේ වෙළඳ පොළේ ඇති ප්ලාස්ටික් සහල් පිළිබඳව ආන්දෝලනයයි. පෝෂණයෙන් ඉහළ වස විසෙන් තොර දේශීය සහල් වර්ග රැසක් අප රටේ තිබියදීත් දෙමාපියන් දරුවන්හට මෙවැනි කෟතිම සහල්වලින් සකසන බත් ලබා දී බලාපොරොත්තුවන්නේ කෙබඳු පෝෂණයක්ද යන්න ගැටලූවකි. හෙල සහලේ පෝෂණය මෙන්ම ඖෂධ ගුණය පිළිබඳව ඇති නොදැනුවත්කම මෙවැනි ප්ලාස්ටිකක් සහල් වැනි දේට අප රට තුළ මේ ආකාරයෙන් වැජඹෙන්නට අවස්ථාව උදා කර දී ඇතැයි සිතීමේ වරදක් නැත.
සැමවිටම දරුවෙකුට ලබා දිය යුතු වන්නේ පෝෂණයෙන් පිරි ක්‍රියාකාරී ආහාරයි. ඒ හරහා බෝ නොවන රෝග ඇති වීමේ අවදානම අවම කරනවා සේම කෘත්‍රිම ආහාර වර්ග නිසා මිනිසුන්ට මුහුණ දෙන්නට සිදුවන සංකූලතාවයන්ගෙන් මිදීමට ද හැකිවේ.
ක්‍රියාකාරී ආහාර යනු මොනවාදැයි ඔබ දන්නවාද?
ප්‍රෝටීන, කාබෝහයිඩ්‍රේට, මේදය, ඛනිජ ලවණ සහ විටමින් වැනි පෝෂක සමගින් සෞඛ්‍ය තත්ත්වය ඉහළ නැංවිය හැකි ආකාරයේ රසායනික සංයෝග අඩංගු ආහාර වර්ගයි. පෝෂණ ගුණයෙන් අනුන කි්‍රයාකාරී ආහාර අනුභව කිරීම රෝග තත්ත්්වයන් පාලනය කිරීමට මෙන්ම මැඩපවත්වා ගැනීමට ලබා දෙන්නේ විශාල සහයෝගයකි. අපගේ දේශීය සහල් ප්‍රභේද පෝෂණ ගුණයෙන් වැඩි ක්‍රියාකාරී සංඝටකයන්ගෙන් සමන්විතය.
දේශීය සහල් වර්ග කිහිපයක් හා ඒවාගේ පෝෂණ ගුණය
| සහල් | පෝෂණ ගුනය |
| සුවදැල් | ශරීරය වර්ධනයකරයි |
| මා වී | දියවැඩියාව පාලනයට සුදුසුයි |
| කුරුලූතූඩ | මුත්රා රෝග පාලනයට සුදූසුයි/කාය ශක්තිය වඩවයි |
| මඩතවාළු | දියවැඩියාව පාලනයට සුදූසුයි/වාත පිත සෙම් සඳහා සුදූසුය |
| කලූහීනටි | කාය ශක්තිය වඩවයි,ශරීරගත විෂ මර්දනය කරයි |
| හැටදා වී | මලබද්ධය පාලනයට සුදූසුයි |
| පොක්කාල | දියවැඩියාව පාලනයට සුදූසුයි,ස්නායු/ සමේ රෝග සඳහා සුදූසුයි |
පිළිකාව යනු වයස් භේදයකින් තොරව වැළෙඳන රෝගයකි. ශ්‍රී ලංකාවේ පාරම්පරික සහල් මගින් පිළිකා රෝගයට පිළිතුරක් ඇති බව ඔබ දන්නවාද? සුදුහීනටි, ගොඩහීනටි, මසුරන් සහ දික් වී යන සහල් ප්‍රභේද මගින් පියයුරු පිළිකා, ආමාෂ පිළිකා, ආහාර මාර්ගය ආශි්‍රත පිළිකා, පෙනහලූ පිළිකා සහ ගර්භාෂ පිළිකා යන පිළිකා රෝග පාලනය සහ මැඩපවත්වීම සඳහා යෝග්‍ය වේ.
එසේම ප්‍රතිඔක්සිකාරක ගුණ ඇති සංයෝග ආහාර මගින් ලබාදීම බෝ නොවන රෝග තත්ත්වයන් පාලනයට යෝග්‍ය වේ. අධ්‍යයනය කළ සහල් වර්ගවලින් සුදුු හීනටි, ගොඩ හීනටි, මසුරන් සහ දික් වී යන සහල් වර්ගවල මෙම ගුණ ඉතා ඉහළ ලෙස ඇත. ඒ අනුව පෙනීයන්නේ අප අපේ දේශීය පාරම්පරික සහල් පරිභෝජනයට නැඹුරුවන්නේ නම් බෝ නොවන රෝගවලින් පමණක් නොව නොරටින් ගෙන්වන කෘතිම සහල්වලට රැවටී රෝගාතුර වීමේ අවදානම ද වළක්වා ගත හැකිය.
දරුවන්හට බත් කැඳ/කොළ කැඳ සකස්කරදීමේදී වුවද මෙවැනි සාමාන්‍ය සුදු සහල් වෙනුවට පෝෂණීය සහල් වර්ග යොදාගත හැකියි. නිරෝගී දරු පරපුරක් වෙනුවෙන් සිහින දකින මව්වරුනි හැමවිටම ඔබේ දරුවාට අපට හුරුපුරුදු දේශීය ආහාර සමගින් පෝෂණය ලබාදෙන්නට සැලකිලිමත් වන්න
-යක්කල, ගම්පහ ආයුර්වේද විද්‍යායතනයේ ආයුර්වේද වෛද්‍ය නිලීකා සමන්වීර මහත්මිය සමග සකසන ලද ලිපියකි.-
